༧གོང་ས་མཆོག་ནས་ངོས་རང་ཕན་ཐོགས་ས་ཞིག་ཏུ་སྐྱེ་བར་ཐེ་ཚོམ་ཁྱོན་ནས་མེད་ཅེས་གསུངས་སོང་།

༧གོང་ས་མཆོག་ནས་མ་འོངས་པར་ཚེ་རབས་ནས་ཚེ་རབས་ཏུ་གནས་གང་དུ་ཕན་ཐོགས་བྱས་ཏེ་ཞབས་འདེགས་བསྒྲུབ་ཐུབ་ན་དེར་ངོས་རང་སྐྱེ་བར་ཐེ་ཚོམ་ཁྱོན་ནས་ཡོད་མ་རེད་ཅེས་གསུངས་སོང་།

དེ་རིང་ཕྱི་ཚེས་ ༢ ཉིན་ཐའེ་ཝན་གྱི་རྒྱལ་ས་ཐའེ་པེ་རུ་ཐའེ་ཝན་མི་མང་གིས་ཕྱི་ལུགས་ལྟར་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༨༧ ལ་ཕེབས་པའི་༧སྐུའི་འཁྲུངས་སྐར་སྲུང་གཙིའི་མཛད་སྒོ་ཞིག་འཚོགས་ཡོད་པ་དང་། མཛད་སྒོའི་སྟེང་༧གོང་ས་མཆོག་ནས་དྲ་ལམ་ཐད་གཏོང་བརྒྱུད་བཀའ་སློབ་ལམ་སྟོན་གནང་སོང་ལ། དེ་བཞིན་མཛད་སྒོའི་སྟེང་དད་ལྡན་རྣམ་པས་སེམས་ཅན་ཐམས་ཅད་སོ་སོའི་ཨ་མ་དང་གཅེས་གྲོགས་ཡིན་སྐོར་གྱི་གླུ་གཞས་ཕུལ་བ་དང་། དད་ལྡན་མི་མང་གིས་ཞལ་འདེབས་བསྡུས་ཏེ་ཡེན་ནིན་རྫོང་མེ་གསོད་རུ་ཁག་ལ་༧གོང་ས་མཆོག་གི་མཚན་ཐོག་ནས་མྱུར་སྐྱོབ་རླངས་འཁོར་ཨང་བརྒྱད་པ་(Ambulance) ཞིག་ཞལ་འདེབས་སུ་ཕུལ་བ་དབུ་འབྱེད་གནང་སོང་།

དྲ་ལམ་ཐད་གཏོང་བརྒྱུད་༧གོང་ས་མཆོག་ནས་བཀའ་སློབ་གནང་སྐབས། དེ་རིང་ཐའེ་ཝན་གྱི་ཆོས་གྲོགས་ཚོས་ངོས་ཀྱི་སྐྱེས་སྐར་གྱི་དུས་ཆེན་གྲ་སྒྲིག་གནང་འདུག ཐུགས་རྗེ་ཆེ་ཞུ་ཡི་ཡིན། ངོས་ནི་བཅོམ་ལྡན་འདས་ཀྱི་རྗེས་འབྲང་དང་དགེ་སློང་། བྱམས་སྙིང་རྗེ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་མཐིལ་དུ་འཛིན་མཁན་ཞིག་ཆགས་བསྡད་ཀྱི་ཡོད་རེད། དེར་བརྟེན་ངོས་ནས་ཉིན་ལྟར་ཇི་སྲིད་ནམ་མཁའ་གནས་པ་དང་། །འགྲོ་བ་དེ་སྲིད་གནས་གྱུར་བ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག་ཟེར་ནས་སྨོན་ལམ་རྒྱག་གི་ཡོད་རེད། ཚེ་རབས་ནས་ཚེ་རབས་ཏུ་གཞན་དོན་བསྒྲུབ་ས་ཞིག་ལ་སྐྱེ་རྒྱུའི་སེམས་ཀྱི་དམ་བཅའ་བརྟན་པོ་ཡོད། ནམ་མཁའ་མ་ཟད་ཀྱི་བར་ལ་ཁམས་དང་མོས་པ་དང་མཐུན་པའི་ལམ་སྟོན་བྱེད་ཐུབ་མཁན་ཞིག་གིས། ལྷ་ཡིན་ན་འདྲ། ཀླུ་ཡིན་ནའང་འདྲ། མི་ཡིན་ནའང་འདྲ། ལུས་རྟེན་དེ་འདྲ་ཞིག་ལ་སྐྱེས་ཏེ་ངོས་ནས་གཞན་དོན་སྒྲུབ་པའི་སེམས་ཤུགས་གཏན་ནས་ཆག་མེད། ལོ་གཅིག་གཉིས་ཀྱི་སྐད་ཆ་དང་ཚེ་རབས་གཅིག་གཉིས་ཀྱི་སྐད་ཆ་མ་རེད། སྨོན་ལམ་འདིས་སེམས་ཤུགས་ཞེ་དྲགས་སྐྱེས་ཀྱི་འདུག