དབྱིན་ཇིའི་གཞུང་གི་ནང་ཁུལ་གྱི་ཆབ་སྲིད་གནས་སྟངས་ཛ་དྲག་ཆགས་ཏེ། གྲོས་ཚོགས་འཐུས་མང་པོས་གཞུང་འཛིན་ཚོགས་པར་ཡིད་ཆེས་མེད་པ་དང་ལས་གནས་ནས་རྩ་དགོངས་ཞུས་རྐྱེན་འོག སྲིད་བློན་བྷོ་རེ་སི་ཇོ་སན་ལགས་ཀྱིས་ཀྱང་དགོངས་པ་ཞུས་ཡོད་པ་རེད།
དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་གཏད་སྲིད་དོན་ཚོགས་པའི་འཐུས་མི་རྣམས་ཀྱི་གཙོས་དབྱིན་ཇིའི་གྲོས་ཚོགས་ཀྱི་འཐུས་མི་དང་ལས་ཐོག་བློན་ཆེན་སོགས་ཀྱིས། སྲིད་བློན་བྷོ་རེ་སི་ཇོ་སན་ལགས་ཀྱི་སྣེ་འཁྲིད་པའི་གཞུང་འཛིན་སྲིད་དོན་ཚོགས་པར་མུ་མཐུད་དབྱིན་ཇིའི་གཞུང་འཛིན་དབང་སྒྱུར་བྱེད་པར་ཡིད་ཆེས་མེད་སྐོར་བརྗོད་དེ། ལས་གནས་ནས་དགོངས་པ་ཞུས་ཡོད་པ་ལྟར། ཁ་སང་ཉིན་རྒྱབ་ཙམ་ལ་སྲིད་བློན་བྷོ་རེ་སི་ཇོ་སན་ལགས་ཀྱིས་རང་ཉིད་སྲིད་བློན་གྱི་གོ་གནས་ནས་དགོངས་པ་ཞུས་པ་ཡོངས་བསྒྲགས་བྱས་ཡོད་པ་རེད།
སྐབས་དེར་སྲིད་བློན་ཇོ་སན་ལགས་ཀྱིས་རང་ཉིད་སྲིད་སྟེགས་ནས་དགོངས་པ་ཞུ་དགོས་དོན་སྐོར་ལ་བརྗོད་དོན། རྙིང་ཞེན་སྲིད་དོན་ཚོགས་པར་མགོ་ཁྲིད་གསར་པ་ཞིག་འོས་འདེམས་བྱེད་པའི་དམིགས་ཡུལ་ཡོད་པ་མངོན་གསལ་ཆགས་སོང་། དེར་བརྟེན། མགོ་འཁྲིད་གསར་པ་འོས་འདེམས་བྱེད་པའི་དུས་ཚོད་ད་ལྟ་ནས་མགོ་བརྩམས་པ་ཡིན། ཞེས་བཤད་ཡོད་ལ། སྲིད་བློན་ཇོ་སན་ལགས་ཀྱིས་ལས་གནས་ནས་དགོངས་པ་ཞུ་དགོས་ཐུག་དོན་ནི། རང་ཉིད་ཀྱིས་བསྐོ་གཞག་བྱས་པའི་བློན་ཆེན་དང་སྒེར་གྱི་རྙིང་ཞེན་སྲིད་དོན་ཚོགས་པའི་འཐུས་མི། དེ་བཞིན་གྲོས་ཚོགས་དང་གཞུང་གི་ལས་བྱེད་པ་སོགས་ཁྱོན་མི་གྲངས་ ༦༠ མ་ཟིན་ཙམ་གྱིས་ས་གནས་ནས་དགོངས་པ་ཞུས་ཏེ་ངོ་རྒོལ་བྱས་པས་ཡིན་པ་རེད།
