བོད་ཀྱི་མཁས་པའི་བགྲོ་གླེང་འཚོག་བཞིན་འདུག

དྷ་རམ་ས་ལ་རུ་བཙན་བྱོལ་བོད་མིའི་ད་ལྟའི་རིག་གཞུང་གི་གནས་སྟངས་དང་མ་འོངས་པའི་ལམ་སྟོན་སྐོར་གྱི་མཁས་པའི་བགྲོ་གླེང་ཐེངས་དང་པོ་དེ་ཉིན་གྲངས་གཉིས་རིང་འཚོག་བཞིན་འདུག

བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག དྷ་ས་ནོར་བུ་གསོལ་མགྲོན་ཁང་དུ། བོད་མི་རིགས་ཀྱི་རྩ་ཆེ་བའི་རིག་གཞུང་མི་ཉམས་གོང་འཕེལ་དང་བོད་ཀྱི་མ་འོངས་པའི་ལས་དོན་བྱེད་ཕྱོགས་སོགས་ཀྱི་ཐད་བཙན་བྱོལ་ནང་གི་ད་ལྟའི་བོད་ཀྱི་རིག་གཞུང་དང་གནས་བབ། མ་འོངས་ལམ་སྟོན་ཞེས་པའི་ཐོག་རིས་མེད་མཁས་པའི་བགྲོ་གླེང་སྐབས་དང་པོ་དེ་རིང་དང་སང་ཉིན་ཉིན་གཉིས་རིང་འཚོག་བཞིན་འདུག་ལ། མཁས་པའི་བགྲོ་གླེང་འདིའི་ཐོག་ཚོགས་བཅར་བ་ ༢༣ དངོས་སུ་མཉམ་ཞུགས་གནང་འདུག

མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་ཀྱིས། དེ་རིང་ང་ཚོས་ཚོགས་འདུ་འདི་འཚོག་དགོས་པའི་དགོས་པ་དང་དམིགས་ཡུལ་ནི། ཇི་སྲིད་བོད་ཀྱི་བདེན་མཐའ་མ་གསལ་བར་དུ། དེ་སྲིད་བོད་ཀྱི་རྩ་ཆེའི་རིག་གཞུང་མུ་མཐུད་བཙན་བྱོལ་དུ་ཉམས་པ་སོར་བཅུད་དང་མི་ཉམས་གོང་འཕེལ་གཏང་རྒྱུ་ཤིན་ཏུ་གལ་ཆེན་པོ་ཆགས་ཀྱི་ཡོད་དུས། ད་ལྟ་ང་ཚོ་བོད་པ་ལ་ངོམ་ཆོག་པ་དང་རྒྱལ་སྤྱིའི་ནང་རྒྱབ་སྐྱོར་དང་དགའ་ཞེན་བྱེད་ས་ནི།  སྤྱིར་ནོར་༧གོང་ས་སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། དེ་བཞིན་བོད་ཀྱི་ཆོས་དང་རིག་གཞུང་ཕྱུག་པོ་འདི་ལ་བརྟེན་ནས་རེད་བསམ་ཀྱིན་ཡོད། བོད་ཀྱི་རིག་གཞུང་གསོན་པོར་གནས་རྒྱུ་དེའང་མི་རབས་རྒན་པ་རྣམས་དང་། རིག་གཞུང་ཐོག་རྒྱུན་རིང་ཕྱག་ལས་གནང་མཁན་རྣམས་དང་།  