ཟླ་འདིའི་ཕྱི་ཚེས་ ༢༥ ཉིན་སི་ཁྲོན་ཞིང་ཆེན་གྱི་འགྲིམ་འགྲུལ་སྐྱེལ་འདྲེན་ཁང་གིས་གསར་འགོད་ལྷན་ཚོགས་བསྡུས་ཏེ་རྒྱལ་ཁབ་གཞུང་ལམ་དྲ་བའི་འཆར་འགོད་ཞེས་པའི་འོག་སི་ཁྲོན་ནས་བོད་ལྗོངས་ཉིང་ཁྲི་གྲོང་ཁྱེར་སྤོ་བོ་རྫོང་བར་གཞུང་ལམ་གསར་པ་ཞིག་བརྒྱག་རྒྱུ་ཡིན་སྐོར་བསྒྲགས།
གསར་འགོད་ལྷན་ཚོགས་དེའི་ཐོག་འགྲིམ་འགྲུལ་སྐྱེལ་འདྲེན་ཁང་གི་འཆར་འགོད་འགན་འཛིན་གཞོན་པ་ཝང་སུང་པོ་ཟེར་བ་ཞིག་གིས། སི་ཁྲོན་དཀར་མཛེས་ཁུལ་དཔལ་ཡུལ་རྫོང་ནས་བོད་ལྗོངས་སྤོ་བོ་བར་གྱི་རྒྱལ་ལམ་དཀྱུས་མ་ཁ་སྣོན་བརྒྱབ་ཡོད་སྐོར་དང་། རྒྱལ་ལམ་G317དང་G318གྱི་བར་སླར་ཡང་བོད་སྐྱོད་བགྲོད་ལམ་གསར་པ་ཞིག་འཛུགས་སྐྲུན་བྱ་རྒྱུ་ཡིན་པ་དེས། ཁྲོན་བོད་ཞིང་ལྗོངས་གཉིས་བར་རྒྱལ་ཁབ་གཞུང་ལམ་མང་པོ་བརྒྱུད་ཕར་འགྲོ་ཚུར་འོང་བྱེད་ཐུབ་རྒྱུ་དང་། ཁྲོན་བོད་ལྕགས་ལམ་གྱི་ཨར་ལས་དུས་མཚམས་ཀྱི་འགྲིམ་འགྲུལ་འགན་ལེན་ནུས་པའང་ཆེ་རུ་གཏོང་རྒྱུར་ནུས་པ་གལ་ཆེན་ཐོན་རྒྱུ་ཡིན་སྐོར་བཤད་འདུག
རྒྱ་ནག་གཞུང་གིས་བོད་ནང་དང་བོད་མཐའ་མཚམས་ཁུལ་དུ་གཞུང་ལམ་དང་མྱུར་བགྲོད་ལྕགས་ལམ་འཛུགས་སྐྲུན་རྒྱུན་མ་ཆད་པར་བྱེད་བཞིན་ཡོད་དེའི་ཐད། འདི་གའི་གསར་འགོད་པས་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་སུ་རྒྱ་ནག་གཞུང་གིས་བོད་ཁུལ་གཙོ་བོར་གྱུར་བའི་བོད་མཐའ་མཚམས་ཁག་ལ་གཞུང་ལམ་གསར་རྒྱག་གི་ལས་གཞི་སྤེལ་བ་དེར་ཆབ་སྲིད་ཀྱི་གནད་འགག་ག་འདྲ་ཡོད་མེད་པར་ཁོང་གིས། བོད་ཁུལ་ལ་རྒྱལ་ལམ་དང་ལྕགས་ལམ། དེ་བཞིན་གནམ་ཐང་འཛུགས་སྐྲུན་བྱས་པ་ནི་རྒྱ་ནག་གི་ནུབ་རྒྱུད་ཐོན་སྐྱེད་ཆེན་པོའི་སྟངས་འཛིན་གྱི་ལས་གཞི་དང་འབྲེལ་བ་ཡོད་རེད། བོད་ཡར་རྒྱས་གཏོང་དགོས་ཀྱི་ཡོད་ཟེར་བའི་མིང་ཐོག་ནས་བོད་ཁུལ་དུ་རྒྱལ་ལམ་དང་གནམ་ཐང་སོགས་འགྲིམ་འགྲུལ་ལས་གཞི་མང་པོ་སྤེལ་གྱི་ཡོད་པ་རེད། ངས་བལྟས་ན། རྒྱ་ནག་གི་རྒྱ་རིགས་འབོར་ཆེན་བོད་ཁུལ་དུ་མེ་སེར་སྤེལ་ཡུལ་སྟབས་བདེ་བཟོ་ཡི་ཡོད་པ་དང་། བོད་ནང་གི་