འདི་ལོའི་དབྱར་གསེང་དང་བསྟུན་མཚོ་སྔོན་ཞིང་ཆེན་སློབ་གསོ་ཁང་གིས་སློབ་གྲྭ་ཆུང་འབྲིང་གི་སློབ་མ་རྣམས་ལ་དབྱར་གསེང་སྐབས་རིག་ཚན་རིགས་(བོད་ཡིག་དང་འབྲེལ་བའི་སྦྱོང་ཚན་ཁག)ཀྱི་ཟབ་སྦྱོང་ནང་གཏན་ནས་ཞུགས་མི་ཆོག་པའི་བཀག་རྒྱ་བཀྲམ་འདུག
རྒྱ་ནག་གཞུང་གིས་འདས་པའི་ལོ་ཤས་ནས་བཟུང་དབྱར་དགུན་གྱི་གུང་སེང་སྐབས་སུ་སློབ་ཕྲུག་རྣམས་བོད་སྐད་ཡིག་གི་ཟབ་སྦྱོང་དང་གསུང་ཆོས་སོགས་སུ་ཞུགས་མི་ཆོག་པ་དང་། དེ་ལ་ཁྱིམ་བདག་གིས་འགན་ཡོངས་རྫོགས་འཁུར་དགོས་པའི་བཀའ་རྒྱ་གཏོང་གི་ཡོད་པ་ལྟར། འདི་ལོའི་ཕྱི་ཟླ་ ༦ ཚེས་ ༣༠ ཉིན་རྒྱ་ནག་གཞུང་འབྲེལ་དྲ་ལམ་དུ་གནས་ཚུལ་སྤེལ་བ་ལྟར་ན། ཉེ་སྔོན་མཚོ་སྔོན་ཞིང་ཆེན་སློབ་གསོ་ཁང་གིས་“ཕྱི་ལོ་ ༢༠༢༢ ལོའི་སློབ་གྲྭ་ཆུང་འབྲིང་གི་དབྱར་གནང་གི་འབྲེལ་ཡོད་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ”་ཟེར་བ་ཞིག་སྤེལ་ཏེ། ཞིང་ཆེན་དེའི་ཁོངས་གཏོགས་སློབ་གྲྭ་ཆུང་འབྲིང་གི་སློབ་མ་རྣམས་དབྱར་གསེང་སྐབས་རིག་ཚན་རིགས་(བོད་ཡིག་དང་འབྲེལ་བའི་སྦྱོང་ཚན་ཁག)ཀྱི་ཟབ་སྦྱོང་ལ་ཞུགས་མི་ཆོག་པ་དང་། ཁྱིམ་བདག་ཕ་མ་རྣམས་ཀྱིས་ཀྱང་སོ་སོའི་བུ་ཕྲུག་ཟབ་སྦྱོང་དེ་རིགས་ནང་གཏོང་མི་ཉན་པའི་བཀའ་རྒྱ་བསྒྲགས་འདུག
དེ་ཡང་མཚོ་སྔོན་ཞིང་ཆེན་སློབ་གསོ་ཁང་གི་བཀའ་རྒྱ་དེའི་ནང་དུ། ས་གནས་ཁག་གིས་ཞིབ་བཤེར་སྐོར་བཤེ
རྒྱ་ནག་གཞུང་གིས་གནད་འགག་གི་བརྗོད་དོན་མང་པོ་ཞིག་ལ་གོ་དཀའ་ཞིང་མགོ་རྙོག་ཆེ་བའི་ཚིག་རྫོབ་ཀྱིས་སྦེད་ཡོད་སྟབས། འདི་གའི་གསར་འགོད་པས་བོད་ནང་གི་འབྲེལ་ཡོད་ཅིག་ལ་རིག་ཚན་རིགས་ཟེར་ན་དོན་དག་རྡོག་རྡོག་དེ་ག་རེ་ལ་ཟེར་གྱི་ཡོད་མེད་དྲིས་པར་ཁོང་གིས། བརྡ་ཐོ་དེ་རིམས་ནད་འགོག་སྡོམ་དང་ཁོར་ཡུག་བདེ་འཇགས་ཆེད་ཡིན་ཟེར་ནས་སྤེལ་ཡོད་པ་དང་། རིག་ཚན་རིགས་ཞེས་པ་དེ་བོད་ཡིག་དང་འབྲེལ་བའི་སྦྱོང་ཚན་ཚང་མ་ལ་གོ་དགོས་ཀྱི་ཡོད་པ་དང་། སྔོན་ཆད་དབྱར་དགུན་གྱི་གུང་གསེང་སྐབས་སུ་སློབ་ཕྲུག་ཚོར་བོད་སྐད་ཡིག་གི་ཟབ་སྦྱོང་མང་པོ་ཡོད་ཀྱང་། ད་ནས་བཟུང་དེ་རིགས་འཚོག་ཆོག་གི་མེད་སྐོར་བརྗོད་བྱུང་།
གཞན་ཡང་། འདི་ལོའི་ཕྱི་ཟླ་ ༤ པའི་ཟླ་མགོར་མགོ་ལོག་ཁུལ་ཐོག་ཏུ་སློབ་ཕྲུག་ཁག་ཅིག་གི་ཕ་མར་ཚོགས་འདུ་ཞིག་བསྡུས་ཏེ། རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་གསོའི་གསབ་སྦྱོང་ཟེར་བ་ཞིག་སྤྲད་ཡོད་པ་དང་། ཚོགས་འདུ་དེའི་སྟེང་ཕ་མ་དང་བུ་ཕྲུག་གི་བསམ་བློ་བསྒྱུར་བཀོད་བྱ་རྒྱུ་གལ་ཆེན་པོ་ཡིན་པ་མ་ཟད། སློབ་ཕྲུག་གི་བསམ་བློ་བསྒྱུར་བཀོད་བྱ་རྒྱུ་ནི་སློབ་གྲྭའི་དགེ་རྒན་དང་གྲོང་ཚོའི་ལས་བྱེད་པ་གཅིག་པུ་ཙམ་མིན་པར། སློབ་ཕྲུག་གི་ཕ་མས་འགན་ཁུར་དགོས་པ་དང་། ཕ་མ་ཚོ་རང་འགུལ་གྱིས་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་གསོའི་གསོ་སྦྱོང་ལ་ཞུགས་ཏེ། རྒྱ་ཡིག་རྒྱ་སྐད་ཀྱི་གནས་ཚད་ཡར་རྒྱས་བཏང་རྗེས། རང་གི་བུ་ཕྲུག་ལའང་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཡག་པོ་སྦྱང་བཅུག་ནས་རྒྱ་ཡིག་རྒྱ་སྐད་ཡག་པོ་བཤད་ཤེས་པ་དང་འབྲི་ཤེས་དགོས་སྐོར་བརྗོད་ཡོད་འདུག
འདི་གའི་གསར་འགོད་པས་རྒྱུས་ལོན་བྱས་པ་ལྟར་ན། རྒྱ་བསྒྱུར་སློབ་གསོའི་ཆེད་དུ་མགོ་ལོག་ཁུལ་མི་རིགས་སློབ་འབྲིང་དུ་ཕ་མ་ཁྱིམ་བདག་རྣམས་ལ་སྔ་རྗེས་སུ་ཐེངས་ ༡༦ ཙམ་ལ་ཟབ་སྦྱོང་བསྡུས་ཡོད་པ་དང་། དེ་བཞིན་རྔ་བ་ཁུལ་དུ་སློབ་མའི་བདེ་འཇགས་སྲུང་སྐྱོབ་སོགས་ཀྱི་མིང་ཐོག་ནས་དམའ་འབྲིང་སློབ་གྲྭ་དང་། ལྷག་པར་དུ་བྱིས་གཉོར་ཁང་ཁག་ཏུ་ཉེན་རྟོག་མི་སྣ་ཆེད་གཏོང་གིས་དགེ་སློབ་རྣམས་ཀྱིས་སློབ་གྲྭའི་ཁོར་ཡུག་ནས་ངེས་པར་དུ་ཕན་ཚུན་རྒྱ་སྐད་བཤད་དགོས་པའི་སྒྲིག་གཞི་ལག་བསྟར་བྱེད་བཞིན་འདུག
ཕྱི་ལོ་ ༢༠༡༨ ལོའི་ཕྱི་ཟླ་ ༡༢ ཚེས་ ༢༥ ཉིན། ནང་ཆེན་རྫོང་འཐབ་ཕྱོགས་གཅིག་གྱུར་ཁང་དང་། ནང་ཆེན་རྫོང་མི་རིགས་ཆོས་ལུགས་ཁང་ཟེར་བས་གྲོང་རྡལ་སོ་སོའི་ཏང་ཨུ་དང་སྲིད་གཞུང་། དགོན་པ་དོ་དམ་ཁང་སོ་སོར་བཀའ་རྒྱ་ཞིག་བཀྲམ་པའི་ནང་། སློབ་གྲྭ་ཆུང་འབྲིང་གི་སློབ་མ་ཚོར་དགུན་གནང་གི་སྐབས་དང་བསྟུན། བོད་ཡིག་ཟབ་སྦྱོང་སྤྲོད་མཁན་གྱི་དགོན་པ་དག་ནི་གནད་དོན་ཆེ་བའི་དགོན་པའི་གྲས་སུ་འཇོག་རྒྱུ་དང་། ཟབ་སྦྱོང་རྩ་འཛུགས་དང་འཆར་འགོད་བྱེད་མཁན་གྱི་མི་སྒེར་ལ་ཁྲིམས་ལྟར་དགོན་པའི་ཡིག་ཐོ་ལས་ཕུད་ཅིང་། ཆོས་ལུགས་མི་སྣའི་དཔང་ཡིག་བསྡུ་དགོས་པར་མ་ཟད། སྤྱི་བསྒྲགས་བྱས་ཏེ་ཉེན་ཟོན་དགོས་པར་དྲན་སྐུལ་བྱེད་དགོས་པ། དེ་བཞིན་སློབ་མ་དང་ཁྱིམ་བདག་གི་བསམ་བློའི་སློབ་གསོའི་ལས་དོན་ལེགས་པོར་བསྒྲུབས་ཏེ། སྤྱི་ཚོགས་ནས་བྱུང་བའི་ལྡོག་ཕྱོགས་ཀྱི་ཤན་ཤུགས་ཉུང་དུ་གཏོང་དགོས་པ་མ་ཟད། གྲོང་རྡལ་སོ་སོར་དགོན་པས་སྤྱི་ཚོགས་སློབ་གྲྭ་འཚོགས་པའི་གནོད་སྐྱོན་རང་བཞིན་གསལ་པོར་ཧ་གོ་བར་བྱས་ཏེ། གཞོན་ནུ་དང་ལོ་ཆུང་ཚོའི་བསམ་བློའི་སློབ་གསོའི་བཙན་ས་བརྟན་པོར་བཟུང་ཞིང་། ཏང་དང་སྲིད་གཞུང་གི་སློབ་གསོའི་ལས་དོན་ཚད་མཐོ་རུ་གཏོང་དགོས་སྐོར་བཀོད་འདུག
འབྲེལ་ཡོད་གནས་ཚུལ། བོད་ཡིག་ཟབ་སྦྱོང་སྤྲོད་མཁན་དགོན་པ་དག་ལ་ཐག་གཅོད་ནན་མོ་བྱོས་ཟེར།
གསར་འགོད་པ། དཔལ་ལྡན།
