༧གོང་ས་མཆོག་གི་བཀའ་སློབ་ལམ་སྟོན་གཞིར་བཟུང་རྒྱལ་སྤྱིའི་དགེ་ལྡན་ལྷན་ཚོགས་ཀྱིས། ནང་པའི་སློབ་གཉེར་ཁང་ཞིག་གསར་འཛུགས་ཀྱིས་གདན་ས་ཁག་གི་སློབ་གྲྭ་དག་རྒྱ་གར་གཞུང་ལ་དེབ་སྐྱེལ་དང་འབྲེལ་དགེ་བཤེས་རྣམས་ལ་རྒྱ་གར་གཞུང་གིས་སློབ་དཔོན་ཆེན་མོའི་ངོས་འཛིན་ཐོབ་ཐབས་གནང་རྒྱུ་ཡིན་འདུག
དེ་རིང་སྔ་དྲོ་ཆུ་ཚོད་ ༡༡ ཡོལ་ཙམ་གྱི་སྟེང་། དྷ་སའི་བོད་ཀྱི་ནོར་བུ་གསོལ་མགྲོན་ཁང་དུ། རྒྱལ་སྤྱིའི་དགེ་ལྡན་ལྷན་ཚོགས་ཀྱི་མགོ་ལས་ཐུན་མོང་གིས། གསར་འགོད་ལྷན་ཚོགས་ཤིག་སྐོང་ཚོགས་གནང་བའི་ཐོག རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངོས་ནས། ཕྱི་ཟླ་ ༧ ཚེས་ ༦ ཉིན་༧གོང་ས་མཆོག་གི་འཁྲུངས་སྐར་གྱི་དུས་བཟང་དང་བསྟུན། ད་སྔ་བར་དགོན་སྡེ་ཁག་ཏུ་ཡོད་པའི་གནའ་བོའི་ཤེས་རིག་ཡོད་པའི་ཁར། ཚན་རིག་དང་ནུབ་ཕྱོགས་ཀྱི་ལྟ་གྲུབ། རྒྱལ་རབས་ལོ་རྒྱུས་དང་ཆོས་ལུགས་ཕན་ཚུན་མཚུངས་བསྡུར། ཨང་རྩིས་སོགས་གནའ་དེང་ཟུང་གི་སློབ་ཚན་ལྡན་པའི་ནང་པའི་སློབ་གཉེར་ཁང་ཞིག་དབུ་འཛུགས་གནང་རྒྱུ་ཡིན་པ་ཡོངས་བསྒྲགས་བྱས་སོང་།
དེ་རིང་ཞོགས་པར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཚོགས་མི་ཡོངས་ལ་༧གོང་ས་མཆོག་གིས་མཇལ་ཁ་སྩལ་ཡོད་པ་ལྟར། གསར་འགོད་པས་མཇལ་ཁའི་སྐབས་༧གོང་ས་མཆོག་གིས་བཀའ་སློབ་ཅི་སྩལ་སྐོར་བཀའ་འདྲི་ཞུས་པར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཚོགས་གཙོ་དང་སྒོ་མང་མཁན་ཟུར་དགེ་བཤེས་ལྷ་རམས་པ་བློ་བཟང་རྒྱ་མཚོ་ལགས་ཀྱིས། ང་ཚོས་གསར་འགོད་གསལ་བསྒྲགས་ནང་གསལ་བ་ལྟར་ཡར་ནང་པའི་སློབ་གཉེར་ཁང་དེ་རྒྱ་གར་གཞུང་ལ་དེབ་སྐྱེལ་བྱེད་སྟངས་སྐོར་ཞུས་པ་ཡིན། ༧སྐུ་མདུན་ནས་མར་བཀའ་སློབ་གནང་བ་ནི། ང་ཚོའི་བོད་ཀྱི་གདན་ས་ཁག་ནི་དགོན་པ་གཅིག་པོ་མ་ཡིན་པར་ཤེས་ཡོན་གྱི་ལྟེ་གནས་ཆེན་པོ་ཞིག་རེད། དགོན་པ་དང་ཤེས་