རྒྱ་ནག་ཧུ་ནན་མངའ་སྡེའི་ནང་མི་མང་གི་ངོ་རྒོལ་བྱས་ཡོད་འདུག

རྒྱ་ནག་གི་དངུལ་ཁང་ཁག་ཅིག་ནས་མི་མང་གི་བཅོལ་དངུལ་ལེན་མ་བཅུག་པས་ངོ་རྒོལ་ཤུགས་ཆེར་བྱུང་སྟེ་མི་མང་པོ་ཞིག་ལ་རྨས་སྐྱོན་བཟོས་ཡོད་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༡ ཉིན་རྒྱ་ནག་གི་ (Zhengzhou People’s Bank)ཟེར་བའི་དངུལ་ཁང་གིས་མི་མང་ལ་དངུལ་ཁང་དུ་དངུལ་འབོར་ཆེན་མི་ཆོག་པའི་གསལ་བསྒྲགས་སྤེལ་བ་བརྟེན། རྒྱ་ནག་གི་ཡུལ་མི་རྣམས་ཀྱི་འཚོ་བར་དཀའ་ངལ་འཕྲད་དེ་རྒྱ་ནག་གི་ཧེ་ནན་ (Henan) མངའ་སྡེའི་ཡུལ་མི་མང་པོ་ཞིག་གིས་ངོ་རྒོལ་བྱས་ཡོད་པ་དང་།སྐབས་དེར་གློ་བུར་ངོ་རྟགས་མ་ཆོད་པའི་མི་མང་པོ་ཞིག་ངོ་རྒོལ་བའི་ཁྲོད་ཡོང་སྟེ།ངོ་རྒོལ་བ་ཚོར་གང་བྱུང་ཉེས་རྡུང་བཏང་རྐྱེན་ཞི་བའི་ངོ་རྒོལ་དེ་དྲག་པོའི་རྣམ་པར་གྱུར་ཡོད་འདུག

གནས་ཚུལ་ལྟར་ན་རྒྱ་ནག་དངུལ་ཁང་དེའི་མི་མང་གི་རྒྱ་སྒོར་ཐེར་འབུམ་ ༣༩ ཙམ་བཀག་རྒྱ་བྱས་ཡོད་པར་བརྟེན།ཡུལ་མི་སྟོང་ཕྲག་ལྷག་གི་འཚོ་བར་བརྡབ་གསིག་ཆེན་པོ་འཕྲད་ཡོད་པ་དང་།ངོ་རྒོལ་བ་རྣམས་ཀྱིས་འཕྲེད་དར་འཁྱེར་ནས་ངོ་རྒོལ་གྱི་ལས་འགུལ་ཆེན་པོ་སྤེལ་ཡོད་འདུག།ད་ལྟའི་ཆར་ས་གནས་ཉེན་རྟོག་པས་གནད་དོན་དེའི་ཐོག་ཞིབ་འཇུག་བྱེད་བཞིན་ཡོད་པ་དང་དངུལ་ཁང་དེ་དག་རྫུན་བཟོ་དང་མི་དམངས་ལ་མགོ་སྐོར་གཏོང་གི་ཡོད་པའི་དོགས་པ་ཡོད་སྐོར་བརྗོད་འདུག་ལ།ཉེན་རྟོག་པས་གནད་དོན་དེའི་ཞིབ་འཇུག་ཞིབ་ཚགས་བྱས་ཏེ་གནད་དོན་ཐག་གཅོད་བྱེད་ཀྱི་ཡིན་སྐོར་ཡང་བསྒྲགས་ཡོད་འདུག