རང་བྱུང་གི་ཐོན་ཁུངས་མང་པོ་དབོར་འདྲེན་བྱེད་པ། བོད་ཁུལ་གྱི་གཙང་ཆུ་མང་པོ་རྒྱ་ཕྱོགས་སུ་ཁ་བསྒྱུར་བྱེད་པ། དེ་བཞིན་རྒྱ་ནག་གིས་དེང་སང་བོད་ཁུལ་ཡོངས་ལ་སྔོན་མ་དང་མ་འདྲ་བར་དྲག་གནོན་དབང་སྒྱུར་གྱི་འོག་བསྡུ་རྒྱུ་སྟབས་བདེ་པོའི་ངང་ནས་འབྲོག་ཡུལ་གནས་སྤོ་བཏང་བ་དང་གྲོང་ཁྱེར་འཛུགས་སྐྲུན་བྱ་རྒྱུ་སོགས་ཀྱི་དམིགས་ཡུལ་གཙོ་བོ་ནི། ཚང་མ་ས་ཆ་གཅིག་ལ་རུབ་རུབ་བྱས་ཏེ་སྐར་མ་ཁ་ཤས་ནང་དྲག་གནོན་བྱེད་ཐུབ་རྒྱུའི་ལས་གཞི་ལག་བསྟར་བྱེད་ཀྱི་ཡོད་པ་དེ་ཆབ་སྲིད་དང་འབྲེལ་བ་ཡོད་རེད་བསམ་གྱི་འདུག ཅེས་བརྗོད་བྱུང་།
ཡང་ཁོང་གིས་མུ་མཐུད་དུ། ཕྱོགས་གཉིས་ནས་རྒྱལ་ལམ་དང་འགྲིམ་འགྲུལ་གྱི་ལས་གཞི་ལག་བསྟར་བྱས་པ་དེ་རྒྱ་ནག་གི་རྒྱུད་གཅིག་ལམ་གཅིག་དང་འབྲེལ་བ་ཡོད་རེད། དཔེར་ན་ཉིང་ཁྲི་ས་ཁུལ་དང་ལ་དྭགས་ཀྱི་མཐའ་མཚམས་ཁུལ། དེ་བཞིན་བལ་ཡུལ་གྱི་མཐའ་མཚམས་ཁུལ་གྱི་རྒྱལ་ལམ་དང་ལྕགས་ལམ་ཚང་མ་བོད་ཁུལ་བརྒྱུད་ནས་ཡོང་བ་མ་གཏོགས་གཞན་དག་ཅིག་བརྒྱུད་ནས་ཡོང་རྒྱུ་ཡོད་མ་རེད། དེ་མེད་ན་ཁོ་རང་ཚོས་བོད་ནང་གི་དབང་སྒྱུར་གྱི་ཐབས་ཇུས་ལག་བསྟར་བྱས། དེའི་འཕྲོ་ནས་ད་ལྟའི་རྒྱལ་ལམ་དེ་ཕྱི་ཕྱོགས་ལ་འགུལ་སྐྱོད་བྱེད་ཀྱི་ཡོད་རེད། དེ་ལ་ང་རང་གི་ལྟ་སྟངས་ནི། ད་ལྟ་རྒྱ་ནག་གིས་མཐའ་མཚམས་ཁག་དང་འབྲེལ་ཡོད་ཀྱི་རྒྱལ་ཁབ་ཁག་གི་ནང་དུ་འཛུགས་སྐྲུན་མང་པོ་བྱེད་པའི་རྩ་བར་དེད་ན་དབང་སྒྱུར་ལ་འབྲེལ་བ་ཡོད་པ་རེད། རྒྱ་ནག་གིས་དབང་སྒྱུར་གྱི་མངའ་ཁོངས་དེ་རྒྱ་སྐྱེད་ཀྱི་ཡོད་པ་རེད། དཔེར་ན། ཁ་སང་དེ་རིང་གི་འབར་མའི་གནས་སྟངས་ལྟ་བུ་དང་། ཡང་ན་ད་ལྟའི་སིངྒ་ལའི་གནས་སྟངས་ལྟ་བུ། དེ་བཞིན་མཐའ་མཚམས་ཁག་གི་ཨེ་ཤ་ཡའི་རྒྱལ་ཁབ་ཆུང་ཆུང་གི་གནས་སྟངས་ཧ་གོ་ཡི་ཡོད་རེད། མདོར་ན་འཛུགས་སྐྲུན་ལ་ཁ་གཡར་ནས་དབང་སྒྱུར་གྱི་མངའ་ཁོངས་དེ་རྒྱ་སྐྱེད་ཀྱི་ཡོད་པ་ཧ་ཅང་གསལ་པོ་རེད། ཆབ་སྲིད་དང་དམག་དོན་གྱི་མངའ་ཁོངས་རྒྱ་སྐྱེད་ཀྱི་ཡོད་པ་ནི་མཐའ་མཚམས་ཁག་ལ་བྱུང་བའི་དཀའ་ངལ་དང་ཉེན་ཁ་ཞིག་ཆགས་བསྡད་ཡོད་རེད་བསམ་གྱི་འདུག ཅེས་བརྗོད་བྱུང་།
