དགེ་བཤེས་ལྷག་རྡོར་ལགས་ཀྱིས་དཔེ་སྟོན་སློབ་གྲྭའི་སློབ་ཕྲུག་གི་ཕ་མ་རྣམས་ལ་བཀའ་སློབ་ལམ་སྟོན་གནང་།

དགེ་བཤེས་ལྷག་རྡོར་ལགས་ཀྱིས་བོད་ཀྱི་ཆོས་རིག་གོང་སྤེལ་གཏོང་ཐབས་དང་ཕྱི་ནང་གཉིས་ཀྱི་འཕྲོད་བསྟེན་ལ་དོ་སྣང་བྱ་རྒྱུ་གལ་ཆེན་ཡིན་པའི་ལམ་སྟོན་སོགས་གནང་སོང་།

དེ་རིང་ཉིན་རྒྱབ་ཆུ་ཚོད་ ༢ པའི་སྟེང་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་ཤེས་ཡོན་སློབ་སྟོན་ཚོགས་ཆུང་གི་ཚོགས་གཙོ་དགེ་བཤེས་ལྷག་རྡོར་མཆོག་གིས་དཔེ་སྟོན་སློབ་གྲྭའི་སློབ་ཕྲུག་གི་ཕ་མ་རྣམས་ལ་བཀའ་སློབ་གནང་ཡོད་ཅིང་། སྐབས་དེར་དགེ་བཤེས་ལགས་ཀྱིས་བོད་ཀྱི་རིག་གཞུང་གོང་མཐོར་དང་དར་སྤེལ་བྱ་རྒྱུ་ནི་བོད་མིའི་འགན་འཁྲི་ཡིན་སྐོར་སོགས་གསུངས་སོང་།

མཛད་རིམ་གྱི་ཐོག་མར་བོད་མི་མང་སྤྱི་འཐུས་དང་དཔེ་སྟོན་སློབ་གྲྭའི་དགེ་རྒན་ཕ་མའི་ཚོགས་ཆུང་གི་སྐབས་ལྔ་པའི་ཚོགས་གཙོ་དོན་གྲུབ་བཀྲ་ཤིས་ལགས་ཀྱིས། དྷ་ས་ཕ་མའི་ཚོགས་ཆུང་གི་ངོ་སྤྲོད་དང་འབྲེལ་ད་ལྟ་དང་མ་འོངས་པའི་དཔེ་སྟོན་སློབ་གྲྭའི་སློབ་ཕྲུག་གི་ཤེས་ཡོན་ཐད་འཛིན་སྐྱོང་གིས་མུ་མཐུད་དུ་ཤུགས་བརྒྱག་དགོས་སྐོར་དང་། བཙན་བྱོལ་བོད་མིའི་སྤྱི་ཚོགས་དང་ལྷག་པར་དྷ་སའི་ཁུལ་དུ་སློབ་གྲྭ་མང་པོ་ཡོད་ཀྱང་། སློབ་གྲྭ་མང་པོའི་ནང་དུ་བོད་ཀྱི་བྱིས་པ་ཉུང་དྲགས་པའི་དཀའ་ངལ་གྱིས་སློབ་གྲྭ་སྒོ་བརྒྱབ་དགོས་ཁེལ་གྱི་ཡོད་རེད། འོན་ཀྱང་། དཔེ་སྟོན་སློབ་གྲྭ་ལྟ་བུར་མཚོན་ན། ལོ་རེ་བཞིན་དུ་སློབ་ཕྲུག་མང་དྲགས་ནས་འཛིན་ཁང་དང་ཉལ་ཁང་སོགས་ཀྱི་དཀའ་ངལ་འཕྲད་བཞིན་ཡོད་པ་དེ་ཕལ་ཆེར་སེལ་ཡོད་སྐོར་དང་། སློབ་གྲྭར་སློབ་ཕྲུག་མང་པོ་ཡོང་བའི་རྒྱུ་མཚན་ནི་དཔེ་སྟོན་སློབ་གྲྭའི་དགེ་རྒན་གྱིས་སློབ་ཕྲུག་རྣམས་ལ་བོད་ཀྱི་རིག་གཞུང་དང་ཤེས་ཡོན་སྲིད་ཇུས་ཀྱི་སློབ་སྟོན་ཡག་པོ་གནང་ཡོད་སྐོར་གསུངས་སོང་།

