དེ་རིང་འབར་མ་དྲག་དམག་སྲིད་གཞུང་གིས་གྲོས་ཚོགས་འཐུས་མི་ཟུར་པ་གཅིག་བཅས་དམངས་གཙོའི་ལས་འགུལ་བ་གཙོ་བོ་ ༤ ལ་སྲོག་ཁྲིམས་བཅད་ཡོད་པ་དང་དེ་ནི་འདས་པའི་ལོ་ངོ་ ༣༠ ནང་འབར་མ་གཞུང་གིས་སྲོག་ཁྲིམས་ལག་བསྟར་བྱས་པ་ཐོག་མ་དེ་ཡིན་ཚུལ་བསྒྲགས་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། འབར་མ་དྲག་དམག་སྲིད་གཞུང་ནས་དམངས་གཙོའི་ལས་འགུལ་བ་བཞི་དེས་གདུག་རྩུབ་དང་དྲག་པོའི་བྱ་སྤྱོད་སྤེལ་བའི་ཉེས་མིང་འོག་སྲོག་ཁྲིམས་བཅད་ཡོད་པར་བརྟེན། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨེན་ཊོ་ནིའོ་གུ་ཊེ་རེ་སི་ (Antonio Guterres) ཡིས། དྲག་དམག་སྲིད་གཞུང་གིས་དམངས་གཙོ་ལས་འགུལ་བ་ ༤ སྲོག་ཐོག་བཅད་པའི་ཐག་གཅོད་དེ་ནི་མིའི་རང་དབང་དང་ཚེ་སྲོག་སོགས་རྩིས་མེད་རྡོག་རོལ་བཏང་ཡོད་སྐོར་བརྗོད་འདུག་ལ། དེ་བཞིན་དྲག་དམག་སྲིད་གཞུང་གིས་ཁྲིམས་འགལ་དང་དྲག་སྤྱོད་པར་ངོས་འཛིན་བྱས་པའི་རྒྱལ་ཁབ་ཀྱི་གཅིག་སྒྲིལ་གཞུང་ (National Unity Government) གི་མགྲིན་ཚབ་པ་ཁེའོ་ཛོ་ (Kyaw Zaw) ཡིས། དམངས་གཙོའི་ལས་འགུལ་བ་དམར་གསོད་བཏང་བར་སྐྱོན་བརྗོད་དང་སྦྲགས། གནས་ཚུལ་དེར་ཧང་སངས་པ་དང་སེམས་སྐྱོ་དགོས་བྱུང་ཡོད་སྐོར་དང་། རྒྱལ་སྤྱིའི་སྤྱི་ཚོགས་ནས་དྲག་དམག་སྲིད་གཞུང་གི་གདུག་རྩུབ་ཅན་གྱི་བྱ་སྤྱོད་དང་མི་བསད་པར་ངན་ལན་སློག་དགོས་པའི་རེ་སྐུལ་བྱས་སྐོར་བརྗོད་འདུག་ལ། འབར་མའི་མི་མང་གིས་ལས་འགུལ་བ་དེ་བཞི་ལ་མྱ་ངན་དང་གུས་འདུད་མཚོན་ཆེད་སྤྱི་ཚོགས་དྲ་ལམ་ཁག་ཏུ་ཚོན་མདོག་ནག་པོ་དང་དམར་པོའི་པར་རིས་སྣ་ཚོགས་འཇོག་གི་ཡོད་འདུག
རྒྱལ་སྤྱིའི་ཉེས་ཡང་ཚོགས་པའི་ (Amnesty International) དབུ་འཛིན་ཨཱར་ཝིན་ (Erwin Van Der Borght) གྱིས། དྲག་དམག་སྲིད་གཞུང་གིས་སྲོག་ཁྲིམས་བཅད་པ་དེ་འབར་མའི་འགྲོ་བ་མིའི་ཐོབ་ཐང་བཙན་འཕྲོག་དང་། མི་མང་ལ་གདུག་རྩུབ་ལག་བསྟར་བྱས་པ་ཞིག་ཡིན་ལ། དྲག་དམག་སྲིད་གཞུང་གིས་དམངས་གཙོའི་ལས་འགུལ་བ་བཞི་ལ་དྲང་བདེན་མ་ཡིན་པའི་ཁྲིམས་བཤེར་དང་གསང་བའི་ཐོག་ནས་ནག་ཉེས་བཙུགས་ཡོད་སྐོར་དང་། མི་མང་ ༡༠༠ ལྷག་ལ་ནག་ཉེས་བཙུགས་སྟེ་འདས་གྲོངས་སུ་ཕྱིན་པར་བརྟེན། རྒྱལ་སྤྱིའི་སྤྱི་ཚོགས་ནས་ཁྲིམས་ཀྱི་ཉེས་ཆད་གཅོད་དགོས་སྐོར་བརྗོད་འདུག