A protester appears to be dragged down a flight of stairs

རྒྱ་ནག་གི་དངུལ་ཁང་དེ་དག་གིས་ཕྱི་ཟླ་ ༤ པའི་ནང་དངུལ་ཁང་གི་རིམ་པ་སྤར་གྱི་ཡོད་པར་བརྟེན།དངུལ་འབོར་ཆེན་ལེན་ཆོག་གི་མེད་སྐོར་བསྒྲགས་ཡོད་ཀྱང་།དུས་དེ་ནས་བཟུང་དངུལ་ཁང་དུ་དངུལ་བཅོལ་མཁན་དེ་དག་ལ་བརྡ་ལན་གཅིག་ཀྱང་སྤྲད་མེད་པ་མ་ཟད།ས་གནས་མི་དམངས་རྣམས་དངུལ་ཁང་དུ་ཆེད་མངགས་ཕྱིན་ཏེ།གནད་དོན་དེའི་སྐོར་ཤེས་ཐབས་བྱས་ཀྱང་གནད་དོན་ཁ་གསལ་མི་བཤད་པ་དང་།རང་ཁྱིམ་དུ་ཕྱིར་ལོག་རྗེས་ཏོག་ནད་ཕོག་པའི་རྐྱེན་གྱིས་ཁྱིམ་སྡོད་བཀག་རྒྱ་བྱ་དགོས་བྱུང་བའི་གནས་ཚུལ་མང་པོ་བྱུང་སྟེ།མི་མང་གི་འཚོ་བར་དཀའ་ངལ་ཤུགས་ཆེར་འཕྲད་རྐྱེན་ངོ་རྒོལ་དེ་བྱུང་བ་ཡིན་འདུག་ལ།གནད་དོན་དབྱེ་ཞིབ་པ་ཚོས་གནད་དོན་དེ་རིགས་རྒྱ་ནག་གི་དཔལ་འབྱོར་ཉམས་ཉེས་འགྲོ་བཞིན་པ་དང་བསྟུན་དངུལ་ཁང་ཁག་ལ་དཀའ་ངལ་འཕྲད་པ་ཞིག་ལ་ངོས་འཛིན་བྱེད་བཞིན་ཡོད་པ་རེད་འདུག

འདི་ལོའི་ཕྱི་ཟླ་ ༤ པའི་ནང་ (New Oriental Contry Bank of Kaifeng) དང་ (Zhecheng Huanghuai Community Bank)། དེ་བཞིན་ (Shagcai Huimin County Bank) དང་ (Yuzhou Xin Min Sheng Village Bank) ཟེར་བའི་དངུལ་ཁང་དེ་དག་གིས་དངུལ་ཁང་ནང་ཡོད་པའི་དངུལ་དང་མ་རྩ། སྐྱེད་བཅོལ་དངུལ་སོགས་ཇི་ཡོད་འབོར་ཆེན་ལེན་མི་ཆོག་པ་བཟོས་ཡོད་པ་དང་།ཐེངས་འདིའི་གནད་དོན་དང་འབྲེལ་ རྒྱ་ནག་གི་སྤྱི་ཚོགས་བརྒྱུད་ལམ་ནང་དུ་ཟང་ཟིང་ཆེན་པོ་ཆགས་ཡོད་པ་དང་།སྐད་འཕྲིན་ནང་དུ་ཧེ་ནན་གཞུང་གི་བྱ་སྤྱོད་ལ་ཧང་སངས་སོང་།ང་ཚོས་དངུལ་གསོག་ཉར་བྱས་ཡོད་པ་རྣམས་ང་ཚོས་སྟོན་ཆོག་པའི་ཐོབ་ཐང་སྤྲད་དགོས་པའི་སྐོར་བརྗོད་མཁན་མང་པོ་འདུག་ལ།ས་གནས་ཉེན་རྟོག་པས་ངོ་རྒོལ་བ་རྣམས་ལ་ཉེས་བརྡུང་གཏོང་མཁན་དེ་དག་འཛིན་བཟུང་བྱས་ཡོད་སྐོར་བསྒྲགས་ཡོད་ན་ཡང་།མི་སྣ་དེ་དག་གང་ནས་ཡིན་དང་སུ་ཞིག་གིས་བཏང་བ་ཡིན་སོགས་གསལ་བཤད་གང་ཡང་བྱས་མེད་འདུག

གསར་འགོད་པ། བསྟན་འཛིན་ཕུར་བུ།