༸གོང་ས་མཆོག་ལ་ལ་དྭགས་མི་མང་ནས་ལ་དྭགས་དཔལ་རྔམ་གཟེངས་རྟགས་འབུལ་བཞེས་མཛད།

དེ་རིང་ལ་དྭགས་དཔལ་རྔམ་དུས་སྟོན་གྱི་མཛད་སྒོ་དང་བསྟུན། ༸གོང་ས་མཆོག་ལ་དཔལ་རྔམ་གཟེངས་རྟགས་འབུལ་བཞེས་མཛད་པ་དང་ལ་དྭགས་རང་སྐྱོང་ས་ཁུལ་གྱི་གནད་ཡོད་མི་སྣ་དང་དགེ་སློབ། དེ་བཞིན་མི་མང་བརྒྱ་ཕྲག་བརྒལ་བར་༸གོང་ས་མཆོག་གིས་བཀའ་ཆོས་མཛད་འཕྲིན་བསྐྱངས་གནང་སོང་།

དེ་རིང་སྔ་དྲོ་ཆུ་ཚོད་ ༩ སྟེང་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སན་དྷོ་གྷ་(Sindhu Ghat)རུ་དཔལ་རྔམ་དུས་སྟོན་གྱི་མཛད་སྒོའི་སྐུ་མགྲོན་གཙོ་བོར་ཆིབས་སྒྱུར་བཀའ་དྲིན་བསྐྱངས་ཏེ། མང་ཚོགས་ལ་ཆོས་ལུགས་མཐུན་སྒྲིལ་དང་སྤྱི་ཚོགས་འཆམ་མཐུན། ལ་དྭགས་ཀྱི་གཞོན་སྐྱེས་ཚོས་སློབ་གཉེར་གནང་གལ་ཆེ་བ། དེ་བཞིན། ༧མགོན་པོ་གང་ཉིད་མཆོག་མ་འོངས་པར་ལ་དྭགས་སུ་ཆིབས་སྒྱུར་བསྐྱང་རྒྱུའི་བཀའ་བཞེས་བཅས་ཀྱི་བཀའ་སློབ་སྩལ་སོང་བ་དང་། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་ལ་དྭགས་མི་མང་ཡོངས་ཀྱི་ཚབ་བྱས་ཏེ། ཕྱི་ལོ་ ༢༠༢༢ ལོའི་ལ་དྭགས་དཔལ་རྔམ་གྱི་གཟེངས་རྟགས་དེ་ཁྲེག་སེ་རིན་པོ་ཆེ་བརྒྱུད་༧གོང་ས་མཆོག་རྒྱལ་བ་རིན་པོ་ཆེ་མཆོག་ལ་ཕུལ་གནང་མཛད་སོང་།

