ཉི་ཧོང་གི་སྲིད་བློན་ཟུར་པ་ཨ་བྷེ་མཆོག་སྐུ་གྲོངས་ཡོད་འདུག (ཁ་སྣོན)

དེ་རིང་ཞོགས་པར་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་ལ་མེ་མདས་བརྒྱབ་སྟེ་སྐུ་གྲོངས་བའི་ཡིད་སྐྱོའི་གནས་ཚུལ་བྱུང་བར་༧གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་གཞུང་མང་གཉིས་ནས་གདུང་སེམས་མཉམ་སྐྱེད་ཞུ་བཞིན་འདུག

Tibetan spiritual leader the Dalai Lama, right, gives a white Tibetan scarf to Japan’s main opposition Liberal Democratic Party President Shinzo Abe during a seminar held by Japanese Diet members in Tokyo, 13 November 2012.

དེ་རིང་ཞོགས་པར་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་ (Shinzo Abe) མཆོག་གིས་གཞུང་འབྲེལ་ཐོག ནོ་རཱ་གྲོང་ཁྱེར་དུ་སྤྱི་དམངས་གུ་ཡངས་དམངས་གཙོ་ཚོགས་པའི་འོས་བསྡུའི་དྲིལ་བསྒྲགས་ལ་རྒྱབ་སྐྱོར་གྱི་གསུང་བཤད་གནང་སྐབས། མི་ཞིག་གིས་གློ་བུར་བྲང་ཁར་མེ་མདས་བརྒྱབ་ནས་ས་རུ་འགྱེལ་ཡོད་པ་དང་། དེ་མ་ཐག་སྨན་ཁང་དུ་བསྐྱལ་ཏེ་ཛ་དྲག་མྱུར་སྐྱོབ་བྱས་ཡོད་ཀྱང་ཕན་ཐོགས་མ་བྱུང་བར་སྐུ་གྲོངས་ཡོད་སྟབས། ༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་ཕམ་ཆེན་པོས་གསུང་འཕྲིན་ཞིག་སྩལ་བའི་ནང་། ངོས་རང་གི་གྲོགས་པོ་ཨ་བྷེ་ལགས་དེ་རིང་མེ་མདས་བརྒྱབ་ནས་སྐུ་གཤེགས་པ་གོ་དུས། ངོས་རང་བློ་ཕམ་ཆེན་པོ་བྱུང་། ངོས་ནས་ཁྱེད་དང་ཁྱེད་ཀྱི་ནང་མིར་སེམས་གསོ་ཞུ་རྒྱུ་ཡིན། ཁྱེད་ཀྱིས་མཁྱེན་གསལ་བཞིན་ཁྱེད་ཀྱི་ཞིང་གཤེགས་སྐུ་ཟླ་བོད་ཀྱི་གྲོགས་པོ་ཞིག་ཡིན་པ་རེད། ངོས་ནས་ཁོང་གི་མཛའ་འབྲེལ་དང་། བོད་ཀྱི་ནང་ཆོས་དང་བོད་མིའི་ངོ་བོ་བདག་གཅེས་བྱེད་པར་རྒྱབ་སྐྱོར་གནང་བར་བསྔགས་བརྗོད་བྱེད་ཀྱི་ཡོད། ཅེས་ཐུགས་སྨོན་གནང་འདུག

དེ་བཞིན་དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་སྒེར་གྱི་ཊི་ཝེ་ཊར་དུ། དེ་རིང་དྲག་རྒོལ་གྱི་འོག་འཛམ་གླིང་གི་ཆེས་མགོ་ཁྲིད་ཡག་པོ་ཞིག་མེད་པར་གྱུར་བ་རེད། སྐུ་ཞབས་ཤིན་ཛོ་ཨ་བྷེ་ལགས་འདས་གྲོངས་སུ་གྱུར་བ་ནི་བོད་ཀྱི་གྲོགས་པོ་དང་བོད་དོན་རྒྱབ་སྐྱོར་ཡུན་རིང་གནང་མཁན་ཞིག་མེད་པར་གྱུར་བ་རེད། ང་ཚོས་ཁོང་གི་ནང་མི་དང་ཉི་ཧོང་གི་མི་མང་ལ་མྱ་ངན་ཞུ། ཞེས་གསུངས་ཡོད་འདུག

