ར་སྦང་ལའི་དམག་སྒར་དང་ཉེན་རྟོག་པའི་བར་འཁྲུག་པ་ཤོར་ཏེ་བོད་དམག་ ༥ བཀག་ཉར་འོག་འདུག

ཟླ་འདིའི་ཕྱི་ཚེས་ ༡༣ ཉིན་ར་སྦང་ལ་ཀུན་ཕན་གླིང་གཞིས་ཆགས་སུ་རྒྱ་གར་རང་བཙན་ཐོབ་པའི་ཉིན་མོ་སྲུང་གཙིའི་ཆེད་རྒྱ་གར་གྱི་ཉེན་རྟོག་པ་དང་ས་གནས་ཀྱི་དམག་སྒར་(6 Vikas)གྱི་བོད་དམག་བར་རྐང་སྤོལ་འགྲན་སྡུར་བྱེད་སྐབས་འཁྲུག་པ་ཤོར་ཡོད་པ་མ་ཟད་ཉིན་གྲངས་ ༥ རིང་བོད་དམག་ ༥ བཀག་ཉར་འོག་བཞག་འདུག

དེ་རིང་འདི་གའི་གསར་འགོད་པས་ར་སྦང་ལ་ཀུན་ཕན་གླིང་གཞིས་ཆགས་ཀྱི་ས་གནས་འཐུས་ཚོགས་ཀྱི་ཚོགས་གཞོན་དང་གཞོན་ནུའི་ཚོགས་གཙོ་ཐུབ་བསྟན་ལགས་སུ་གནད་དོན་འདིའི་སྐོར་དྲིས་པར། ཁོང་གིས། ད་བར་དུ་ར་སྦང་ལ་གཞིས་ཆགས་ཀྱི་བོད་མི་དང་ས་གནས་ཡུལ་མི་བར་རྩོད་པ་ཤོར་མྱོང་མེད་ཀྱང་། ཁོང་ཚོས་གཞིས་ཆགས་ནང་གནས་སྡོད་བོད་མི་དང་དམག་སྒར་གྱི་དམག་མི་གཉིས་མཉམ་དུ་སྦྲེལ་ནས་བོད་པའི་དམག་མི་ཟེར་གྱི་འདུག སྤྱིར་བཏང་དམག་སྒར་ནང་ཡོད་པའི་དམག་མི་དེ་དག་བོད་པའི་དམག་མི་མ་རེད། ཁོང་ཚོ་རྒྱ་གར་གྱི་ནང་སྲིད་འོག་ཆགས་ཀྱི་ཡོད་པས་རྒྱ་གར་གྱི་དམག་མི་ཆགས་ཀྱི་ཡོད་རེད། འོན་ཀྱང་། ས་གནས་ཉེན་རྟོག་པས་དབྱེ་བ་གང་ཡང་མ་ཕྱེས་པར་ཁྱེད་ཚོ་བོད་ལ་ལོག  (Go back to Tibet) ཟེར་བ་དང་། བོད་པ་ཟེར་བ་དེ་ཁ་ཆེ་ལས་སྡུག་པ་ཡོད་སྐོར་སོགས་ཚིག་རྩུབ་རྗོད་ཀྱི་འདུག ད་ལྟའི་ཆར་ས་གནས་ཉེན་རྟོག་པས་ར་སྦང་ལ་ཀུན་ཕན་གླིང་གཞིས་ཆགས་ཀྱི་བོད་མི་ཚོང་ཁང་དང་ཟ་ཁང་སོགས་ལ་ཕྱག་ལས་གནང་མཁན་རྣམས་ཕྱིར་ཕུད་གཏང་དགོས་པ་དང་། སྡོད་ཆོག་གི་མེད་སྐོར་བརྗོད་དེ་མི་མང་གི་འཚོ་བར་བརྡབ་གསིག་གཏོང་གི་ཡོད་སྐོར་བརྗོད་བྱུང་།