ཡང་སྲིད་བློན་ཇོ་སན་ལགས་ཀྱིས། སྲིད་བློན་གསར་པ་འདེམས་སླད། རེས་གཟའ་ཟླ་བ་སྟེ། ཕྱི་ཚེས་ ༡༡ ཉིན་རྙིང་ཞེན་སྲིད་དོན་ཚོགས་པའི་གྲོས་ཚོགས་འཐུས་མི་རྒན་གྲས་ཀྱི་ཚོགས་ཆུང་ཞིག་བཙུགས་ཏེ། རང་ཉིད་ཀྱི་རྗེས་འཛིན་པ་འདེམས་པའི་བརྒྱུད་རིམ་སོགས་གྲོས་བསྡུར་གྱིས་གྲ་སྒྲིག་བྱ་རྒྱུ་ཡིན་པ་རེད་ལ། ད་ལྟ་སྲིད་བློན་ཇོ་སན་ལགས་ཀྱིས་རྩ་དགོངས་ཞུས་པའི་བློན་ཆེན་ཁག་གི་ཚབ་ཏུ། མི་སྣ་གསར་བསྐོ་ཡིས་བཀའ་ཤག་གསར་པ་ཞིག་མགོ་འཛུགས་བྱས་ཡོད་ཅིང་། ད་ལྟའི་བཀའ་ཤག་གསར་པ་དེས་དབྱིན་ཇིའི་གྲོས་ཚོགས་ཀྱིས་སྲིད་བློན་གསར་པ་ཞིག་འོས་འདེམས་མ་བྱས་པར་དུ་གཞུང་འཛིན་གྱི་ལས་ཁུར་ཞུ་རྒྱུ་ཡིན་འདུག
དེ་ཡང་རྩོད་རྙོག་གི་འབྱུང་ཁུངས་གཙོ་བོ་ཞིག་ནི། དབྱིན་ཇིའི་གྲོས་ཚོགས་ཀྱི་འཐུས་མི་མང་པོ་ཞིག་གིས། གྲོས་ཚོགས་འཐུས་མི་སྐུ་ཞབས་ (Chris Pincher) ལགས་སུ། ཕྱི་ལོ་ ༢༠༡༩ ལོར་ཆང་རག་མང་དྲགས་རྐྱེན་འཐུང་བ་དང་མི་གཉིས་ལ་རྩིབ་སྤྱོད་ཀྱི་བྱ་སྤྱོད་སྤེལ་བའི་ཉེས་སྐྱོན་ཡོད་པ་ཤེས་བཞིན་དུ། སྲིད་བློན་བྷོ་རེ་སི་ཇོ་སན་ལགས་ཀྱིས་ཁོ་པ་དབྱིན་ཇིའི་དཔལ་འབྱོར་བློན་ཆེན་གཞོན་པར་བསྐོ་གཞག་བྱས་པར་སྐྱོན་བརྗོད་བྱེད་ཀྱི་ཡོད་ཅིང་། དམིགས་བསལ་སྲིད་བློན་བྷོ་རེ་སི་ཡིས་པེན་ཆཱར་ (Chris Pincher) ལགས་དཔལ་འབྱོར་གཞོན་པར་བསྐོ་གཞག་མ་བྱས་གོང་། པེན་ཆཱར་སྒེར་གྱི་ཉེས་སྐྱོན་དེ་དག་གི་ཐད་འདྲི་གཅོད་བྱས་ཡོད་ཅེས་རང་གི་བློན་ཆེན་རྣམས་ལ་བརྗོད་ཡོད་ཀྱང་། དོན་དངོས་ཐོག་སྲིད་བློན་བྷོ་རེ་ཡི་ཡིས་པེན་ཆཱར་སྒེར་གྱི་ཉེས་སྐྱོན་དང་འབྲེལ་བའི་གནད་དོན་གཅིག་ཀྱང་དག་སེལ་དང་གླེང་སློང་བྱས་མེད་པ་གྲོས་ཚོགས་དང་། སྲིད་བློན་རང་གི་ཆབ་སྲིད་ཚོགས་པའི་འཐུས་མི་དག་གིས་ཤེས་རྟོགས་བྱུང་བར་བརྟེན། སྲིད་བློན་བྷོ་རེ་སི་ལགས་སུ་རང་གི་ཆབ་སྲིད་ཚོགས་པ་དང་ཁ་གཏད་ཆབ་སྲིད་ཚོགས་པའི་གྲོས་ཚོགས་འཐུས་མི་མང་པོ་ཞིག་གིས་ཡིད་ཆེས་མེད་པའི་གནས་སྟངས་འོག་ངོ་རྒོལ་བྱེད་ཀྱི་ཡོད་པ་རེད།