གཞན་ཡང་། བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་ནས་ཐུགས་གསོ་ཞུས་པའི་ནང་། ཁྱེད་ཀྱི་བཟའ་ཟླ་སྨན་ཁང་ནས་འདས་གྲོངས་སུ་གྱུར་བའི་གནས་ཚུལ་གོ་འཕྲལ་བློ་ཡུལ་དུ་ཤོང་དཀའ་བ་ཞིག་བྱུང་། ཉི་ཧོང་གི་སྲིད་བློན་གྱི་ལས་ཁུར་ཡུན་རིང་ཤོས་བཞེས་མྱོང་བའི་སྐུ་ཞབས་ཤིན་ཛོ་ཨ་བྷེ་མཆོག་ནི་ཉི་ཧོང་གཅིག་པུའི་ཆེས་མཐོའི་མི་སྣ་ཞིག་མིན་པར། ཁོང་ནི་བློ་གྲོས་དང་ལྡན་པའི་སྐྱེས་བུ་ཞིག་ཡིན་པ་མ་ཟད། ༧གོང་ས་རྒྱལ་བ་རིན་པོ་མཆོག་དང་བོད་མིའི་ཆེས་ཁ་ཐག་ཉེ་བའི་གྲོགས་པོ་ཞིག་ཀྱང་ཡིན་པ་རེད། ཁོང་ཉིད་ཉི་ཧོང་གི་དམངས་གཙོ་གུ་ཡངས་ཚོགས་པའི་ཚོགས་གཙོ་ཞིག་ཡིན་སྟབས། ཁོང་ནི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེས་ཆེ་ཤོས་སུ་གྱུར་བའི་ཉི་ཧོང་བོད་དོན་རྒྱབ་སྐྱོར་ཚོགས་པ་འཛུགས་མཁན་གཙོ་བོ་ཞིག་ཡིན་སྐོར་གསུངས་འདུག

ཡང་ཁོང་གིས། བོད་ཀྱི་གྲོགས་པོ་ཆེས་ཡག་པོ་ཞིག་དང་འཛམ་གླིང་གི་ཆེས་བཟང་པའི་མགོ་ཁྲིད་ཅིག་ང་ཚོ་དང་གྱེས་ཟིན་དུས། བོད་མི་མང་སྤྱི་འཐུས་ལྷན་ཚོགས་དང་བོད་མི་རྣམས་ནམ་ཡང་ཁྱེད་ལ་གདུང་སེམས་མཉམ་སྐྱེད་གནང་བཞིན་ཡོད་སྐོར་གསུངས་འདུག

NARA, JAPAN – JULY 08: Former Prime Minister Shinzo Abe makes a street speech before being shot in front of Yamatosaidaiji Station on July 8, 2022 in Nara, Japan. Abe is shot while making a street speech for upcoming Upper House election. (Photo by The Asahi Shimbun via Getty Images)

དེ་རིང་ཞོགས་པར་ཡིད་སྐྱོའི་གནས་ཚུལ་དེ་བྱུང་རྗེས། དེ་མ་ཐག་ཉེན་རྟོག་པས་དོགས་ཡོད་ཉེས་ཅན་རང་ལོ་ ༤༠ ཅན་རཱ་མཱ་གྷཱ་མི་ཊི་སུ་ཡཱ་(Yamagami Tetsuya)ཟེར་བའི་སྐྱེས་པ་ཞིག་འཛིན་བཟུང་བྱས་ཡོད་ཅིང་། ཁོས་བེད་སྤྱོད་བཏང་བའི་མེ་མདའ་དེ་ཁོ་རང་གིས་བཟོ་སྐྲུན་བྱས་ཡོད་པའི་ཚོད་དཔག་བྱེད་ཀྱི་ཡོད་འདུག་ལ། ནོ་རཱ་གྲོང་ཁྱེར་གྱི་ཉེན་རྟོག་པས་མུ་མཐུད་དུ་ཞིབ་གཤེར་དང་རྟོག་ཞིབ་བྱེད་མུས་ཡིན་འདུག