ཡང་ཐུབ་བསྟན་ལགས་ཀྱིས། ས་གནས་འཐུས་ཚོགས་ནས་དམག་སྒར་དང་གཞིས་ཆགས་གཉིས་ཁ་ཁ་ཡིན་པ་དང་། དམག་སྒར་གྱི་འཁྲུག་པའི་ནང་ང་ཚོ་གཞིས་ཆགས་ཀྱི་མི་ལ་འབྲེལ་བ་མེད། ལྷག་པར་དུ་འཁྲུག་པ་འདིའི་ནང་ལོགས་ལ་དམག་མི་གཅིག་པུ་ཡོད་པ་ལས་གཞིས་ཆགས་ཀྱི་མི་མེད། དེ་བཞིན་དམག་མི་དེ་དག་རྒྱ་གར་གྱི་ནང་སྲིད་ཀྱི་མངའ་འོག་ཏུ་ཡོད་པ་ལས་ང་ཚོ་བོད་པའི་དམག་མི་མ་རེད་ཟེར་ནས་གནད་དོན་གཙང་མ་བཟོ་སླད་དུ། ཕྱི་ཚེས་ ༡༤ ཉིན་ས་གནས་མགོ་འཛིན་དང་ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་གཞོན། རང་བདེན་ཚོགས་ཆུང་གི་ཚོགས་གཙོ། གཞོན་ནུའི་ཚོགས་གཙོ། བརྒྱ་ཤོག་བདུན་གྱི་བརྒྱ་དཔོན། དྭང་ཟུར་གྱི་སྐུ་ཚབ་བཅས་ས་གནས་ཀྱི་ཁྲིམས་བཟོ་ལྷན་ཁང་(MLA)དུ་བཅར་ཡོད་ཀྱང་། ལམ་བར་དུ་ཉེན་རྟོག་པ་དང་ཡུལ་མི་མང་པོས་མདུན་བཀག་ཡོད་པ་མ་ཟད། ཁག་ཅིག་ནས་ས་གནས་མགོ་འཛིན་གྱི་རླངས་འཁོར་ལ་རྡོ་དང་རྒྱུག་པ་སོགས་ཀྱིས་གཞུས་ཏེ་ཁ་ལོ་བར་རྨས་སྐྱོན་བཟོས་ཡོད་པར་བརྟེན། ད་ལྟ་སྒང་ཏོག་གི་སྨན་ཁང་ཞིག་ཏུ་སྨན་བཅོས་བྱེད་བཞིན་ཡོད་འདུག

གསར་འགོད་པས་ད་ལྟ་དཀའ་རྙོག་འགྲིག་འཇགས་བྱུང་ཡོད་མེད་དྲིས་པར་ཁོང་གིས། གནད་དོན་འགྲིག་འཇགས་ཡོང་ཆེད་ས་གནས་ཁྲིམས་བཟོ་ལྷན་ཁང་དུ་ཕྱིན་ཡོད་ཀྱང་། ལམ་བར་དུ་ཉེན་རྟོག་པ་དང་ཡུལ་མི་མང་པོས་ངོ་རྒོལ་བྱས་ཏེ་རྡོ་དང་རྒྱུག་པ་སོགས་ཀྱིས་གཞུས་ཏེ་འགྲོ་རུ་བཅུག་མེད་ཀྱང་།  མུ་མཐུད་དུ་འགྲིག་འཇགས་ཡོང་ཐབས་ལ་འབད་བརྩོན་བྱེད་བཞིན་ཡོད་སྐོར་དང་། ད་ལྟའི་ཆར་སྐོར་སྲུང་བས་ཉེན་ཁ་ཆེན་པོ་ཡོད་པ་མཐོང་ནས་ཁྲིམས་བཟོ་ལྷན་ཁང་དུ་ཡོང་མི་དགོས་པའི་བརྡ་ལན་བཏང་ཡོད་པ་མ་ཟད། ས་གནས་ཉེན་རྟོག་པས་ཟ་ཁང་དང་ཚོང་ཁང་སོགས་ལ་ཡོང་ཆོག་གི་མེད་ཟེར་གྱི་ཡོདཔས། བོད་མིའི་མཉམ་འབྲེལ་གྱི་གོ་སྒྲིག་འོག་ར་སྦང་ལ་གཞིས་ཆགས་སུ་གནས་སྡོད་བོད་མི་རྣམས་ཀྱི་བཟའ་ཆས་རིགས་མཁོ་སྒྲུབ་བྱེད་ཐབས་གནང་གི་ཡོད་སྐོར་བརྗོད་བྱུང་།

ཕྱི་ལོ་ ༡༩༩༣ ལོར་ས་གནས་ཀྱི་དམག་སྒར་གཞན་ཞིག་དང་ས་གནས་ཉེན་རྟོག་པའི་བར་འཁྲུག་པ་ཤོར་རྗེས། ཉེས་སྐྱོན་ཡོངས་རྫོགས་ར་སྦང་ལ་གཞིས་ཆགས་ལ་བཙུགས་པར་བརྟེན། བོད་མི་རྣམས་ལ་ཟ་ཁང་དང་ཚོང་ཁང་སོགས་སྒོ་བརྒྱབ་ཏུ་བཅུག་སྟེ་ཕྱིར་ཕུད་བཏང་བར་བརྟེན། ར་སྦང་ལའི་ད་ལྟའི་ས་གནས་(Namchi)རྫོང་ཞེས་པར་གནས་སྤོར་དགོས་བྱུང་ཡོད་པ་དང་། སྐབས་དེར་དམག་སྒར་དེའི་བོད་དམག་ཁག་ཅིག་ཀྱང་ཕྱིར་ཕུད་བཏང་བའི་གནས་ཚུལ་བྱུང་ཡོད་འདུག

གསར་འགོད་པ། བསྟན་འཛིན་ཕུར་བུ།