རྒྱ་ནག་གཞུང་གིས་ཐའེ་ཝན་གྱི་གནད་ཡོད་མི་སྣ་ ༧ ལ་དཔལ་འབྱོར་དང་འགྲོ་འོང་བཀག་སྡོམ་གྱི་ཉེས་ཆད་བཅད་ཡོད་པ་མ་ཟད་མཚོ་ཁུལ་དུ་དམག་དོན་གནམ་གྲུ་དང་མཚོ་གྲུ་མང་པོ་སྡེབ་གཏོང་བྱས་ཏེ་འཇིགས་སྐུལ་མུ་མཐུད་བྱེད་ཀྱིན་ཡོད་འདུག
ཨ་རིའི་གྲོས་ཚོགས་འོག་མའི་ལྕམ་སྐུ་པེ་ལོ་སི་མཆོག་གི་དབུ་འཁྲིད་པའི་ཨ་རིའི་གྲོས་ཚོགས་ཀྱི་འཐུས་མི་ཁག་ཅིག་ཐའེ་ཝན་ནང་གཞུང་འབྲེལ་གཟིགས་སྐོར་དུ་ཕེབས་ཏེ། སྲིད་འཛིན་ཚའེ་ཡེན་ཝུན་སོགས་མཐོ་རིམ་གནད་ཡོད་མི་སྣ་མང་པོར་མཇལ་མོལ་གནང་ཡོད་པར་བརྟེན། ཁ་སང་རྒྱ་ནག་གཞུང་ཕྱོགས་ནས་གནས་ཚུལ་སྤེལ་བ་ལྟར་ན། ཐའེ་ཝན་རང་བཙན་རྒྱལ་ཁབ་ཡིན་པར་ངན་སྐུལ་བྱས་པའི་ཉེས་མིང་འོག ཐའེ་ཝན་གྱི་ཨ་རིའི་གཞུང་ཚབ་པ་སི་ནི་ཡོ་( Hsiao Bi-khim)ལགས། ཐའེ་ཝན་གྱི་བདེ་སྲུང་དྲུང་ཆེ་ཝེན་ལིང་ཏོང་(Wellington Koo)ལགས། ཕྱི་སྲིད་བློན་ཆེན་ཇོ་སི ( Joseph Wu)ལགས། ཁྲིམས་བཟོ་ལྷན་ཁང་གི་ཝང་ཏིང་ཡུ (Wang Ting-yu)ལགས། ཁྲིམས་བཟོ་ལྷན་ཚོགས་ཀྱི་ཚོགས་གཙོ་ཀར་ཆེན་མིང་(Ker Chien-ming)ལགས། ཐའེ་ཝན་གྱི་་ཁྲིམས་བཟོ་ཁང་གི་མགྲིན་ཚབ་པ་གཞོན་པ་ཚའེ་ཆི་ཆང་(tsai Chi-chang)ལགས། དྲུང་ཆེའི་ལས་རོགས་ལིན་ཧྥེ་ཧྥན་Lin Fei-fan)ལགས་བཅས་ལ་དཔལ་འབྱོར་གྱི་ཉེས་ཆད་གཅད་རྒྱུ་ཡིན་པ་མ་ཟད། ཁོང་རྣམས་རྒྱ་ནག་སྐམ་ས་དང་ཧོང་ཀོང་། ཨོ་མིན་(Macau)བཅས་ཀྱི་ནང་དུའང་འགྲོ་སྐྱོད་དང་ཚོང་འབྲེལ་གྱི་ལས་དོན་གཉེར་མི་ཆོག་པ། དེ་བཞིན་ཁོང་རྣམས་ཀྱི་ནང་མི་དང་། འབྲེལ་བ་ཡོད་པའི་ཚོགས་སྡེ་དང་མ་འཛུགས་མཁན་རྣམས་ཀྱང་རྒྱ་ནག་ནང་འགྲོ་འོང་མི་ཆོག་པའི་ཐག་གཅོད་བྱས་ཡོད་འདུག
