ཁ་སང་༧སྐུའི་འཁྲུངས་སྐར་དང་བསྟུན་ཁེ་ན་ཌར་གནས་སྡོད་བོད་དོན་ལས་འགུལ་བ་འཆི་མེད་ལྷ་མོ་ལགས་ཡུལ་དེའི་གྲོང་ཁྱེར་ཊོ་རོན་ཊོའི་སློབ་སྟོན་འོས་མིར་ལངས་ཀྱི་ཡོད་པ་ཡོངས་བསྒྲགས་བྱས་ཡོད་འདུག
ཁ་སང་༧གོང་ས་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་གྱི་ཉིན་མོ་དང་བསྟུན། ཁེ་ན་ཌའི་གྲོང་ཁྱེར་ (Parkdale Highpark) ནང་གནས་སྡོད་བོད་དོན་ལས་འགུལ་བ་འཆི་མེད་ལྷ་མོ་ལགས། ཁེ་ན་ཌའི་མངའ་སྡེ་ཨོན་ཊེ་རི་ཡོའི་ (Ontario) རྒྱལ་ས་ཊོ་རོན་ཊོའི་(toronto) གྲོང་ཁྱེར་གྱི་སློབ་སྟོན་འོས་མིའི་ཁོངས་སུ་འོས་ལངས་བྱས་པ་ཡོངས་བསྒྲགས་བྱས་ཡོད་འདུག
དེ་འབྲེལ་འཆི་མེད་ལྷ་མོ་སྒེར་གྱི་ངོ་དེབ་སྟེང་སྤེལ་བའི་གནས་ཚུལ་ནང་། ཊོ་རོན་ཊོ་གྲོང་ཁྱེར་གྱི་པཱག་ཌལ་ས་ཁུལ་གྱི་ངལ་རྩོལ་བའི་ཁྱིམ་ཚང་དག་ལ་དཀའ་ཁག་ཞེ་དྲགས་འཕྲད་ཡོད། ཏོག་དབྱིབས་གཉན་རིམས་སྐབས།་པཱག་ཌལ་ས་ཁུལ་གྱི་མི་མང་ལ་དཀའ་ངལ་ཆེན་པོ་འཕྲད་ཡོད་ལ། སྐབས་དེར་ང་ཚོའི་སྤྱི་ཚོགས་ཀྱིས་ཐུན་མོང་ཁེ་ཕན་ལྡན་པའི་མཉམ་འདུས་རོགས་སྐྱོར་གྱི་ལས་གཞི་སྤེལ་དགོས་བྱུང་སྟེ། ཏོག་དབྱིབས་འགོག་ཁབ་དང་སྨན་བཅོས་ཀྱི་མཐུན་རྐྱེན་སོགས་མཁོ་སྒྲུབ་བྱེད་ཐབས་བྱས་ཡོད།
ང་ཚོ་པཱག་ཌལ་དུ་གནས་སྡོད་བྱེད་བཞིན་པའི་མི་འབོར་ཕྱེད་ཀ་ཁང་གླ་བཏང་ནས་སྡོད་ཀྱི་ཡོད་སྟབས། ང་ཚོའི་ཡོང་འབབ་ཀྱི་གསུམ་ཆའི་གཅིག་ལྷག་ཁང་རིན་དུ་འགྲོ་ཡི་ཡོད། ས་ཁུལ་འདིར་གནས་སྡོད་བྱེད་མཁན་དག་གིས། སྡོད་ཁང་ངེས་གཏན་དང་བདེ་འཇགས། འགྲོ་གྲོན་གཏོང་ཐུབ་པའི་ཁང་པ་སྟེ། ཁྱིམ་བསྐྲུན་དགོས་པའི་དགོས་འདུན་འདོན་གྱི་ཡོད། དོན་དངོས་ཐོག ང་ཚོས་ལོ་རབས་མང་པོ་ཁང་པའི་གནས་སྟངས་ཇེ་ལེགས་སུ་གཏོང་ཐབས་དང་། ཁང་པ་དང་འབྲེལ་བའི་དྲིལ་བསྒྲགས་དང་སློབ་སྦྱོང་སོགས་ཀྱི་ཐོག་བཏང་ཡོད། འོན་ཀྱང་། ང་ཚོས་མཐོང་བ་ནི་ཁང་གླ་ཇེ་མཐོར་ཕྱིན་པ་ཁོ་ན་ཡིན་སྟབས། པཱག་ཌལ་མི་མང་གི་འཚོ་བའི་གནས་སྟངས་ཇེ་བཟང་དུ་ཕྱིན་ན་འོས་ཤིང་འཚམ་པ་ཡིན།