དེ་ནས་བཙན་བྱོལ་བོད་མི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ཚོགས་གཙོ་དགེ་བཤེས་ལྷག་རྡོར་ལགས་ཀྱིས། ཤེས་ཡོན་སྲིད་ཇུས་གཏན་ལ་ཕབ་ནས་ལག་ལེན་བསྟར་མགོ་འཛུགས་ཏེ་ལོ་ ༡༧ ཙམ་ཕྱིན་ཡོད་རེད། དེར་བརྟེན་རྣམ་པ་ཚོས་ཤེས་ཡོན་སྲིད་ཇུས་ཡག་པོ་ཀློག་སྟེ་ཉིན་རེའི་སློབ་གྲྭའི་འཛིན་སྐྱོང་དང་འཛིན་གྲྭའི་ནང་དུ་ལག་ལེན་བསྟར་དགོས་པ་ནི་གལ་ཆེན་པོ་ཡིན་ཞིང་། ཤེས་ཡོན་སྲིད་ཇུས་ནི་འགྲོ་བ་མི་སྤྱིའི་ཁེ་ཕན་ལ་མ་གནོད་པར་མི་རིགས་སོ་སོར་ཁེ་ཕན་ཡོད་པ་ཞིག་དགོས་ཀྱི་ཡོད་རེད། ལྷག་པར་དུ་བོད་པ་ལ་ཐུན་མོང་མ་ཡིན་པའི་རིག་གཞུང་དང་ངོ་བོ་ཧ་ལས་པ་ཞིག་ཡོད་སྟབས།  བོད་པའི་ཆོས་དང་རིག་གཞུང་སྲུང་སྐྱོབ་དང་མི་ཉམས་རྒྱུན་འཛིན། ཡར་རྒྱས་གཏང་དགོས་པའི་སྐོར་དང་། བོད་ཀྱི་སྐད་ཡིག་དང་རིག་གཞུང་འཛམ་གླིང་སྤྱི་ཡོངས་སུ་དར་སྤེལ་བྱ་གལ་ཆེན་པོ་ཡིན་པའི་སྐོར།  ༧གོང་ས་མཆོག་གི་བཀའ་སློབ་གཞིར་བཟུང་ཕྱིའི་མི་ལ་མཐུན་སྒྲིལ་བྱེད་ན་ཕན་ཚུན་གཉིས་ཀར་ཕན་གྱི་ཡོད་སྐོར་སོགས་གསུངས་སོང་།

ཡང་ཁོང་གིས། མཐོང་ཐོས་སུ་གྱུར་བའི་རིག་གཞུང་གི་སྒྱུ་རྩལ་དེ་དག་ངོ་སྤྲོད་དང་འཛིན་སྐྱོང་བྱ་དགོས་རྒྱུ་ནི་གལ་ཆེན་པོ་ཡིན་པ་དང་། འདས་པའི་གནས་ཚུལ་ཤེས་དགོས་པ་དང་མ་འོངས་པར་བསམ་བློ་གཏང་དགོས་པ་ནི་གལ་ཆེན་པོ་རེད། འདས་པ་ནས་སློབ་སྦྱོང་བླངས་ཏེ། མ་འོངས་པར་གྲ་སྒྲིག་བྱ་དགོས་རེད་དེ། ད་ལྟའི་སྤྱི་ཚོགས་ཀྱི་གནས་སྟངས་ཤེས་དགོས་པ་དང་། དེང་སང་བེད་སྤྱོད་གཏོང་བཞིན་པའི་ཅ་དངོས་དེ་དག་གི་མིང་བསྒྱུར་དགོས་ཤིང་། སྒེར་སོ་སོས་གཞུང་ལ་བརྟེན་མི་དགོས་པར་གསར་གཏོད་བྱ་རྒྱུ་ནི་གལ་ཆེན་པོ་ཡིན་སྐོར་དང་། བོད་པའི་ཆོས་དང་རིག་གཞུང་གི་སྙིང་པོ་ནི་འཚེ་བ་མེད་པ་ཡིན་ཞིང་། འཚེ་བ་མེད་པ་དང་དབུ་མའི་ལམ་གྱི་སྲིད་ཇུས་ལག་བསྟར་ཚད་ལྡན་བྱ་དགོས་པའི་བླང་དོར་ལམ་སྟོན་གནང་སོང་།