གཞན་ཡང་། རྒྱ་ནག་གཞུང་གིས་ཐའེ་ཝན་གྱི་མཚོ་འགག་ཁུལ་དུ་དམག་གི་སྟོབས་ཤུགས་ངོམས་ཏེ། ཨ་ཐའེ་གཉིས་ཀྱི་མཉམ་ལས་འབྲེལ་བར་མཐའ་གཅིག་ཏུ་ངོ་རྒོལ་ཡོད་པའི་དྲག་པོའི་ཉེན་བརྡ་ནན་པོ་བཏང་དང་གཏོང་བཞིན་ཡོད་པ་ལྟར། ཁ་སང་རྒྱ་ནག་གཞུང་གིས་ཐའེ་ཝན་གྱི་མཚོ་ཁོངས་སུ་བཅིངས་གྲོལ་དམག་གི་Su-30 རྟགས་ཅན་དང་། J-11 ། J- 16 ། Y-8 རྟགས་ཅན་ཟེར་བ་སོགས་ཚུད་པའི་འཐབ་འཁྲུག་གནམ་གྲུ་ ༡༧ དང་མཚོ་གྲུ་ ༥ མངག་གཏོང་བྱས་ཏེ། མུ་མཐུད་ཐའེ་ཝན་གཞུང་མང་གཉིས་ལ་འཇིགས་སྐུལ་བྱས་དང་བྱེད་བཞིན་ཡོད་འདུག
རྒྱ་ནག་གཞུང་གི་དྲག་པོའི་འཇིགས་སྐུལ་དེར་ཐའེ་ཝན་བདེ་སྲུང་ལས་ཁུངས་ཀྱིས། རྒྱ་ནག་གཞུང་གི་ཚད་ལས་འདས་པའི་བྱ་སྤྱོད་ལ་སྐྱོན་བརྗོད་དང་། ཐའེ་གཞུང་གིས་འཇིགས་ཞུམ་གང་ཡང་མེད་པར། རྒྱ་ནག་གཞུང་གི་གནམ་མཚོ་གཉིས་ཀྱི་དམག་མིར་ཐའེ་ཝན་གྱི་ས་མཚོ་གནམ་གསུམ་གྱི་དམག་མིས་རྒོལ་ལན་དྲག་པོ་བསློག་རྒྱུ་ཡིན་པའི་ཉེན་བརྡ་བཏང་ཡོད་འདུག
ཟླ་འདིའི་ཕྱི་ཚེས ༣ ཉིན་ཨ་རིའི་གྲོས་ཚོགས་འོག་མའི་ལྕམ་སྐུ་པེ་ལོ་སི་དང་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝུན་མཆོག་གིས་དབུ་འཁྲིད་པའི་ཆེས་མཐོའི་དཔོན་རིགས་ལྷན་ཚོགས་ཐོག་དབུ་འཁྲིད་རྣམས་མཇལ་འཕྲད་གནང་ཡོད་པ་དང་། དེ་བཞིན་ཟླ་འདིའི་ཕྱི་ཚེས་ ༡༣ ཉིན་ཡང་བསྐྱར་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཀེ་( Ad Markey )སྣེ་འཁྲིད་ནས་ཨ་རིའི་གཞུང་འབྲེལ་མི་སྣ་ཁག་ཅིག་ཐའེ་ཝན་དུ་འབྱོར་ཏེ། ཉིན་གྲངས ༢ རིང་གི་གཞུང་འབྲེལ་འཚམས་གཟིགས་སོགས་བྱས་ཏེ། ཨ་ཐའེ་གཉིས་ཀྱིས་ཐའེ་ཝན་མཚོ་འགག་བརྟན་བརླིང་གནས་ཐབས་དང་། ཨ་རིས་ཐའེ་ཝན་དེ་རང་སྐྱོང་རྒྱལ་ཁབ་ཚད་ལྡན་ཞིག་ཡིན་པར་ངོས་འཛིན་ཡོད་སྐོར་གསུངས་ཡོད་པ་རེད།
