རྒྱ་ནག་གཞུང་གིས་བོད་མི་རྣམས་ལ་བཙན་གྱིས་ངལ་རྩོལ་བྱེད་དུ་འཇུག་གི་ཡོད་པའི་སྙན་ཐོ་བཏོན།

རྒྱ་ནག་གཞུང་གིས་བོད་མི་དང་ཡུ་གུར་བ་སོགས་གྲངས་ཉུང་མི་རིགས་རྣམས་ངལ་རྩོལ་བསྒྱུར་བཀོད་ཁང་དུ་བཅུག་སྟེ་བཙན་གྱིས་ངལ་རྩོལ་བྱེད་དུ་འཇུག་བཞིན་ཡོད་པའི་སྙན་ཐོ་ཞིག་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐོག་འཁུར་གྱི་ཡོད་འདུག

Residents line up inside a vocational training center in Artux, in western China’s Xinjiang region, Dec. 3, 2018. Critics say China uses some of these facilities as detention camps for forced labor.

འདི་ལོའི་ཕྱི་ཟླ་ ༩ ཚེས་ ༡༢ ནས་ ༡༠ ཚེས་ ༧ ཉིན་བར་ཇེ་ནི་ཝ་རུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ པ་དེ་འཚོག་རྒྱུ་ཡིན་པ་ལྟར། ཟླ་འདིའི་ཕྱི་ཚེས ༡༦ ཉིན་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་དམིགས་བསལ་སྐུ་ཚབ་སྐུ་ཞབས་ཀྲོ་མོ་ཡ་( Tomoya Obakaata ) ལགས་ཀྱིས། རྒྱ་ནག་གཞུང་གིས་བོད་དང་ཡུ་གུར། ཀར་ཛཱག་སོགས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་ངལ་རྩོལ་བསྒྱུར་བཀོད་ཁང་སོགས་བཙུགས་ཏེ། གྲངས་ཉུང་མི་རིགས་རྣམས་ལ་བྲན་གཡོག་བཞིན་ངལ་རྩོལ་བཙན་གྱིས་བྱེད་དུ་འཇུག་གི་ཡོད་པའི་ཤོག་ངོས་ ༢༠ ཅན་གྱི་སྙན་ཐོ་ཞིག་འདོན་སྤེལ་གནང་ཡོད་པ་དང་། སྙན་ཐོ་དེ་ལྷན་ཚོགས་ཀྱི་དཔྱད་གཞི་རུ་འཁུར་གྱི་ཡོད་འདུག

སྙན་ཐོ་དེའི་ནང་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་བོད་ཀྱི་རོང་འབྲོག་མང་ཚོགས་རྣམས་བཙན་གྱིས་གནས་སྤོར་བྱེད་དུ་བཅུག་སྟེ། ལག་རྩལ་སོགས་ཞན་པའི་རོང་འབྲོག་མང་ཚོགས་ལ་གླ་ཆ་ཉུང་ཉུང་རེ་སྤྲད་དེ། ངལ་རྩོལ་ཁང་དུ་འགྲོ་འདུག་སྤྱོད་གསུམ་ལ་ལྟ་རྟོག་ནན་པོ་བྱས་ཏེ་བྲན་གཡོག་བཞིན་ངལ་རྩོལ་བྱེད་དུ་འཇུག་གི་ཡོད་སྐོར་སོགས་བརྗོད་འདུག

ཡང་སྙན་ཐོ་དེའི་ནང་། རྒྱ་ནག་གཞུང་གིས་བཙན་གྱིས་གྲངས་ཉུང་མི་རིགས་རྣམས་དང་། ཐ་ན་བྱིས་པ་ཚོ་ལའང་ངལ་རྩོལ་བྱེད་དུ་འཇུག་གི་ཡོད་པ་མ་ཟད། བྱིས་པ་དང་ན་གཞོན་ཚོ་བཙན་གྱིས་མི་རིགས་མཉམ་བསྲེས་ཀྱི་སྲིད་ཇུས་འོག་ནས་གཉེན་སྒྲིག་བྱེད་དུ་འཇུག་གི་ཡོད་པ་དང་། དེ་བཞིན་ངལ་རྩོལ་བ་ཚོར་བརྙན་མིག་སོགས་ནས་ལྟ་ཞིབ་ནན་པོ་དང་། དྲ་ལམ་བཀོལ་སྤྱོད་བྱེད་པར་དམ་དྲག བཙན་གཡེམ་རྩུབ་སྤྱོད་སོགས་ཚུད་པའི་མི་ཆོས་ལས་འདས་པའི་བཙན་གནོན་བྱེད་མུས་ཡིན་པ་དང་། ལྷག་པར་དུ་ཡུ་གུར་གྱི་ངལ་རྩོལ་བ་རྣམས་ལ་ཚད་ལས་འདས་པའི་བཙན་གནོན་བྱས་ཏེ། ཉེས་མེད་འཛིན་བཟུང་བྱས་ཏེ་ངལ་རྩོལ་དུ་བཀོལ་བ་དང་མི་ཚོང་རྒྱག་པ་སོགས་ཡོང་གི་ཡོད་སྐོར་བརྗོད་འདུག