ཡོན་གྱི་ལྟེ་གནས་གཉིས་ཁ་ཁ་ཕྱེ་དགོས་རེད། དགོན་པ་ཁ་ཤས་ལ་འདོན་པ་དང་ཞབས་བརྟན་སྒྲུབ་རྒྱུ་མ་གཏོགས་ཡོད་པ་མ་རེད་དེ། ང་ཚོའི་གདན་ས་སེར་འབྲས་དགའ་གསུམ་དང་རྒྱུད་གྲྭ་སྟོད་སྨད་ལ་སོགས་བཅས་ཀྱིས། རྒྱ་གར་གྱི་དཔལ་ནཱ་ལེནྡྲའི་གཞུང་ལ་རིག་པས་བརྡར་ཤ་བཅད་པ་དང་། (དེང་སང་ཚན་རིག་པས་གསུང་གི་ཡོད་པའི་ལྟ་བ་བརྟེན་འབྱུང་དང་སྟོང་ཉིད་སོགས་ཀྱི་སྐོར། ང་ཚོའི་ཆོས་དཔེའི་ནང་དུ་ལོ་ངོ་སྟོང་ཕྲག་གོང་ནས་ཡོད་པ་མ་ཟད།) བརྟག་དཔྱད་དང་རྩོད་པ། ཕན་ཚུན་བར་གྲོས་བསྡུར་སོགས་བྱས་ནས་སློབ་སྦྱོང་བྱེད་མཁན་ང་ཚོ་མ་གཏོགས་འཛམ་གླིང་ནང་ཡོད་པ་མ་རེད་གསུངས་སོང་། ཏོག་དབྱིབས་གཉན་རིམས་ཞི་འཇགས་ཡོང་ཚེ། རིང་མིན་༧སྐྱབས་མགོན་རིན་པོ་ཆེ་མཆོག་ལྡི་ལིར་ཕེབས་ཏེ། ལྡི་ལིའི་སློབ་གྲྭ་ཆེན་མོ་གང་མང་ཞིག་གི་དགེ་རྒན་ཆེན་མོ་རྣམས་དང་ལྷན་དུ་གྲོས་བསྡུར་གྱིས་ཏེ། གདན་སའི་དགེ་བཤེས་རྣམས་ལ་སློབ་དཔོན་ཆེན་མོའི་མཚན་གནས་རག་ཐབས་བྱ་རྒྱུ་ཡིན་པ་མ་ཟད། སྐུ་རྩེད་དང་སྦྲགས་ནས་སློབ་དཔོན་ཆེན་མོའི་མཚན་གནས་ཐོག་མ་དེ་ཁོང་གིས་བཞེས་ཀྱི་ཡིན་སྐོར་སོགས་གསུངས་སོང་། ཞེས་འགྲེལ་བརྗོད་གནང་བྱུང་།
ྋགོང་ས་ྋསྐྱབས་མགོན་ཆེན་པོ་མཆོག་གི་བླ་ན་མེད་པའི་དགོངས་གཞི་དང་བཀའ་སློབ་ལམ་སྟོན་སྔ་རྗེས་སྩལ་པ་གཞིར་བཟུང་། རྒྱལ་སྤྱིའི་དགེ་ལྡན་ལྷན་ཚོགས་ཀྱིས་ནང་པའི་སློབ་གཉེར་ཁང་གསར་འཛུགས་ཞུ་རྒྱུར། ཕྱི་ལོ་ ༢༠༡༨ ནས་བཟུང་རྒྱ་གར་གྱི་ཆེས་མཐོའི་མི་སྣ་དང་མཉམ་དུ་བགྲོ་གླེང་ཚོགས་འདུ་ཡང་ཡང་འཚོགས་ཏེ་ནང་བའི་མཐོ་རིམ་སློབ་གཉེར་ཁང་ཞིག་དབུ་འཛུགས་ཞུ་གཏན་ཁེལ་བ་བཞིན། ཕྱི་ལོ་ ༢༠༢༢ ཟླ་བ་ ༧ ཚེས་ ༦ ྋརྒྱལ་བའི་འཁྲུངས་སྐར་དུས་ཆེན་ཉིན། ནང་པའི་སློབ་གཉེར་ཁང་དབུ་བརྙེས་པའི་ལོར་སྲུང་བརྩི་ཞུ་རྒྱུ། སློབ་གཉེར་ཁང་འདིའི་དམིགས་ཡུལ་ནི། ལོ་ངོ་བརྒྱ་ཕྱག་མང་པོའི་སྔོན་ནས་རྒྱ་གར་འཕགས་ཡུལ་ དཔལ་ནཱ་ལེནྡྲའི་གཙུག་ལག་སློབ་གཉེར་ཁང་དུ། ནང་བསྟན་ཐེག་པ་ཆེ་ཆུང་སྔགས་དང་བཅས་པ་དར་ཁྱབ་བྱུང་བ་ དེ་ཉིད་རིམ་གྱིས་བོད་གངས་ཅན་གྱི་ལྗོངས་སུ་དར་རྒྱས་ཤུགས་ཆེ་བྱུང་སྟེ། བོད་གངས་ཅན་པས་ལོ་ངོ་བརྒྱ་ཕྲག་མང་པོའི་རིང་བདག་ཉར་བྱས་པའི་རྒྱ་གར་གྱི་གནའ་བོའི་ཤེས་ཡོན་དེ་དག་ལ་ནང་སེམས་ཀྱི་གདུང་བ་སེལ་བ་དང་ ཞི་བདེ་སྒྲུབ་པར་ཕན་ནུས་ཐོན་པའི་དམིགས་བསལ་གྱི་ཆ་རྐྱེན་ཞིག་ཡོད་སྟབས། ཆ་རྐྱེན་དེས་མི་སྒེར་དང༌། སྤྱི་ཚོགས། འཛམ་གླིང་བཅས་ཞི་བདེ་དང་བྱམས་བརྩེ་ལྡན་པ་ཞིག་བསྐྲུན་རྒྱུ།
མཐོ་རིམ་སློབ་ཁང་འདི་ནས་ད་ཡོད་ཤེས་ཡོན་གྱི་ལམ་ལུགས་ཕུན་སུམ་ཇེ་ཚོགས་སུ་འགྱུར་བའི་རམ་འདེགས་བྱས་ཏེ། གནའ་བོའི་ཤེས་རིག་དེ་ཡངས་པའི་འཇིག་རྟེན་ཆེན་པོར་སྐྱེས་སུ་འབུལ་རྒྱུའི་ཐོག སྔར་སྲོལ་དགོན་པའི་ཤེས་ཡོན་གྱི་ཁོངས་སུ་མེད་པའི་སློབ་ཚན་ཆོས་ལུགས་ཕན་ཚུན་མཚུངས་བསྡུར་དང་། ཚན་རིག ནུབ་ཕྱོགས་ཀྱི་ལྟ་གྲུབ། རྒྱལ་རབས་ལོ་རྒྱུས་དང༌། ཨང་རྩིས་སོགས་སློབ་སྦྱོང་གི་གོ་སྐབས་སྐྱ་སེར་ཀུན་ལ་ཆ་མཉམ་ཕུལ་ནས་ཤེས་ཡོན་རྒྱ་བསྐྱེད་བྱ་རྒྱུ། མཐོ་རིམ་སློབ་ཁང་འདི་ནས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཁྱབ་ཁོངས་དགོན་སྡེ་དང་བཙུན་དགོན་ཚང་མར་སྤྱི་མཚུངས་ལག་འཁྱེར་སྤྲོད་རྒྱུ་དང༌། ཕྱིའི་སྐྱ་སེར་ཕོ་མོ་ཀུན་ལ་གནའ་བོའི་རྒྱ་གར་གྱི་ཕུལ་བྱུང་རྣམ་ དཔྱོད་དང་ཤེས་ཡོན་སྦྱོང་བརྡར་ཁྱད་འཕགས་སློབ་སྦྱོང་གི་གོ་སྐབས་འབུལ་རྒྱུ། ནང་པའི་སློབ་གཉེར་ཁང་འདི་ཉིད་རིམ་གྱིས་(གཙུག་ལག་སློབ་གཉེར་ཁང་སྟངས་འཛིན་ལྷན་ཚོགས་ཀྱི་བཅའ་ཁྲིམས་དོན་ཚན་༡༩༥༦ གི་ཁོངས་སུ་) ཆེས་མཐོའི་གཙུག་ལག་སློབ་ཁང་དུ་ཚད་འཛིན་ཐོབ་ཐུབ་པའི་དམིགས་ཡུལ་ཡང་བཅངས་ཡོད།
