འདི་ལོའི་ཕྱི་ཟླ་ ༩ པའི་ནང་ཨོ་གླིང་གྲོས་ཚོགས་ནང་བོད་དོན་ཞུ་གཏུག་གནང་གཏན་འཁེལ་ཡོད་འདུག 

ཨོ་གླིང་གྲོས་ཚོགས་གོང་མའི་འཐུས་མི་བོད་དོན་རྒྱབ་སྐྱོར་བ་ལྕམ་སྐུ་ཇེ་ནེཌ་ར་ཡེ་སི་ལགས་ཀྱིས་ཡུལ་དེའི་གྲོས་ཚོགས་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པའི་གྲུབ་དོན་ངོ་སྤྲོད་དང་འབྲེལ་འདི་ལོའི་ཕྱི་ཟླ་ ༩ པའི་ནང་ཨོ་གླིང་གྲོས་ཚོགས་ནང་བོད་དོན་ཞུ་གཏུག་གནང་གཏན་འཁེལ་ཡོད་སྐོར་གསུངས་འདུག

 ཟླ་འདིའི་ཕྱི་ཚེས་ ༢ ཉིན་ཨོ་སི་ཊོ་ལི་ཡའི་གྲོས་ཚོགས་ནང་དུ། ཨོ་གླིང་གི་གྲོས་ཚོགས་གོང་མའི་འཐུས་མི་ལྕམ་སྐུ་ཇེ་ནེཌ་ར་ཡེ་སི་ (Janet Rice) ལགས་ཀྱིས། འདི་ལོའི་ཕྱི་ཟླ་ ༦ ཚེས་ ༢༢ དང་ ༢༣ ཉིན་གཉིས་ཀྱི་རིང་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་འཚོགས་པའི་སྐོར་གླེང་སློང་གནང་བ་དང་། ཕྱི་ཟླ་ ༩ པའི་ནང་བོད་ཀྱི་ཞུ་གཏུག་ཉིན་མོར་བོད་མི་ཁག་ཅིག་ཨོ་གླིང་གི་གྲོས་ཚོགས་ནང་བོད་དོན་ཞུ་གཏུག་གནང་གཏན་འཁེལ་ཡོད་པར་བརྟེན། སྐབས་དེ་དུས་ཨོ་གླིང་གི་གྲོས་ཚོགས་འཐུས་མི་རྣམས་ཀྱིས་བོད་ལ་ཞི་བདེ་དང་དྲང་བདེན་ཐོབ་ཐབས་སུ་ཨོ་གླིང་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་། བོད་མི་ཞུ་གཏུག་པ་རྣམས་ཐུག་འཕྲད་གནང་དགོས་པའི་འབོད་སྐུལ་ཤུགས་ཆེ་གནང་ཡོད་འདུག

ལྕམ་སྐུ་ཇེ་ནེཌ་ལགས་ཀྱིས། རང་ཉིད་འདི་ལོའི་ཕྱི་ཟླ་ ༦ པའི་ནང་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་བཅར་བའི་སྐལ་བ་བཟང་པོ་བྱུང་བ་དང་། དོ་དགོང་གཏམ་བཤད་འདིའི་ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་བསྒྲགས་གཏམ་སྐོར་གཏམ་བཤད་བྱ་རྒྱུའི་ཐག་བཅད་པ་ཡིན། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་དེའི་ནང་རྒྱལ་ཁབ་ ༢༨ ཀྱི་གྲོས་ཚོགས་འཐུས་མི་མཉམ་ཞུགས་ཀྱིས། བོད་ནང་གི་གནས་སྟངས་དང་བོད་རྒྱའི་དཀའ་རྙོག་སེལ་ཐབས་སྐོར་གྲོས་བསྡུར་གནང་ཡོད་པ་དང་། ཕྱི་ལོ་ ༡༩༥༠ ལོར་རྒྱ་ནག་གིས་བོད་དབང་བསྒྱུར་བྱས་པ་དང་། དུས་དེ་ནས་བཟུང་ཁྲིམས་འགལ་གྱི་བྱ་སྤྱོད་མང་པོ་སྤེལ་ཡོད་པ་རེད། ཅེས་གསུངས་འདུག

