དེ་རིང་སྔ་དྲོ་ཆུ་ཚོད་ ༩ སྟེང་༸གོང་ས་རྒྱལ་བ་རིན་པོ་ཆེ་མཆོག་ལ་དྭགས་ལྕོག་ལམ་སར་གྱི་ཉེ་འཁྲིས་སུ་ཆགས་པའི་ལ་དྭགས་དགོན་ཚོགས་ཀྱི་ནང་ཆོས་ཀྱི་བསྟི་གནས་ཁང་(Dharma Center)དུ་ཆིབས་བསྒྱུར་བསྐྱངས་ཏེ། བསྟི་གནས་ཁང་དེའི་རྟེན་གྱི་གཙོ་བོ་སྟོན་པ་ཐུབ་པའི་དབང་བོ་མཆོག་ལ་མཆོད་མཇལ་དང་འདུ་ཁང་ནང་རབ་གནས་མཛད་རྗེས། ནང་དྭགས་ནང་ཚོགས་དང་དགོན་ཚོགས་གཉིས་ནས་༸མགོན་པོ་གང་ཉིད་མཆོག་ལ་མནྜལ་རྟེན་གསུམ་འདེགས་འབུལ་ཞུས་གྲུབ་མཚམས། ༸གོང་ས་མཆོག་གིས་དད་ལྡན་སེར་སྐྱ་མང་ཚོགས་ལ་བཀའ་སློབ་སྩལ་དོན།
Photo: Tibettimes
རྒྱ་གར་གཏིང་ལ་མར་ཆར་ཞོད་ཤུགས་ཆེན་པོ་ཡོད་དུས། ལ་དྭགས་སུ་ས་སྐམ་པོ་དང་ཉི་མ་ཡག་པོ་ཡོད་སྟབས་འདིར་ཡོང་བ་ཡིན། གལ་ཆེེ་བ་ཞིག་ལ་ཁྱེད་རང་ཚོ་ལ་དྭགས་མི་མང་དད་པ་དམ་ཚིག་གཡོ་བ་མེད་པར་ཡོད་པ་ཡིན་དུས། ངོས་ཁྱེད་རང་ཚོར་ཐུག་འདོད་ཡོད་པ་བཞིན་འདིར་འབྱོར་བ་རེད། ཟངས་དཀར་དང་ལ་དྭགས་ཀྱི་མི་མང་ཚང་མས་དད་པ་རྩེ་གཅིག་ཏུ་ཡོད་དུས། རྟེན་བཞུགས་ཀྱི་སྲོལ་ཡོང་གི་འདུག མི་མང་གིས་དད་པ་ཆེན་པོས་ངོས་ལ་དགའ་པོ་ཞེ་དྲགས་བྱེད་ཀྱི་ཡོད་པ་དེས། ངོས་མི་ཚེ་རིང་པོར་འདུག་དགོས་རེད་བསམ་པ་ཡོང་གི་འདུག དེ་རྟེན་བཞུགས་ལས་ཕན་པ་འདུག ཁྱེད་ཚོ་མི་མང་དངོས་གནས་དྲང་གནས་ཀྱིས་སངས་རྒྱས་ཀྱི་ཆོས་ལ་དད་མོས་ཡོད་བསྡད་པའི་ཐོག་ལ་ངོས་དང་ཐུག་སྟེ། ངོས་ནས་ནང་ཆོས་འགྲེལ་བཤད་ཏོག་ཙམ་ཞིག་རྒྱག་གི་ཡོད་པ་རེད། དེས་ཁྱེད་རང་ཚོར་དད་པ་གཅིག་པོ་མ་ཡིན་པར་རྒྱུ་མཚན་གྱི་ཐོག་ནས་དད་པ་སྐྱེ་ཡོང་བ་ཞིག་དང་། སངས་རྒྱས་ཀྱི་ཆོས་ལ་དཔྱད་ནས་དད་པ་འཐོབ་པར་ངོས་ནས་ཁྱེད་ཚོར་ཕན་གང་འཚམ་ཐོགས་ཀྱི་ཡོད། ངོས་རང་སྤྲོ་བ་ཡོད་ལ་བསྟན་པའི་ཞབས་འདེགས་རེད། དེ་བཞིན། ས་གནས་ལ་ཁ་ཆེ་ཆོས་པའང་མང་པོ་ཡོད་པ་དང་ཚང་མས་དགའ་པོ་ཞེ་དྲགས་བྱེད་ཀྱི་འདུག