འདས་པའི་ཉིན་ཤས་རིང་དྷ་རམ་ས་ལ་ཁུལ་དུ་བསྟུད་མར་ཆར་པ་ཆེན་པོ་འབབ་པའི་རྐྱེན་གྱིས་མདང་དགོང་དྷ་ཤོད་ནས་གངས་ཅན་སྐྱིད་གཤོངས་དང་མེག་གྷན་དུ་འགྲོ་སའི་གཞུང་ལམ་ཆད་དེ་རྒྱང་སྐོར་བྱས་ནས་འགྲོ་དགོས་པ་སོགས་འགྲོ་སྐྱོད་ལ་དཀའ་ངལ་འཕྲད་བཞིན་འདུག
ཉིན་ཤས་གོང་ནས་བཟུང་དྷ་ཤོད་ནས་གངས་སྐྱིད་དུ་འགྲོ་སའི་ཝེ་ཇི་ཕ་ལི་སི་ (Vijay palace hotel ) ཉེ་འགྲམ་གྱི་གཞུང་ལམ་ཕྱེད་ཀར་གས་ཆག་ཤོར་ཡོད་སྟབས། ལམ་ལས་པ་ཁག་ཅིག་གིས་གས་ཆག་ནང་ཨར་འདམ་བླུགས་ཏེ་ཁ་གསབ་ཙམ་བྱས་ཡོད་ཀྱང་། མདང་དགོང་ཆར་ཞོད་ཀྱིས་གཞུང་ལམ་རྦད་དེ་བརྡིབས་ཡོད་པ་དང་། འདམ་རྙོག་དང་རྡོ་རུད་རྣམས་གྷམ་རུ་གྲོང་སྡེའི་སུམ་མདོ་(Kirpu Moud) ནས་རྡ་ཤོད་བར་དུ་ཁེངས་པར་བརྟེན། དེ་རིང་ཞོགས་པར་མེས་དབོན་གཙུག་ལག་དཔེ་སྟོན་སློབ་གྲྭ་སོགས་ཀྱི་སློབ་མ་བསུ་ལེན་དང་ལས་བྱེད་རྣམས་ལས་ཞུགས། དེ་བཞིན་སྔོ་ཚལ་སྐྱེལ་འདྲེན་རླངས་འཁོར་སོགས་འགྲོ་སྐྱོད་བྱེད་པར་དཀའ་ངལ་འཕྲད་དེ་རྒྱང་སྐོར་བྱས་ནས་འགྲོ་དགོས་བྱུང་འདུག
དྷ་ས་གཡས་གཡོན་གྱི་འགྲོ་ལམ་གཞན་དུའང་འགྲོ་སྐྱོད་བྱེད་པར་དཀའ་ངལ་འཕྲད་ཀྱི་ཡོད་པའི་གནས་ཚུལ་གོ་ཐོས་བྱུང་སྟབས། འདི་གའི་གསར་འགོད་པས་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་སུ་དྷ་ས་ཁུལ་གྱི་ས་རུད་ཆུ་ལོག་གི་དཀའ་ངལ་ག་འདྲ་ཆགས་ཡོད་མེད་དྲིས་པར་ཁོང་གིས། ད་ལྟ་སྨན་རྩིས་ཁང་གི་འོག་ཏུ་ས་ཤུགས་ཆེན་པོ་ཉུལ་བ་དང་། ལམ་འཕྲོ་བརླག་འགྲོ་བསྡད་ཡོད་རེད། གནས་དོན་དེ་མདང་དགོང་བྱུང་བ་རེད། ས་ཉུལ་བ་དང་ལམ་འགག་པའི་བརྙན་རིས་མང་པོ་ཞིག་དྲ་ལམ་བརྒྱུད་ནས་འགྲེམས་སྤེལ་བྱེད་ཀྱི་ཡོད་དུས། ས་གནས་རྫོང་དཔོན་ལས་ཁུངས་(DC)སོགས་ཀྱིས་མ་མཁྱེན་པ་རྩ་བ་ནས་ཡོད་མ་རེད། ང་ལ་དེ་རིང་ཞོགས་པ་ཆུ་ཚོད་༧ ཙམ་ལ་བརྙན་ཐུང་དེ་འདྲ་ཞིག་འབྱོར་བྱུང་བས། དྷ་ས་ས་གནས་མགོ་འཛིན་གྱི་ངོས་ནས་རྫོང་དཔོན་གྱི་སྒེར་དྲུང་གི་(whatapp)ནང་བཏང་བ་ཡིན་ལ། ཡར་སྙན་སེང་ཞུས་ཟིན་པའི་བརྡ་ལན་འབྱོར་བྱུང་། དེ་མིན་ས་གནས་མགོ་འཛིན་ནས་ལམ་འགག་པ་དང་ཆད་པ་སོགས་བཟོ་ཆོག་ཆོག་དང་མི་གཏང་ཆོག་ཆོག་ཅིག་རྩ་བ་ནས་ཡོད་མ་རེད་ལ། ང