འདས་པའི་ལོ་གཉིས་ནང་རྒྱ་ནག་གིས་བོད་ཁུལ་དུ་གཞུང་ལམ་ལྕགས་ལམ་ག་ཚོད་ཅིག་གསར་རྒྱག་བྱས་ཡོད་དྲིས་པར་ཁོང་གིས། བོད་ས་ཡོངས་ལ་དཔེར་ན། ལྷ་ཉིང་ལྕགས་ལམ་དང་མཚོ་བོད་ལྕགས་ལམ། ཁྲོན་བོད་ལྕགས་ལམ་སོགས་ལྕགས་ལམ་མང་པོ་བཙུགས་ཡོད་རེད། དེ་རེ་རེ་གང་ནས་གང་དུ་བཙུགས་ཡོད་པ་དེ་ངས་བཤད་ཐུབ་ཀྱི་མེད། རྒྱུ་མཚན་ནི་ཁ་ཤས་གསང་བ་རེད་འདུག དཔེར་ན་བོད་རང་སྐྱོང་ལྗོངས་ཀྱི་མངའ་ཁོངས་ནས་མཐའ་མཚམས་ཁག་ལ་ལྕགས་ལམ་དང་གནམ་ཐང་འཛུགས་སྐྲུན་བྱེད་པ་མང་ཆེ་བ་གསང་བ་རེད་འདུག རྒྱུ་མཚན་ནི་དམག་དོན་གྱི་ལས་འགུལ་དང་འབྲེལ་བ་ཡོད་རེད། དེ་ང་ཚོས་བཤད་ཐུབ་ཀྱི་མ་རེད། ང་ཚོས་ཤེས་པ་ཞིག་ལ། དཔེར་ན་མཚོ་སྔོན་ཞིང་ཆེན་གྱི་རི་རབ་དང་བྲག་རི་ཚང་མ་གཏོར་ནས་གནམ་ཐང་དང་ལྕགས་ལམ། འགྲིམ་འགྲུལ་གྱི་གཞུང་ལམ་བཟོས་པ་མིག་མཐོང་ལག་ཟིན་རེད་འདུག འོན་ཀྱང་ཁ་གྲངས་དེ་བཤད་ཐུབ་མ་སོང་། ཞེས་བརྗོད་བྱུང་།
གངས་ལྗོངས་ཉི་གཞོན་ཟེར་བའི་བོད་ནང་གི་དྲ་གནས་ཤིག་གིས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༠༠ ལོའི་ལོ་མཇུག་ཏུ་བོད་ཀྱི་གཞུང་ལམ་དུ་རླངས་འཁོར་ཤར་གཏོང་ཐུབ་པའི་སྤྱི་ལེ་ཁྲི་ ༢།༢༥ ལས་ཟིན་གྱི་མེད་ཀྱང་། ཕྱི་ལོ་ ༢༠༢༠ ལོའི་ལོ་མཇུག་ཏུ་སྤྱི་ལེ་ཁྲི་ ༡༡།༨༨ བར་མང་དུ་སོང་ནས། གྲོང་རྡལ་དང་སྒྲིག་ཚུད་གྲོང་ཚོ་བཅས་སུ་རླངས་འཁོར་ཤར་གཏོང་ཐུབ་ཚད་བརྒྱ་ཆ་ ༩༣།༧ དང་བརྒྱ་ཆ་ ༧༥།༩ ཟིན་ཡོད་ཚུལ་དང་། བོད་རང་སྐྱོང་ལྗོངས་ཡོངས་ཀྱི་རྫོང་དང་། གྲོང་རྡལ་ ༤༧༦ དང་སྒྲིག་ཚུད་གྲོང་ཚོ་ ༢༠༥༠ ཡོངས་ལ་འགྲུལ་སྐྱེལ་རླངས་འཁོར་ཤར་གཏོང་ཐུབ་ལུགས་དང་། ཕྱི་ལོ་ ༢༠༠༠ ལོའི་དམངས་སྤྱོད་མཁའ་འགྲུལ་གྱི་འགྲུལ་སྐྱེལ་བྱེད་ཚད་ནི་མི་ཁྲི་ ༥༣ ནས་ཕྱི་ལོ་ ༢༠༢༠ ལོར་མི་ཁྲི་ ༥༡༥ ལྷག་ཙམ་མང་དུ་ཕྱིན་ཡོད་སྐོར་བསྒྲགས་འདུག
གསར་འགོད་པ། བསྟན་འཛིན་ཕུར་བུ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