ཆོས་ལུགས་ཚང་མའི་བསླབ་བྱ་སེམས་པ་བཟང་པོ་བྱ་རྒྱུ་གཅིག་གྱུར་ཡིན་དུས། ངོས་ཀྱི་ལས་འགན་གཅིག་ནི་ཆོས་ལུགས་ཚང་མ་མཐུན་སྒྲིལ་བྱ་རྒྱུ་དེ་ཡིན།
ལ་དྭགས་བོད་ཀྱི་ས་མཚམས་ཡིན་དུས། བོད་རྒྱ་ཆེ་མི་མང་གིས་༸རྒྱལ་བ་རིན་པོ་ཆེ་ཟངས་དཀར་དང་ལ་དྭགས་སུ་བསླེབས་ཡོད་པ་དང་། ཡུལ་བ་ཚོས་དད་པ་རྩེ་གཅིག་ཏུ་ཡོད་པ། དེ་བཞིན་༸རྒྱལ་བ་རིན་པོ་ཆེ་འཛུམ་ཤིག་ཤིག་བསྡད་ཡོད་པའི་སྐད་ཆ་བོད་ནང་ནས་གོ་དུས། བོད་ནང་གི་རྒྱ་ཆེ་མི་མང་གིས་ངོས་ལ་བློ་གཏད་བཅོལ་བ་དང་ཡིད་ཆེས་ཇེ་བརྟན་དུ་ཕྱིན་ཏེ་སེམས་གཏིང་ནས་རང་རང་གི་འགན་འཁུར་གྱི་ཡོད། བོད་ཀྱི་ཆོས་དང་རིག་གཞུང་དེ་རྒྱ་མི་གུང་ཁྲན་གྱིས་ཐབས་ཤེས་ཡོད་རྒུ་རྩལ་སྤྲུགས་ཀྱི་ཐོག་ནས་མེད་པར་བཟོ་གང་ཐུབ་བྱས་པ་རེད་དེ། རྩ་བ་ནས་ཕམ་ཉེས་ཕྱིན་ཏེ། བོད་རྒྱ་ཆེ་མི་མང་གི་དད་པ་དང་དམ་ཚིག་གཡོ་བ་མེད་པ་ཡིན་དུས། སེམས་ཤུགས་སྐྱེ་བར་ཕན་ཐོགས་ཡོང་གི་ཡོད།
བོད་ཀྱི་ཆོས་དང་རིག་གཞུང་དེ་སངས་རྒྱས་ཀྱི་ཆོས་ཀྱི་ནང་ནས་དཔལ་ནཱ་ལེནྡྲའི་མཁས་པའི་དབང་པོ་ཚོས་བསྲེགས་བཅད་བརྡར་གསུམ་གནང་སྟེ་དཔེ་དག་ཞེ་དྲགས་ཆགས་ཡོད། དཔལ་ནཱ་ལེནྡྲའི་མཁས་པའི་དབང་པོ་ཚོས་བསྲེགས་བཅད་བརྡར་གསུམ་གྱི་ཐོག་ནས་སངས་རྒྱས་ཀྱི་ཆོས་གཏན་ལ་ཕབ་བཞག་པ་དེ་རིགས་པ་དང་ལྡན་ཞིང་། ག་ཚོད་ཀྱིས་བསམ་བློ་གཏང་ན་དེ་ཚོད་ཀྱིས་རིགས་པའི་ངེས་པ་ཇེ་ཆེར