རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་ཀྱི་དབུས་གྲོས་ཚོགས་འཐུས་མི་མང་པོ་མཉམ་འབྲེལ་གྱི་ཐོག་ནས་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་བྷ་རཱ་ཊི་རཱ་ཊ་ནཱ་འབུལ་ལམ་ཞུ་དགོས་པའི་འབོད་སྐུལ་གནང་གི་ཡོད་འདུག
ཟླ་འདིའི་ཕྱི་ཚེས་ ༢༠ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལས་སྤེལ་བ་ལྟར་ན། རྒྱ་གར་གྱི་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇི་ཏི་ཀུ་མཱར་ (Sujeet Kumar) ལགས་ཀྱིས་དབུས་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ (All Party Parliamentary Forum for Tibet) ཚོགས་མི་ ༢༠ ལྷག་དང་། བྷི་ཇུ་ཇཱ་ནཱ་ཌཱ་ཌལ་ (Biju Janata Dal)སྲིད་དོན་ཚོགས་པའི་ཚོགས་མི་བཅས་གྲོས་ཚོགས་འཐུས་མི་མང་པོ་མཉམ་རུབ་ཐོག རྒྱ་གར་གཞུང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་བྷ་རཱ་ཊི་རཱ་ཏ་ནཱ་ (Bharat Ratna) འབུལ་ལམ་ཞུ་དགོས་པའི་འབོད་སྐུལ་ཞུ་འཆར་ཡོད་འདུག་ལ། འདི་ལོའི་ཕྱི་ཟླ་ ༩ ཚེས་ ༢ བོད་མིའི་དམངས་གཙོའི་དུས་ཆེན་ཉིན་བཞུགས་སྒར་དྷ་རམ་ས་ལར་༧གོང་ས་མཆོག་ལ་མཇལ་བཅར་ཞུས་ཏེ། མ་འོངས་པར་༧གོང་ས་མཆོག་རྒྱ་གར་གྱི་གྲོས་ཚོགས་ནང་ཆིབས་བསྒྱུར་བསྐྱང་གནང་ཡོང་བའི་གསོལ་འདེབས་ཞུ་འཆར་ཡོད་འདུག
རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་སུ་ཇི་ཏི་ཀུ་མཱར་ལགས་ཀྱིས། བོད་རྒྱའི་དཀའ་རྙོག་སེལ་བར་རྒྱ་ནག་གཞུང་དང་ཐད་ཀར་ཞི་བའི་ལམ་ནས་གྲོས་མོལ་ཡོང་སླད། རྒྱ་གར་དབུས་གཞུང་ནས་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་རྒྱུ་དང་། རྒྱ་གར་ནང་བཙན་བྱོལ་དུ་ཡོད་པའི་བོད་མི་རྣམས་ཀྱིས་དམངས་གཙོའི་ལས་འགུལ་སྣ་མང་སྤེལ་གྱི་ཡོད་པ་དེ་དག་ལ་མཐུན་རྐྱེན་སྦྱོར་སླད་དུ་ཉུང་མཐར་ཧིན་སྒོར་ས་ཡ་ ༣ ཙམ་གྱིས་རོགས་སྐྱོར་གནང་སྐོར་རེ་སྐུལ་ཞུས་ཡོད་སྐོར་དང་། ད་དུང་ཉེ་སྔོན་ཨ་རིའི་གྲོས་ཚོགས་འོག་མའི་ཚོགས་གཙོ་ནེན་སི་པེ་ལོ་སི་ (Nancy Pelosi) མཆོག་ཐའེ་ཝན་ལ་ཕེབས་པར་བརྟེན། རྒྱ་ནག་གིས་ཐའེ་ཝན་གྱི་བདེ་སྲུང་གི་འོག་ཏུ་ཡོད་པའི་མཚོ་འགག་ཏུ་དམག་དོན་གྱི་ལས་འགུལ་སྤེལ་ཏེ་འཇིགས་སྐུལ་བྱེད་བཞིན་པར་གདུང་སེམས་མཉམ་སྐྱེད་ཡོད་སྐོར་གསུངས་འདུག