ཕྱོགས་ཡོངས་ཀྱི་འབད་རྩོད་དང་ལྷག་བསམ། སེམས་ཤུགས་བཅས་ལ་བརྟེན་ནས་བྱུང་ཡོད། ཡིན་ཡང་། ང་ཚོས་ཆོས་དང་རིག་གཞུང་འདི་མུ་མཐུད་ནས་གནས་རྒྱུ་དང་། རིག་གཞུང་དེ་བོད་ཀྱི་འཐབ་རྩོད་ཁྲོད་ཀྱི་ཆ་ཤས་གལ་ཆེན་པོ་ཞིག་ཏུ་ཆགས་ཀྱི་ཡོད་པ་དང་། མི་རབས་ནས་མི་རབས་བར་རྩིས་སྤྲོད་ཐུབ་པ། སློབ་གསོ་བརྒྱག་རྒྱུ། དེ་ཙམ་མ་ཟད་མུ་མཐུད་དུ་དེ་ལ་དོ་སྣང་དང་ཤུགས་སྣོན་བརྒྱག་རྒྱུ་དེ་ནི་བོད་མི་ཚོའི་ལས་འགན་ཆགས་བསྡད་ཡོད་པ་རེད་ལ། ཆོས་རིག་ལས་ཁུངས་ཀྱི་ངོས་ནས་ཚོགས་འདུ་འདི་གལ་ཆེན་པོར་རྩིས་ཡོད། གང་ཡིན་ཟེར་ན། ད་ལྟ་ང་ཚོ་མིའི་ལུང་པ་དང་རྒྱལ་ཁབ་འདྲ་མིན་དུ་གནས་ཡོད་དུས། གནས་སྡོད་བྱེད་སའི་ཁོར་ཡུག་དང་གོམས་གཤིས་སོགས་ལ་བརྟེན་ནས། སྐད་ཡིག་དང་རིག་གཞུང་ལ་ཤན་ཞུགས་པ་དང་འདྲེས་ལྷད་འབྱུང་ཉེན་ཆེན་པོ་ཆགས་ཡོད་པ་བརྗོད་མེད་ཡིན། ཆོས་རིག་ལས་ཁུངས་ཀྱི་ངོས་ནས་ད་ལྟའི་གནས་སྟངས་ལ་གཞིགས་པའི་བོད་ཀྱི་རིག་གཞུང་དང་སྒྱུ་རྩལ་གྱི་ལས་གཞི་སྤེལ་མུས་ཡིན་ལ། བོད་ཀྱི་རིག་གཞུང་གི་ཐོག་ལ་ལས་ཀ་བྱེད་མཁན་རྣམས་ལ་དཔལ་འབྱོར་གྱི་རོགས་པ་བྱས། དེ་བཞིན་དབྱར་དུས་བོད་ཀྱི་སྐད་ཡིག་དང་རིག་གཞུང་གི་གོ་རྟོགས་ལས་གཞི་ཟེར་ན་རེད། བོད་ཀྱི་གཞོན་སྐྱེས་རྣམས་ལ་ཆོས་དང་རིག་གཞུང་གི་གོ་རྟོགས་སྤེལ་སླད། ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཉིན་ ༢༡ རིང་ཟབ་སྦྱོང་གོ་སྒྲིག་བྱས་ཡོད། དེ་བཞིན་རྒྱུད་སྨད་གྲྭ་ཚང་ལ་མཉམ་འབྲེལ་གྱི་ཐོག་ནས། མཐོ་སློབ་ལ་སྐྱོད་མུས་ཡིན་པའི་ན་གཞོན་ཚོར་ཟླ་དྲུག་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་གནང་གི་ཡོད། དེ་བཞིན་ལྷ་མོ་ཚོགས་པ་དང་རིག་གཞུང་ཚོགས་པ་གསར་དུ་འཛུགས་མཁན་རྣམས་ལའང་དཔལ་འབྱོར་གྱི་མཐུན་རྐྱེན་སྦྱོར་བའི་་ལས་གཞི་སྤེལ་མུས་ཡིན། ཞེས་གསུངས་སོང་།

དེའི་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། དེ་རིང་ཆོས་རིག་ལས་ཁུངས་ཀྱི་གོ་སྒྲིག་འོག