ལྕམ་སྐུ་ནེན་སི་པེ་ལོ་སི་མཆོག་ཐའེ་ཝན་ནང་བདེ་ལེགས་ངང་ཕེབས་འབྱོར་བྱུང་།  

ད་ལྟ་རང་ཐའེ་པའེ་ཡི་དགོང་མོའི་ཆུ་ཚོད་ ༡༠།༥༤ ཐོག་ལྕམ་སྐུ་ནེན་སི་པེ་ལོ་སི་མཆོག་ཐའེ་ཝན་གྱི་རྒྱལ་ས་ཐའེ་པའེ་སོང་ཧྲན་གནམ་ཐང་དུ་བདེ་ལེགས་ངང་འབྱོར་འདུག

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་ཐའེ་ཝན་ནང་ཕེབས་འཆར་ཡོད་པའི་གནས་ཚུལ་བརྒྱུད་ལམ་དུ་ཐོན་རྗེས། རྒྱ་ནག་གི་མགོ་འཁྲིད་ཞི་ཅིན་ཕིང་སོགས་ཀྱིས་གལ་སྲིད་ལྕམ་སྐུ་མཆོག་ཐའེ་ཝན་ནང་ཕེབས་པ་ཡིན་ན། རྒྱལ་ཁབ་གཉིས་ཀྱི་འབྲེལ་བར་འགལ་ཟླ་ཆེན་པོ་འབྱུང་རྒྱུ་ཡིན་པ་མ་ཟད། ཨ་རིས་མེ་ཡིས་རྩེད་མོ་བརྩེས་ན་རང་ཉིད་འཚིག་ངེས་ཡིན་པའི་གནས་ལུགས་རྟོགས་དགོས་ཤིང་། རྒྱ་ནག་བཅིངས་གྲོལ་དམག་གིས་ལྟད་མོ་བལྟས་ནས་སྡོད་མི་སྲིད་པའི་དྲག་པོའི་ཉེན་བརྡ་བཏང་ཡོད་པ་དང་། རྒྱལ་སྤྱིའི་ཐོག་ནས་ཀྱང་ད་ལན་གྱི་གཟིགས་སྐོར་གྱིས་ཉེན་ཁ་དང་དཀའ་རྙོག་ཆེན་པོ་བཟོ་སྲིད་པའི་གླེང་སློང་བྱུང་མིན་ལ་མ་ལྟོས་པར། ཐོག་མའི་འཆར་གཞི་ལྟར་དེ་རིང་ཕྱི་ཚེས་ ༢ ཉིན་གྱི་ཕྱི་དྲོར་མཱ་ལེ་ཞི་ཡའི་རྒྱལ་ས་ཁཱ་བྷོལ་གནམ་ཐང་ནས་ལྕམ་སྐུ་མཆོག་གིས་དབུ་འཁྲིད་པའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་དེ། ཐའེ་ཝན་གྱི་རྒྱལ་ས་ཐའེ་པའེ་སོང་ཧྲན་གནམ་ཐང་དུ་ད་ལྟ་རང་ཆུ་ཚོད་ ༡༠།༥༤་ཐོག་བདེ་ལེགས་ངང་འབྱོར་འདུག