ད་ལྟ་ང་ཚོར་སྡོད་ཁང་ཙམ་མིན་པར། ཐག་གཅོད་ཤུགས་ཆེན་ལེན་དགོས་ཤིང་ངེས་གཏན་མེད་པའི་གནམ་གཤིས་འགྱུར་ལྡོག་གི་དཀའ་ངལ་འཕྲད་ཀྱི་ཡོད་སྟབས། ང་ཚོས་མི་མང་གི་དཀའ་ངལ་དེ་དག་སེལ་ཐུབ་པའི་ལམ་ཁ་འཚོལ་དགོས་པ་དང་། ང་ཚོས་རང་གི་སྤྱི་ཚོགས་ནང་སྐྱེད་བསྲིང་གི་མ་འཛུགས་བྱས་ཏེ་སོ་སོ་སྲུང་སྐྱོབ་བྱ་དགོས་པ་ལས། ཉེན་རྟོག་པའི་ཐོག་མ་འཛུགས་བྱ་རྒྱུ་མེད། ང་ཚོ་ང་ཚོའི་གྲོང་ཁྱེར་གྱི་གོམ་སྟབས་རྗེས་མ་དེ་ཡིན་ན་མི་ཆོག དེར་བརྟེན། ང་རང་པཱག་ཌལ་ས་ཁུལ་ནས་ཁྱེད་ཀྱི་སློབ་སྟོན་འོས་མིར་ལངས་ཀྱི་ཡོད། ང་ཚོ་དང་ལྷན་དུ། པཱག་ཌལ་སྤྱི་ཚོགས་གྲོང་ཁྱེར་གྱི་སློབ་སྟོན་པའི་ཁོངས་སུ་འཁྱེར་ནས། ང་ཚོའི་སྤྱི་ཚོགས་ལ་དྲང་བདེན་ལེན་པར་འཐབ་རྩོད་བྱ་དགོས། ཞེས་བརྗོད་འདུག
ཉེ་ལམ་ཕྱི་ཟླ་ ༥ ནང་འཆི་མེད་ལྷ་མོ་ལགས་རྒྱལ་སྤྱིའི་སྟེང་གྲགས་ཆེ་བའི་ནོར་ཝེའི་རྒྱལ་ས་ཨོ་སི་ལོའི་རང་དབང་གླེང་སྟེགས་སྟེང་། བོད་དོན་དང་འབྲེལ་བའི་གཏམ་བཤད་སྤེལ་ཡོད་པ་དང་། ཕྱི་ལོ་ ༢༠༡༩ ལོའི་ཟླ་ ༢ ནང་འཆི་མེད་ལྷ་མོ་ལགས་ཊོ་རོན་ཊོ་གཙུག་ལག་སློབ་གྲྭ་ཆེན་མོའི་སློབ་ཕྲུག་མཐུན་ཚོགས་ཀྱི་ཚོགས་གཙོར་འདེམས་ཐོན་བྱུང་ཞིང་། སྐབས་དེར་སློབ་གཉེར་ཁང་དེའི་རྒྱ་རིགས་སློབ་མ་ཚོས། འཆི་མེད་ལྷ་མོ་ལགས་བོད་མི་ཞིག་ཡིན་པའི་ངོས་ནས་སློབ་ཕྲུག་མཐུན་ཚོགས་ཀྱི་ཚོགས་གཙོར་འདུག་རྒྱུའི་ཐོབ་ཐང་མེད་སྐོར་སོགས་བརྗོད་དེ་ངོ་རྒོལ་བྱས་ཡོད། དེ་ཙམ་མ་ཟད་སྐབས་དེའི་འཆི་མེད་ལྷ་མོ་ལགས་ཀྱི་གནས་ཚུལ་རྒྱལ་སྤྱིའི་བརྒྱུད་ལམ་ཁག་གི་བརྗོད་གཞིར་གྱུར་བའི་གནད་དོན་ཞིག་ཀྱང་ཆགས་ཡོད། ཕྱི་ལོ་ ༢༠༡༩ ལོའི་ཟླ་ ༨ ནང་འཆི་མེད་ལྷ་མོ་ལགས་སུ་རྒྱལ་སྤྱིའི་སློབ་མའི་མཐུན་ཚོགས་ཀྱི་གོ་སྒྲིག་བྱས་པའི་སྐབས་དང་པོའི་བོད་ཀྱི་ན་གཞོན་གཟེངས་རྟགས་ཐོབ།
གསར་འགོད་པ། སྐལ་བཟང་སྦྱིན་པ།