མེ་མདའི་དོན་རྐྱེན་དེ་བྱུང་མ་ཐག འཛམ་གླིང་རྒྱལ་ཁབ་ཁག་གི་གནད་ཡོད་མི་སྣ་ཚོས་ཁོང་དང་ཁོང་གི་ནང་མིར་ཐུགས་གསོ་ཞུས་དང་ཞུ་མུས་ཡིན་པ་ལྟར། ཨ་རིའི་རྒྱལ་སྲིད་དྲུང་ཆེ་སྐུ་ཞབས་ཨེན་ཐོ་ནི (Antony Blinken )མཆོག་གིས། ཉི་ཧོང་དུ་སྐུ་ཞབས་ཤིན་ཛོ་ཨ་བྷེ་ལགས་སུ་མེ་མདས་བརྒྱབ་པའི་དོན་རྐྱེན་བྱུང་བ་གོ་དུས་སྐྱོ་སྣང་དང་སེམས་འཚབ་བྱུང་། ང་ཚོས་ཁོང་གི་ད་ལྟའི་གནས་སྟངས་ཤེས་རྟོགས་གང་ཡང་མ་བྱུང་ཡང་། ང་ཚོས་ཁོང་གི་ནང་མི་དང་ཉི་ཧོང་མི་མང་མཉམ་དུ་རེ་བ་དང་སྨོན་ལམ་རྒྱག་བཞིན་ཡོད། དེ་ནི་ཆེས་ཡིད་སེམས་སྐྱོ་བའི་དོན་རྐྱེན་ཞིག་ཡིན་སྐོར་གསུངས་ཡོད་འདུག

སྤྱིར་ཉི་ཧོང་ནང་མེ་མདས་བརྒྱབ་པའི་དོན་རྐྱེན་ཧ་ཅང་ཉུང་ཞིང་། ཉི་ཧོང་གཞུང་གིས་མེ་མདའ་སོགས་ཉར་ཚགས་བྱེད་པར་དམ་དྲག་ཤུགས་ཆེན་བྱེད་ཀྱི་ཡོད་ཀྱང་། ད་ལན་སྲིད་ཟུར་མཆོག་ལ་མེ་མདས་བརྒྱབ་པའི་དོན་རྐྱེན་དེ་ནི་ཀུན་གྱི་བློ་ཡུལ་དུ་ཤོང་དཀའ་བའི་གནད་དོན་ཞིག་ཏུ་གྱུར་ཡོད་ཅིང་། ཉི་ཧོང་གི་མེ་མདའ་ཉར་ཚགས་ཀྱི་ཁྲིམས་སྒྲིག་ཏུ་ལག་འཛིན་མེ་མདའ་( hand gun ) ཉོ་ཚོང་ཆོག་ཀྱང་། དེ་མིན་གྱི་མེ་མདའ་རིགས་ཉོ་ཚོང་དང་བདག་ཉར་གཏན་ནས་མི་ཆོག་པའི་ཁར། ལག་འཛིན་མེ་མདའ་ཉོ་མཁན་རིགས་ཀྱང་ཉིན་ལྟར་འཛིན་གྲྭར་འགྲོ་དགོས་པ་དང་། འབྲི་རྒྱུགས་དང་མེ་མདའ་འཕེན་སྟངས་ཀྱི་ཡིག་རྒྱུགས་སོགས་ཀྱིས་ཉུང་མཐའ་ཡང་བརྒྱ་ཆ་༩༥ ལོན་ཐུབ་པར་བྱ་དགོས་པ་མ་ཟད། མི་དེ་དག་གི་རྒྱབ་ལྗོངས་ཀྱི་གནས་སྟངས་སོགས་ལ་རྒྱུས་ལོན་དང་སྨྱོས་རྫས་རིགས་སྤྱོད་ཀྱི་ཡོད་མེད་བརྟག་དཔྱད་ནན་མོ་བྱེད་ཀྱི་ཡོད་པ་རེད་འདུག

གསར་འགོད་པ། དཔལ་ལྡན།