བཙན་བྱོལ་ནང་དུ་བོད་ཀྱི་རིག་གཞུང་གང་འདྲ་ཆགས་ཡོད་མེད་དང་། མ་འོངས་པའི་བྱེད་ཕྱོགས་སླད། རིག་གཞུང་རྐྱང་པའི་བགྲོ་གླེང་ཐེངས་དང་པོ་ཆགས་ཡོད་པ་རེད། ད་ལན་གྱི་མཁས་པའི་བགྲོ་གླེང་ཐོག་ཆོས་རིག་ལས་ཁུངས་ཀྱིས་ཆེད་མངགས་མགྲོན་འབོད་ཞུས་པའི་ང་ཚོའི་སྤྱི་ཚོགས་ནང་དུ་རྒྱུན་དུ་ནས་འགན་བཞེས་མཁན་གྱི་སློབ་སྦྱོང་དང་ཉམས་མྱོང་ཕུན་སུམ་ཚོགས་པའི་མཁས་པ་ ༢༥ ནས་གཉིས་མ་གཏོགས་གཞན་ཚང་མ་ཕེབས་ཐུབ་འདུག ངས་བཀའ་ཤག་སྐབས་བཅུ་དྲུག་པ་དང་། ང་རང་སྒེར། ཆོས་རིག་ལས་ཁུངས་ཀྱི་ངོས་ནས་རྣམ་པ་ཚོར་མགྲོན་འབོད་ལྟར་ཕེབས་པར་ཐུགས་རྗེ་ཆེ་ཞུ་ཡི་ཡིན། ཆོས་རིགས་ལས་ཁུངས་རང་གིས་ངོས་ནས་བཙན་བྱོལ་སྤྱི་ཚོགས་སུ་ཐུགས་ཕན་གསོ་བའི་ལས་ཀ་ཐད་ཀར་བྱེད་ཐུབ་རྒྱུ་ཞིག་མེད་པ་ཚང་མས་མཁྱེན་མཁྱེན་པ་རེད། ལྷག་པར་དུ་ཆོས་དང་འབྲེལ་བའི་གནས་ཚུལ་དེ་དག་ཡིན་ན། རིས་སུ་མ་ཆད་པའི་དགོན་སྡེ་ཁག་གི་སོ་སོའི་འགྲོ་སྟངས། འཛིན་སྐྱོང་བྱེད་སྟངས། ནམ་རྒྱུན་གྱི་འཚོ་རྟེན་དག་སོ་སོས་འགན་ཁུར་ནས་གནང་བསྡད་ཀྱི་ཡོད་རེད། བསླབ་པ་སློབ་གཉེར་ཡིན་ནའང་ཆོས་བརྒྱུད་སོ་སོས་གནང་བསྡད་ཀྱིན་ཡོད་དུས། ཆོས་རིག་ལས་ཁུངས་ཀྱིས་ཐེ་ཇུས་བྱས་ནས་ལས་གཞི་བརྩམ་རྒྱུ་དེ་འདྲ་ཞིག་གནང་སྲོལ་ཡོད་མ་རེད་ལ། མ་འོངས་པར་ཡང་ཆོས་རིག་ལས་ཁུངས་ཀྱིས་བྱ་ཐུབ་མིན་གྱི་གནས་སྟངས་ཤིག་རེད། ཆོས་རིག་ལས་ཁུངས་ཀྱི་ངོས་ནས་རིག་གཞུང་ནང་ལོགས་ནས་ཡལ་ལ་ཉེ་བ་དང་། སྒྱུ་རྩལ་རིག་ཚན་ག་རེ་ཡིན་ནའང་འགན་ཞིག་ཁུར་ཐུབ་ན་བསམ་ནས་ལས་གཞི་འདོན་གྱི་ཡོད་པ་རེད། དེ་ཡིན་དུས་ད་བར་བྱས་བཞག་པ་འདི་བོད་པའི་སྤྱི་ཚོགས་ནང་རིག་རྩལ་དང་སྒྱུ་རྩལ་ལག་ལེན་བསྟར་བཞིན་པ་རྣམས་ལ་སེམས་ཤུགས་འཕར་རྒྱུའི་ཆེད་དུ་དངུལ་འབོར་ཉུང་ཉུང་ཞིག་ཕུལ་ཐུབ་ཀྱི་ཡོད་པ་མ་གཏོགས། དེ་ལས་ལྷག་པ་ཞིག་ཆོས་རིག་ལས་ཁུངས་ཀྱིས་ཕུལ་ཐུབ་ཀྱི་མེད་པ་རེད། ང་ཚོའི་འཐབ་རྩོད་ཀྱི་ཐོག་ནས་ཆ་བཞག་པ་ཡིན་ན། ཕྱི་ལོ ༢༠༡༡ ལོར་ང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཡིན་པའི་སྐབས་སུ་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དེ་དབུ་འབྱེད་གནང་བ་རེད། སྐབས་དེ་དུས་༧གོང་ས་སྐྱབས་མགོན་ཆེན་པོ་མཆོག་གིས། ང་ཚོ་བཙན་བྱོལ་ནང་ཡོད་པའི་བོད་པ་ཚོས་བོད་ཀྱི་ཆོས་དང་རིག་གཞུང་བདག་ཉར་ཡག་པོ་ཞིག་བྱེད་ཐུབ་པ་ཡིན་ན། དེ་འཐབ་རྩོད་ཀྱི་ལས་འགན་ཆེན་པོ་ཞིག་སྒྲུབ་པ་རེད་གདའ། ཞེས་བཀའ་སློབ་སྙིང་པོ་དེ་གནང་བ་རེད།  བོད་མིའི་སྒྲིག་འཛུགས་ཀྱི་ངོས་ནས་སྤྱི་ཡོངས་ནས་ཁོར་ཡུག་བསྐྲུན་རྒྱུ་དེ་དཔེ་གལ་ཆེན་པོ་མཐོང་གི་འདུག ད་ལྟ་བཀའ་ཤག་གི་བསམ་བློ་དེ། འདས་པའི་ལོ་ ༦༠ རིང་ལ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཕུགས་རྒྱང་རིང་པོའི་དགོངས་པ་བཞེས། རྒྱ་གར་གཞུང་གིས་མཐུན་རྐྱེན་སྦྱར་ནས་བོད་མི་འདུག་སའི་ས་གནས་མང་པོ་ཞིག་བཙུགས་ཐུབ་པ་བྱུང་བ་རེད། བོད་མི་འདུག་སའི་ས་གནས་མང་པོ་ཞིག་བཙུགས་ཐུབ་པ་ལ་བརྟེན་ནས་མི་རིགས་ཀྱི་ཁྱད་ཆོས་དེ་ཚོ་ཆ་ཚང་ཞིག་ཉར་ཐུབ་ཡོད་པ་དང་། གཞིས་ཆགས་ཁག་ཏུ་སློབ་གྲྭ་དང་དགོན་པ། ཆོས་སྡེ། རིག་གཞུང་གི་སྟི་གནས་སྣ་ཚོགས་ཤིག་བཙུགས་ནས། ད་ལྟ་བར་དུ་རྒྱུན་འཁྱོངས་ཐུབ་པ་ཞིག་བྱུང་ཡོད་རེད། འོན་ཀྱང་། ཉེན་ཁ་དེ་སྤྱི་ཚོགས་ཀྱི་གནས་བབ་ཁྲོད་ནས་ང་རང་ཚོའི་རིག་གཞུང་གི་གནས་བབ་དེ་དེའི་ཁ་ཤས་སུ་གྱུར་འགྲོ་ཡི་ཡོད་རེད། འདས་པའི་ལོ་དྲུག་ཅུའི་རིང་ལ་འགྲིག་བསྡད་པ་དེ། མ་འོངས་པར་འགྲིག་ས་རེད་དང་མ་རེད་ཀྱི་མཚམས་འདྲ་བོ་ཞིག་ཏུ་བསླེབས་བསྡད་འདུག མི་འབོར་ལ་ཆ་བཞག་ན། ཆོས་རིག་ལས་ཁུངས་ཀྱི་ཁྱབ་ཡོངས་སུ་དགོན་སྡེ་ཁག་ ༢༨༨ ཡས་མས་ཤིག་ཡོད་པ་རེད། དེ་དག་གི་ནང་དུ་གྲྭ་བཙུན་གྱི་གྲངས་འབོར་ཉུང་དུ་ཕྱིན་མི་འདུག་ཀྱང་། ཧི་མ་ཡ་ལའི་གྲྭ་བཙུན་གྱི་གྲངས་འབོར་མང་དུ་ཕྱིན་ཡོད་པ་དང་། ང་ཚོའི་གཞིས་ཆགས་སུ་སྐྱེས་ནས་དགོན་པར་འཛུལ་མཁན་ཧ་ཅང་ཉུང་ཉུང་ཡིན་པ་དང་། བོད་ནས་ཡོང་མཁན་ཡང་ཉུང་དུ་ཕྱིན་ཡོད་པ་དང་། འདས་ལོར་མི་གྲངས ༡༠ དང་ད་ལོ ༤ ལས་བསླེབས་མེད་པ་རེད་འདུག ཅེས་གསུངས་སོང་།