ད་ལྟའི་དུས་རབས་འདིར་ངོས་རང་བོད་ཀྱི་མདོ་སྨད་ཁུལ་ལ་སྐྱེས་པ་ཞིག་རེད། མ་འོངས་པར་ཚེ་རབས་ནས་ཚེ་རབས་གནས་གང་དུ་ངོས་ནས་ཕན་ཐོགས་བྱས་ཏེ་ཞབས་འདེགས་བསྒྲུབ་ཐུབ་ཡ་ཡོད་ས་དེར་ངོས་རང་སྐྱེ་ཡི་རེད། ཐེ་ཚོམ་ཁྱོན་ནས་ཡོད་མ་རེད། ད་ལྟ་མི་ཚེ་འདིར་ཆ་བཞག་ན། ངོས་རང་བོད་མི་ཞིག་ལ་སྐྱེས་བསྡད་ཡོད་རེད། མདོ་སྨད་ལ་སྐྱེས་བསྡད་ཡོད་རེད། གང་ལྟར་བོད་མི་ཚོས་ངོས་ལ་ཡིད་ཆེས་བྱེད། དད་པ་བྱེད། དགའ་པོ་བྱེད་ཀྱི་ཡོད་རེད། དངོས་ཡོད་གནས་ཚུལ་ལ་ཆ་བཞག་ནའང་ངོས་རང་གི་མི་ཚེ་དེར་དཀའ་ངལ་མང་པོ་ཞིག་བརྒྱུད་པའི་ཐོག་ནས་བོད་ཀྱི་སངས་རྒྱས་ཀྱི་བསྟན་པ་དང་། མི་རིགས་ཀྱི་དོན་དག་ལ་ངོས་ཀྱིས་ཞབས་འདེགས་གང་འཚམ་བསྒྲུབས་ཡོད་རེད། དེར་བརྟེན་ད་ལྟའི་རྟེན་འདི་ད་ལྟ་དང་ཚེ་རབས་ནས་དམིགས་བསལ་གྱིས་ལས་འབྲས་ཡོད་བསྡད་པའི་བོད་རིགས་ཚོ་ལ་ངོས་རང་གིས་ཕན་ཐོགས་བྱེད་ཡ་ཞིག་ཡོང་གི་ཡོད་རེད། མུ་མཐུད་ནས་ཉུང་མཐར་ལོ་ ༢༠ དང་ ༣༠ ཞིག་ངོས་རང་བསྡད་ཀྱི་རེད། ཁྱེད་རང་ཚང་མ་བློ་བདེ་པོ་བྱས་ནས་སྡོད་ཨ། ཧུར་ཐག་བྱོས། ཞེས་གསུངས་སོང་།

ཡང་༧གོང་ས་མཆོག་གིས། ང་རང་ཚོ་སངས་རྒྱས་པའི་ཆོས་པ་རེད། སངས་རྒྱས་པའི་ཆོས་ཀྱི་ཐོག་ནས་ལྟ་གྲུབ་ཀྱི་སྐོར་དང་སེམས་པ་བཟང་པོ་བྱེད་ཡ་གཉིས་པོ་དེ་གལ་ཆེན་པོ་ཡིན་པ་གསུང་གི་འདུག འདི་ང་རང་ཚོའི་སེམས་ལ་ངེས་པ་བྱས། ངོས་རང་ལ་ཆ་བཞག་ན། ཉིན་རེའི་ཞོགས་པར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད། ཁྱེད་རང་ཚོ་ངོས་རང་གི་ཆོས་གྲོགས་རེད། ག་ཚོད་ཐུབ་ཐུབ་ཀྱིས་ཞོགས་པ་གཉིད་སད་པ་དང་སྤྱོད་འཇུག་ནས་གསུངས་པ་ནང་བཞིན་གྱི་བྱང་ཆུབ་ཀྱི་སེམས་སྒོམ་ཡ། འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་བྱུང་། །འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། །མང་དུ་བཤད་ལྟ་ཅི་ཞིག་དགོས། །བྱིས་པ་རང་གི་དོན་བྱེད་དང༌། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར་ཟེར་ནས་གསུངས་ཡ་དེ་རེད། དེར་བརྟེན་ངོས་རང་ལ་ཆ་བཞག་ན། བྱང་ཆུབ་ཀྱི་སེམས་ཉམས་ལེན་བྱེད་ཀྱི་ཡོད་པ་དང་། གང་ལ་གང་འཚམ་གྱི་ཉམས་མྱོང་ཡོད་རེད། དེ་ལྟར་སེམས་ཤུགས་སྐྱེད་ནས་སྡོད་ཀྱི་ཡོད། ཁྱེད་རང་ཚོས་དེ་དེ་བཞིན་མི་ལུས་ཤིག་ཐོབ། སངས་རྒྱས་པའི་ཆོས་དར་སའི་ཡུལ་གྲུ་གཅིག་ལ་སྐྱེས་ནས་མི་མང་པོ་ལ་སངས་རྒྱས་པའི་ཆོས་ཀྱི་ཐོག་ནས་ཞབས་འདེགས་བསྒྲུབ་པ། གལ་སྲིད་ཆོས་མེད་ན་ཡང་སེམས་པ་བཟང་པོ་བྱེད་པ། ང་རང་ཚོའི་རྒྱ་རིགས་གྲོགས་པོ་ཚོའི་ནང་ལ་ཆ་བཞག་ནའང། དེ་སྔ་རྒྱ་ནག་ལའང་ངོས་རང་གི་གྲོགས་པོ་མང་པོ་ཞེ་དྲགས་ཡོད་རེད། དེ་ནས་ལྷ་སར་བསྡད་པའི་རིང་ལའང་རྒྱ་རིགས་གྲོགས་པོ་མང་པོ་ཞེ་དྲགས་ཡོད་རེད། དངོས་གནས་ཁ་ཤས་ཁ་ཞེ་གཉིས་མེད་རེད་གདའ། ངོས་རང་དང་སེམས་ཐག་ཉེ་པོ་བྱས་ནས་སྡོད་མཁན་ཞེ་དྲགས་ཡག་པོ་ཡོད། རིགས་ཁ་ཤས་འདྲ་ཆགས་པོ་བྱེད་ཀྱི་ཡོད་རེད། དེར་བརྟེན་ང་ཚོ་ཚེ་རབས་ནས་ཚེ་རབས་སྐད་ཆ་བཤད་དུས་འདྲ་ཆགས་པོ་བྱས་ནས་བསྡད་པས་ཕན་མ་སོང་། ཁ་ཡོད་ལག་ཡོད་ཀྱིས་སེམས་པ་བཟང་པོ་དང་མི་ལ་རོགས་བྱ་རྒྱུ་དེ་ཞེ་དྲགས་གལ་ཆེན་པོ་རེད། ངོས་རང་ཡང་འདི་ཉམས་ལེན་བྱས་ནས་སྡོད་ཀྱི་ཡོད། འབྱུང་འགྱུར་ལོ་ ༢༠ ངོས་རང་སྡོད་ཀྱི་རེད། ཅེས་གསུངས་སོང་།

༧གོང་ས་མཆོག་གི་ཆོས་གྲོགས་དམ་པ་ཊུ་ཊུ་མཆོག་གི་སྐོར་གསུངས་སྐབས། འདས་པོ་ཊུ་ཊུ་ནི་ངོས་རང་གི་སེམས་ཐག་ཉེ་བའི་གྲོགས་པོ་རེད། ང་ཚོས་ཆོས་ལུགས་མཐུན་འབྲེལ་ག་འདྲ་བཟོ་དགོས་པ་དང་། ང་ཚོ་ཆོས་པ་རྣམས་ཀྱིས་སེམས་ཞི་བདེ་ཡོང་སླད་དུ་མཐུན་རྐྱེན་ག་ཚོད་སྦྱོར་ཐུབ་ཀྱི་ཡོད་པ། དེ་བརྒྱུད་ནས་འཛམ་གླིང་ཞི་བདེ་ཡོང་རྒྱུའི་ཐོག་ལ་གྲོས་བསྡུར་བྱས་པ་རེད། འོན་ཀྱང་ས་ཆ་མང་པོའི་ནང་དུ་ཆོས་ལུགས་མི་འདྲ་བར་དད་མོས་ཡོད་པའི་རྐྱེན་གྱིས་རྩོད་རྙོག་བྱུང་གི་ཡོད་པ་རེད། དེར་བརྟེན་ཆོས་ལུགས་མཐུན་འབྲེལ་དགོས་གལ་ཆེན་པོ་རེད། ཁྱེད་རང་གིས