དགའ་ལྡན་ཕོ་བྲང་དགེ་རྩ་ནས་འདི་ལོའི་༧གོང་ས་མཆོག་གི་སྐུའི་འཁྲུངས་སྐར་དུས་ཆེན་དང་བསྟུན་གཙུག་ལག་སློབ་ཐོན་གྱི་བོད་རིགས་སློབ་མ་ ༤༥ ལ་འདི་ལོའི་དགའ་ལྡན་ཕོ་བྲང་གི་སློབ་ཡོན་གནང་གཏན་འཁེལ་ཡོད་འདུག
དེ་རིང་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ནས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༢༢ ལོའི་ཏཱ་ལའི་བླ་མའི་གཙུག་ལག་སློབ་ཐོན་སློབ་ཡོན་ཆེད་སྙན་ཞུ་འབུལ་མཁན་སློབ་མ་ ༧༥ བྱུང་བ་ལས་སློབ་ཕྲུག་ ༤༥ བདམས་ཐོན་བྱུང་ཡོད་པ་དང་། ཨ་རི་དང་ཁེ་ན་ཌ། ཡོ་རོབ། ཨེ་ཤ་ཡ་བཅས་ཀྱི་ནང་ཆེས་མཐོའི་གཙུག་ལག་སློབ་ཁང་ཁག་ཏུ་གཙུག་ལག་རབ་འབྱམས་པ་དང་། འབུམ་རམས་པའི་སློབ་སྦྱོང་གནང་བཞིན་པའི་སློབ་མ་དེ་དག་གིས། ཕྲ་སྲིན་སྐྱེ་ལྡན་རིག་པ་དང་མཁའ་འགྲུའི་འཕྲུལ་ལས་རིག་པ། མི་རིགས་རིག་པ། སྤྱི་ཚོགས་འཕྲོད་བསྟེན། ཁྲིམས་དང་སྨན། སྒྲ་སྙན་བཟོ་རིག་པ་ལ་སོགས་པའི་ཐོག་ལ་ཆེད་སྦྱོང་གནང་བཞིན་ཡོད་འདུག
གཞན་ཡང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་འདི་ལོའི་སློབ་ཡོན་དང་འབྲེལ་བའི་གསལ་བསྒྲགས་ནང་དུ། འདི་ལོའི་ཉེ་བའི་གཙུག་ལག་རབ་འབྱམས་པའི་སློབ་ཡོན་དང་ཟུར་བཅད་ས་མིག དེ་བཞིན་ཤེས་རིག་སློབ་ཡོན་ཆེད་འཛིན་གྲྭ་བཅུ་པའི་ཚད་མཉམ་བོད་ཡིག་ཡིག་རྒྱུགས་གཏོང་རྒྱུའི་དུས་ཚེས་ཕར་འགྱངས་གནང་འདུག ཉེ་བའི་གཙུག་ལག་རབ་འབྱམས་པའི་སློབ་ཡོན་དང་ཟུར་བཅད་ས་མིག་གི་དུས་ཚེས་ཟླ་འདིའི་ཕྱི་ཚེས་ ༣༡ ལ་དུས་འགྱངས་གནང་ཡོད་པ་དང་། དེ་བཞིན་ཟླ་འདིའི་ཕྱི་ཚེས་ ༢༦ ཉིན་འཛིན་རིམ་བཅུ་པའི་ཚད་མཉམ་བོད་ཡིག་ཡིག་རྒྱུགས་གཏོང་འཆར་ཡོད་པ་དེ་ཕྱི་ཟླ་ ༨ ཚེས་ ༣ ལ་དུས་འགྱངས་གནང་འདུག
དགའ་ལྡན་ཕོ་བྲང་གི་མཐོ་རིམ་སློབ་ཡོན་དེ་ནི་༧གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་བཞིན། ཕྱི་ལོ་ ༢༠༡༡ ལོར་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ནས་མགོ་འཛུགས་གནང་ཞིང་། ད་བར་བོད་རིགས་སློབ་མ་ཁྱོན་ ༢༥༠ ལ་ཨ་སྒོར་ས་ཡ་ ༢།༥ ཙམ་གྱི་སློབ་ཡོན་གནང་ཡོད་པ་དང་། དེ་ཡང་སློབ་ཚན་བྱེ་བྲག་པའི་ཐོག་གྲུབ་འབྲས་འབུར་ཐོན་གྱི་སློབ་མ་རྣམས་ལ་སློབ་ཡོན་དེ་འབུལ་བཞིན་ཡོད་འདུག་ལ། སློབ་ཡོན་ལས་གཞིའི་དགོས་དམིགས་ནི། བོད་པའི་སློབ་མ་རྣམས་ལ་སློབ་ཡོན་གྱི་མཐུན་རྐྱེན་སྦྱར་ཏེ་གཙུག་ལག་རབ་འབྱམས་པའི་སློབ་ཚན་ལ་ཆེད་སྦྱོང་བྱས་པ་བརྒྱུད་བོད་མིའི་ནུས་པ་གོང་འཕེལ་དུ་གཏོང་ཆེད་དང་། འགྲོ་བ་མིའི་རིགས་དང་ཤེས་ཡོན་ལ་རམ་འདེགས་སྒྲུབ་ཐུབ་པའི་ཆེད་དུ་དམིགས་པ་ཞིག་ཡིན་འདུག
སྤྱིར་ཏཱ་ལའི་བླ་མའི་དགེ་རྩ་ཚོགས་པ་ནི། ༧གོང་ས་སྐྱབས་ཆེན་པོ་མཆོག་གིས་གཞི་རྩའི་འགྲོ་བ་མིའི་རིན་ཐང་དང་། ཆོས་ལུགས་མཐུན་སྒྲིལ། ཞི་བདེ་དང་། འཚེ་མེད་ཞི་བ། ཁོར་ཡུག་སྲུང་སྐྱོབ་སོགས་ལ་གཙོ་བོར་དམིགས་ནས་བཙུགས་པ་ཞིག་ཡིན་ཞིང་། ཚོགས་པའི་ངོས་ནས་བོད་ཀྱི་ཆོས་རིག་ལ་སྲུང་སྐྱོབ་དང་བོད་མིར་རོགས་སྐྱོར། དེ་བཞིན་མི་རིགས་དང་ཆོས་ལུགས། སྐྱེས་ཁུངས་སོགས་ལ་དབྱེ་བ་མེད་པར་མཁོ་ངེས་ཅན་ཚོར་རོགས་སྐྱོར་ཆེན་པོ་གནང་མུས་ཡིན་པ་རེད།
གསར་འགོད་པ། བསྟན་འཛིན་ཕུར་བུ།