ཟླ་འདིའི་ཕྱི་ཚེས ༡༧ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཝང་ཝིན་པེན་ (Wang Wenbin) གྱིས་གསར་འགོད་གསལ་བསྒྲགས་སྟེང་། རྒྱ་ནག་གིས་གྲངས་ཉུང་མི་རིགས་རྣམས་ལ་ངལ་རྩོལ་བྱེད་དུ་འཇུག་གི་ཡོད་པའི་གནས་ཚུལ་དེ་ནི། རྒྱལ་ཚོགས་ཀྱི་དམིགས་བསལ་སྐུ་ཚབ་དང་། ཨ་རི་ཚུད་པའི་ནུབ་ཕྱོགས་རྒྱལ་ཁབ་ཁག་གིས་རྫུན་གཏམ་དྲིལ་བསྒྲགས་བྱས་པ་ཁོ་ན་རེད། རྒྱ་ནག་གཞུང་གིས་ལས་མི་དེ་དག་གི་ཁེ་ཕན་གྱི་ཆེད་དུ་ཐོབ་ཐང་ལ་བརྩི་འཇོག་དང་སྲུང་སྐྱོབ་བྱེད་ཀྱི་ཡོད། ང་ཚོས་དཔལ་འབྱོར་དང་ཚོང་ལས་སུ་མཉམ་ཞུགས་བྱས་པའི་ལས་མི་ཚང་མར་གཅིག་མཚུངས་ཀྱི་ལྟ་ཚུལ་འཛིན་གྱི་ཡོད་སྟབས། དམིགས་གསལ་སྐུ་ཚབ་ཀྱིས་སྙན་ཐོ་ཕྱིར་འཐེན་དང་། རྫུན་གཏམ་དྲིལ་བསྒྲགས་བྱེད་མཚམས་གཞག་དགོས་ལུགས་ཀྱི་ཉེན་བརྡ་བཏང་ཡོད་འདུག

རྒྱ་ནག་གཞུང་གིས་ཡུ་གུར་གཙོ་བོར་གྱུར་བའི་གྲངས་ཉུང་མི་རིགས་ཀྱི་ས་གནས་ཁག་ཏུ་ངལ་རྩོལ་བསྒྱུར་བཀོད་ཁང་སོགས་བཙུགས་ཏེ། གྲངས་ཉུང་མི་རིགས་རྣམས་ལ་དྲག་གནོན་ཤུགས་ཆེན་བྱེད་ཀྱི་ཡོད་པ་ལྟར། འདི་ལོའི་ཕྱི་ཟླ་ ༡ ནང་ཨ་རིས་རྒྱ་ནག་གཞུང་གི་ངལ་རྩོལ་བསྒྱུར་བཀོད་ཀྱི་ལས་གཞིའི་འོག་ནས་ཕྱིར་ཚོང་བྱས་པའི་ལྡུམ་སྒོང་དམར་པོ་ (tomato) དང་ཤིན་ཅང་ནས་བཟོ་སྐྲུན་བྱས་པའི་སྲིན་བལ་ ( cotton )གྱི་ཐོན་རྫས་ཉོ་མཚམས་བཞག་ཡོད་འདུག་ལ། འདས་ལོའི་ཕྱི་ཟླ་ ༡༢ ཚེས་ ༡༧ ཉིན་ཨ་རིའི་གྲོས་ཚོགས་གོང་མའི་ནང་ཡུ་གུར་ངལ་རྩོལ་སྲུང་སྐྱོབ་ཅེས་པའི་གྲོས་གཞི་དེར་མང་མོས་རྒྱབ་སྐྱོར་ཐོབ་ཡོད་པ་དང་། ཕྱི་ཟླ ༡༢ ཚེས་ ༢༣ ཉིན་སྲིད་འཛིན་བྷའེ་ཌིན་མཆོག་གིས་ཁྲིམས་གཞི་དེར་མཚན་རྟགས་བསྐྱོན་ཡོད་ནའང་། ད་ལྟ་བར་དུ་དངོས་སུ་གྲོས་ཆོད་ནང་གསལ་ལྟར་ལག་བསྟར་ཐུབ་མེད་འདུག

གསར་འགོད་པ། དཔལ་ལྡན།