དེ་རིང་ཉིན་རྒྱབ་བཙན་བྱོལ་ནང་གི་ད་ལྟའི་བོད་ཀྱི་རིག་གཞུང་གི་གནས་བབ་དང་མ་འོངས་པའི་ལམ་སྟོན་སྐོར་གྱི་མཁས་པའི་བགྲོ་གླེང་ཐེངས་དང་པོ་དེ་མཇུག་བསྒྲིལ་སོང་བ་དང་ཐེངས་འདིའི་ཚོགས་ཐོག་ཏུ་མ་འོངས་ལས་གཞི་ལས་འཆར་ཁག་གི་ས་བོན་ལྟ་བུར་གྲོས་ཆོད་དོན་ཚན་ ༣༨ ཡས་མས་ཡོང་གི་ཡོད་འདུག
དེ་རིང་བགྲོ་གླེང་གི་ཉིན་མཐའ་མར་ཝཱ་རཱ་ཎཱ་སི་དབུས་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས་ཀྱིས། ༧གོང་ས་མཆོག་བཙན་བྱོལ་དུ་ཕེབས་ཏེ་ཕུགས་རྒྱང་རིང་བོའི་ཐོག་ནས་སློབ་གྲྭ་དང་གཞིས་ཆགས་ཁག དགོན་སྡེ་ཁག་བཙུགས་ཏེ་བཙན་བྱོལ་དུ་བོད་ཀྱི་རིག་གཞུང་གི་མེ་རོ་གསོས་བ་ལྟ་བུ་བྱུང་བ་རེད། དེ་འདྲའི་བཀའ་དྲིན་བསྐྱངས་པ་ལ་བརྟེན་ནས་གང་ཅིའི་ཐད་བོད་ཀྱི་ཤེས་རིག་གི་གཞི་རྐང་བཙུགས་ཐུབ་ཡོད་པ་རེད། བོད་ཀྱི་རིག་གཞུང་རྒྱ་གར་ནང་དུ་གཅིག་པུ་མ་ཡིན་པར། འཛམ་གླིང་ས་ཕྱོགས་གང་སར་ཆོས་དང་བཟང་སྤྱོད་ཐད་ཀྱི་བླང་དོར་སྤེལ་མུས་ཡིན་པ་མ་ཟད། དེང་དུས་ཚན་རིག་གི་སློབ་ཚན་བོད་ཀྱི་ཤེས་ཡོན་དུ་ནང་འདྲེན་བྱེད་ཐུབ་པ་བྱུང་ཡོད་པའི་རླབས་ཆེན་གྱི་མཛད་རྗེས་ངོ་སྤྲོད་དང་སྦྲགས། བོད་ཀྱི་རིག་གཞུང་འཛིན་སྐྱོང་སྤེལ་གསུམ་བྱེད་པར་ཝཱ་ཎ་གཙུག་ལག་སློབ་གཉེར་ཁང་ནས་ཤེས་ཡོན་ཡར་རྒྱས་གཏོང་བར་ཐབས་ལམ་ག་རེ་འདོན་གྱི་ཡོད་མེད་དང་། ཉེ་བའི་ལོ་འགའི་ནང་དུ་བོད་ཀྱི་རྒྱལ་རབས་དང་། སྐད་ཡིག་རྩོམ་རིག སྒྱུ་རྩལ་བཅས་ལ་ཆེད་ལས་རང་བཞིན་གྱི་བྱེད་ཕྱོགས་གཙོར་བཟུང་གིས་ཤུགས་རྒྱག་བཞིན་ཡོད་སྐོར་གསུངས་སོང་།
ཡང་ཁོང་གིས། རིག་གཞུང་ནང་འདྲེན་བྱ་རྒྱུ་ནི་གལ་ཆེན་ཡིན་པར་བརྟེན། ད་ལྟའི་ཚན་རིག་ཤེས་བྱ་བོད་ཀྱི་ཤེས་ཡོན་དུ་ནང་འདྲེན་བྱེད་མ་ཐུབ་པ་ཡིན་ན། ང་ཚོའི་རིག་གཞུང་དེ་ལེགས་སྦྱར་ནང་བཞིན་ཉམས་ཆགས་སུ་འགྲོ་རྒྱུ་ཡིན་པ་དང་། རིག་གཞུང་ཚོགས་སྡེས་འཛིན་སྐྱོང་བྱེད་པར་འཆར་གཞི་སྐྲུན་པ་གཅིག་པུ་མིན་པར་འཆར་གཞི་ལ་ཆ་རྐྱེན་བསྐྲུན་ནས་སློབ་མ་གསོ་སྐྱོང་བྱེད་པར་ཆེད་ལས་རང་བཞིན་ཅན་ཡིན་དགོས་པ་དང་། ནུབ་ཕྱོགས་རྒྱལ་ཁབ་ཁག་དང་བོད་རིགས་འདུས་སྡོད་ས་ཁུལ་དུ་བོད་ཀྱི་གྲོང་སྡེ་འཛུགས་ཐུབ་དགོས་པ་ནི་གལ་ཆེན་ཡིན་སྐོར་སོགས་གསུངས་སོང་།
