འཛམ་གླིང་ནང་ཁྱབ་བཞིན་པའི་ནད་ཡམས་གཉིས་ལ་ཡིད་གཟབ་དགོས་པའི་འབོད་སྐུལ་གནང་།

བོད་མི་ཚོས་ཏོག་དབྱིབས་རིམས་ནད་དང་སྤྲེའུའི་འབྲུམ་ནད་སྔོན་འགོག་གི་ཐབས་ལམ་ལ་བསྟེན་དགོས་པའི་ལམ་སྟོན་གནང་སོང་།

 དེ་རིང་ཕྱི་དྲོར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༡༢༡ པ་སྤེལ་སྐབས། འདས་པའི་བདུན་ཕྲག་གཅིག་རིང་བོད་མིའི་གཞིས་ཆགས་གྲངས་ ༤ ནང་ཏོག་དབྱིབས་ནད་པ་གསར་པ་གྲངས་  ༢༢ བྱུང་ཡོད་པ་དང་། དེའི་ཁྲོད་ནས་དགུང་ལོ་ ༩༠་ཅན་གྱི་བོད་མི་  ༡ འདས་གྲོངས་སུ་ཕྱིན་ཡོད་འདུག

ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་ཏོག་དབྱིབས་རིམས་ནད་འགོས་པའི་བོད་མི་གྲངས ༩༢༩༡ བྱུང་བའི་ཁྲོད་དྲག་སྐྱེད་ཟིན་པ་ ༩༡༢༡ དང་། མི་༡༧༠ རྐྱེན་འདས་སུ་གྱུར་ཡོད་ཅིང་། ད་བར་བོད་མི་གྲངས་ ༡༡༣༢༡ ལ་ཤུགས་སྣོན་འགོག་ཁབ་གསུམ་པ་བརྒྱབ་ཟིན་འདུག

འཕྲོད་བསྟེན་དྲུང་གཞོན་པདྨ་གཡུ་སྒྲོན་ལགས་ཀྱིས། སྤྲེའུའི་འབྲུམ་ནད་དེ་དེང་སང་འཛམ་གླིང་གང་སར་ཁྱབ་བཞིན་པའི་ནད་ཡམས་ཤིག་རེད།   དེ་ཕྱི་ལོ་༡༩༧༠ ལོར་ཨ་ཧྥེ་རི་ཁ་ནས་ཐོག་མར་ཐོན་ཞིང་བརླག་ནས་སླར་ཡང་འཛམ་གླིང་གང་སར་ཁྱབ་བཞིན་པ་རེད། ད་ལྟའི་ཆར་འཛམ་གླིང་གི་རྒྱལ་ཁབ་ ༧༨ ནང་དུ་ཁྱབ་ཡོད་ཅིང་། མི་གྲངས་ཁྱོན་ ༡༨༠༠༠ ལྷག་ཙམ་ལ་འགོས་ཡོད་འདུག་ལ། རྒྱ་གར་ནང་དུ་དེ་རིང་གི་བར་དུ་མི་གྲངས་ ༦ ལ་འགོས་འདུག སྤྲེའུའི་འབྲུམ་ནད་དེ་མི་དང་མིའི་བར་དུ་ལུས་འབྲེལ་བྱས་པ་དང་།  གློ་སོགས་བརྒྱབ་བའི་དབང་གིས་ནད་འབུ་ཁྱབ་བཞིན་ཡོད་པ་མ་ཟད། ནད་རྟགས་ནི་ལུས་ལ་འབྲུམ་འབུར་དང་ཆུ་སེར་ཐོན་ནས་མགོ་འཛུགས་ཀྱི་ཡོད་པ་རེད། བོད་མི་ཚོས་འགྲུལ་བཞུད་བྱེད་སྐབས་མགྲོན་ཁང་ནང་གི་ཉལ་ཆས་སོགས་ཀྱི་གཙང་སྦྲར་དོ་སྣང་བྱེད་གལ་ཆེ་བ་དང་། ཏོག་དབྱིབས་ནད་ཡམས་བཞིན་གློ་བརྒྱབ་ནས་འགོས་ཀྱི་ཡོད་ཙང་། རྟག་ཏུ་ཁ་རས་གྱོན་དགོས་པ་དང།  མི་ཚོགས་སུ་འདུ་འཛོམས་མི་བྱེད་པ། མི་གཞན་དང་བར་ཐག་འཇོག་པ། ལག་པ་རྒྱུན་ཏུ་འཁྲུད་དགོས་སྐོར་བརྗོད་སོང་།

