བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པའི་ཐོག་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་དགུ་བཅུ་གསུམ། བོད་ཀྱི་བུད་མེད་ཚོགས་པ། རྒྱ་གར་བོད་རང་བཙན་སློབ་ཕྲུག་ཚོགས་པ་བཅས་ནས་མཉམ་དུ་ལོ་མང་རིང་བོད་ཀྱི་རྩ་དོན་འཐབ་རྩོད་བྱས་པའི་ངོས་འཛིན་འོག་ཚོགས་པ་རེ་རེར་དགའ་སྤོབས་དྲན་རྟེན་རེ་སྤྲད་སོང་།
དྷ་ས་མེག་གྷན་གྱི་(Club house)ཚོགས་ཁང་ནང་དུ་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པ། ༢༠༢༢།༠༨།༢༠ དུས་བབ་ཀྱི་པར།
དེ་རིང་ཞོགས་པར་དྷ་ས་མེག་གྷན་གྱི་ཀུ་ལབ་མགྲོན་ཁང་(Club house)ཚོགས་ཁང་ནང་དུ། བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པ་མགོ་འཛུགས་གནང་སོང་བ་དང་། ཚོགས་ཐོག་ཏུ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅཱརྱ་ཡེ་ཤེས་ཕུན་ཚོགས་ལགས་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་གཉིས་དང་། དེ་བཞིན་བོད་མི་མང་སྤྱི་འཐུས་ཟླ་བ་ཕུན་སྐྱིད་ལགས་དང་། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་མཉམ་ཞུགས་གནང་འདུག དེ་རིང་ཚོགས་ཆེན་གྱི་ཉིན་དང་པོར་བདེ་སྐྱིད་གླིང་དང་། སྦོག་ར། ཀུ་ལུ། སྦེལ་ཀོབ་བཅས་ཀྱི་ས་གནས་ཡན་ལག་ཚོགས་པར་ལས་འགུལ་ཚགས་ཚུད་དང་ཡག་ཤོས་སྤེལ་མཁན་དུ་ངོས་འཛིན་བྱས་ཏེ་གཟེངས་རྟགས་སྤྲད་སོང་། དེ་བཞིན་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་དགུ་བཅུ་གསུམ། བོད་ཀྱི་བུད་མེད་ཚོགས་པ། རྒྱ་གར་བོད་རང་བཙན་སློབ་ཕྲུག་ཚོགས་པ་བཅས་ནས་མཉམ་དུ་ལོ་མང་རིང་བོད་ཀྱི་རྩ་དོན་འཐབ་རྩོད་བྱས་པའི་ངོས་འཛིན་འོག་ཚོགས་པ་རེ་རེར་དགའ་སྤོབས་དྲན་རྟེན་རེ་སྤྲད་སོང་།
བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་ཀྱིས་ཚོགས་ཆེན་ངོ་སྤྲོད་འབྲེལ་བའི་གཏམ་བཤད་གནང་སྐབས། བོད་རྒྱལ་ཡོངས་མང་གཙོ་ཚོགས་པ་ནི་༧གོང་ས་མཆོག་གི་དགོངས་གཞི་ལྟར་བཙུགས་པའི་ཆབ་སྲིད་ཚོགས་པ་རྙིང་ཤོས་ཤིག་དང་། གཞོན་ནུ་ལྷན་ཚོགས་ཀྱི་ཕྲུ་གུ་ལྟ་བུ་ཡིན། ད་ལྟ་བར་དུ་ཚོགས་པའི་ངོས་ནས་ཆོལ་ཁ་དང་ཆོལ་ལུགས་ཀྱི་ཕྱོགས་ཞེན་དུ་མ་སོང་བར་བོད་སྤྱི་པའི་འགན་གང་ཐུབ་འཁྱེར་གྱི་ཡོད། བོད་གཞུང་དམངས་གཙོ་ཚད་ལྡན་ཞིག་ལ་འགྲོ་བའི་དམིགས་ཡུལ་འགྲུབ་པར་དམངས་གཙོའི་གོ་རྟོགས་སྤེལ་ཆེད། བགྲོ་གླེང་དང་ཟབ་སྦྱོང་སོགས་ལས་རིམ་མང་པོ་བྱས་དང་བྱེད་མུས་ཡིན། བོད་ཀྱི་རྩ་དོན་འཐབ་རྩོད་ཐད་རྒྱ་གཞུང་ལ་ཁ་གཏད་གཅོག་པར་དངོས་ཤུགས་བརྒྱུད་གསུམ་གྱི་ནུས་པ་གང་འཚམ་བཏོན་ཡོད། ཅེས་སོགས་བརྗོད་སོང་།
བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས། ཕྱི་ལོ་ ༡༩༩༠ ལོར་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༢༡ པ་ཚོགས་པའི་སྐབས་སུ་༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས། གཞོན་ནུ་ལྷན་ཚོགས་དང་གཞི་རྩའི་ལྟ་བ་དང་དམིགས་ཡུལ་གཅིག་པ་ཡིན་པ་གང་ཞིག་ལ་ནང་གི་དམིགས་ཡུལ་དམངས་གཙོའི་ལྟ་གྲུབ་ཡོད་པའི་ཚོགས་པ་དེ་འདྲ་དགོས་ཀྱི་རེད་གསུངས་པའི་ལམ་སྟོན་འོག ཕྱི་ལོ་ ༡༩༩༢ ལོར་གཞོན་ནུ་ལྷན་ཚོགས་ཀྱིས་༧གོང་ས་མཆོག་གི་སྔ་ཕྱིའི་བཀའ་སློབ་དང་། བོད་ཀྱི་སྤྱི་ཚོགས་ཁྱོན་ཡོངས་ལ་གཟིགས་ནས་བོད་ཀྱི་རྒྱལ་ཡོངས་མང་གཙོ་ཚོགས་པ་འཛུགས་རྒྱུ་གཏན་འབེབ་གནང་བ་རེད། ཕྱི་ལོ་ ༡༩༩༤ ལོར་དངོས་སུ་དབུ་བརྙེས་པ་རེད། ཅེས་དང་། དགྲ་བོ་རྒྱ་དམར་གྱིས་བོད་དུ་བཙན་འཛུལ་བྱས་ནས་ཉིན་འཁྱོལ་ཡང་མཚན་མ་འཁྱོལ་བའི་དུས་སྐབས་ཞིག་ཏུ་གྱུར་ནས་བོད་ནང་གི་བོད་མི་ཚོས་བཙན་བྱོལ་ནང་གི་བོད་མིར་རེ་བ་རྒྱག་གི་ཡོད་ཀྱང་། བཙན་བྱོལ་ནང་དུ་དམངས་གཙོའི་ཐོག་ནས་འོས་འདེམས་བྱེད་པར་ཕྱོགས་ཞེན་གྱི་ཡ་ང་བའི་གནས་སྟངས་ཞིག་ཆགས་བསྡད་ཡོད། བཙན་བྱོལ་ནང་གི་གཞུང་དང་ཚོགས་པ་སྒེར་སུ་ཡིན་ཡང་མཐུན་སྒྲིལ་རྡོག་རྩ་གཅིག་སྒྲིལ་གྱིས་དམངས་གཙོའི་ལམ་ལུགས་རྒྱུན་འཁྱོངས་བྱས་ནས་བོད་ཀྱི་རྩ་དོན་སྒྲུབ་རྒྱུ་གལ་ཆེན་པོ་ཡིན་པའི་སྐོར་བཤད་སོང་།
དྷ་ས་མེག་གྷན་གྱི་(Club house)ཚོགས་ཁང་ནང་དུ་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པ། ༢༠༢༢།༠༨།༢༠ དུས་བབ་ཀྱི་པར།
དེ་ནས་ཚོགས་ཆེན་གྱི་སྐུ་མགྲོན་གཙོ་བོ་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས། བོད་ཀྱི་རྒྱལ་ཡོངས་མང་གཙོ་ཚོགས་པ་ནི་༧གོང་ས་མཆོག་གི་ཐུགས་ཀྱི་དགོངས་གཞི་རླབས་པོ་ཆེའི་ནང་ནས་དམངས་གཙོ་འཕེལ་རིམ་གྱི་གནད་འགག་ཅིག་ཆགས་བསྡད་ཡོད། ༼ངོས་ཀྱི་ཡུལ་དང་ངོས་ཀྱི་མི་མང་།༽དང་༼བཙན་བྱོལ་ནང་གི་རང་དབང་།༽ལས་ཀྱང་ང་ཚོས་གསལ་བོ་ཤེས་བ་ལྟར། ༧སྐྱབས་མགོན་རིན་པོ་ཆེ་མཆོག་གིས་ཐོག་མར་བོད་ནང་གི་ཁྲལ་དང་འུ་ལག་མེད་པ་བྱས་ནས་སྤྱི་ཚོགས་ལ་བསྒྱུར་བཅོས་བཏང་། དེ་ནས་མི་མང་ཉམ་ཆུང་ཚོར་དཀའ་ངལ་ཞུ་ས་བཙུགས་པ། ཚོགས་འདུ་ཆེན་མོ་འདུ་སྐོང་བྱས་ནས་བསྒྱུར་བཅོས་ནས་དམངས་གཙོའི་འཕེལ་རིམ་དབུ་འཛུགས་གནང་ཡོད་པ་དང་། ༧གོང་ས་མཆོག་བཙན་བྱོལ་ནང་ཞབས་སོར་འཁོད་པ་ནས་བཟུང་བོད་མི་མང་ལ་དམངས་གཙོ་གསོལ་རས་གནང་སྟེ་བོད་ཀྱི་ལས་དོན་བྱེད་ཕྱོགས་ཐམས་ཅད་དམངས་གཙོ་གཞིར་བཟུང་ནས་དམངས་གཙོའི་འཕེལ་རིམ་གཏན་འཇགས་བྱུང་ཡོད་སྐོར་གསུངས་སོང་།
ཡང་ཁོང་གིས། ཐེངས་འདིའི་བོད་རྒྱལ་ཡོངས་མང་གཙོ་ཚོགས་པའི་ཚོགས་ཆེན་སྟེང་གྲོས་གཞི་དང་གྲོས་ཆོད་མང་པོ་ཞིག་ཡོད་པ་རེད། སྲིད་དོན་ཚོགས་པ་དང་གཞུང་འབྲེལ་མིན་པའི་ཚོགས་པ་གང་ཡིན་ཡང་སྤྱི་ཚོགས་ནང་དུ་ལས་དོན་བྱེད་ཕྱོགས་གཅིག་ཡིན། ཁྱད་པར་ནི་གཞུང་གི་འཛིན་སྐྱོང་སྲིད་དོན་ཚོགས་པས་གཙོ་བོ་བྱེད་ཅིང་། གཞུང་འབྲེལ་མིན་པའི་ཚོགས་པས་སྤྱི་ཚོགས་ཞབས་ཞུ་གཙོ་བོ་བྱེད་པ་ཡིན། བོད་རྒྱལ་ཡོངས་མང་གཙོ་ཚོགས་པ་ཡང་བོད་གཞུང་གི་མཐུན་འགྱུར་ལ་བརྟེན་ནས་ད་ལྟ་རྒྱལ་སྤྱིའི་སྟེང་དུ་སྙོབ་བཞིན་ཡོད་པ་རེད། ཨ་རིའི་དམངས་གཙོ་ཚོགས་པའི་ཚོགས་ཆེན་སྟེང་དུ་བོད་རྒྱལ་ཡོངས་མང་གཙོ་ཚོགས་པའི་ཚོགས་མི་མཉམ་ཞུགས་བྱས་ཡོད་སྐོར་གསུངས་སོང་།
ཐེངས་འདིའི་ཚོགས་ཆེན་ཐོག་ཚོགས་པའི་སྒྲིག་གཞི་བསྐྱར་བཅོས་དང་དབུས་སའི་ལས་དོན་བྱེད་ཕྱོགས་སོགས་གྲོས་གཞི་དོན་ཚན་དགུ་ཡི་ཐོག་བགྲོ་གླེང་དང་གཏན་འབེབ་དང་། ཉིན་མཐའ་མར་དབུས་རྒྱུན་འོས་འདེམས་བཅས་བྱ་རྒྱུ་ཡིན་འདུག
བྱམས་པ་ཚེ་རིང་།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
པར་དེ་ལ་ལྟས་ནས་ཤེས་སོང་། བོད་གཞུང་གི་མིང་འཁུར་ནས་སློང་མོ་རྒྱབ་ནས་ཐར་ཚག་ཤོག་ནང་དོན་པ་ཁོ་དང་། ༢༠༠༨ལོར་བཙན་འབྱོར་པ་ཚང་མས་རྒྱ་ལ་ངོ་འགོལ་བྱེད་དུས་ཡེ་ཤེས་ཕུན་ཚོགས་གཡག་འཁྲབ་ནས་བསུ་བྱེད་པ་དང་་་ད་དུང་ཉེ་དུས་ང་ཚོས་འགྲིག་རཛུགས་འཁྲུག་ཆ་དོད་སྐབས་ཡང་གཞོན་ནུའི་མིང་ཐོག་ནས་གསལ་བསྒྲགས་སུ་འགྲིག་ཁུལ་བྱེད་མཁན་སོགས་་གང་ལྟར་མདོར་ན་ུ་ནག་ཉེས་ཅན་དང་་བཀྲ་མི་ཤིས་མཁན་ཤ་རྟག་རེད་འདུག་་་ད་ལྟོ་གོས་ཆེད་ཐལ་མོ་ཏང་ལ་འབྱར་་སྐྱག་པ་རྡ་སར་གཡུག་མཁན་ཁོ་མིན་འགྲོ་