རྒྱ་ནག་གཞུང་གིས་བལ་གཞུང་ལ་རོགས་དངུལ་ཨ་སྒོར་ས་ཡ་ ༡༡༨ སྤྲད་རྒྱུ་བྱས་འདུག

བལ་ཡུལ་གྱི་ཕྱི་སྲིད་བློན་ཆེན་ནག་རག་ཡེན་ཀ་ཌི་ཀ་(Narayan Khadka)དང་རྒྱ་ནག་ཕྱི་སྲིད་བློན་ཆེན་ཝང་ཡས་ (Wang Yi) གཉིས་ཀྱིས་ཐུག་འཕྲད་བྱས་ཏེ་བལ་ཡུལ་ནང་རྒྱ་ནག་གཞུང་ལ་གནོད་འཚེ་ཡོད་པའི་ལས་རིགས་སྤེལ་བཅུག་རྒྱུ་མིན་པའི་ཁས་ལེན་བྱས་ཡོད་འདུག

Nepal’s foreign minister Narayan Khadka in China for bilateral talks (Photo: Reuters)

ཟླ་འདིའི་ཕྱི་ཚེས ༡༠ ཉིན་རྒྱ་ནག་གི་ཆིན་དོ་( Qingdao) གྲོང་ཁྱེར་དུ། བལ་ཡུལ་གྱི་ཕྱི་སྲིད་བློན་ཆེན་ནག་རག་ཡེན་ཀ་ཌི་ཀ་(Narayan Khadka)དང་གཞུང་འབྲེལ་མི་སྣ་ཁག་གིས་རྒྱ་ནག་ཕྱི་སྲིད་བློན་ཆེན་ཝང་ཡས་ (Wang Yi) དང་ཐུག་འཕྲད་བྱས་ཏེ། རྒྱ་ནག་གཞུང་གིས་བལ་ཡུལ་དུ་རྒྱུད་གཅིག་ལམ་གཅིག་དང་བལ་ཡུལ་ཡར་རྒྱས་གཏོང་ཆེད་ཨ་སྒོར་ས་ཡ་ ༡༡༨ སྤྲད་རྒྱུ་བྱས་ཡོད་པ་མ་ཟད། བལ་ཡུལ་གཞུང་གིས་བལ་ཡུལ་ནང་རྒྱ་ནག་གཞུང་ལ་གནོད་འཚེ་ཡོད་པའི་ལས་རིགས་སྤེལ་བཅུག་རྒྱུ་མིན་པའི་ཁས་ལེན་བྱས་ཡོད་འདུག

རྒྱ་བལ་གཉིས་ཀྱི་ཕྱི་སྲིད་བློན་ཆེན་གཉིས་ཀྱི་ཐུག་འཕྲད་སྐབས། རྒྱ་ནག་ཕྱི་སྲིད་བློན་ཆེན་ཝང་ཡས་ཀྱིས། རྒྱ་ནག་གཞུང་གིས་བལ་ཡུལ་དུ་རྒྱུད་གཅིག་ལམ་གཅིག་གི་ལས་གཞི་དང་། བལ་ཡུལ་ཡོངས་ཀྱི་དཔལ་འབྱོར་ཡར་རྒྱས། བོད་ནས་བལ་ཡུལ་རྒྱལ་ས་ཀ་ཐི་མན་ཌུ་བར་དུ་གཟུག་འཆར་ཡོད་པའི་མེ་འཁོར་ལྕགས་ལམ། བལ་ཡུལ་དུ་འགྲིམ་འགྲུལ་གཞུང་ལམ་གསར་རྒྱག་གི་ལས་གཞི་སོགས་ལེགས་འགྲུབ་ཡོང་སླད། ཨ་སྒོར་ས་ཡ་༡༡༨ ཀྱི་རོགས་རམ་བྱས་ཡོད་སྐོར་དང་། རྒྱ་ནག་གཞུང་གིས་མུ་མཐུད་དུ་བལ་ཡུལ་གྱི་མངའ་ཁོངས་སྲུང་སྐྱོབ་དང་། མཐའ་མཚམས་ཀྱི་བདེ་འཇགས་སོགས་ཀྱི་ཐད་ལ་རོགས་འདེགས་བྱ་རྒྱུ་ཡིན་ལུགས་བརྗོད་ཡོད་འདུག་ལ། བལ་ཡུལ་གཞུང་གིས་བལ་ཡུལ་ནང་རྒྱ་ནག་གཞུང་ལ་གནོད་འཚེ་ཡོད་པའི་ལས་རིགས་སྤེལ་བཅུག་རྒྱུ་མིན་པ་དང་། རྒྱ་ནག་གཞུང་གིས་ད་ལྟ་པ་ཀི་སི་ཐན་དང་སེངྒ་ལ་གཉིས་སུ་ལུས་པའི་རྒྱུད་གཅིག་ལམ་གཅིག་གི་ལས་གཞི་རྣམས་བལ་ཡུལ་དུ་ལག་བསྟར་གང་མགྱོགས་བྱ་དགོས་སྐོར་འགྲེལ་བརྗོད་བྱས་ཡོད་འདུག