འོན་ཀྱང་། ཕྱི་ཟླ་ ༦ ཚེས་ ༣༠ ཉིན་གྲོས་ཚོགས་འཐུས་མི་པེན་ཆཱར་ལགས་ཀྱིས། གཞུང་འཛིན་སྲིད་དོན་ཚོགས་པར་དགོངས་སེལ་དང་སྦྲགས་ནས། དཔལ་འབྱོར་བློན་ཆེན་གཞོན་པའི་ལས་འགན་ནས་དགོངས་པ་ཞུས་པ་མ་ཟད། དམིགས་བསལ་སྲིད་བློན་བྷོ་རེ་སི་ཇོ་སན་ལགས་སུ་དགོངས་དག་ཞུས་ཡོད་ཅིང་། སྲིད་བློན་བྷོ་རེ་སི་ལགས་ཀྱིས་ཀྱང་རང་ཉིད་ནས་པེན་ཆཱར་ལགས་སུ་ཉེས་སྐྱོན་གྱི་རྒྱབ་ལྗོངས་ཡོད་པ་ཤེས་རྟོགས་མེད་སྐོར་བརྗོད་དེ། གྲོས་ཚོགས་ལ་དགོངས་དག་ཞུས་ཡོད་ཀྱང་། དབྱིན་ཇིའི་གྲོས་ཚོགས་ཀྱིས་སྲིད་བློན་བྷོ་རེ་སི་ལགས་ནས་པེན་ཆཱར་ལགས་སུ་ཆགས་སྲེད་ཀྱི་བྱ་སྤྱོད་སྤེལ་བའི་ཉེས་ཆད་མ་བཅད་ཚེ་བྷོ་རེ་སི་ཡིས་སྣེ་འཁྲིད་པའི་གཞུང་ལ་ཡིད་ཆེས་མེད་སྐོར་བརྗོད་དེ་ད་ལྟའི་བར་གྲོས་ཚོགས་མང་པོས་ལས་གནས་ནས་དགོངས་པ་ཞུས་པའི་གནས་སྟངས་དེ་བྱུང་ཡོད་འདུག
སྲིད་བློན་བྷོ་རེ་སི་ལགས་གོ་གནས་ནས་དགོངས་པ་ཞུས་པ་ཡོངས་བསྒྲགས་བྱས་པ་དང་། ད་ལྟ་ནས་གྲོས་ཚོགས་འཐུས་མི་ཁག་ཅིག་དབྱིན་ཇིའི་སྲིད་བློན་གྱི་འོས་བསྡུའི་ནང་ཞུགས་པའི་གྲ་སྒྲིག་བྱེད་བཞིན་ཡོད་ཅིང་། རྙིང་ཞེན་སྲིད་དོན་ཚོགས་པའི་གྲོས་ཚོགས་འཐུས་མི་སྐུ་ཞབས་ཊོམ་ (Tom Tugendhat) ལགས་དང་། འཐུས་མི་སེའོ་ལཱ་ (Suella Braverman) ལགས། དེ་བཞིན་སི་ཊེ་ཝི་ (Brexiteer Steve