སྲིད་སྐྱོང་མཆོག་ནས་རྒྱ་གར་གྱི་བདམས་ཐོན་སྲིད་འཛིན་གཞོན་པར་འཚམས་འདྲི་གནང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་རྒྱ་གར་གྱི་སྲིད་འཛིན་གཞོན་པ་སྐབས་ ༡༤ པར་བདམས་ཐོན་བྱུང་བའི་སྐུ་ཞབས་ཇག་དྷིབ་ཌན་ཀར་ལགས་སུ་འཚམས་འདྲི་དང་སྦྲགས་མ་འོངས་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་འདུག

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་སྲིད་འཛིན་གཞོན་པ་སྐབས་ ༡༤ པར་བདམས་ཐོན་བྱུང་བའི་སྐུ་ཞབས་ཇག་དྷིབ་ཌན་ཀར་(Shri Jagdeep Dhankhar) མཆོག་ལ་དགའ་བསུའི་འཚམས་འཕྲིན་གནང་ཡོད་པ་དང་། འཚམས་འདྲིའི་ནང་སྐུ་ཉིད་རྒྱ་གར་སྤྱི་མཐུན་རྒྱལ་ཁབ་ཀྱི་སྲིད་འཛིན་གཞོན་པ་སྐབས་ ༡༤ པར་བདམས་ཐོན་བྱུང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་དགའ་བསུའི་འཚམས་འདྲི་ཞུ་ཡི་ཡོད། སྐུ་ཉིད་ཀྱིས་ལོ་ངོ་བཅུ་ཕྲག་མང་པོའི་རིང་དབུ་ཁྲིད་གནང་སྟེ་མི་མང་ལ་ཞབས་འདེགས་བསྒྲུབས་གནང་བའི་ཉམས་མྱོང་དེས་ཏན་ཏན་རྒྱལ་ཁབ་ལ་ཕན་ཐོགས་ངེས་ཅན་འབྱུང་ངེས་ཡིན་པ་ང་ལ་གདེང་ཚོད་ཡོད། ཅེས་གསུངས་འདུག

ཡང་སྲིད་སྐྱོང་མཆོག་ནས་གོ་སྐབས་འདི་བརྒྱུད་ངས་རྒྱ་གར་གཞུང་མང་གཉིས་ལ་བཀའ་དྲིན་ཤིན་ཏུ་ཆེ་ཞེས་ཞུ་རྒྱུ་ཡིན། རྒྱ་གར་གྱིས་གཏོང་ཕོད་ཆེན་པོ་དང་གཡོ་བ་མེད་པའི་སྒོ་ནས་མུ་མཐུད་མཐུན་འགྱུར་རོགས་རམ་གནང་དང་གནང་མུས་ཡིན་སྟབས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་བཙན་བྱོལ་བོད་མི་རྣམས་འཚོ་གནས་ཐུབ་པ་མ་ཟད། འཕེལ་རྒྱས་སུ་འགྲོ་བཞིན་ཡོད། སྐུ་ཉིད་ཀྱིས་གོ་བབ་མཐོ་བའི་ལས་ཁུངས་ཀྱི་ཐུགས་འགན་བཞེས་གནང་གི་ཡོད་པའི་ཆ་ནས། ང་ཚོ་ངོས་ནས། སྐུ་ཉིད་ཀྱིས་མུ་མཐུད་བོད་མིའི་བདེ་དོན་དང་། ལྷག་པར་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་གནང་རྒྱུའི་རེ་བ་ཞུ་ཡི་ཡོད། སླར་ཡང་ང་ཚོས་སྐུ་ཉིད་ལ་འཚམས་འདྲི་དང་། སྐུ་ཉིད་ཀྱི་མ་འོངས་པའི་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཤུགས་དྲག་ཞུ་རྒྱུ་ཡིན། ཞེས་གསུངས་འདུག

བོད་མིའི་སྒྲིག་འཛུགས་ཀྱི་དྲ་བ་ལས་བཤུས།