བོད་ནང་གི་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་ཇེ་ཆུང་དུ་ཕྱིན་ཚེ། རྒྱ་ནག་གཞུང་གིས་བོད་དང་བལ་ཡུལ་གྱི་མཐའ་མཚམས་སྒོ་ཕྱེས་ཏེ་ཚོང་འབྲེལ་གྱི་ལས་དོན་མུ་མཐུད་དུ་བྱ་རྒྱུ་དང་། རྒྱ་ནག་གཞུང་གིས་བལ་ཡུལ་གྱི་ཇ་དང་། སྨན་རྩྭ། ཞིང་ཁའི་ཐོན་སྐྱེད་རྣམས་ནང་འདྲེན་དང་། དེ་བཞིན་བལ་ཡུལ་གྱི་བཟོ་ལས་ཐོན་སྐྱེད་དང་དེང་རབས་ཅན་གྱི་ཞིང་ལས་ཡར་ཐོན། བལ་ཡུལ་གྱི་སློབ་མ་རྣམས་རྒྱ་ནག་གི་མཐོ་སློབ་ཁག་ཏུ་བསྐྱོད་རྒྱུ་སོགས་ལ་རོགས་རམ་བྱ་རྒྱུའི་གྲོས་ཆོད་བཞག་ཡོད་འདུག་ལ། དེ་བཞིན་རྒྱལ་ཁབ་གཉིས་ཀྱི་འབྲེལ་ལམ་གོང་མཐོར་དང་། ཞིང་ལས། འཕྲོད་བསྟེན། འགྲིམ་འགྲུལ། ཚོང་ལས་སོགས་ཀྱི་ཐོག་ཏུའང་བགྲོ་གླེང་བྱས་ཡོད་སྐོར་བསྒྲགས་འདུག

འདས་ལོའི་ཟླ ༡༢ ནང་བལ་ཡུལ་གྱི་ས་གནས་ ༧ དུ་གནས་སྡོད་བྱེད་མུས་ཡིན་པའི་འབྲུག་གི་སྐྱབས་བཅོལ་བ་རྣམས་ལ་ངོ་སྤྲོད་ལག་ཁྱེར་སྤྲད་ཡོད་པ་དང་། འདི་ལོའི་ཟླ་ ༦ ནང་བལ་ཡུལ་གཞུང་གིས་བལ་ཡུལ་དུ་གནས་སྡོད་སྐྱབས་བཅོལ་བ་གཞན་རྣམས་ལའང་ངོ་སྤྲོད་ལག་ཁྱེར་སྤྲད་རྒྱུ་ཡིན་སྐོར་བསྒྲགས་ཡོད་ཀྱང་། ད་བར་བལ་ཡུལ་གཞུང་ནས་དངོས་སུ་ལག་བསྟར་བྱེད་ཀྱི་ཡོད་པའི་གནས་ཚུལ་གང་ཡང་ཐོན་མེད་པ་རེད། བལ་ཡུལ་ནི་ཕྱི་ལོ་ ༡༩༥༡ ལོར་གཏན་འབེབ་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་བའི་རྩ་འཛུགས་ (UN 1951 Refugee Convention) ཀྱི་ཁོངས་སུ་མེད་ནའང་། རྒྱ་ནག་གཞུང་གིས་ཕྱི་ལོ་ ༡༩༥༩ ལོར་བོད་ས་ཡོངས་རྫོགས་བཙན་བཟུང་བྱས་རྗེས་བོད་མི་ཕོན་ཆེན་རྒྱ་བལ་འབྲུག་གསུམ་ནང་བཙན་བྱོལ་དུ་འབྱོར་ཡོད་ཅིང་། སྐབས་དེ་དུས་བལ་གཞུང་གིས་བལ་ཡུལ་ནང་གཞིས་ཆགས་པའི་བོད་མི་རྣམས་ལ་སྐྱབས་བཅོལ་ལག་དེབ་སྤྲད་ཡོད་ནའང་། ཕྱི་ལོ་ ༡༩༩༥ ལོ་ནས་བཟུང་བལ་གཞུང་གིས་བོད་མི་རྣམས་ལ་སྐྱབས་བཅོལ་ལག་ཁྱེར་སྤྲོད་མཚམས་བཞག་ཡོད་སྟབས། བལ་ཡུལ་ནང་དུ་གནས་སྡོད་བོད་མི་རྣམས་ལ་ལས་ཀར་འཛུལ་ཞུགས་དང་། ཐ་ན་ཁ་ལོ་བའི་ལག་འཁྱེར་ཞིག་ཀྱང་ཁྲིམས་མཐུན་གྱི་ཐོག་ནས་རག་གི་མེད་པ་རེད།

