བོད་གཞུང་མང་གཉིས་ནས་རྒྱ་གར་གྱི་རང་བཙན་ཉིན་མོ་ཐེངས་ ༧༥ པ་སྲུང་གཙི་ཞུས།

རྒྱ་གར་དབྱིན་ཇིའི་བཙན་འོག་ནས་རང་བཙན་ཐོབ་ནས་མི་ལོ་ཧྲིལ་བོ་ ༧༥ འཁོར་བའི་ཉིན་མོ་དང་བསྟུན་བོད་གཞུང་མང་གཉིས་ནས་རྒྱལ་དར་བསྒྲེངས་འཛུགས་དང་རིག་གཞུང་འཁྲབ་སྟོན་བྱས་ཏེ་སྲུང་གཙི་ཞུས་སོང་།

རྒྱ་གར་རྒྱལ་ས་ལྡི་ལི་གཙོས་རྒྱལ་ཡོངས་སུ་རྒྱ་གར་རང་བཙན་ཉིན་མོ་སྲུང་གཙི་བྱས་ཡོད་པ་དང་། ཉིན་དེར་ཆར་ཞོད་ཆེ་རྐྱེན་བོད་མིའི་སྒྲིག་འཛུགས་ནས་འཆར་ཅན་གྱི་མཛད་སྒོ་སྟབས་བདེ་དེ་འཚོགས་མེད་ཀྱང་། བཀའ་ཤག་གི་མདུན་ཐང་དུ་རྒྱ་གར་རྒྱལ་དར་བསྒྲེངས་འཛུགས་གནང་ཡོད་པ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ཚོགས་དྲ་གནས་སུ། འཛམ་གླིང་གང་སར་ཡོད་པའི་རྒྱ་གར་མི་མང་བྱིངས་ཀྱིས་རྒྱལ་ཞེན་དང་དགའ་སྤོབས་ཆེན་པོའི་ཐོག་ནས་རྒྱ་གར་རང་བཙན་ཐོབ་ནས་མི་ངོ ༧༥ འཁོར་བ་སྲུང་གཙི་བྱེད་པར་བོད་མིའི་སྒྲིག་འཛུགས་དང་བོད་མི་མང་ཡོངས་ནས་རྟེན་འབྲེལ་ཞུ་ཡི་ཡོད་སྐོར་དང་། རྒྱ་གར་གཞུང་མང་གཉིས་ཀྱིས་བཙན་བྱོལ་བོད་མིའི་སྤྱི་ཚོགས་འཛུགས་སྐྲུན་ལེགས་འགྲུབ་ཡོང་བར་ཕན་གྲོགས་གནང་བ་བཀའ་དྲིན་ཆེེན་པོ་ཡིན་ལ། ང་ཚོས་རྒྱ་གར་རྒྱལ་ཁབ་ཀྱི་རླབས་ཆེ་བའི་བྱ་བཞག་མཐའ་དག་མུ་མཐུད་ཡར་རྒྱས་གོང་འཕེལ་གྱི་ལམ་བུར་བསྐྱོད་ཐུབ་པའི་སྨོན་འདུན་ཞུ་ཡི་ཡོད་སྐོར་གསུངས་འདུག

ཉིན་རྒྱབ་ཏུ་ངྷ་ས་བོད་ཀྱི་ཟློས་གར་ཁང་གི་ཚོགས་ཁང་དུ། དྷ་ས་ས་གནས་མགོ་འཛིན་གྱི་གོ་སྒྲིག་འོག་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་མཉམ་འཛོམས་ཀྱིས་རྒྱ་གར་གཞུང་མང་གཉིས་ལ་བཀའ་དྲིན་རྗེས་དྲན་ཞུ་སླད་རྒྱ་གར་གྱི་གྲོས་ཚོགས་འཐུས་མི་ཁིར་ཤིན་ཀ་པུར་(Shri Kishan Kapoor)ལགས་སོགས་ས་གནས་ཀྱི་གནད་ཡོད་མི་སྣ་ཁག་ཅིག་ལ་སྣེ་ལེན་ཞུས་ཏེ་བོད་ཀྱི་རིག་གཞུང་འཁྲབ་སྟོན་གཟིགས་འབུལ་ཞུས་ཡོད་པ་རེད།