 ཁ་སང་ཕྱི་ཚེས་ ༡ ཉིན་ནས་ལྕམ་སྐུ་ནེན་སི་པེ་ལོ་སི་མཆོག་ནས་ཨེ་ཤ་ཡའི་རྒྱལ་ཁབ་སིང་གྷ་པོར་ (Singapore) དང་མཱ་ལེ་ཤི་ཡཱ་ (Malaysia)། ལྷོ་ཀོ་རི་ཡ། ཉི་ཧོང་བཅས་ལ་གཞུང་འབྲེལ་གཟིགས་སྐོར་མགོ་འཛུགས་གནང་ཡོད་པ་ལྟར། ། ཕྱི་ཟླ་ ༧ ཚེས་ ༣༠ ཉིན་མཁའ་ལམ་བརྒྱུད་ནས་སིང་གྷ་པོར་ནང་ཕེབས་འབྱོར་བྱུང་ཡོད་པ་དང་། དེ་རིང་ཕྱི་ཚེས་ ༢ ཉིན་གྱི་སྔ་དྲོར་མཱ་ལེ་ཤི་ཡཱའི་རྒྱལ་ས་ཀོ་ལ་ལམ་པུར་ (Kuala Lumpur) འབྱོར་ཡོད་འདུག ཐེངས་འདིའི་ལྕམ་སྐུ་མཆོག་གི་ཨེ་ཤ་ཡའི་ཁུལ་གྱི་གཞུང་འབྲེལ་གཟིགས་སྐོར་སྐབས་ཨ་རིའི་གྲོས་ཚོགས་འཐུས་མི་གྷེར་གྷོར་མེག་ (Gregory Meeks) དང་ཊ་ཀཱ་ནོ་ (Mark Takano)། སུ་ཛན་ (Suzan DelBene)། རཱ་ཇ་ (Raja Krishnamoorthi)། ཀིམ་ (Andy Kim) བཅས་ཨ་རིའི་གྲོས་ཚོགས་འཐུས་མི་ལྔ་ཕེབས་ཡོད་འདུག

འདས་པའི་ལོ་ངོ་ ༢༥ ནང་ཨ་རིའི་ཆེས་མཐོའི་དཔོན་རིགས་ཤིག་གིས་ཐའེ་ཝན་དུ་གཞུང་འབྲེལ་སྐོར་སྐྱོད་གནང་བ་ཐོག་མ་དེ་ཆགས་ཡོད་འདུག་ལ། ལྕམ་སྐུ་མཆོག་གི་འཚམས་གཟིགས་སྐོར་གནས་ཚུལ་ཐོན་པ་ནས་བཟུང་རྒྱ་ནག་གཞུང་ནས་ཉེན་བརྡ་ནན་པོ་བཏང་ཡོད་པ་མ་ཟད། འདས་པའི་ཉིན་ཤས་ནས་བཟུང་འཐབ་འཛིང་གནམ་གྲུ་སྔར་ལས་མང་པོ་བཏང་སྟེ་འཇིགས་སྐུལ་བྱས་ཡོད་ཀྱང་། ཨ་རིའི་རྒྱལ་སྲིད་དྲུང་ཆེ་སྐུ་ཞབས་ཨེན་ཊོ་ནི་བྷི་ལིན་ཀན་ (Antony Blinken) མཆོག་གིས། ཚོགས་གཙོ་ལྕམ་ནེན་སི་པེ་ལོ་སི་མཆོག་ཐའེ་ཝན་ནང་ཕེབས་དང་མི་ཕེབས་ཁོང་མོ་རང་ནས་ཐུགས་གཏན་འཁེལ་དགོས་པ་ཞིག་ཡིན་ལ། གྲོས་ཚོགས་འོག་མ་ནི་རང་དབང་དང་འདྲ་མཉམ་ལྡན་པའི་ལས་ཁུངས་ཤིག་ཆགས་ཡོད། སྔོན་མའང་གྲོས་ཚོགས་ཚོགས་གཙོ་ཐའེ་ཝན་ནང་ཕེབས་མྱོང་ཡོད་ལ། ད་ལོ་ཚུད་པའི་གྲོས་ཚོགས་འཐུས་མི་མང་པོའང་ཐའེ་པའེ་ནང་ཕེབས་ཡོད་པ་རེད། ད་ལན་ལྕམ་སྐུ་མཆོག་ཕེབས་པ་ཡིན་ན་རྒྱ་ནག་ཕྱོགས་ནས་ཛ་དྲག་གི་གནས་བབ་ག་རེ་བཟོས་པ་ཡིན་ནའང་། རྒྱ་ནག་རང་ནས་འགན་འཁུར་དགོས་པ་རེད། ཅེས་བརྗོད་ཡོད་པ་རེད།

གསར་འགོད་པ། བསྟན་འཛིན་ཕུར་བུ།