དེ་ནས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་སྤྱི་ཟུར་བསོད་ནམས་རྒྱལ་མཚན་ལགས་ཀྱིས། རིག་གཞུང་ལབ་དུས་རིག་གཞུང་རྒྱུད་འཛིན་བྱ་དགོས་པ་གལ་ཆེན་དུ་མཐོང་། ངས་བརྡ་སྤྲོད་ཀ་ཙན་དབྱངས་གསུམ་གྱི་རྒྱུད་བོད་ནས་བླངས་ནས་ཡོང་བ་རེད། རྒྱ་གར་གྱི་བརྡ་སྤྲོད་ཀ་ཙན་དབྱངས་གསུམ་ཉམས་བཞིན་པ་ཚོར་གྱི་འདུག བྱས་ཙང་ཆོས་རིག་ལས་ཁུངས་ནས་ད་ལོ་འི་ལས་འཆར་བླངས་པ་ཡིན། དེ་དག་ཉར་ཚགས་བྱས་པ་ཡིན་ན་རྗེས་མ་རྒྱུད་འཛིན་བྱེད་ཐུབ་པ་རེད། ང་ཚོས་ལག་ཆའམ་ཡོ་ཆས་སྐྲུན་མ་ཐུབ་པ་ཡིན་ན། དེ་བེད་སྤྱོད་གཏོང་མཁན་ཡོད་མ་རེད། ཉར་ཚགས་དེའང་གློག་ཀླད་ནང་དུ་བཅུག་སྟེ་དེང་རབས་ཀྱི་ཁྱད་ཆོས་ཡོད་པའི་ཐོག་ནས་བེད་སྤྱོད་བྱེད་ཐུབ་ན། ང་ཚོའི་རྒྱུད་འཛིན་ལ་ཕན་ཐོགས་ཡོད་ཅིང་། ཆབ་སྲིད་དང་གསོ་རིག་བཅས་པར་འཆར་འགོད་བྱ་ཐུབ་ཚེ། ལས་འཆར་དེ་དགོས་མཁོར་མཐུན་པ་ཞིག་ཡིན། དེའི་ལས་འཆར་དབྱིན་ཡིག་སོགས་སུ་བསྒྱུར་ཚེ། བེད་སྤྱོད་དང་དགོས་མཁོ། ཉར་ཚགས་སོགས་ལ་རྒྱུད་འཛིན་ཙམ་མིན་པར་འཕེལ་རྒྱས་གཏོང་ཐུབ་པའི་ཆ་རྐྱེན་ཞིག་ཏུ་མཐོང་གི་ཡོད། ཅེས་གསུངས་སོང་།
བོད་ཀྱི་ཟློས་གར་ཚོགས་པའི་འགན་འཛིན་བསམ་གཏན་དོན་གྲུབ་ལགས་ཀྱིས། ཟློས་གར་སྦྱོང་མཁན་རྣམས་ཀྱི་བོད་ཡིག་གནས་ཚད་མཐོ་བོ་མེད་ཀྱང་། ཁོང་ཚོས་ང་ལ་གཞས་ཚིག་ཚང་མ་མཁྲེགས་པོ་ག་རེ་བྱས་ནས་ཡོད་དགོས་རེད་ཟེར། དེས་ཁོང་ཚོའི་གནས་ཚད་མཐོ་རུ་མ་ཕྱིན་པར་ང་ཚོ་མར་འཐེན་པའི་བཟོ་ལྟ་ཞིག་རེད། ད་ལྟའི་བོད་ཀྱི་ཟློས་གར་ནང་དུ་དགེ་སྐྱོན་ཅི་ཡོད་ཞིབ་ཚགས་མ་བྱས་ཚེ། སྐྱོན་ཡོན་གང་ཡིན་མ་ཤེས་པའི་ནོར་འཁྲུལ་གྱི་ཆ་འབྱུང་སྲིད་པ་ཞིག་རེད། རྒྱུད་འཛིན་བྱེད་པར་འཆར་གཞི་མེད་ན་དེང་རབས་རོལ་མོ་ལ་དབྱིངས་སླེབས་ཡོད་པ་བཞིན། ང་ཚོའི་འཛིན་སྐྱོང་སྤེལ་གསུམ་གྱི་ལས་ཀར་ཉམས་ཆགས་འབྱུང་རྒྱུ་རེད། ཉར་ཚགས་བྱེད་པར་དེང་དུས་ཀྱི་ཁྱད་ཆོས་ལྡན་དགོས། ཞེས་གསུངས་སོང་།
སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་པ་དང་། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་འཇུ་བསྟན་སྐྱོང་ལགས་ཀྱིས། ང་ཚོས་རིག་གཞུང་འཛིན་སྐྱོང་བྱེད་པར་ཆོས་ལུགས་ཀྱི་ལྟ་གྲུབ་གཅིག་པུ་བཤད་ནས་མ་བསྡད་པར། རི་མོ་དང་སྒྱུ་རྩལ་གྱི་ལམ་ནས་བྱིས་པའི་ཤེས་ཡོན་ཡར་རྒྱས་གཏང་དགོས་པ་གལ་ཆེན་དུ་མཐོང་གི་ཡོད། དེང་སྐབས་བཙོན་ཁང་དུ་ཡོད་པའི་མི་རྣམས་ཀྱང་སྒྱུ་རྩལ་བ་རྐྱང་རྐྱང་རེད། ནང་པའི་ཆོས་ལུགས་ཀྱི་སྒྱུ་རྩལ་ལྟ་གྲུབ་ཤེས་མཁན་མི་འདུག ཡོད་ཀྱང་ཧ་ཅང་ཉུང་ཉུང་རེད། སྒྱུ་རྩལ་ལྟ་གྲུབ་ཤེས་མཁན་ཡོད་ཀྱང་ཡིད་ཚིམས་པ་ཞིག་ཡོད་མ་རེད། ང་ཚོའི་རིག་གཞུང་ནི་མི་མང་གིས་བེད་སྤྱོད་གཏོང་ཐུབ་པ་དང་། མི་མང་གི་འཚོ་བའི་ནང་དུ་ཕན་ཐོགས་པ་ཞིག་ཡིན་དགོས། མཁས་པའི་བགྲོ་གླེང་གཅིག་པུ་བྱས་བསྡད་ཚེ། ཐང་གི་རྡོ་ལེན་པའི་ཚབ་ཏུ།་རུམ་གྱི་བྲོ་ལྷུང་བའི་ཉེན་ཁ་འདུག ང་ཚོས་རིག་གཞུང་གློག་ཀླད་དུ་བཅུག་པར་ཚད་ལྡན་དགེ་རྒན་དགོས་པ་རེད། ང་ཚོས་སྨོན་ལམ་ཚིག་མཛོད་གློག་ཀླད་དུ་བཅུག་པ་རེད། ཚིག་མཛོད་རིག་པའང་བཅུག་ཡོད་པ་རེད། ཡིན་ནའང་། བེད་སྤྱོད་གཏོང་མཁན་ཡོད་མ་རེད། ཐ་ན་སྐྱོན་བརྗོད་བྱེད་མཁན་ཡང་མི་འདུག དེ་བས་ང་ཚོའི་ལས་ཀ་བྱེད་བཞིན་པ་ཡར་རྒྱས་འགྲོ་གིན་ཡོད་མེད་དོགས་པ་ཟ་བཞིན་ཡོད། ང་ཚོས་མཐོ་རིམ་ནས་མི་མང་ནང་དུ་མ་བལྟས་པར་མདུན་སྐྱོད་བྱས་ཀྱང་། དོན་གྱིས་ང་ཚོར་དགོས་པའི་རིག་གཞུང་འཛིན་སྐྱོང་བྱེད་ཕྱོགས་ལ་ཕན་ཐོགས་ཀྱི་ཡོད་མིན་ཡང་ཤེས་ཀྱི་མེད་སྐོར་གསུངས་སོང་།
ཐེངས་འདིའི་མཁས་པའི་བགྲོ་གླེང་གི་ཚོགས་བཅར་བ་སོ་སོའི་བརྗོད་གཞི་གཏམ་བཤད་ཡོངས་སུ་གྲུབ་རྗེས། ཚོགས་བཅར་བ་ཚང་མ་སྡེ་ཚན་གཉིས་སུ་བགོས་ཏེ། ཐེངས་འདིའི་བགྲོ་གླེང་ཚོགས་འདུ་ཡི་གྲོས་ཆོད་དོན་ཚན་ ༣༨ ཡས་མས་ཤིག་བཟོ་འགོད་བྱས་ཏེ། མ་འོངས་པར་བོད་མིའི་སྒྲིག་འཛུགས་ནས་ལས་གཞི་ལས་འཆར་ཁག་བཟོ་བར་རྨང་གཞི་ལྟ་བུར་བེད་སྤྱོད་གནང་འཆར་ཡོད་འདུག
བྱམས་པ་ཚེ་རིང་།