་བསམ་བློ་གཏིང་ཟབ་པོ་བཏང་བ་ཡིན་ན། ཆོས་ལུགས་ཡོངས་ཀྱིས་བྱམས་སྙིང་རྗེ་དང་དྲང་བདེན། གཞན་ཕན་བྱ་རྒྱུ་དང་གཞན་ལ་འཚེ་བ་མི་བྱེད་པ་སློབ་ཀྱི་ཡོད་པ་གཅིག་མཚུངས་རེད། ངོས་རང་ཐག་ཉེ་བའི་གྲོགས་པོ་ཊུ་ཊུ་ལ་གུས་ཞབས་ཞེ་དྲགས་ཡོད། འདས་པོ་ཊུ་ཊུས་ཁོང་རང་ཡི་ཤུ་བ་ཡིན་པའི་ཆ་ནས་ཁོང་རང་ལྷ་ཡུལ་དུ་འགྲོ་ཡི་ཡོད་པ་དང་། ༧གོང་ས་མཆོག་ཡི་ཤུ་མ་རེད། དེར་བརྟེན་འཇིག་རྟེན་བཀོད་པ་པོ་མེད་པས་ས་ཕྱོགས་གཞན་ལ་འགྲོ་སྲིད་ཀྱི་རེད། དམྱལ་བ་ལབ་ཀྱི་ཡོད་རེད། འདས་པོ་ཊུ་ཊུས་ངོས་རང་ལ་ཀུ་རེ་དེ་ལྟར་བྱེད་ཀྱི་འདུག ཆོས་ལུགས་ཚང་མར་ལྟ་གྲུབ་དང་གཞུང་ལུགས་མི་འདྲ་བ་ཡོད་རུང་ཚང་མས་བྱམས་སྙིང་རྗེ་དང་དྲང་བདེན་སློབ་ཀྱི་ཡོད་པ་གཅིག་མཚུངས་རེད། དེ་ལ་བརྟེན་ནས་ཆོས་ལུགས་མཐུན་འབྲེལ་ཡོང་སྲིད་པ་རེད། ང་ཚོས་འཛམ་གླིང་འདིའི་ནང་ཆོས་ལུགས་མི་འདྲ་བ་རྣམས་གཅིག་སྒྲིལ་ཡོང་ཆེད་དུ་གོ་རྟོགས་སྤེལ་རྒྱུ་དང་ཡར་རྒྱས་གཏོང་ཐུབ་ཀྱི་རེད། ཞི་བདེའི་དོན་དུ་དཀའ་ལས་བརྒྱག་པ་དང་འགྲོ་བ་མི་ལ་ཞབས་འདེགས་བསྒྲུབ་པ། ད་ལྟའི་ཆར་ཁོར་ཡུག་སྲུང་སྐྱོབ་བྱེད་དགོས་ཀྱི་འདུག ཅེས་བཀའ་སློབ་གནང་སོང་།

མཇུག་ཏུ་༧གོང་ས་མཆོག་གིས། འཛམ་གླིང་ཞི་བདེ་བསྐྲུན་པར་འགྲོ་བ་མིའི་རིགས་ཐེར་འབུམ་ ༧ རྣམས་གཅིག་གྱུར་ཡིན་པ་ཤེས་དགོས་ཀྱི་ཡོད་རེད། ཚང་མ་སྐྱེས་དུས་ནས་སེམས་པ་བཟང་པོ་ཡོད་པ་རེད། ང་ཚོ་སྐྱེས་ནས་ཨ་མའི་བྱམས་སྐྱོང་དང་བརྩེ་བ་མེད་པར་གནས་ཐུབ་ཀྱི་མ་རེད། དེ་རང་བཞིན་གྱིས་རེད། ཆོས་ལུགས་སྐོར་ལ་མ་རེད། དེར་བརྟེན་སྐྱེས་པ་ནས་བཟུང་སེམས་པ་བཟང་པོ་ཡོད་པ་དེ་མུ་མཐུད་དུ་གནས་དགོས་ཀྱི་ཡོད་རེད། དེང་སང་ཕྱི་དངོས་པོའི་ཤེས་ཡོན་བསླབ་པ་ལས་སེམས་པ་བཟང་པོའི་སྐོར་ལ་སློབ་ཀྱི་ཡོད་མ་རེད། ད་ལྟའི་ཆར་ཤེས་ཡོན་གྱི་སྡེ་ཚན་ནང་སེམས་ཞི་བདེའི་སྐོར་གྱི་ཤེས་ཡོན་དགོས་ཀྱི་ཡོད་པ་དང་། བྱམས་སྙིང་རྗེ་དེ་གཙོ་བོ་ཡིན་པས་སེམས་ཞི་བདེ་ཡོང་བ་དང་སེམས་པ་སྐྱིད་པོ་སོགས་ཀྱིས་ཚེ་རིང་པོ་གནས་ཐུབ་ཀྱི་རེད། སྐབས་རེར་མི་དེ་ཚོས