Baker) ལགས་བཅས་ནི་མ་འོངས་པའི་དབྱིན་ཇིའི་སྲིད་བློན་དུ་འོས་ལངས་བྱེད་མཁན་གྲས་ཀྱི་ཁག་ཅིག་ཡིན་པ་རེད་ལ། མ་འོངས་པའི་སྲིད་བློན་འོས་འདེམས་ཀྱི་བརྒྱུད་རིམ་ནི། གྲོས་ཚོགས་ནང་ཆབ་སྲིད་ཚོགས་པ་སུ་ཞིག་ལ་རྙིང་ཞེན་སྲིད་དོན་ཚོགས་པའི་འོས་གྲངས་ལས་མང་བ་འཐོབ་ཚེ། དེ་ནི་མ་འོངས་པའི་དབྱིན་ཇིའི་གཞུང་འཛིན་པ་ཡིན་ཞིང་། ཁག་ཅིག་གིས་གཅིག་བྱས་ན་དབྱིན་ཡུལ་ནང་རྒྱལ་ཡོངས་འོས་བསྡུ་ཞིག་ཡོང་སྲིད་སྐོར་རྗོད་ཀྱིན་ཡོད་ཀྱང་། དབྱེ་ཞིབ་པས། སྤྱིར་དབྱིན་ཇིའི་ལུགས་སྲོལ་ལྟར་ན། སྲིད་བློན་གྱིས་དགོངས་ཞུས་སྐབས་རྒྱལ་ཡོངས་འོས་བསྡུ་མི་བྱེད་པ་དང་རྒྱལ་ཡོངས་འོས་བསྡུ་དེ་ཕྱི་ལོ་ ༢༠༢༥ ལོར་ཡིན་པས། དེའི་བར་སྲིད་བློན་གསར་པ་ཞིག་འདེམས་རྒྱུ་ཡིན་པ་གཏན་འཁེལ་ཡིན་སྐོར་བརྗོད་འདུག
སྲིད་བློན་བྷོ་རེ་སི་ཇོ་སན་ལགས་ནི། ཕྱི་ལོ་ ༢༠༡༩ ལོར་དབྱིན་ཇིའི་ནང་ཡུ་རོབ་མཐུན་ཚོགས་དང་དབྱིན་ཇི་གཉིས་ལོག་ཁ་བྱེད་དགོས་པའི་བསམ་ཚུལ་ཤུགས་ཆེན་ཡོང་བཞིན་པའི་སྐབས་སུ། དབྱིན་ཇི་ཡུ་རོབ་མཐུན་ཚོགས་ཀྱི་ཁོངས་གཏོགས་ནས་ཕྱིར་འཐོན་རྒྱུའི་འབོད་ཚིག་ཤུགས་ཆེན་བསྒྲགས་ཏེ་རྒྱལ་ཁ་ཐོབ་པའི་སྲིད་བློན་ཞིག་ཡིན་པ་དང་། དབྱིན་ཇིའི་རྩིས་ལུགས་ལྟར་ན། ཁོས་ཉིན་གྲངས་ ༣༤༩ རིང་སྲིད་བློན་གྱི་ལས་འགན་ཁུར་ཡོད་སྟབས། དབྱིན་ཇིའི་སྲིད་བློན་ཐེངས་ ༣༤ པ་དེ་ཆགས་ཀྱི་ཡོད་ཅིང་། ཕྱི་ལོ་ ༡༩༨༧ ནས་ ༡༩༩༠ བར་དབྱིན་ཡུལ་ནང་སྐད་གྲགས་ཆེ་བའི་ (The Daily Telegraph) གསར་ཁང་དང་(The Spectator) སོགས་སུ་ཞུགས་ཏེ། ཡུ་རོབ་མཐུན་ཚོགས་དང་འབྲེལ་ནས་རྒྱལ་སྤྱིའི་རང་བཞིན་གྱི་གནད་དོན་མང་དག་ཅིག་གླེང་སློང་བྱས་ཡོད་པར་བཤད། ཕྱི་ལོ་ ༢༠༠༡ ལོར་དབྱིན་ཇིའི་ནང་ཞུགས་ཏེ། ད་བར་ལོ་ངོ་ ༢༡ རིང་དབྱིན་ཇིའི་སྲིད་དོན་པ་གྲགས་ཅན་ཞིག་གི་མིང་འཁུར་ཡོད་འདུག
གསར་འགོད་པ། སྐལ་བཟང་སྦྱིན་པ།