ཕྱི་ལོ་ ༢༠༡༦ ཟླ་ ༡༢ ཚེས་ ༢༡ ཉིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་སྤྱི་མོས་ཐོག་གྲོས་ཆོད་ཐོག་མ་བཞག་སྟེ། རྒྱ་གར་དབུས་གཞུང་ལ་བྷ་རཱ་ཊི་རཱ་ཊི་ནཱ༧གོང་ས་མཆོག་ལ་འབུལ་ལམ་ཞུས་པའི་སྙན་ཞུ་ཕུལ་ཡོད་པ་དང་། སྐབས་དེའི་གྲོས་ཆོད་ནང་དུ་རྒྱ་གར་གཞུང་ནས་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཚེ་ཧྲིལ་བོར་འཛམ་གླིང་ཁྱོན་ཡོངས་སུ་འཚེ་མེད་ཞི་བ་གོང་སྤེལ་གཏོང་གནང་མཛད་པའི་རླབས་ཆེན་གྱི་མཛད་རྗེས་ལ་ངོས་འཛིན་ཞུས་པའི་ཐོག་ནས་གཟེངས་རྟགས་དེ་འབུལ་ལམ་ཞུ་དགོས་སྐོར་ཞུས་ཡོད་པ་དང་། དེའི་རྗེས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་དང་། རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ (All Party Forum for Tibet) ཚོགས་གཙོ་ཟུར་པ་སྐུ་ཞབས་ཤན་ཏ་ཀུ་མཱར་ (Shanta Kumar) མཆོག རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཀི་ཤན་ཀཱ་པུར་ (Kishan Kapoor) མཆོག དབུས་གྲོས་ཚོགས་འཐུས་མི་ཟུར་པ་ཁྲིག་སེ་རིན་པོ་ཆེ་ངག་དབང་བྱམས་པ་བསྟན་འཛིན་མཆོག་སོགས་ནས་སྔ་རྗེས་སུ་རྒྱ་གར་གྱི་སྲིད་བློན་མཆོག་གི་མཚན་ཐོག་ཏུ་ཞུ་ཡིག་ཕུལ་ཏེ། ཆེས་མཐོའི་གཟེངས་རྟགས་དེ་༧གོང་ས་མཆོག་ལ་འབུལ་ལམ་ཞུ་དགོས་སྐོར་ཞུས་ཡོད་པ་རེད།
རྒྱ་གར་གྱི་ཆེས་མཐོའི་གཟེངས་རྟགས་བྷ་རཱ་ཊི་རཱ་ཊི་ནཱ་ནི་ནོར་བུ་ཞེས་པའི་དོན་ཡིན་པ་དང་། དེ་ནི་རྒྱ་གར་རྒྱལ་ཡོངས་ཀྱི་གཟེངས་རྟགས་མཐོ་ཤོས་དེ་ཡིན་ཞིང་། མིའི་རིགས་ཀྱི་བདེ་དོན་ཆེད་མཛད་རྗེས་རླབས་ཆེན་འཇོག་གནང་མཁན་དང་། རང་དབང་དང་འགྲོ་བ་མིའི་ཐོབ་ཐང་འཐབ་རྩོད་པ་གནང་མཁན་གྱི་མི་སྣ་གྲགས་ཅན་རྣམས་ལ་འབུལ་སྲོལ་ཡོད་པ་ལྟར། ཕྱི་ལོ་ ༡༩༨༠ ལོར་ཡི་ཤུ་ཨ་མ་ཊི་རེ་སཱ་མཆོག་ལ་ཕུལ་ཡོད་པ་དང་། ཕྱི་ལོ་ ༡༩༩༠ ལོར་ལྷོ་ཨ་ཧྥེ་རི་ཁའི་རང་དབང་འཐབ་རྩོད་པ་དང་སྲིད་འཛིན་ཟུར་པ་ནེལ་སན་མན་ཌ་ལཱ་ (Nelson Mandela)མཆོག་དང་། དེ་བཞིན་རྒྱ་གར་རང་བཙན་འཐབ་རྩོད་པ་ཁཱན་ཨབ་དུལ་གྷ་ཕར་ཁཱན(Khan Abdul Ghaffar Khan)། སྲིད་བློན་དམ་པ་ནེ་རོ་མཆོག་སོགས་མི་སྣ་གྲགས་ཅན་ ༤༨ ཙམ་ལ་ཕུལ་ཡོད་འདུག
གསར་འགོད་པ། བསྟན་འཛིན་ཕུར་བུ།