ཡང་ལྕམ་སྐུ་ལགས་ཀྱིས། རྒྱལ་སྤྱིའི་གྲོས་ཚོགས་འཐུས་མི་རྣམས་དང་བོད་མི་མང་སྤྱི་འཐུས་རྣམས་མཉམ་སྦྲེལ་གྱིས་བོད་དོན་སྐོར་ལས་འགུལ་སྤེལ་རྒྱུའི་ཆོད་སེམས་བརྟན་པོ་ཡོད་པ་དང་། གྲོས་ཚོགས་འཐུས་མི་རྣམས་ཀྱིས་བོད་དོན་སླད་གྲོས་གཞི་གྲོས་ཆོད་གཏན་འབེབ་དང་། རྒྱལ་སྤྱིའི་ཁྲིམས་གཞི་ལ་བཞག་པའི་ཐོག འགྲོ་བ་མིའི་ཐོབ་ཐང་དང་རང་དབང་། དམངས་གཙོའི་ལམ་ལུགས་སོགས་གོང་འཕེལ་གཏང་རྒྱུ་དང་། རྒྱ་ནག་གིས་བོད་ཐོག་བདག་དབང་ཡོད་སྐོར་རྗོད་བཞིན་པར་ངོས་ལེན་གནང་རྒྱུ་མེད་པ། དེ་བཞིན་བོད་ནི་རྒྱ་ནག་གིས་དབང་བསྒྱུར་བྱས་པ་ཞིག་ཡིན་པ་ལས་རྒྱ་ནག་གི་ཆ་ཤས་མིན་པ་ངོས་འཛིན་གནང་དགོས་སྐོར་དང་། སྔོན་འགྲོའི་ཆ་རྐྱེན་གང་ཡང་མེད་པའི་ཐོག རྒྱལ་སྤྱིའི་གྲོས་ཚོགས་འཐུས་མི་རྣམས་ཀྱིས་བོད་རྒྱའི་དཀའ་རྙོག་སེལ་ཐབས་སུ་མཉམ་རུབ་གནང་དགོས་སྐོར་དང་། ༸གོང་ས་མཆོག་གིས་དབུས་པའི་བོད་ཀྱི་བླ་ཆེན་རྣམས་ཀྱི་མ་འོངས་པའི་ཡང་སྲིད་དེ་བོད་མི་དང་བོད་བརྒྱུད་ནང་པའི་ཚོགས་སྡེ་ཁོ་ནར་འདེམས་སྒྲུག་དང་བསྐོ་བཞག་གནང་དུ་འཇུག་དགོས་པ། དེ་བཞིན་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་ཀྱིས་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཞེས་རྗོད་བཞིན་པར་ངོས་ལེན་གནང་རྒྱུ་མེད་ཅིང་། རྒྱ་ནག་གཞུང་གིས་བོད་མཐོ་སྒང་གི་ཁོར་ཡུག་ལ་གཏོར་བཤིག་གཏོང་བཞིན་ཡོད་པ་དེ་འགོག་ཐབས་དང་། དབུ་མའི་ལམ་གྱི་སྲིད་ཇུས་ཐོག་ནས་མུ་མཐུད་དུ་བོད་རྒྱའི་དཀའ་རྙོག་སེལ་ཐབས་གནང་བཞིན་ཡོད་པ་དེ་ལ་རྒྱབ་སྐྱོར་གནང་རྒྱུ། རྒྱ་ནག་གི་དབང་བསྒྱུར་འོག་ཡོད་པའི་ཡུ་གུར་དང་ལྷོ་སོག ཧོང་ཀོང་། ཐའེ་ཝན་སོགས་ཀྱི་མི་མང་། དེ་བཞིན་རྒྱ་རིགས་མང་གཙོ་ལས་འགུལ་བ་བཅས་ལ་གདུང་སེམས་མཉམ་སྐྱེད་ཀྱིས་རྒྱབ་སྐྱོར་གནང་རྒྱུའི་བསྒྲགས་གཏམ་སྤེལ་ཡོད་པ་སོགས་ཀྱི་སྐོར་ལ་གསུང་བཤད་གནང་ཡོད་འདུག