སྐབས་དེར་༧གོང་ས་མཆོག་གིས། སྔོན་ལ་ངོས་རང་ངོ་སྤྲོད་ཅིག་བྱས་ན། སྟོན་དེའི་རྗེས་སུ་རབ་ཏུ་བྱུང་གྱུར་ཏེ།། རྒྱལ་བའི་གསུང་ལ་སྦྱང་པ་མི་དམན་ཞིང་།། རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག། དྲང་སྲོང་ཆེན་པོ་དེ་ལ་དེ་ལྟར་གུས།། ཞེས་རྗེ་རིན་པོ་ཆེས་གསུངས་པ་ནང་བཞིན་ང་ཡང་དེ་ལྟར་ཡིན། སྟོན་པའི་རྗེས་སུ་རབ་ཏུ་བྱུང་ནས་ལོ་བཅུ་ཕྲག་ཁ་ཤས་རིང་ལ་དཔེ་ཆ་བལྟས། དེ་ནས་ང་ཚོ་བཙན་བྱོལ་བ་ཆགས་རྗེས་དཔེ་ཆ་མུ་མཐུད་ལྟ་ཡི་ཡོད། རྒྱལ་བའི་གསུང་ལ་ལྗགས་པ་མི་དམན་ཞིང་། བཅོམ་ལྡན་འདས་ཀྱིས་སྡེ་སྣོད་གསུམ་གྱི་བཀའ་སྩལ། བོད་གངས་ཅན་ལྗོངས་ཀྱི་རིས་སུ་མ་མཆེད་པའི་སྐྱེ་བུ་དམ་པ་མང་པོས་འགྲེལ་བ་དང་ཡང་འགྲེལ་བརྩམས་ནས་དངོས་གནས་དྲང་གནས་ཀྱི་ཕུལ་དུ་བྱུང་བའི་ལེགས་བཤད་ཡོད་བསྡད་པ་དེ་དག་ད་ལྟ་ཡིན་ནའང་སློབ་སྦྱོང་བྱེད་བཞིན་ཡོད། དཔེ་ཆ་བལྟས་པའི་དགོས་འདུན་དེ་སེམས་རྒྱུད་འདུལ་དགོས་ཀྱི་ཡོད་པ་རེད། རྒྱུད་མ་དུལ་བ་ཡིན་ན་དཔེ་ཆ་བལྟས་པའི་དགོས་པ་གང་ཡང་བྱུང་མེད་པ་རེད། དེར་བརྟེན། ཉིན་རེ་བཞིན་དུ་སྒོམ་བརྒྱབ་སྟེ་གཙོ་བོ་བྱང་ཆུབ་ཀྱི་སེམས་སྒོམ་གྱི་ཡོད། བྱང་ཆུབ་ཀྱི་སེམས་སྒོམ་ནས་སྙིང་སྟོབས་སྐྱེ་ཡི་འདུག བྱང་ཆུབ་ཀྱི་སེམས་ཀྱིས་སེམས་ཤུགས་སྐྱེས་ཡོང་དུས། ཇི་སྲིད་གནམ་མཁའ་གནས་པ་དང་།། འགྲོ་བ་དེ་སྲིད་གནས་གྱུར་པ།། དེ་སྲིད་བདག་ནི་སྲིད་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག ། ཅེས་སྨོན་ལམ་འདི་འདྲ་ཞིག་རྒྱག་གི་ཡོད་པ་རེད། གནམ་མཁའ་མ་ཟད་བར་དང་ཇི་སྲིད་སེམས་ཅན་གྱི་སྡུག་བསྔལ་མ་སེལ་གྱི་བར་དུ། ངས་མུ་མཐུད་འགྲོ་བའི་དོན་བྱེད་ཀྱི་ཡིན་ཞེས་དམ་བཅའ་འཇོག་གི་ཡོད་པ་རེད། ཤེས་སོང་ངམ། དེས་སེམས་ཤུགས་ཞེ་དྲགས་བསྐྱེད་ཀྱི་འདུག ཇི་ཙམ་གྱིས་སྙིང་སྟོབས་ཡོད་པའི་ཚོད་ཀྱིས། སེམས་ལ་རྔམ་སྐྲག་དང་རེ་དོགས་ཡོང་གི་མི་འདུག སེམས་ལ་དངོས་གནས་ཞི་བདེ་ཡོང་གི་འདུག དེ་དག་ངས་ཉམས་ལེན་བྱེད་ཀྱི་ཡོད། བྱང་ཆུབ་ཀྱི་སེམས་དེ་སྟོང་ཉིད་ཀྱི་ལྟ་བ་དང་འབྲེལ་ནས་བསམ་བློ་གཏང་གི་ཡོད། རྒྱ་གར་གྱི་གྲུབ་མཐའ་སྨྲ་བ་དང་བྱེ་བྲག་སྨྲ་བ། མདོ་སྡེ་བ། སེམས་ཙམ་པ། དབུ་མ་པ། དབུ་མ་པ་ལ་ནང་གསེས་ཀྱི་དབུ་མ་རང་འགྱུར་བ་དང་ཐལ་འགྱུར་བ་ཡོད་དུས། ངས་སློབ་དཔོན་ཟླ་བ་གྲགས་པའི་དབུ་མ་ལ་འཇུག་པའི་རང་འགྲེལ་དག་ཉིན་རེ་བཞིན་དུ་ཀློག་གི་ཡོད། ཆོས་ཐམས་ཅད་མིིང་རྐྱང་རྟགས་ཡོད་ཙམ་སྟེ། སེམས་ཀྱི་གཏིང་ནས་ངེས་པ་རྙེད་བསྡད་པ་བྱས་ཏེ། དེ་འདྲ་བའི་ལྟ་བ་དང་བྱང་ཆུབ་ཀྱི་སེམས་ཟུང་དུ་འབྲེལ་ནས། ངས་ཉིན་བཞིན་དུ་སྒོམ་སྡོད་ཀྱི་ཡོད། ཅེས་གསུངས་པ་དང་ལ་དྭགས་ཀྱི་སྐད་བསྒྱུར་བས་གསུང་བསྒྱུར་གནང་སོང་།