གཞན་ཡང་། ནེའུ་ཡོག་ལ་རྟེན་གཞི་བྱས་ཡོད་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་ (Human Rights Watch) གིས། སྲོག་ཁྲིམས་བཅད་པའི་དམིགས་ཡུལ་ནི་དྲག་དམག་སྲིད་གཞུང་ལ་ངོ་རྒོལ་གྱི་ལས་འགུལ་སྤེལ་མཁན་རྣམས་ཀྱིས་ལས་འགུལ་མཚམས་འཇོག་བྱེད་པའི་ཆེད་དུ་ཡིན་སྐོར་དང་། ཨེ་ཤ་ཡ་ཚོགས་པའི་ཚོགས་གཙོ་ཨེ་ལིན་པིར་སོན་ (Elaine Pearson)གྱིས་ཡུ་རོབ་མཐུན་ཚོགས་ཀྱི་ཚོགས་མི་དང་ཨ་རི། རྒྱལ་སྤྱིའི་གཞུང་དག་ནས་འབར་མ་དྲག་དམག་སྲིད་གཞུང་གི་བྱས་ཉེས་ལ་རྒོལ་ལན་སློག་དགོས་སྐོར་དང་། བཙོན་འཇུག་བྱས་པའི་འབར་མའི་ཆབ་སྲིད་པ་རྣམས་ཀློད་གྲོལ་དགོས་པའི་དགོས་འདུན་འདོན་དགོས་སྐོར་བརྗོད་ཡོད་འདུག
སྲོག་ཁྲིམས་བཅད་པའི་དམངས་གཙོའི་ལས་འགུལ་བ་རང་ལོ་ ༥༣ ཡིན་པའི་མིཎ་ཡུ་ (Kyaw Min Yu) ཡིས། ཕྱི་ལོ་ ༡༩༨༨ ལོར་དྲག་དམག་སྲིད་གཞུང་ལ་ངོ་རྒོལ་དང་དམངས་གཙོའི་ལས་འགུལ་སྤེལ་བར་བརྟེན་བཙོན་འཇུག་ཐེངས་མང་བྱས་ཏེ། ཕྱི་ལོ་ ༢༠༡༢ ལོར་ཀློད་གྲོལ་བཏང་ཡོད་པ་རེད། འོན་ཀྱང་འདས་ལོའི་ཕྱི་ཟླ་ ༡༠ པའི་ནང་ཁོང་གིས་གོ་མཚོན་སོགས་སྦས་པའི་ཉེས་མིང་འོག་འཛིན་བཟུང་བྱས་ཡོད་འདུག དེ་བཞིན་རང་ལོ་ ༤༡ ཡིན་པའི་ཛེ་ཡ་ཐཱོ་ (Phyo Zeya Thaw) ནི་ལྕམ་ཨང་སན་སུའུ་སྐྱིད་ (Aung San Suu Kyi) ཀྱི་དམངས་གཙོ་ཚོགས་པའི་གྲོས་ཚོགས་འཐུས་མི་ཟུར་པ་ཞིག་དང་། གླུ་གཞས་སྒྱུ་རྩལ་བ་ཞིག་ཀྱང་ཡིན་འདུག ཁོང་གིས་དྲག་དམག་སྲིད་གཞུང་ལ་ངོ་རྒོལ་ཆེད་གཞས་ཚིག་བརྩམས་པ་སོགས་ཀྱི་ཉེས་མིང་འོག འདས་ལོའི་ཕྱི་ཟླ་ ༡༡ ནས་འཛིན་བཟུང་བཙོན་འཇུག་བྱས་ཡོད་འདུག གཞན་ཡང་། ལས་འགུལ་བ་མཱ་ཡོ་ཨང་ Hla Myo Aung དང་ཨང་ཐུ་རཱ་ Aung Thura Zaw གཉིས་ཀྱིས་དྲག་དམག་སྲིད་གཞུང་གི་སོ་མྱུལ་བ་བུད་མེད་གཅིག་བསད་པའི་ཉེས་མིང་འོག་བཙོན་འཇུག་བྱས་ཡོད་འདུག འདི་ལོའི་ཕྱི་ཟླ་ ༡ པོའི་ནང་དམངས་གཙོའི་ལས་འགུལ་བ་དེ་བཞི་ལ་སྲོག་ཁྲིམས་གཅོད་རྒྱུའི་ཐག་གཅོད་བྱས་ཡོད་འདུག
འདས་ལོའི་ཕྱི་ཟླ་ ༢ པའི་ནང་འབར་མའི་དྲག་དམག་ཕྱོགས་ཀྱིས་ཡུལ་དེའི་འོས་བསྡུའི་གྲུབ་འབྲས་རྩིས་མེད་བཏང་སྟེ། ལྕམ་ཨང་སན་སུའུ་སྐྱིད་ལགས་ཀྱིས་སྣེ་འཁྲིད་པའི་དམངས་གཙོའི་སྲིད་གཞུང་མགོ་རྟིང་བསླགས་ཡོད་པ་མ་ཟད། ལྕམ་ཨང་སན་སུའུ་སྐྱིད་ལགས་རྒྱལ་ཁབ་ཀྱི་སློབ་སྟོན་པའི་གོ་གནས་ནས་གནས་དབྱུང་བཏང་ཏེ་རང་ཁྱིམ་ལ་བཟང་བཙོན་དུ་བཅུག་ཡོད་པ་དང་། མི་མང་གིས་དྲག་དམགགི་བཙན་བཟུང་ལ་ངོ་རྒོལ་ལས་འགུལ་སྣ་མང་སྤེལ་བར་བརྟེན། ད་བར་མི་གྲངས་ ༡༤༨༤༠ ལྷག་འཛིན་བཟུང་དང་། མི་མང་ ༡༡༧༥༩ ལྷག་བཀག་ཉར། མི་ ༢༡༡༤ ཙམ་གྱིས་ཚེ་སྲོག་ཤོར་ཡོད་འདུག
གསར་འགོད་པ། བསྟན་འཛིན་ཕུར་བུ།