་འགྲོ་བ་མ་གཏོགས། རིག་པས་དཔྱད་དེ་ཐེ་ཚོམ་སྐྱེ་བའི་གཞི་ཁྱོན་ནས་མེད། སྤྱིར་ཆོས་ལུགས་ཚང་མས་བྱམས་བརྩེ་གསུང་གི་ཡོད་ཀྱང་། བོད་ཀྱི་ཆོས་དེ་བསྲེགས་བཅད་བརྡར་གསུམ་གྱི་ཐོག་ནས་རིག་པས་དཔྱད་པ་བྱས་ནས་གཏན་ལ་ཕབ་བཞག་པ་ཆགས་ཡོད་དུས། ཇི་ཙམ་གྱིས་རིག་པས་བརྡར་ཤ་གཅད་ན་དེ་ཚོད་ཀྱིས་སེམས་ལ་ངེས་པ་འཐོབ་པ་ཞིག་ཆགས་ཡོད། ངོས་མ་ཎིའི་རྡོ་རིང་པོ་དེའི་འཁྲིས་ནས་ཡོང་སྐབས། བྱང་ཆུབ་སེམས་མཆོག་རིན་པོ་ཆེ།། མ་སྐྱེས་པ་རྣམས་སྐྱེས་གྱུར་ཅིག། ཅེས་འཆར་ཅན་བསགས་ནས་ཡོང་གི་ཡོད། བདེ་སྐྱིད་ཀྱི་རྩ་བ་ནི་སེམས་ལ་ཞི་བདེ་ཡོད་པའི་ཐོག རང་རོགས་ཚང་མའི་མཛའ་མཐུན་ཡག་པོ་བྱུང་ན་བདེ་སྐྱིད་ཡོང་གི་རེད། དེར་བརྟེན། ངོས་ནས་རྟག་པར་རླངས་འཁོར་ནང་དུ་དུས་ཚོད་ཕྲན་བུ་ཡོད་དུས། རྟག་པར་བྱང་ཆུབ་སེམས་མཆོག་རིན་པོ་ཆེ།། ཞེས་བསྐྱོར་སྡོད་ཀྱི་ཡོད།
དེ་ནས། ཆབ་སྲིད་དང་མི་རིགས་ཀྱི་དོན་དག་ཐོག་ནས་བཤད་ཡོང་དུས། འདི་བོད་དང་ས་འབྲེལ་ཡིན་དུས། བོད་ནང་ལོགས་ཀྱི་བོད་མི་ཚོས་གནས་ཚུལ་ཏོག་ཙམ་གོ་ཐུབ་པ་ཞིག་ཡིན་པ་དང་། ཕྱོགས་གཅིག་ནས་རྒྱ་མི་གུང་ཁྲན་གྱིས་ཏཱ་ལའི་ལོག་སྤྱོད་པ་ཟེར་ནས་ཤོད་སྡོད་ཀྱི་ཡོད་པ་དང་ད་ལྟ་ཏཱ་ལའི་ལོག་སྤྱོད་པ་དེ་སྲ་ཐག་ཐག་བྱས་ནས་བསྡད་འདུག་བསམ་ཡོང་དུས། བོད་ནང་གི་མི་ཚོར་སེམས་ཤུགས་སྐྱེ་བར་ཕན་གྱི་རེད། རྒྱ་མི་གུང་ཁྲན་གྱི་མགོ་ཁྲིད་སྦུབ་སུག་དོག་པོ་དེ་ཚོའི་བསམ་བློའི་ནང་། ཧི་མ་ལ་ཡའི་རི་རྒྱུད་པ་ཚོ་ཏཱ་ལའི་བླ་མར་ཁ་ཞེ་གཉིས་མེད་ཀྱི་ཐོག་ནས་དད་མོས་ཤུགས་ཆེན་བྱས་ནས་བསྡད་ཡོད་པ་མཐོང་ཡོང་དུས། དེ་ལ་གནད་འགོག་