ཚེ་འདི་ལའང་། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་བའི་ཕྱོགས་དེར་ནི།། སྙིང་རྗེ་ཆེན་པོའི་ཡིད་རབ་བསྐྱེད་པ་ཡིས།། ཕན་བདེ་གཏེར་དུ་གསལ་བར་བྱེད་པར་ཤོག ། ཅེས་གསུངས་པ་དེ་ངས་ལག་ལེན་བསྐྱལ་གྱི་ཡོད། དེ་ནས་ཧི་མ་ལ་ཡའི་རི་བརྒྱུད་དག་ལ་བོད་ཀྱི་ཆོས་དང་རིག་གཞུང་ཤུགས་ཆེན་པོ་ཡོད་པ་རེད། སེངྒ་ཁ་འབབ་འདིར་ནས་མར་བཞུར་ནས་བོད་དང་ཐུན་མོང་མ་ཡིན་པའི་འབྲེལ་བ་ཡོད། ལ་དྭགས་ལ་ཆོས་ལུགས་ཀྱི་མཐུན་སྒྲིལ་ཡག་པོ་ཞེ་དྲགས་རེད་འདུག ལ་དྭགས་ལ་ཁ་ཆེ་ཆོས་ལུགས་བྱེད་མཁན་གྱི་ཆོས་གྲོགས་མང་པོ་འདུག ཚང་མ་མཐུན་པོ་བྱས་ནས་སྡོད་ཀྱི་ཡོད་པ་ནི་ཡག་པོ་ཞེ་དྲགས་རེད། འཛམ་གླིང་ནང་ཆོས་ལུགས་མི་འདྲ་བར་ལྟ་གྲུབ་འདྲ་མིན་ཡོད་པ་རེད་དེ། ཆོས་ལུགས་ཚང་མས་ག་ཚོད་ཐུབ་ཐུབ་ཀྱིས་སེམས་བཟང་པོ་དང་མི་ལ་ཕན་སེམས་བྱ་དགོས་རེད་གསུངས་གི་ཡོད་པ་རེད། ཁྱེད་རང་ཚོ་ལ་དྭགས་སུ་ཡོད་པའི་མོ་ཧན་མུ་དུའི་ཆོས་གྲོགས་ཚོ་ཐུགས་མཐུན་སེམས་གཙང་ཞེ་དྲགས་རེད་འདུག ཅེས་གསུངས།

ངོས་རང་འཛམ་གླིང་འདིའི་སྒང་གི་མི་གཅིག་ཆགས་ཀྱི་ཡོད། ང་ཚོ་འཛམ་གླིང་གི་མི་ཚང་མས་བདེ་སྐྱིད་འདོད་ཀྱི་ཡོད་པ་དང་བདེ་སྐྱིད་ཡོང་བའི་ཐོབ་ཐང་གཅིག་པ་རེད། ངོས་རང་མི་གཅིག་ཡིན་པའི་ངོས་ནས་འཛམ་གླིང་འདིའི་སྒང་དངོས་གནས་དྲང་གནས། བདེ་སྐྱིད་ཡོད་པ་དང་དམག་འཁྲུག་མེད་པ། ཚང་མ་གཅིག་གིས་གཅིག་ལ་འཆམ་མཐུན་བྱས་ནས་ཡོད་པའི་འཛམ་གླིང་ཞིག་ཡོང་ཐུབ་ན་བསམ་ནས་ངས་འབད་བརྩོན་བྱེད་ཀྱི་ཡོད།
ང་ལ་ནོ་སྦེལ་ཞི་བདེ་གཟེངས་རྟགས་ཐོབ་པ་དེ། ངས་སེམས་ཤུགས་བསྐྱེད་ནས་དངོས་གནས་དྲང་གནས་འཛམ་གླིང་ཞི་བདེ་ཡོང་བར་འབད་བརྩོན་བྱས་པ་ཡིན་སྟབས། ཞི་བདེ་གཟེངས་རྟགས་དེ་ཐོབ་བསྡད་ཡོད་པ་རེད། ངོས་ཀྱི་ངོ་ཤེས་མང་པོས་དགའ་བོ་ཞེ་དྲགས་བྱེད་ཀྱི་འདུག

