ཞི་ཅིན་ཕིང་གིས་ཨ་རི་ལ་མེ་ཡིས་རྩེད་མོ་བརྩེས་ན་རང་ཉིད་འཚིག་རྒྱུ་ཡིན་པའི་ཉེན་བརྡ་བཏང་།

ཨ་རིའི་སྲིད་འཛིན་བྷའེ་ཌིན་མཆོག་དང་རྒྱ་ནག་གི་མགོ་འཁྲིད་ཞི་ཅིན་ཕིང་རྣམ་གཉིས་ཀྱིས་ཞལ་པར་བརྒྱུད་འབྲེལ་མོལ་གནང་སྐབས་ཞི་ཅིན་ཕིང་གིས་ཨ་རིའི་གཞུང་ནས་མེ་ཡིས་རྩེད་མོ་བརྩེས་ན་རང་ཉིད་འཚིག་རྒྱུ་ཡིན་པ་གསལ་པོ་ཤེས་དགོས་སྐོར་བརྗོད་འདུག

China described the exchange between Joe Biden and Xi Jinping as ‘candid’. Photograph: Mandel Ngan/AFP/Getty

ཁ་སང་ཨ་རིའི་སྲིད་འཛིན་རྗོ་བྷའེ་ཌིན་མཆོག་དང་རྒྱ་ནག་གི་མགོ་འཁྲིད་ཞི་ཅིན་ཕིང་གཉིས་ཀྱིས་ཞལ་པར་བརྒྱུད་ཆུ་ཚོད་ ༢ ལྷག་རིང་བཀའ་མོལ་གནང་ཡོད་པ་དང་། སྐབས་དེར་གླེང་གཞི་ཆེན་པོར་གྱུར་བའི་ཐའེ་ཝན་གྱི་གནད་དོན་དང་། གནམ་གཤིས་འགྱུར་ལྡོག འཕྲོད་བསྟེན་བདེ་འཇགས། ཟས་རིགས་དང་ནུས་ཤུགས་ཀྱི་དཀའ་ངལ། དེ་བཞིན་ཨུ་རུ་སུ་དང་ཡུག་ཁི་རིན་གྱི་གནད་དོན་སོགས་ཀྱི་ཐོག་བཀའ་མོལ་གནང་ཡོད་འདུག་ལ། མ་འོངས་པར་སྲིད་འཛིན་གཉིས་སུ་ཐུག་འཕྲད་གནང་རྒྱུར་མོས་མཐུན་བྱུང་ཡོད་འདུག

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་ཐའེ་ཝན་ནང་དུ་ཕེབས་འཆར་ཡོད་པའི་གནས་ཚུལ་གྱིས་ཨ་རྒྱ་གཉིས་བར་སྔར་ལས་རྩོད་རྙོག་ཆེན་པོ་ཡོང་གི་ཡོད་པའི་ཐད། ཁ་སང་གི་འབྲེལ་མོལ་སྐབས་ཞི་ཅིན་ཕིང་གིས། ཐའེ་ཝན་གྱི་གནད་དོན་ཐད་ནས་མཚོ་འགག་གཉིས་རྒྱ་ནག་གཅིག་ཏུ་གཏོགས་པའི་ལོ་རྒྱུས་ཀྱི་དོན་དངོས་དང་ད་ལྟའི་གནས་བབ་གསལ་གསལ་ཐིང་ཐིང་ཡིན་ལ། རྒྱ་ཨ་གཉིས་ཀྱི་མཉམ་འབྲེལ་གསུམ་ཆིངས་ནི་དེའི་ཐད་ཀྱི་ཆབ་སྲིད་དམ་བཅའ་དང་། རྒྱ་ནག་གཅིག་གི་རྩ་དོན་ནི་རྒྱ་ཨ་གཉིས་ཀྱི་འབྲེལ་བའི་ཆབ་སྲིད་རྨང་གཞི་ཡིན་པར་བརྟེན། ང་ཚོས་མཐའ་གཅིག་ཏུ་ཐའེ་ཝན་རང་བཙན་གྱི་ཁ་བྲལ་དང་ཕྱིའི་ཇུས་གཏོགས་ལ་ངོ་རྒོལ་བྱེད་ཀྱི་ཡོད། རྣམ་པ་ག་འདྲ་ཞིག་གི་ཐོག་ནས་ཡིན་ནའང་ཐའེ་ཝན་རང་བཙན་ལ་སྐུལ་སློང་བྱེད་པའི་བར་སྟོང་ཞིག་འཇོག་རྒྱུ་མིན། རྒྱ་ནག་གཞུང་དང་རྒྱ་ནག་མི་མང་གིས་ཐའེ་ཝན་གནད་དོན་ཐོག་བཟུང་བའི་ལངས་ཕྱོགས་ནི་གཅིག་གྱུར་ཡིན། རྒྱ་ནག་གི་བདག་དབང་དང་མངའ་ཁོངས་ཆིག་སྒྲིལ་ནི་རྒྱ་ནག་མི་མང་དུང་ཕྱུར་ ༡༤ ཡི་འགྱུར་བ་མེད་པའི་ལངས་ཕྱོགས་ཡིན་པས། མང་གི་མངོན་འདོད་ལ་རྒྱབ་འགལ་བྱ་མི་རུང་། མེ་དང་རྩེད་མོ་བརྩེས་ན་རང་ཉིད་འཚིག་འགྲོ་ངེས་རེད། ཨ་རིའི་ཕྱོགས་ནས་དོན་འདིར་ཤེས་རྟོགས་གསལ་པོ་དགོས་ཞེས་བརྗོད་འདུག