ད་རེས་ཕྱི་ལོ་༢༠༢༢ ཟླ་བ་༧ ཚེས་༤ ཉིན་འཇམ་མགོན་རྒྱལ་བའི་རྒྱལ་ཚབ་༸སྐྱབས་རྗེ་དགའ་ལྡན་ཁྲི་ ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང༌། མཚུངས་མེད་བྱང་རྩེ་ཆོས་ རྗེ་སྒོ་སོག་རིན་པོ་ཆེ། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཁྱབ་ཁོངས་གྲྭ་ཚང་ཁག་གི་མཁན་རིན་པོ་ཆེ་རྣམ་པ་ དང་། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ། རྒྱལ་སྤྱིའི་དགེ་ལྡན་ལྷན་ཚོགས་ཀྱི་བཀུར་འོས་ཤེས་ཡོན་ སློབ་སྟོན་པ་རྣམ་པ་བཅས་རྡ་ས་བཞུགས་སྒར་དུ་ཆེད་འཛོམས་ཀྱིས། ནང་པའི་སློབ་གཉེར་ཁང་གི་བཅའ་ཁྲིམས་མཚན་རྟགས་བཀོད་དེ། མཚན་རྟགས་འབྱར་མའི་རྩ་འཛིན་ཡིག་ཆ་དེ་ཉིད་བདག་ཅག་ཡོངས་ཀྱི་མགོན་སྐྱབས་ ཟླ་མེད་སྤྱི་ནོར་ྋགོང་ས་ྋསྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་སྤྱན་འབུལ་ཐོག་ལམ་སྟོན་བཀའ་སློབ་ཞུས་ཞེས་བརྗོད་འདུག
མཇུག་ཏུ་གསར་འགོད་པས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཚོགས་གཙོ་དང་སྒོ་མང་མཁན་ཟུར་དགེ་བཤེས་ལྷ་རམས་པ་བློ་བཟང་རྒྱ་མཚོ་ལགས་སུ་སློབ་གཉེར་ཁང་དེ་འདྲ་ཞིག་འཛུགས་དགོས་དོན་གང་ཡིན་དྲིས་སྐབས། ད་ལྟ་གདན་སའི་བཤད་གྲྭ་ཁག་ལ་ཡོད་པའི་སློབ་གཉེར་ལ་རྒྱ་གར་གཞུང་གི་ངོས་འཛིན་དང་དེབ་སྐྱེལ་མེད་སྟབས། དེ་དེབ་སྐྱེལ་ཡོང་ཐབས་ཀྱི་སླད་དང་ཞོར་དུ་ཕྱི་ནང་གི་མི་རིགས་ཚང་མར་ད་ལྟའི་སློབ་སྦྱོང་ཁོ་ན་མ་ཡིན་པར་ཁ་སྣོན་གྱི་སློབ་སྦྱོང་སྤྲོད་རྒྱུའི་དམིགས་ཡུལ་བཟུང་ཡོད། ཅེས་དང་། སློབ་གཉེར་ཁང་དེའི་ནང་སྐྱ་སེར་ཕོ་མོ་དང་འཛིན་རིམ། མི་རིགས་དང་ཆོས་བརྒྱུད་སོགས་དབྱེར་མེད་ཀྱི་འཛུལ་ཞུགས་བྱེད་ཆོག་གི་ཡོད་པ་དང་། ནང་པའི་སློབ་གཉེར་ཁང་དེ་བརྒྱུད་གདན་ས་གསུམ་གྱི་གཙོས་བོད་ཀྱི་དགོན་སྡེ་ཁག་ཏུ་སློབ་གཉེར་གནང་བཞིན་པའི་དགེ་འདུན་པ་རྣམས་ལ་རྒྱ་གར་གཞུང་གིས་ངོས་འཛིན་ལག་འཁྱེར་ཐོབ་ཐབས་ཀྱི་དམིགས་ཡུལ་བཟུང་ཡོད་སྐོར་གསུངས་སོང་།
གསར་འགོད་པ། སྐལ་བཟང་སྦྱིན་པ།