ད་ང་ཚོའི་འཛམ་གླིང་འདིའི་སྒང་ག་ལེར་ཚ་དྲོད་ཆེ་རུ་འགྲོ་ཡི་ཡོད་པ་དཔེ་ཆའི་ནང་དུའང་ཡོད་པ་རེད་ལ་ཚན་རིག་པས་ཀྱང་ཤོད་ཀྱི་འདུག ངོས་ཀྱི་ཉམས་མྱོང་ཐོག་ནས་ཡིན་ནའང་། ངོས་རང་ཆུང་ཆུང་གི་སྐབས་སུ། ལྷ་སའི་ཉེ་འཁོར་གྱི་རི་དེ་ཚོའི་སྒང་དུ་དགུན་ཁ་གངས་གང་འཚམ་ཡོད་པ་རེད། ངོས་ཀྱིི་མི་ཚེའི་ནང་གངས་ཉུང་དུ་ཉུང་དུ་ཕྱིན་སོང་། འཛམ་གླིང་གི་ཚ་དྲོད་དེ་རང་བཞིན་གྱིས་ཤུགས་ཆེ་རུ་འགྲོ་ཡི་ཡོད་དུས། ང་ཚོའི་ཁོར་ཡུག་ནང་ནགས་ཚལ་འདེབས་འཛུགས་བྱ་རྒྱུ་དེ་གལ་ཆེན་པོ་ཞེ་དྲགས་རེད་འདུག སྔོན་མའི་ལ་དྭགས་ཀྱི་ཚད་གཞི་བྱས་ན། དེ་རིང་ཁ་སང་ལ་དྭགས་ནང་སྔོན་ལྗང་ཞེ་དྲགས་མང་དུ་ཕྱིན་འདུག་པས། ཡག་པོ་ཞེ་དྲགས་རེད། ད་དུང་ཁྱེད་རང་ཚོ་ཚང་མས་ཁོར་ཡུག་ཡག་པོ་ཞིག་ཡོང་བར་དོ་སྣང་ཤུགས་ཆེར་བྱས་ཏེ་ཧུར་ཐག་གནང་ཤོག དེ་ནས་སེངྒ་ཁ་འབབ་ཀྱི་གཙང་པོ་འདིར་ཡོད་པ་རེད། དེའི་ཆུ་རྩ་དེ་ཚོ་ག་འདྲ་ཡོང་གི་ཡོད་མེད་སྲུང་སྐྱོབ་བྱས་ཏེ། ཁྱེད་རང་ཚོས་ག་ཚོད་ཐུབ་ཐུབ་ཀྱིས་ཁོར་ཡུག་སྔོན་ལྗང་ཡོང་བར་འབད་བརྩོན་བྱ་དགོས་རེད། ཅེས་གསུངས།

ད་ཕལ་ཆེར་ངོས་ཀྱི་མི་རབས་འདིས་འཛམ་གླིང་གི་ཚ་དྲོད་ཡར་མཐོ་པོར་བསླེབ་བཞིན་པ་ཞེ་དྲགས་མཐོང་གི་མ་རེད། འོན་ཀྱང་། ང་ཚོའི་མི་རབས་རྗེས་མ་དེ་ཚོའི་སྐབས་སུ་འཛམ་གླིང་གི་ཚ་དྲོད་ཆེ་རུ་ཕྱིན་པ་དང་ཆུ་སྐམ་པ་དང་ལྗང་མདོག་ཇེ་ཉུང་དུ་འགྲོ་བའི་ཉེན་ཁ་ཡོད་པ་རེད། ང་ཚོའི་མི་རབས་རྗེས་མ་དག་གི་དོན་དུ་ད་ལྟའི་ང་ཚོའི་མི་རབས་འདིས་དེ་དག་ལ་དོ་སྣང་བྱེད་དགོས་པ་ཞིག་རེད་འདུག མཐའ་དོན་ཁྱེད་ཚོས་ངོས་ལ་གཟེངས་རྟགས་གསོལ་རས་གནང་བ་རེད། ཁྱེད་རང་ཚོས་དངོས་གནས་དྲང་གནས་དད་པ་དང་དམ་ཚིག་གཡོ་བ་མེད་པའི་ཐོག་ནས་གཟེངས་རྟགས་གནང་བ་རེད། ཐུགས་རྗེ་ཆེ་ཞུ་རྒྱུ་ཡིན། དེ་ནས་དྷ་རམ་ས་ལར་ཆར་ཤུད་ཆེན་པོ་བྱས་ནས་བཞའ་ཚན་ཞེ་དྲགས་རེད་འདུག ལ་དྭགས་ལ་ས་སྐམ་པོ་དང་དེ་འདྲ་བའི་བཞའ་ཚན་མེད་པ་ཡིན་དུས། ངོས་རང་གུང་གསེང་འདྲ་པོ་བྱས་ནས་ཡོང་གི་ཡོད་པ་རེད། ད་རེས་འདིར་ཡོང་བ་རེད། ཁྱེད་ཚོ་དངོས་གནས་དྲང་གནས་དད་པ་དང་དམ་ཚིག་གཡོ་བ་མེད་པ་ཡིན་དུས། ངོས་རང་ཧ་ཅང་དགའ་བོ་བྱུང་། ལོ་རེ་ལོ་རེར་རྒྱ་གར་གཏིང་ལ་མར་ཆར་ཤུད་ཆེན་པོ་ཚུགས་པའི་སྐབས་སུ། ངོས་རང་ལ་དྭགས་སུ་ཡོང་བར་འདོད་པ་ཆེན་པོ་ཡོད་ལ། ཁྱེད་ཚོར་ཡང་ནས་ཡང་དུ་ཐུག་གི་རེད། བཀྲ་ཤིས་བདེ་ལེགས་ཞུ་རྒྱུ་ཡིན། གསུངས་སོང་།

གསར་འགོད་པ་སྐལ་བཟང་སྦྱིན་པས་ལ་དྭགས་ལྕོག་ལམ་སར་ཞི་བའི་ཚལ་ཕོ་བྲང་གི་ཉེ་འགྲམ་ནས་སྤེལ།