ཡང་སྲིད་སྐྱོང་མཆོག་གིས། དེང་གི་ཆར་བོད་ནས་ཡོང་མཁན་ཉུང་དུ་ཕྱིན་ཡོད་པ་དང་། བཙན་བྱོལ་དུ་ཡོད་པའི་བོད་མི་མང་པོ་ཞིག་གནས་སྟངས་སོགས་ཀྱི་དབང་གིས་ནུབ་ཕྱོགས་རྒྱལ་ཁབ་སོགས་སུ་བསྐྱོད་མུས་ཡིན་སྟབས། སློབ་གྲྭ་དང་དགོན་སྡེ་ཁག་ཏུ་བོད་པའི་སློབ་ཕྲུག་ཉུང་དུ་ཕྱིན་ཡོད་པ་མ་ཟད། གཞིས་ཆགས་ཁག་ཏུ་བོད་པའི་ཕྲུ་གུ་སྐྱེས་ཚད་ཇེ་ཉུང་དུ་ཕྱིན་སྟབས། བོད་ཀྱི་སློབ་གྲྭ་དང་དགོན་པ་ཁག་ཏུ་བོད་པའི་གྲྭ་རྒྱུན་ཆད་ཉེན་ཡོད་པ་མ་ཟད། བོད་ཀྱི་ཆོས་རིག་དང་ངོ་བོ་སྲུང་སྐྱོབ་སོགས་ཀྱི་སླད། གཞིས་ཆགས་ཁག་ནས་ཕྱི་རྒྱལ་དུ་ཕེབས་མཁན་གྱི་ས་མིག་དེ་དག་གི་ཁ་སྐོང་ཆེད། བོད་མི་འདུས་སྡོད་ཀྱི་ས་གནས་ཁག་ཏུ་བོད་མི་མངག་གཏོང་གི་ལས་གཞི་སྤེལ་འཆར་དང་། ད་ལན་གྱི་ཚོགས་ཐོག་ཏུ་མཁས་དབང་སོགས་ཀྱི་དགོངས་གཞིར་གཞིགས་ནས་བོད་ཀྱི་མ་འོངས་པའི་ལས་དོན་སོགས་ཀྱི་སླད། འཕྲལ་ཕུགས་ཀྱི་ཐབས་ཇུས་ཚོགས་འདུ་ཞིག་འཚོགས་ནས་བོད་ཀྱི་རིག་གཞུང་དང་འཐབ་རྩོད་རྒྱུན་གནས་ཐུབ་པ་བྱ་རྒྱུ་གལ་ཆེན་པོ་ཡིན་སྐོར་སོགས་གསུངས་སོང་།

དེ་རིང་ཞོགས་པར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོ་ལགས་དང་། བཙུན་དགོན་སྒྲོལ་མ་གླིང་གི་སློབ་དཔོན་དགེ་བཤེས་མ་བདེ་ལེགས་བཟང་མོ་ལགས། སྐུའི་ན་བཟའ་བ་ཆེན་མོ་བསྟན་འཛིན་ཆོས་དཀར་ལགས་དང་། ནོར་གླིང་བོད་ཀྱི་བོད་ཀྱི་རིག་གཞུང་གཅེས་སྐྱོང་ཁང་གི་རྟེན་བཞེངས་དགེ་རྒན་ཚེ་བརྟན་དོན་གྲུབ་ལགས། ཀིརྟིའི་བྱེས་པ་གྲྭ་ཚང་གི་རིག་གནས་སློབ་དཔོན་རེ་མདོ་སེངྒེ་ལགས། ཉིན་རྒྱབ་ཏུ་ས་རཱ་བོད་ཀྱི་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས། སྨན་རྩིས་ཁང་གི་སྐར་རྩིས་པ་ཚེ་རིང་ཆོས་འཛོམས། ནོར་གླིང་མཐོ་སློབ་ཀྱི་སློབ་སྤྱི་སྨན་ཤེར་བློ་གྲོས་ལགས། འཇམ་དབྱངས་བོད་ཀྱི་རིག་གཞུང་ཁང་གི་དྲུང་གཞོན་འགྱུར་མེད་བརྩོན་འགྲུས་ལགས་བཅས་ཀྱིས་གཏམ་བཤད་གནང་གི་ཡོད་པ་རེད།

གསར་འགོད་པ། དཔལ་ལྡན།