 ཡང་འཕྲོད་བསྟེན་དྲུང་གཞོན་པདྨ་གཡུ་སྒྲོན་ལགས་ཀྱིས་འདི་ལོའི་འཕྲོད་བསྟེན་བསྐྱར་ཞིབ་ཀྱི་ཐད་ལ། ཟླ་འདིའི་ཕྱི་ཚེས་ ༡༤ དང་ ༡༥ ཉིན་གཉིས་ཀྱི་རིང་ལ་དྷ་རམ་ས་ལར་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་འཚོགས་ཡོད་པ་རེད། ཚོགས་འདུ་འདིའི་ནང་ང་ཚོ་བོད་པའི་སྤྱི་ཚོགས་ནང་། ན་ཚ་མང་པོ་ཡོད་པའི་ནང་ནས་ན་ཚ་མཐོ་ཤོས་ལྔའི་ཐོག་ལ་གདོང་ལེན་བྱེད་སྟངས་དང་། སྔོན་འགོག་དང་དྲག་ཐབས་ཇི་ལྟར་ཡོད་པའི་སྐོར་ལ་གྲོས་ཆོད་མང་པོ་བཞག་ཡོད་རེད། གཞིས་ཆགས་ཁག་གི་ནང་ལོ་རེར་ཐེངས་རེར་མང་ཚོགས་ནས་ལུས་པོའི་རིང་ཚད་ལ་དཔག་པའི་ལྗིད་ཚད་བརྟག་དཔྱད་ (Body Mass Index) ཀྱི་ལས་རིམ་ཞིག་སྤེལ་མགོ་འཛུགས་རྒྱུའི་གྲོས་ཆོད་གཅིག་བཞག་ཡོད་པ་དང་། འཕྲོད་བསྟེན་ལས་ཁུངས་ནས་ཁྱབ་ཁོངས་ས་གནས་མགོ་འཛིན་དང་སྨན་ཁང་གི་འགན་འཛིན་ལ་རིམ་པས་ལུས་རྩལ་དང་སྒོར་གཞས་སོགས་ཀྱི་ཁོར་ཡུག་བསྐྲུན་རྒྱུའི་ཐད་གསལ་བསྒྲགས་བྱ་རྒྱུའི་གྲོས་ཆོད་བཞག་ཡོད།  དེ་བཞིན་ཁྲག་ཤེད་ཡོད་པའི་ནད་པ་རྣམས་ཀྱི་སྐད་འཕྲིན་ཚོགས་པ་བཟོས་ཏེ། ནད་རིགས་དེ་དག་གོ་རྟོགས་སྤེལ་རྒྱུའི་ཐད་ལ་གྲོས་ཆོད་དང་། དབུགས་བསགས་ནད་ཡོད་པའི་ནད་པ་རྣམས་སྨན་པར་བསྟེན་སླད།  ཕྱི་ལུགས་དང་བོད་ཀྱི་གསོ་བ་རིག་པའི་སྨན་ཟུང་འབྲེལ་གྱི་ཐོག་ནས་བཅོས་ཐབས་བྱ་བར་གྲོས་ཆོད་བཞག་ཡོད་རེད། བོད་པའི་སྤྱི་ཚོགས་ནང་ཕོ་བའི་ནད་གཞི་ (H pylori) དང་གཅིན་སྙི་ནད་ (Gastritis) ཁྱབ་གདལ་འགྲོ་བཞིན་སྟབས། ནད་རིགས་དེ་དག་ནི་འབྲས་ནད་ལ་འགྱུར་རྒྱུའི་ཉེན་ཚབས་ཆེན་པོ་ཡོད་པར་བརྟེན། འཕྲོད་བསྟེན་ལས་ཁུངས་ཀྱི་འཛིན་སྐྱོང་དང་། སྤྱི་ཚོགས་འཕྲོད་བསྟེན་ཚན་པ། སྨན་རྩིས་ཁང་མཉམ་རུབ་ཀྱིས་ས་གནས་ཁག་གི་མི་མང་རྣམས་ལ་ནད་རྟགས་ཡོད་མེད་བརྟག་དཔྱད་བྱ་རྒྱུར་གྲོས་ཆོད་བཞག་ཡོད་སྐོར་དང་། བོད་མི་མང་པོ་ཞིག་ཟས་བཅུད་བསྟེན་སྟངས་སོགས་ཀྱི་རྐྱེན་གྱིས་ཤ་རྒྱུས་དང་རུས་ཚིགས་ཀྱི་ནད་གཞི་འབྱུང་གི་ཡོད་པར་བརྟེན། འཕྲོད་བསྟེན་ལས་ཁུངས་ཀྱིས་བརྙན་ཐུང་བཟོ་སྐྲུན་གྱིས་སྤྱི་ཚོགས་དྲ་ལམ་བརྒྱུད་མང་ཚོགས་ལ་གོ་རྟོགས་སྤེལ་རྒྱུའི་གྲོས་ཆོད་བཞག་ཡོད་སྐོར་སོགས་འགྲེལ་བརྗོད་གནང་སོང་།

དེའི་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། འདས་པའི་ཉིན་ཤས་རིང་ཉི་ཧོང་དང་། ཐའེ་ཝན། ཨོ་གླིང་སོགས་ནས་ཏོག་དབྱིབས་རིམས་ནད་བསྐྱར་དུ་ཁྱབ་གདལ་འགྲོ་མགོ་བཙུགས་ཡོད་པ་མ་ཟད། རྒྱ་གར་ནང་དུའང་རིམ་པས་ཏོག་དབྱིབས་རིམས་ནད་འགོས་པའི་ནད་པ་ཇེ་མང་དུ་འགྲོ་མུས་ཡིན་སྟབས། ཚང་མས་ཁ་རས་སོགས་གྱོན་ནས་རིམས་ནད་འགོག་སྡོམ་བྱ་དགོས་པ་དང་། ཉེ་ལམ་རྒྱ་གར་ནས་གསར་དུ་རྙེད་པའི་ཨོ་མི་ཁུ་རོན་གྱི་ནད་འབུ་ BA ༢། ༧༥ ཞེས་པ་དེའང་ཁྱབ་གདལ་འགྲོ་ཧ་ཅང་སླ་བོ་ཡོད་པ་མ་ཟད།  དེང་གི་ཆར་བོད་པའི་སྤྱི་ཚོགས་ཁྲོད་དུའང་ནད་པ་ཇེ་མང་དུ་འགྲོ་མུས་ཡིན་པས། རིམས་ནད་གཙང་སེལ་གྱི་སླད་སྔོན་འགོག་གི་ཐབས་ལམ་ཁག་ལ་བསྟེན་དགོས་པ་དང་། སྔོན་འགོག་སྨན་ཁབ་དག་ཏག་ཏག་བརྒྱག་དགོས་པའི་ལམ་སྟོན་གནང་སོང་།

གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་།