་ཚོས་འགན་ཞིག་ཁུར་བ་ཡིན་ཡང་། ལམ་སེང་བཟོ་ཆོག་ཆོག་གི་གནས་སྟངས་དེ་འདྲ་ཞིག་ཡོད་མ་རེད། ཡིན་ཡང་། ས་གནས་མགོ་འཛིན་གྱིས་འགན་འཁྱེར་བའི་ཐོག་ནས་གོང་གི་འགན་འཛིན་དང་དབང་ཆ་ཡོད་མཁན་རྣམས་ལ་ད་ལྟ་བར་དུ་ཡར་ཞུ་གཏུགས་བྱས་ཡོད་ལ། མ་འོངས་པ་ཡང་ས་གནས་མི་མང་གི་དཀའ་ངལ་རྣམས་གོང་རིམ་ལ་ཞུ་ཡི་ཡིན། ཞེས་བརྗོད་བྱུང་།
ཉེ་སྔོན་ཕྱི་ཟླ་ ༨ ཚེས་ ༤ ཉིན་གྱི་མཚན་མོར་གངས་སྐྱིད་ནས་མེག་གྷན་དུ་འགྲོ་བའི་གཞུང་ལམ་བརྒྱུད་དུ་ས་རུད་བྱུང་སྟེ་ཕ་བོང་ཆེན་པོ་ཞིག་གཞུང་ལམ་ཐོག་ཟགས་ནས་ད་ལྟའང་ལྷག་བསྡད་ཡོད་སྟབས། ཕ་བོང་ཆེན་པོ་དེ་གཙང་བཟོ་མ་བྱས་ཚེ་གཤམ་འོག་ཏུ་ཡོད་པའི་བཀའ་ཤག་ལས་ཁུངས་དང་ལས་ཤག ཡུལ་མིའི་སྡོད་ཁང་སོགས་ལ་གནོད་སྐྱོན་ཐེབས་ཉེན་ཡོད་པ་རེད། དེའི་ཐད་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས། དྷ་ས་ཁུལ་དུ་ཉིན་ཤས་གོང་ནས་ཆར་ཞོད་ཆེ་བའི་རྐྱེན་པས་གངས་སྐྱིད་ཀྱི་ཕེབས་ལམ་ནས་ས་སོགས་ཉུལ་ནས་ད་ལྟའང་རྡོ་ཆེན་པོ་ཞིག་ཟགས་གྲབས་ཡོད་རེད། འོན་ཀྱང་། མིའི་སྲོག་ལ་དཀའ་ངལ་ཆེན་པོ་དེ་འདྲ་གང་ཡང་བྱུང་ཡོད་མ་རེད་དེ། རླངས་འཁོར་ཟགས་པའི་གནས་སྟངས་དེ་འདྲ་བྱུང་རེད། བྱས་ཙང་ས་གནས་མགོ་འཛིན་ལས་ཁུངས་ནས་ས་གནས་རྫོང་དཔོན་ལས་ཁུངས་(DC)སོགས་རྒྱ་གར་གྱི་འབྲེལ་ཡོད་ཀྱི་ལས་ཁུངས་སུ་ཡར་ཞུ་བྱས་ཡོད། དེ་བཞིན་ཁ་སང་(DC)ལས་ཁུངས་སུ་ཉེ་ལམ་རི་ཉུལ་ནས་རྡོ་ཟགས་པ་དང་ལམ་འགག་པའི་གན ད་དོན་དེར་གཙང་བཟོ་དང་མཇུག་སྐྱོང་ཡག་པོ་བྱ་དགོས་པའི་འབོད་སྐུལ་ཞིག་ཡིག་ཐོག་ནས་ཕུལ་བ་བཞིན་སྙན་སེང་ཞུས་ཟིན་པའི་བརྡ་ལན་འབྱོར་སོང་། ཞེས་བརྗོད་བྱུང་།
ལོ་རེའི་ཕྱི་ཟླ་ ༧ པ་ཙམ་ནས་ཟླ་ ༣ ཡས་མས་རིང་རྒྱ་གར་གྱི་མངའ་སྡེ་ཁག་མང་པོ་དང་ལྷག་པར་དུ་བྱང་ཤར་རི་རྒྱུད་ཁུལ་དུ་ཡོད་པའི་མངའ་སྡེ་ཁག་གི་ནང་དུ་ཆར་ཞོད་ཆེ་བའི་རྐྱེན་གྱིས། ཆུ་ལོག་ས་རུད་ཀྱིས་མི་རྒྱུ་གཉིས་ལ་གནོད་འཚེ་ཆེན་པོ་ཕོག་གི་ཡོད་པ་རེད། ཉེ་སྔོན་རྒྱ་གར་གྱི་བྱང་ཤར་མངའ་སྡེ་ཨ་སམ་གཙོ་བྱས་པའི་མཱ་གྷ་ལ་ཡ་དང་ཨ་རུ་ན་ཅལ། ཀར་ན་ཌ་ཀ་སོགས་སུ་ཆར་ཞོད་ཀྱིས་གནོད་སྐྱོན་ཆེན་པོ་ཐེབས་ཡོད་པ་རེད།
གསར་འགོད་པ། དཔལ་ལྡན།