ཅིག་ཡོད་པ་རེད། རྒྱ་མི་གུང་ཁྲན་གང་ཡང་མི་ཤེས་མཁན་གྱི་གྲས་དེ་ཚོས་ཆོས་ཟེར་དུས་སྡུག་པོ་ཞེ་དྲགས་བརྩི་ཡི་ཡོད། ངོས་འདི་ནས་ཡར་མར་ཕྱིན་དུས། ཧི་མ་ལ་ཡའི་རི་རྒྱུད་ཀྱི་རྨོངས་དད་ཅན་ཚོར་ཏཱ་ལའི་བླ་མས་མགོ་བསྐོར་གཏོང་གི་འདུག་དྲན་གྱི་ཡོད། ད་ལྟ་དུས་ཚོད་གཡོལ་ཟིན་པ་རེད་མ་གཏོགས། མའོ་ཙེ་ཏུང་གིས་ངོས་ལ་ནང་ཚགས་དང་དགའ་པོ་ཞེ་དྲགས་བྱེད་ཀྱི་ཡོད། ཉིན་ཞིག་ངོས་མའོ་ཙེ་ཏུང་དང་ཐུག་དུས། དགའ་པོའི་ངང་ནས་ཁྱེད་ཀྱི་བསམ་བློ་ཚན་རིག་དང་མཐུན་པ་རེད། ཆོས་ཟེར་བ་དེ་དུག་རེད། ཅེས་བཤད་བྱུང་། དེ་རིང་ཁ་སང་མའོ་ཙེ་ཏུང་ཡོད་ཚེ། ཆོས་དུག་རེད་ཟེར་བའི་སྐད་ཆ་དེ་ཕན་པའི་མཆམས་ལ་བསླེབས་ཡོད་པ་རེད།
སྤྱིར་འཛམ་བུ་གླིང་འདིའི་ནང་ཁ་ཤས་ཀྱིས་འཇིག་རྟེན་བཀོད་པ་པོ་འདོད་པ་དང་ཁག་ཅིག་གིས་འདོད་ཀྱི་མེད་པ་སོགས་་རིས་སུ་མཆེད་པའི་ཆོས་ལུགས་ཁག་ཚང་མའི་ལྟ་གྲུབ་མི་འདྲ་བར་ཡོད་ཀྱང་། སེམས་པ་བཟང་པོ་བྱ་དགོས་པ་དང་མི་ལ་ཕན་ཐོགས་དགོས་པའི་བསླབ་བྱ་གཅིག་གྱུར་རེད་འདུག ངོས་འཛམ་གླིང་གི་ས་ཕྱོགས་འདྲ་མིན་གྱི་ནང་དུ་སོང་བའི་སྐབས་སུ། ཁ་ཆེ་ལྷ་ཁང་དུ་བསམ་པ་རྣམ་དག་གིས་ཁོ་ཚོའི་དཀོན་མཆོག་ལ་གསོལ་བ་འདེབས་ཀྱི་ཡོད། གྲུབ་དོན་དེ་སེམས་པ་བཟང་པོ་བྱ་རྒྱུ་ཞིག་ཡོང་གི་ཡོད་ལ། ངོས་ནས་དེ་བཞིན་སྨོན་ལམ་བརྒྱབ་བསྡད་ཡོད། དེ་བཞིན་ཧིན་རྡུ་དང་ཡེ་ཤུ་ལྷ་ཁང་སོགས་ཚང་མའི་བསླབ་བྱ་གཅིག་གྱུར་ཡིན་པས། མི་མང་པོར་ཕན་ཐོགས་ཡོང་བར་ཤོག་ཅེས་སྨོན་ལམ་བརྒྱབ་བསྡད་ཡོད། ཅེས་གསུངས་སོང་།
གསར་འགོད་པ་སྐལ་བཟང་སྦྱིན་པས་ལ་དྭགས་ཀྱི་རྒྱལ་ས་གླེ་ནས་སྤེལ།
