ཕྱི་ཟླ་བདུན་པའི་ཚེས་ ༡ ཉིན་ནས་བཟུང་རྒྱ་གར་ནང་ཁོར་ཡུག་སྲུང་སྐྱོབ་ཀྱི་སླད་དུ་གཞུང་ངོས་ནས་བསྐྱར་སྤྱོད་མེད་པའི་འགྱིག་རིགས་སྤྱོད་མཚམས་འཇོག་ཐབས་ཀྱི་སྲིད་ཇུས་ལག་བསྟར་བྱ་རྒྱུ་ཡིན་པ་རེད།
རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་རྒྱ་གར་དབུས་གཞུང་གིས་ལམ་སྟོན་བཀོད་ཁྱབ་ཅིག་ཕྱིར་བསྒྲགས་པའི་ནང་། རྒྱ་གར་རྒྱལ་ཡོངས་སུ་འགྱིག་རིགས་བེད་སྤྱོད་གཏང་རྒྱུ་མཚམས་འཇོག་གི་སླད་དུ། འབྱུང་འགྱུར་ཕྱི་ཟླ་ ༧ ཚེས་ ༡ ཉིན་ནས་བཟུང་། རྒྱ་གར་གྱི་མངའ་སྡེ་ཁག་དང་རང་སྐྱོང་ས་ཁུལ་ཚང་མས། རང་རང་གི་ཁྱབ་ཁོངས་ནས་འགྱིག་རིགས་བཟོ་སྐྲུན་དང་བགོས་འགྲེམས། ནང་འདྲེན་དང་ཚོང་སྒྱུར་སོགས་ཀྱི་རིགས་གཏན་ནས་བྱེད་མི་ཆོག་པའི་བཀའ་བཏང་ཡོད་པ་རེད།
འགྱིག་རིགས་ཀྱིས་རང་བྱུང་ཁོར་ཡུག་ལ་འབག་བཙོག་ཚབས་ཆེན་བཟོ་ཡི་ཡོད་པ་ལྟར། དེ་འབྲེལ་ཐད་རྒྱ་གར་གྱི་ཁོར་ཡུག་དང་གནམ་གཤིས་འགྱུར་ལྡོག དེ་བཞིན་ནགས་ཚལ་བཅས་ཀྱི་བློན་ཆེན་ལས་ཁུངས་ཀྱིས། འགྱིག་རིགས་བེད་སྤྱོད་མཚམས་འཇོག་དགོས་པའི་གནད་དོན་གྱི་ཐད་རྒྱལ་ཡོངས་རང་བཞིན་དང་མངའ་སྡེ་རིམ་པས་སྟངས་འཛིན་བྱེད་ཡུལ་གྱི་ལས་ཁུངས་བཙུགས་ཏེ། བསྐྱར་སྤྱོད་མེད་པའི་འགྱིག་རིགས་བཀོལ་རྒྱུ་ངེས་པར་དུ་མཚམས་འཇོག་བྱ་དགོས་ཡོད། ཅེས་བརྗོད་འདུག་པ་དང་། ད་རེས་འགྱིག་རིགས་བེད་སྤྱོད་མཚམས་འཇོག་གི་ལས་འགུལ་དང་འབྲེལ་ནས། དབུས་གཞུང་གིས་དམིགས་བསལ་མི་སྣ་བསྐོ་གཞག་གིས། ཁྲིམས་འགལ་ཐོག་བཟོ་སྐྲུན་བྱས་པ་དང་ཉར་ཚགས་བྱེད་པ། ཚོང་སྒྱུར་དང་བགོས་འགྲེམས་སོགས་བྱེད་བཞིན་པའི་འགྱིག་རིགས་ཡོངས་བཀག་སྡོམ་བྱ་རྒྱུ་ཡིན་པ་མ་ཟད། རྒྱ་གར་གྱི་མངའ་སྡེ་ཁག་དང་རང་སྐྱོང་ས་ཁུལ་དག་གིས་ཀྱང་རང་རང་གི་ས་མཚམས་སོགས་སུ་བརྟག་དཔྱད་ས་ཚིགས་བཙུགས་ཏེ། དེ་ལྟར་བརྟག་དཔྱད་བྱས་པ་བརྒྱུད་འགྱིག་རིགས་སྤྱོད་མཚམས་འཇོག་ཐབས་བྱ་དགོས་པའི་ལམ་སྟོན་བྱས་ཡོད་འདུག
རྒྱ་གར་ཁོར་ཡུག་བློན་ཆེན་ལས་ཁུངས་ཀྱི་ཡོངས་ཁྱབ་བསྒྲགས་གཏམ་དེའི་ནང་། བསྐྱར་སྤྱོད་མེད་པའི་འགྱིག་རིགས་བཀོལ་བཞིན་པ་དེས། ས་ཁམས་སྤྱིའི་ཁོར་ཡུག་དང་མཚོའི་སྐྱེ་ཁམས་ཁོར་ཡུག་སོགས་ལ་གནོད་སྐྱོན་ཚབས་ཆེན་ཐེབས་ཀྱི་ཡོད་པ་འཛམ་གླིང་གིས་ངོས་འཛིན་བྱས་ཡོད། བསྐྱར་སྤྱོད་མེད་པའི་འགྱིག་རིགས་བེད་སྤྱོད་བྱས་པ་ལ་བརྟེན་ནས། འཛམ་གླིང་རྒྱལ་ཁབ་ཚང་མར་ཁོར་ཡུག་ལ་འབག་བཙོག་ཤོར་བའི་དཀའ་ངལ་འཕྲད་བཞིན་ཡོད། ཅེས་བརྗོད་ཡོད་པ་དང་། ད་ལན་བཀག་སྡོམ་བྱ་རྒྱུའི་འགྱིག་རིགས་ཀྱི་ཁྲོད་དུ། འགྱིག་རིགས་ཀྱི་སླན་པ་བརྒྱབ་པའི་རྣ་ཉན་དང་ལྒང་ལི། དར་ཆ་བཅས་དང་། རྒྱན་སྤྲས་དང་ཐུར་མ། གྲི་དང་གཞོང་པ། ཐུམ་རྒྱག་བྱེད། མགྲོན་ཤོག་གི་རིགས་དང་ཐ་མག་གི་སྣོན་སྒམ། ཕྲེད་དར་དང་དཀྲུག་བྱེད་སོགས་ཀྱི་འགྱིག་རིགས་ཚང་མ་བཀག་སྡོམ་བྱེད་ཀྱི་ཡོད་པ་རེད།
ཕྱི་ལོ་ ༢༠༢༡ ལོའི་རྒྱ་གར་གྱི་འགྱིག་རིགས་དོ་དམ་ཚོད་འཛིན་གྱི་སྒྲིག་གཞི་ལྟར་ན། ལོ་དེར་རྒྱ་གར་གཞུང་གིས་འགྱིག་རིགས་བཟོ་སྐྲུན་དང་ནང་འདྲེན། ཉར་ཚགས་དང་ཚོང་སྒྱུར། བགོས་འགྲེམས་སོགས་བྱེད་མི་ཆོག་པར་བཟོས་པ་མ་ཟད། འདི་ལོའི་ལོ་མཇུག་ནས་རྒྱ་གར་ནང་འགྱིག་རིགས་ཀྱི་བཟོས་པའི་ཁུག་མའི་ཚད་ལ་ (microns) བདུན་ཅུ་ཙམ་ལས་ཡོད་མི་ཆོག་པར་བཟོ་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