གཞན་ཡང་། རྒྱ་ནག་གཞུང་གིས་ཧི་མ་ཡ་ལའི་རི་རྒྱུད་ཁུལ་དུ་ཆགས་པའི་རྒྱལ་ཁབ་ཁག་ཏུ་དཔལ་འབྱོར་གྱི་རོགས་སྐྱོར་དང་འཛུགས་སྐྲུན་སོགས་ཀྱི་མིང་ཐོག་ནས་དབང་ཤུགས་སྐྱེད་ཐབས་བྱེད་མུས་ཡིན་པ་ལྟར། འདི་ལོའི་ཕྱི་ཟླ ༣ པར་བལ་ཡུལ་གྲོས་ཚོགས་ཀྱིས་ཨ་རིའི་རོགས་དངུལ་ཨ་སྒོར་ས་ཡ་ ༥༠༠ དྭང་ལེན་བྱས་ཏེ། ཨ་བལ་གཉིས་ཀྱིས་ ( Millennium Challenge Corporation) ལས་གཞི་དེར་མཉམ་ལས་བྱས་ཏེ། རྒྱ་ནག་གཞུང་གི་དབང་ཤུགས་རྒྱ་སྐྱེད་ལ་ཁ་གཏད་དུ་ལངས་ཡོད་ཀྱང་། ཉེ་བའི་ཟླ་ཤས་རིང་རྒྱ་བལ་གྱི་གཞུང་འབྲེལ་མགོ་ཁྲིད་དག་ཕར་འགྲོ་ཚུར་ཡོང་བྱས་ཏེ། རྒྱ་ནག་གཞུང་གིས་ཕྱོགས་ཡོངས་ནས་བལ་ཡུལ་དུ་དབང་ཤུགས་སྐྱེད་ཐབས་དང་། རྒྱ་བལ་གྱི་མཉམ་ལས་འབྲེལ་བ་ཤུགས་ཆེ་རུ་བཏང་སྟེ་ཨ་རིའི་སིམ་འཛུལ་འགོག་ཐབས་བྱེད་བཞིན་ཡོད་འདུག

གནད་དོན་དབྱེ་ཞིབ་པ་ཁག་ཅིག་གིས། རྒྱ་ནག་གཞུང་གིས་རྒྱ་བལ་མཉམ་ལས་དང་བལ་ཡུལ་འཛུགས་སྐྲུན་ཟེར་ནས་མ་འཛུགས་དང་རོགས་དངུལ་སྤྲོད་ཀྱི་ཡོད་ཀྱང་། དེ་ནི་རྒྱ་ནག་གི་དབང་ཤུགས་རྒྱ་སྐྱེད་ཐབས་དང་རྒྱུད་གཅིག་ལམ་གཅིག་གི་ལས་གཞི་ཚགས་ཚུད་ཡོང་ཆེད་ཡིན་པ་དང་། རྗེས་མ་ཧི་མ་ཡ་ལའི་རི་རྒྱུད་དུ་ཆགས་པའི་བལ་ཡུལ་སོགས་ཀྱི་དཔལ་འབྱོར་ལ་ཉམས་ཉེས་ཆེན་པོ་འགྲོ་ཉེན་ཡོད་པ་མ་ཟད། སེངྒ་ལ་བཞིན་བུ་ལོན་གྱི་འོག་ཏུ་ཚུད་སྲིད་པའི་ཚོད་དཔག་བྱེད་ཀྱི་ཡོད་འདུག

གསར་འགོད་པ། དཔལ་ལྡན།