ཡང་དགེ་བཤེས་ལགས་ཀྱིས། མི་རྣམས་འདུག་ཁོམ་མེད་པར་བྲེལ་ཟིང་ངང་ནས་སྒོར་མོའི་ཆེད་དུ་འདུར་རྒྱུག་བྱེད་ཀྱི་ཡོད་པ་ལས། གཏན་གྱི་བདེ་བའི་ཆེད་དུ་རྒྱུག་མཁན་ཉུང་ཉུང་ཡིན། འོན་ཀྱང་། དེ་ལྟར་ཕྱི་ཡི་དཔལ་འབྱོར་ཡར་རྒྱས་གཏོང་སླད་དུ་འབད་བརྩོན་བྱ་ཆོག་གི་ཡོད་ཀྱང་། རྒྱལ་ཁབ་སྤྱི་ཡོངས་དཔལ་འབྱོར་གྱི་རྗེས་སུ་རྒྱུག་སྟེ། དེང་སྐབས་འཛམ་གླིང་ས་ཕྱོགས་གང་སར་གཏེར་ཁ་སྔོག་འདོན་དང་། རྩི་ཤིང་གཅོད་འབྲེག་སོགས་བྱས་ནས། མི་རྣམས་ཀྱི་འགྲོ་འདུག་ལ་གནོད་འཚེ་གཏོང་མུས་ཡིན་པ་རེད། མི་ལོ་འདི་དག་གི་རིང་ལ་རིམས་ནད་སོགས་ཀྱིས་དཀའ་ངལ་འོག་ནས། མི་རྣམས་ཀྱི་སེམས་ཁམས་འཕྲོད་བསྟེན་ལ་གནོད་འཚེ་ཆེན་པོ་ཐེབས་ཡོད་པས། ཚང་མས་མི་དང་མིའི་བར་འཆམ་མཐུན་དང་། ཕན་ཚུན་རོགས་འདེགས་སོགས་བྱས་ནས། སྤྱི་ཚོགས་སྤྱི་ཡོངས་ཀྱི་ཕན་བདེ་ལ་དམིགས་ནས་རང་ནུས་ཅི་ལྕོགས་ཀྱིས་སྲི་ཞུ་བསྒྲུབ་སྟེ། དབང་པོའི་གཞན་དབང་དུ་མ་སོང་བར། ཡིད་ཀྱི་དབང་པོར་བྱམས་བརྩེ་དང་། སྙིང་རྗེ་སོགས་གོམས་འདྲིས་ཐེབས་པར་བྱས་ཏེ། ནང་སེམས་ཀྱི་བདེ་སྐྱིད་དོན་དང་ལྡན་པ་བསྐྲུན་ཐུབ་ཚེ། མིའི་རིགས་ཀྱི་ཕྱི་ནང་གཉིས་ཀྱི་འཕྲོད་བསྟེན་ལ་ཕན་ཐོགས་ཡོད་པ་དང་། ཤེས་ཡོན་གཙོ་བོར་དམིགས་ནས་འཕྲོད་བསྟེན་སོགས་ལ་དོ་སྣང་མ་བྱས་པར་གཞག་རྒྱུ་མེད་པར། ཤེས་ཡོན་དང་འཕྲོད་བསྟེན་གཉིས་ཀར་དོ་དབྱིངས་བྱ་དགོས་སྐོར་སོགས་གསུངས་སོང་།

ཡང་ཁོང་གིས། སློབ་ཕྲུག་དེ་དག་གི་ཕ་མ་ཚོས་དངོས་ཡོད་ཀྱི་གནས་ཚུལ་ལ་བདེན་པའི་ཆ་ནས་བརྟག་དཔྱད་བྱ་དགོས་པ་ལས། ཕྱོགས་ཞེན་དང་བླུན་པོ་ཆུ་སྣ་གར་འཁྲིད་བཞིན་མ་བྱས་པར། སོ་སོས་རིག་པའི་ལམ་ནས་བརྟག་དཔྱད་དང་། དགའ་ཞེན་ཡོད་པའི་མིར་བསྟོད་པ་དང་གཞན་ལ་སྨད་པ་རྐྱང་རྐྱང་གི་དུས་འདའ་པར་བྱ་མི་རུང་བར། མིའི་རིགས་ཀྱི་བླ་ན་མེད་པའི་རྣམ་དཔྱོད་སྤྱད་དེ་བསམ་བློ་བཟང་ཕྱོགས་ནས་གཏང་རྒྱུ་དང་། ལུས་ནི་སེམས་ཀྱི་བྲན་གཡོག་ལྟ་བུ་ཞིག་ཡིན་པས། རང་ལུས་ཉོན་མོངས་ཀྱི་དབང་འོག་ཏུ་མ་ཤོར་བ་བྱས་ཏེ། ཕྱོགས་ཡོངས་ནས་བསམ་བློ་བཟང་ཕྱོགས་ནས་གཏང་རྒྱུ་དང་། བསམ་བློ་རྒྱ་སྐྱེད་ནས་བློ་ཕྱོགས་ལྷུང་མེད་པར། ཕུགས་རྒྱང་རིང་པོར་རང་གཞན་ཚང་མར་ཕན་བདེ་བསྐྲུན་དགོས་སྐོར་སོགས་གསུངས་སོང་།

 གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། དཔལ་ལྡན།