ཚེ་རིང་ཁཱོར་ནལ་ལགས་ཀྱིས་ཨ་རིའི་ཁུ་ལེག་རྫོང་ཁུལ་གྱི་ཁྲིམས་དཔོན་གྱི་ལས་འཁུར་དམ་འབུལ་ཞུས་ཏེ། མོ་ནི་ས་ཁུལ་དེའི་ལོ་རྒྱུས་ནང་ཨེ་ཤ་ཡ་དང་བོད་རིགས་ཀྱི་ཁྲིམས་དཔོན་ཐོག་མ་དེ་ཆགས་ཡོད་འདུག
ཁ་སང་ཨ་རིའི་ཁུ་ལེག་རྫོང་ཁྲིམས་ཁང་གི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡ ཉིན་ཨ་རིའི་ཝ་ཤིན་ཊོན་མངའ་སྡེའི་ཁུ་ལེག་རྫོང་ (Clark County) ཁུལ་གྱི་བོད་པའི་བུ་མོ་ཚེ་རིང་ཁཱོར་ནལ་ལགས་ཀྱིས། ཁྲིམས་ཁང་གི་ཚོགས་རའི་ནང་ཁྲིམས་དཔོན་རྗན་ནེ་ཧྥར་(Jennifer Snider) ལགས་དང་ཁེམ་རཱ་བྷན་ཧྥི་ཌི ( Camara Banfield) ལགས། དེ་བཞིན་སོའུ་རྫན་ (Suzan Clark) ལགས་བཅས་ཚང་འཛོམས་ཀྱི་ཁར། དྲ་ལམ་བརྒྱུད་རྫོང་དེའི་སྤྱི་ཁྱབ་ཁྲིམས་དཔོན་སི་ཊེ་ཝི་ (Steve Gonzalez) ལགས་ཀྱི་མདུན་ནས། སྤྱི་དམངས་གཏུགས་བཤེར་གྱི་ཁྲིམས་དཔོན་གྱི་ལས་འཁུར་དམ་འབུལ་ཞུས་གནང་ཡོད་པ་རེད།
དེ་རིང་ཚེ་རིང་ཁཱོར་ནལ་ལགས་ཀྱིས་སྒེར་གྱི་ངོ་དེབ་སྟེང་། ངའི་ཁྲིམས་དཔོན་གྱི་དམ་འབུལ་སྐབས་ཡུལ་དངོས་དང་དྲ་ལམ་བརྒྱུད་མཉམ་ཞུགས་གནང་མཁན་དང་རྟེན་འབྲེལ་ཞུ་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། དམིགས་བསལ་སྤྱི་ཁྱབ་ཁྲིམས་དཔོན་སི་ཊེ་ཝི་ (Steve Gonzalez) ལགས་དང་ཁྲིམས་དཔོན་རྗན་ནེ་ཧྥར་(Jennifer Snider) ལགས། ཁེམ་རཱ་བྷན་ཧྥི་ཌི ( Camara Banfield) ལགས། དེ་བཞིན་སོའུ་རྫན་ (Suzan Clark) ལགས་བཅས་ཀྱིས་རང་གི་དུས་ཚོད་བློས་གཏོང་དང་ཕན་སེམས་བཅིངས་པར་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་འདུག
ཉེ་ལམ་ཚེ་རིང་ལགས་ཀྱིས་དམ་འབུལ་མཛད་རིམ་དེའི་སྐབས། རང་ཉིད་ནི་རྫོང་ཁུལ་དེའི་ཨེ་ཤ་ཡ་དང་བོད་རིགས་ཀྱི་ཁྲིམས་དཔོན་ཐོག་མ་དེ་ཆགས་ཡོད་སྟབས། དམ་འབུལ་མཛད་སྒོ་དེ་ཉིད་རང་ཉིད་ཁོ་ནའི་ཆེད་དུ་མ་ཡིན་པར། བོད་མི་ཡོངས་ཀྱི་ཆེད་དུ་ཡིན་པ་མ་ཟད། ངས་ཨ་རིར་སྐྱེས་པའི་བོད་རིགས་གཞོན་སྐྱེས་རྣམས་ནས་མོ་རང་ནང་བཞིན་འབད་བརྩོན་ཞུས་ཏེ་སོ་སོའི་ཕུགས་བསམ་མངོན་འགྱུར་སླད་ཤུགས་རྒྱག་དགོས་པའི་འབོད་སྐུལ་ཞུས་ཡོད་པ་རེད།
ཚེ་རིང་ལགས་ནས་དངོས་སུ་ཨ་རིའི་ཁྲིམས་དཔོན་ཞིག་གི་ལས་འཁུར་དམ་འབུལ་ཞུས་པར་བོད་མི་མང་པོས་ཁོང་ལ་དྲ་ལམ་ནས་འཚམས་འདྲི་ཞུ་ཡི་འདུག་ཅིང་། ཕྱི་ལོ་ ༢༠༠༠ ལོ་ནས་ཁོང་ནི་ནུབ་བྱང་བོད་ཀྱི་རིག་གཞུང་ཚོགས་པའི་ཚོགས་མི་ཞིག་ཡིན་པ་དང་། ད་ལྟ་ཚེ་རིང་ལགས་རང་ལོ་ ༤༠ ཡིན་ཞིང་། ཕ་མ་གཉིས་བོད་ནས་རྒྱ་གར་དུ་སྐྱབས་བཅོལ་ལ་འབྱོར་བ་དང་། རིམ་པས་ཨ་རིར་གནས་སྤོར་བྱས་རྗེས། ཚེ་རིང་ལགས་ཨ་རིའི་ཨོ་རེ་གྷོན་ (Oregon) མངའ་སྡེའི་གྲོང་ཁྱེར་ (Astoria) ནང་སྐྱེས་ཡོད་པ་དང་། ད་ལྟ་ཚེ་རིང་ལགས་བཟའ་ཟླ་བྷན་ཇི་མེན་དང་བུ་མོ་བསྟན་འཛིན་བཅས་ཀྱི་ལྷན་དུ་ཡོད་པ་དང་། ཁོ་མོས་ཨ་རིའི་ (Dartmouth) མཐོ་སློབ་ནས་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན་པ་དང་། ཨ་རིའི་ཁ་ལི་ཧྥོ་ནེ་ཡའི་California གཙུག་ལག་སློབ་གྲྭ་ཆེན་མོ་ནས་ཁྲིམས་ཀྱི་སློབ་མཐར་ཕྱིན་ཡོད་འདུག
གསར་འགོད་པ། སྐལ་བཟང་སྦྱིན་པ།
དགའ་བསུའི་འཚམས་འདྲི་ཡོད་། བོད་པའི་མིང་གྲགས་ཙམ་གྱི་བོད་དོན་ལ་ཕན་པའི་རེ་བ་དང་ཡིད་ཆེས་ཡོད་།