དེ་ལ་ཨ་རིའི་སྲིད་འཛིན་བྷའེ་ཌིན་མཆོག་གིས། ད་ལྟ་འཛམ་གླིང་འདི་གནད་འགག་གི་དུས་ཚོད་ཅིག་ཏུ་བསླེབས་ཡོད་པ་དང་། ཨ་རྒྱ་གཉིས་ཀྱི་མཉམ་འབྲེལ་གྱིས་རྒྱལ་ཁབ་གཉིས་ཀྱི་མི་མང་ཙམ་མིན་པར་རྒྱལ་ཁབ་སོ་སོའི་མི་མང་ལ་ཁེ་ཕན་སྐྲུན་གྱི་ཡོད་པར་བརྟེན། ཨ་རིའི་ཕྱོགས་ནས་རྒྱ་ནག་གིས་མུ་མཐུད་འབྲེལ་མོལ་རྒྱུན་འཁྱོངས་དང་། ཕན་ཚུན་རྒྱུས་ལོན་གཏིང་ཟབ་ཏུ་གཏང་སྟེ། གོ་ལོག་འཁྲུལ་ཤེས་རྣམས་སེལ་བར་བྱས་ཏེ། ཁེ་ཕན་མཉམ་སྤྱོད་ཀྱི་ཁོར་ཡུག་འོག་མཉམ་ལས་ཡོང་ཐབས་བྱེད་པ་དང་དུས་མཉམ་དུ། དབྱེ་འབྱེད་སྟངས་འཛིན་ལེགས་བཅོས་བྱེད་དགོས། ཨ་རིའི་རྒྱ་ནག་གཅིག་གི་སྲིད་ཇུས་ལ་འགྱུར་བ་ཕྱིན་མེད་ལ། འགྱུར་བ་འགྲོ་མི་སྲིད། ཨ་རིས་ཐའེ་ཝན་རང་བཙན་ལ་རྒྱབ་སྐྱོར་བྱེད་ཀྱི་མེད་ཅེས་གསུངས་འདུག

ཨ་རིའི་གྲོས་ཚོགས་འོག་མའི་ལྕམ་སྐུ་ནེན་སི་པེ་ལོ་སི་མཆོག་ཐའེ་ཝན་ནང་དུ་འཚམས་གཟིགས་སུ་ཕེབས་འཆར་ཡོད་པ་དེས་ཨ་རྒྱ་གཉིས་བར་ལ་འགལ་ཟླའི་ཚ་རླབས་གསར་པ་ཞིག་འཕྱུར་བཞིན་ཡོད་པ་དང་། སྲིད་འཛིན་གཉིས་ཀྱི་འབྲེལ་མོལ་འདིས་ལྕམ་སྐུ་མཆོག་གི་གཟིགས་སྐོར་ལ་འགྱུར་བ་ཐེབས་སྲིད་པའི་ཚོད་དཔག་བྱེད་ཀྱི་ཡོད་པ་ལྟར། རྒྱ་ནག་གཞུང་གི་ཉེན་བརྡ་ནན་པོ་ལ་བརྟེན་ནས་ལྕམ་སྐུ་མཆོག་ཐའེ་ཝན་ནང་དུ་ཕེབས་མ་ཐུབ་པ་ཡིན་ན། རྒྱ་ནག་གཞུང་གིས་འཛམ་གླིང་ཁྱོན་ཡོངས་ལ་བཙན་སྐུལ་དང་དབང་ཤུགས་རྒྱ་སྐྱེད་གཏོང་བཞིན་པ་སྔར་ལས་ཆེ་རུ་འགྲོ་རྒྱུའི་རྐྱེན་རྩ་ཞིག་ཏུ་འགྱུར་རྒྱུ་ཡིན་ལུགས་དང་། ཡང་དེ་ལས་ལྡོག་སྟེ་ལྕམ་སྐུ་མཆོག་ཕེབས་པ་ཡིན་ན་རྒྱ་ནག་གཞུང་གིས་ཐའེ་ཝན་ལ་དྲག་པོའི་བཙན་བཟུང་དང་འཛམ་གླིང་ནང་སྔར་ལས་དཀའ་རྙོག་མང་དུ་བཟོ་ཉེན་ཡོད་པ་སོགས་ཀྱི་རྩོད་གླེང་ཡོང་གི་ཡོད་པ་རེད།

གསར་འགོད་པ། བསྟན་འཛིན་ཕུར་བུ།