འབྲེལ་ལམ་དང་ཞུ་གཏུག་གནང་ཕྱོགས་ཀྱི་ཟབ་སྦྱོང་མགོ་འཛུགས་བྱས།

བོད་མིའི་སྒྲིག་འཛུགས་ཀྱི་ཕྱི་དྲིལ་བོད་དོན་ཞུ་གཏུག་ཚན་པས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ལས་བྱེད་ ༢༢ ལ་ཉིན་གྲངས་གསུམ་རིང་འབྲེལ་ལམ་དང་ཞུ་གཏུག་གནང་ཕྱོགས་སྐོར་ལ་ཟབ་སྦྱོང་སྤྲོད་བཞིན་འདུག

ཕྱི་དྲིལ་བོད་དོན་ཞུ་གཏུག་ཚན་པའི་གོ་སྒྲིག་འོག དེ་རིང་ནས་ཉིན་གསུམ་རིང་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་འབྲེལ་ལམ་དང་ཞུ་གཏུག་གནང་ཕྱོགས་ཀྱི་ཟབ་སྦྱོང་ཞིག་མགོ་འཛུགས་གནང་སོང་བ་དང་། ཐེངས་འདིའི་ཟབ་ཁྲིད་པ་ནི་རྒྱ་གར་གྱི་གསར་འགོད་པ་ཝི་ཤལ་ཨཱ་རོ་རཱ་ (Vishal Arora) ལགས་དང་ཧར་ཤི་ཏ་རཱ་ཐོར་ (Harshita Rathore) ལགས་གཉིས་ཡིན་ཞིང་། ཟབ་སྦྱོང་ནང་དུ་ཕྱི་དྲིལ་ལས་ཁུངས་དང་བོད་ཀྱི་འགྲེམ་སྟོན་ཁང་། བོད་ཀྱི་སྲིད་ཇུས་ཉམས་ཞིབ་ཁང་། ཚོགས་དྲུང་ལས་ཁུངས། རྒྱལ་སྤྱིའི་བོད་དོན་འབྲེལ་མཐུད་ཁང་། བོད་ཀྱི་བུད་མེད་ལྷན་ཚོགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་། བོད་ཀྱི་རྩོད་རྙོག་འདུམ་འགྲིག་ཁང་། འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་། བོད་རང་བཙན་སློབ་ཕྲུག་ཚོགས་པ་བཅས་ནས་མི་གྲངས་ ༢༢ ཙམ་གྱིས་མཉམ་ཞུགས་བྱས་འདུག

ཐོག་མར་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས།  ཐེངས་འདིའི་ཟབ་སྦྱོང་ནི་འབྲེལ་ལམ་དང་ཞུ་གཏུག་གནང་ཕྱོགས་ཐད་ལ་དམིགས་ཡོད་པ་རེད། རྒྱུ་མཚན་ནི། ཁྱེད་རང་ཚོས་ཤེས་གསལ་ལྟར་སྐབས་བཅུ་དྲུག་པའི་བཀའ་ཤག་འོག་ནས་དྭང་བླངས་བོད་དོན་ཞུ་གཏུག་ཚན་པའི་ལས་འགུལ་གསར་པ་ཞིག་མགོ་བཙུགས་ཡོད་པ་དང་། དེའི་མངོན་འདོད་བསྒྲུབ་པར་བོད་དོན་ཞུ་གཏུག་ཚན་པ་ཡོད་ཅིང་། དེ་གོ་ལ་ཡོངས་སུ་བོད་དོན་ལས་འགུལ་གྱི་ནུས་པ་གོང་འཕེལ་གཏོང་བར་དམིགས་པ་དང་། ཕྱི་དྲིལ་ལས་ཁུངས་ནས་བོད་གཞུང་དང་བོད་པའི་སྤྱི་ཚོགས་ཁག་ལ་འབྲེལ་བ་བྱེད་དགོས་ཀྱི་ཡོད་པར་བརྟེན་མཉམ་ཞུགས་བྱ་རྒྱུ་གལ་ཆེན་པོ་ཡིན་སྐོར་དང་། འབྱུང་འགྱུར་ཟབ་སྦྱོང་དེ་རིགས་གང་མང་ཡོང་རྒྱུ་ཡིན་སྐོར་སོགས་གསུངས་སོང་།

ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས། ཕྱི་དྲིལ་ལས་ཁུངས་ཀྱི་ཚབ་ཞུས་ནས་ཝི་ཤལ་ཨཱ་རོ་རཱ་ལགས་དང་ཧར་ཤི་ཏ་རཱ་ཐོར་ལགས་གཉིས་ཀྱིས་ལྡི་ལི་ནས་ཆེད་དུ་ཟབ་སྦྱོང་སྤྲོད་དུ་ཕེབས་པར་ཐུགས་རྗེ་ཆེ་ཞུ་རྒྱུ་དང་། འབྲེལ་ལམ་གནང་སྟངས་ནི་སྒྱུ་རྩལ་ཞིག་ཡིན་པ་དང་དེའི་སྐོར་ལ་སྦྱང་དགོས་ཀྱི་ཡོད་པ་རེད། གཞན་ལ་འབྲེལ་བ་བྱེད་པའི་སྐབས་སུ་གནད་དུ་འཁེལ་བ་དང་སྙིང་བསྡུས། དེ་བཞིན་གཞན་གྱིས་དོན་རྟོགས་པ་ཞིག་དགོས་ཀྱི་ཡོད་སྐོར་དང་། ཐེངས་འདིའི་ཉིན་གསུམ་རིང་གི་ཟབ་སྦྱོང་ནང་མཉམ་ཞུགས་གནང་མཁན་ཡོངས་ལ་ཁེ་ཕན་ཡོད་པའི་ཡིད་ཆེས་ཡོད་སྐོར། བོད་དོན་ཞུ་གཏུག་ཚན་པས་གོ་ལ་ཡོངས་སུ་གནས་སྡོད་བྱེད་མཁན་གྱི་བོད་མི་ཡོངས་ལ་འབྲེལ་བ་འཇོག་པའི་ཐབས་ཤེས་བྱེད་ཀྱི་ཡོད་པ་རེད། གཞོན་སྐྱེས་ཚོར་ཞུ་གཏུག་གི་རྒྱབ་ལྗོངས་ལོ་རྒྱུས་ཐོག་ལ་གོ་རྟོགས་མེད་སྲིད་པས། གཞོན་སྐྱེས་རྣམས་ལ་གོ་རྟོགས་སྤེལ་རྒྱུའི་སླད་དུ་ཟབ་སྦྱོང་གོ་སྒྲིག་ཞུ་ཡོད་པ་རེད། དེར་བརྟེན་ཚང་མ་ལ་ཁེ་ཕན་ཡོང་བའི་རེ་བ་ཡོད་སྐོར་སོགས་གསུངས་སོང་།

དེ་རིང་ཞུ་གཏུག་གི་སྐོར་དང་བསྒྲགས་གཏམ། གསར་འགོད་གསལ་བསྒྲགས་འབྲི་སྟངས་སྐོར་ལ་སྦྱོང་བརྡར་སྤྲོད་བཞིན་ཡོད་པ་དང་། སང་ཉིན་ཕྱི་ཚེས་ ༣༠ ཉིན་གསར་འགྱུར་བརྒྱུད་ལམ་ཁག་ཏུ་གནས་ཚུལ་འགྲེམ་སྤེལ་བྱ་རྒྱུ་དང་། གསར་ཁང་གི་འབྲེལ་ལམ་རྒྱུན་འཛིན་ཐུབ་པ། བཅར་འདྲི་བྱེད་ཚུལ་སོགས་ཀྱི་སྐོར་ལ་སྦྱོང་བརྡར་སྤྲོད་རྒྱུ་དང་། ཕྱི་ཚེས་ ༣༡ ཉིན་ཞུ་གཏུག་གི་ལས་འགུལ་འདིའི་ནང་པར་རིས་དང་སྒྲ། ཡི་གེ། བརྙན་སོགས་བེད་སྤྱོད་བྱེད་སྟངས་སོགས་བསླབ་རྒྱུ་ཡིན་འདུག

ཐེངས་འདིའི་ཟབ་ཁྲིད་པ་ཝི་ཤལ་ཨཱ་རོ་རཱ་ (Vishal Arora) ལགས་ནི་གསར་འགོད་ལས་རིགས་ཐོག་ལོ་ངོ་ ༢༠ ལྷག་གི་མཉམ་མྱོང་ཡོད་པའི་གསར་འགོད་པ་ཞིག་ཡིན་ཞིང་། ཁོང་གིས་གཞུང་དང་གཞུང་འབྲེལ་མ་ཡིན་པའི་ཚོགས་པ་མང་པོར་འབྲེལ་མོལ་གནང་སྟངས་སྐོར་ཟབ་ཁྲིད་གནང་མྱོང་ཡོད་འདུག དེ་བཞིན་ཟབ་ཁྲིད་པ་ཧར་ཤི་ཏ་རཱ་ཐོར་ (Harshita Rathore) ལགས་ཀྱང་གསར་འགོད་པ་ཞིག་ཡིན་ཞིང་། ཁོང་མོས་གསར་འགྱུར་ཆེད་ལས་པ་དང་གསར་འགོད་པའི་སློབ་ཕྲུག་གྲངས་ ༥༠༠ ལྷག་ལ་གསར་འགོད་ལས་རིགས་སྐོར་ཟབ་ཁྲིད་གནང་མྱོང་ཡོད་འདུག

 གསར་འགོད་པ། བསྟན་འཛིན་ཕུར་བུ།