ལྕམ་སྐུ་ཇེ་ནེཌ་ཨེ་ལི་ཛ་བྷི་ཐི་ར་ཡེ་སི་ (Janet Elizabeth Rice) ལགས་ནི། ཕྱི་ལོ་ ༡༩༦༠ ཟླ་ ༡༡ ཚེས་ ༡༨ ཉིན་ཨོ་སི་ཊོ་ལི་ཡའི་ལྷོ་རྒྱུད་ཀྱི་ཝེ་ཊོ་རེ་ཡ་མངའ་སྡེའི་གྲོང་ཁྱེར་མེལ་བྷོན་ (Melbourne) དུ་སྐྱེས་ཤིང་། ཨོ་གླིང་གི་མེལ་བྷོན་གཙུག་ལག་སློབ་གྲྭ་ཆེན་མོ་ (University of Melbourne) ནས་རྩིས་རིག་དང་གནམ་གཤིས་རིག་པའི་ཐོག་སློབ་སྦྱོང་གནང་ཡོད་འདུག ཁོང་མོ་ནི་ཨོ་གླིང་གི་ལྗང་ཁུ་ཚོགས་པའི་ཚོགས་མི་ཟུར་པ་ཞིག་དང་། ཁོར་ཡུག་འཐབ་རྩོད་པ་ཞིག་ཡིན་ཞིང་། ཨོ་གླིང་གི་ (Australian Greens Victoria) ཚོགས་པ་གསར་འཛུགས་གནང་ཡོད་པ་རེད། ཕྱི་ལོ་ ༢༠༡༣ ལོར་ཨོ་གླིང་གི་གྲོས་ཚོགས་གོང་མའི་འཐུས་མི་ཆགས། ཕྱི་ལོ་ ༢༠༢༠ ལོར་ཕྱི་སྲིད་དང་ཤིང་ནགས། སྐྱེལ་འདྲེན་དང་འཛུགས་སྐྲུན་ (Transport & Infrastructure)། ཚན་རིག་དང་ཉམས་ཞིབ། ལེགས་བཅོས་ (Science, Research & Innovation) སོགས་ཀྱི་མགྲིན་ཚབ་པའི་ཕྱག་ལས་གནང་།

ཕྱི་ལོ་ ༢༠༢༠ ལོར་ཁོང་མོས་རྒྱ་ནག་གིས་བོད་དང་ཡུ་གུར་མི་མང་རྣམས་བཙན་གྱིས་ངལ་རྩོལ་གྱི་ལས་ལ་བཅུག་པ་དང་། རྒྱ་ནག་གི་བཙན་གནོན་འོག་བོད་མི་རྣམས་ནས་སྡུག་པོ་མྱངས་དང་མྱོང་བཞིན་ཡོད་པ། དེ་བཞིན་བོད་མི་རྣམས་ལ་སྨྲ་བརྗོད་དང་ཆོས་དད་ཀྱི་རང་དབང་འཕྲོག་པ་སོགས་ཀྱི་གནད་དོན་ཐེར་འདོན་གནང་བ་དང་སྦྲགས། རྒྱ་ནག་གཞུང་གིས་མགོ་འཁྲིད་དང་གསར་འགོད་པ་ཚོར་གནད་དོན་དེར་ལྟ་ཞིབ་བྱེད་དུ་འཇུག་དགོས་སྐོར་འབོད་སྐུལ་གནང་ཡོད་འདུག་ལ། འདི་ལོར་ཨ་རིའི་རྒྱལ་སར་ཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ནང་དུའང་མཉམ་ཞུགས་གནང་ཡོད་འདུག 

གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།