མཛད་སྒོའི་ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས། བོད་པ་ཚོའི་ངོས་ནས་རྒྱ་གར་ཡུལ་དང་། རྒྱ་གར་གྱི་ཡུལ་མི། རྒྱ་གར་གཞུང་བཅས་ལ་འཚམས་འདྲི་དང་། རྒྱ་གར་རང་བཙན་ཐོབ་ནས་ལོ་ངོ ༧༥ རིང་དུ་རྒྱ་གར་ཡར་རྒྱས་ཆེན་པོ་ཕྱིན་ཡོད།  རྒྱ་གར་རང་བཙན་དོན་དུ་སྐུ་སྲོག་བློས་གཏོང་མཁན་གྱི་འདས་པོ་ཚང་མར་བོད་གཞིས་བྱེས་གཉིས་ཀྱི་བོད་མི་ཡོངས་ཀྱི་ཚབ་བྱས་ནས་རྗེས་དྲན་དང་། ཁོང་ཚོའི་བཀའ་དྲིན་ལ་བརྟེན་ནས་རྒྱ་གར་ལ་རང་བཙན་ཐོབ་ཡོད་པ་ལྟར། བོད་མི་ཚོས་རང་སྲོག་བློས་བཏང་པ་དེས་མ་འོངས་བར་བོད་ལ་འབྲས་བུ་ཏན་ཏན་སྨིན་གྱི་རེད། ཅེས་གསུངས་འདུག

འདི་ལོའི་ཕྱི་ཟླ་ ༨ ཚེས་ ༡༣ ནས་ ༡༥ བར་དུ་རྒྱ་གར་གྱི་སྲིད་བློན་མུ་དྷི་མཆོག་ནས་རྒྱལ་ཡོངས་ཀྱི་ཁྱིམ་ཚང་རེ་རེ་ནས་རྒྱལ་དར་བསྒྲེངས་འཛུགས་དགོས་པའི་འབོད་སྐུལ་གནང་བ་ལྟར། བཙན་བྱོལ་བོད་མིའི་སྒྲིག་འཛུགས་དང་། གཞིས་ཆགས། སློབ་གྲྭ། དེ་བཞིན་དགོན་སྡེ་དང་ཚོགས་སྡེ། ཁྱིམ་ཚང་སོགས་ནས་ཀྱང་རྒྱལ་དར་བསྒྲེངས་འཛུགས་བྱས་པ་དང་། སྤྱི་ཚོགས་དྲ་གནས་ཁག་ཏུ་རང་བཙན་ཉིན་མོ་སྲུང་གཙི་བྱས་དང་བྱེད་མུས་རེད་འདུག

རྒྱ་གར་རྒྱལ་ས་ལྡི་ལི་གཙོས་རྒྱལ་ཡོངས་སུ་རྒྱ་གར་རང་བཙན་ཉིན་མོ་སྲུང་གཙི་བྱས་ཡོད་པ་དང་། སྲིད་བློན་མུ་དྷི་མཆོག་ནས་མཛད་སྒོའི་གསུང་བཤད་གནང་དོན། རྒྱ་གར་གྱིས་རང་ཉིད་ཀྱི་རིག་གཞུང་ལ་བརྩི་འཇོག་ཡོད་པའི་ཐོག་ནས་འཛམ་གླིང་མི་མང་གི་དཀའ་ངལ་སེལ་བར་སྟོབས་ཤུགས་ཡོད་པ་ཞིག་བསྐྲུན་དགོས། རང་ཉིད་ཀྱི་རྒྱལ་ཁབ་ཨང་དང་པོ་བཞག་སྟེ། ང་ཚོའི་མང་གཙོ་རྒྱལ་ཁབ་ཀྱི་འདྲ་མཉམ་གྱི་བསམ་བློའི་འདུ་ཤེས་སྤེལ་ཏེ་རྡོག་རྩ་གཅིག་སྒྲིལ་བྱེད་དགོས་པ་མ་ཟད། བུད་མེད་ནི་རྒྱལ་ཁབ་ཡར་རྒྱས་འགྲོ་བར་ནུས་པ་ཤུགས་ཆེན་ཐོན་པས། བུད་མེད་ཀྱི་ཐོབ་ཐང་ལ་བརྩི་མཐོང་བྱེད་དགོས་ཅིང་།ཕོ་མོ་འདྲ་མཉམ་གྱི་བསམ་བློ་འདུ་ཤེས་སྤེལ་རྒྱུ་ཧ་ཅང་གལ་ཆེན་དང་། རྒྱ་གར་མི་མང་ཡོངས་ཀྱིས་མཉམ་ལས་ཀྱི་ནུས་པ་སྤེལ་ཏེ་མ་འོངས་བའི་རྒྱ་གར་སྟོབས་ཤུགས་ལྡན་པ་ཞིག་བསྐྲུན་དགོས་སྐོར་གསུངས་ཡོད་པ་རེད།

བྱམས་པ་ཚེ་རིང་།