་ཆོས་ལུགས་ནི་ལྷ་ཡུལ་སྐོར་རེད་བསམ་གྱི་ཡོད་རེད། འོན་ཀྱང་ང་ཚོ་ཉིན་རེ་ནས་སེམས་པ་སྐྱིད་པོ་དང་ཞི་བདེ་ཡོང་བར་ཆོས་ལུགས་ཡོངས་ཀྱི་བསླབ་བྱ་ནི་སེམས་པ་བཟང་པོ་བྱ་རྒྱུ་དེ་རེད། དེ་གལ་ཆེན་པོ་ཞེ་དྲགས་རེད། ཆོས་ལུགས་ཡོངས་ལ་སེམས་པ་བཟང་པོ་བསྐྲུན་པའི་ནུས་པ་གཅིག་པ་ཡོད་པ་རེད། དེར་བརྟེན་ངོས་རང་གི་དམ་བཅའ་གཅིག་ནི་ཆོས་ལུགས་མཐུན་སྒྲིལ་་བྱ་རྒྱུ་དེ་རེད། དེ་ཡོང་སྲིད་ཀྱི་རེད། རྒྱ་གར་ནང་ཆོས་ལུགས་མི་འདྲ་བ་ཡོད་པ་རྣམས་མཉམ་དུ་སྡོད་ཀྱི་ཡོད་རེད། སྐབས་རེར་རྩོད་རྙོག་ཡོང་གི་ཡོད་རེད། འོན་ཀྱང་ཆོས་ལུགས་མི་འདྲ་བ་རྣམས་མཉམ་དུ་བསྡད་ཐུབ་ཀྱི་རེད། འོན་ཀྱང་སེམས་པ་བཟང་པོ་དགོས་པ་དེ་གོང་འཕེལ་གཏོང་དགོས། ངོས་རང་གི་ཐག་ཉེ་བའི་འདས་པོ་ཊུ་ཊུ་དང་ངོས་གཉིས་ཀྱིས་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་དམ་བཅའ་བཞག་ཡོད། དེ་བརྒྱུད་ནས་སེམས་པ་བཟང་པོ་གོང་མཐོར་བཏང་ནས་འཛམ་གླིང་ཞི་བདེ་ལྡན་པ་བསྐྲུན་ཐུབ་ཀྱི་རེད། ཅེས་གསུངས་སོང་། 

གཞན་ཡང་། ཕྱི་ཟླ་ ༦ ཚེས་ ༣༠ ཉིན་བྱང་ཨ་རིའི་མདོ་སྨད་ཚོགས་པ་ (North America Dhomay Association) ཡི་གོ་སྒྲིག་འོག ༧གོང་ས་མཆོག་གི་སྐུའི་འཁྲུངས་སྐར་སྲུང་གཙི་ཞུས་ཡོད་པ་དང་། མཛད་སྒོའི་ཐོག་སྐྱབས་རྗེ་ཀིརྟི་རིན་པོ་ཆེ་མཆོག་གི་དབུས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག་ཕེབས་ཡོད་པ་རེད། དེ་བཞིན་ཕྱི་ཟླ་ ༦ ཚེས་ ༢༥ ཉིན་སྦེལ་ཇམ་ཆོས་རིག་འཛིན་སྐྱོང་ཁང་གི་འཇམ་དབྱངས་བློ་འཕེལ་གཟའ་མཇུག་སློབ་གྲྭས་སྦེལ་ཇམ་གྱི་གྲོང་ཁྱེར་ (Antwerpen) དུ། ༧གོང་ས་མཆོག་གི་སྐུའི་འཁྲུངས་སྐར་སྲུང་གཙི་ཞུས་ཡོད་འདུག དེ་བཞིན་ས་གནས་མདོ་སྨད་ཚོགས་པ་ནས་ཀྱང་འཁྲུངས་སྐར་སྲུང་གཙི་ཞུས་ཡོད་འདུག ཡང་ཕྱི་ཟླ་ ༦ ཚེས་ ༡༧ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་ཐོག རྒྱལ་ས་ཐའེ་པེ་ (Howard Plaza Hotel) རུ་སྐུའི་འཁྲུངས་སྐར་ཉིན་མོ་སྲུང་གཙི་ཞུས་ཡོད་འདུག

གསར་འགོད་པ། བསྟན་འཛིན་ཕུར་བུ།