ཟླ་འདིའི་ཕྱི་ཚེས་ ༡༡ ཉིན་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་ཝང་ཝན་ཕིན་( Wang Wen bin) གྱིས། ཐའེ་ཝན་གྱི་སྲིད་འཛིན་སོགས་ཀྱིས་ཐའེ་ཝན་མི་མང་ལ་བརྡ་ལན་ངན་པ་ཞིག་སྤྲད་སོང་ལ། རྒྱལ་ཁབ་ཀྱི་ཁ་བྲལ་རིང་ལུགས་པ་དང་། ཐའེ་ཝན་རང་བཙན་དུ་འདོད་པའི་རང་གཤིས་ངོ་མ་དེ་མངོན་ཡོང་གི་འདུག ང་ཚོས་ལོ་རྒྱུས་ཀྱི་འཕེལ་རིམ་དང་བསྟུན་ནས། རྒྱ་ནག་མི་མང་གི་འདོད་མོས་བཞིན་མཚོ་འགག་གཉིས་གོང་བུ་གཅིག་ཏུ་བསྒྲིལ་འདོད་ཡོད་ཀྱང་། ཐའེ་ཝན་རང་བཙན་དུ་འདོད་མཁན་ཁ་བྲལ་བ་རྣམས་འཆི་ལམ་དུ་གང་མགྱོགས་འདེད་ཐབས་ཤིག་དང་། ཐའེ་ཝན་རྐྱེན་ངན་གྱི་གནས་སུ་བརྗངས་པ་ཡིན་ཚུལ་བསྒྲགས་ཡོད་པ་རེད།
གཞན་ཡང་། ཟླ་འདིའི་ཟླ་མགོ་ནས་རྒྱ་ནག་གཞུང་གིས་ཐའེ་ཝན་གྱི་མཚོ་འགག་ཁུལ་དུ་དམག་དོན་གྱི་ལས་འགུལ་མང་པོ་ཞིག་སྤེལ་མུས་ཡིན་པ་ལྟར། ཟླ་འདིའི་ཕྱི་ཚེས ༨ ཉིན་ཨ་རི་དང་། ཨོ་གླིང་། ཉི་ཧོང་བཅས་ཀྱིས་རྒྱ་ནག་གཞུང་གིས་ཐའེ་ཝན་གཞུང་མང་གཉིས་ཀྱི་བདེ་འཇགས་ལ་གནོད་པའི་དམག་དོན་ལས་འགུལ་སྤེལ་མཚམས་འཇོག་དགོས་པའི་ཉེན་བརྡ་བཏང་འདུག་ལ། ཨ་རིའི་མཐུན་ཕྱོགས་རྒྱལ་ཁབ་དེ་གཉིས་ཀྱིས་ཨ་རི་དང་མཉམ་དུ་ཐའེ་ཝན་གྱི་མཚོ་འགག་བདེ་འཇགས་ཡོང་བར་མཉམ་ལས་བྱ་རྒྱུ་ཡིན་སྐོར་བསྒྲགས་ཡོད་ཀྱང་། རྒྱ་ནག་གཞུང་གིས་མུ་མཐུད་དུ་ཐའེ་ཝན་མཚོ་འགག་ཁུལ་དུ་དམག་དོན་གྱི་ལས་འགུལ་སྤེལ་དང་སྤེལ་མུས་ཡིན་པ་མ་ཟད། རྒྱ་ནག་དང་ཨ་རི་བར་གྱི་མཉམ་ལས་སོགས་ཚུད་པའི་གནད་དོན་ ༨ ཕྱིར་འཐེན་བྱས་ཏེ་རྒོལ་ལན་སྤྲད་ཡོད་པ་དང་། ཐའེ་ཝན་དུའང་ཚོང་རྫས་རིགས་བཀག་སྡོམ་བྱས་ཡོད་པ་རེད།
གསར་འགོད་པ།་དཔལ་ལྡན།
