རྒྱ་གར་གྱི་ཧྥི་ལོ་མི་ན ( St. Philomena) མཐོ་སློབ་ཏུ་ཚོང་རིག་ཐོག་གཙུག་ལག་རབ་འབྱམས་པ་ཐོན་མཁན་བོད་རིགས་བུ་མོ་བརྩོན་འགྲུས་བཟང་མོ་ལགས་དང་དབྱིན་ཡིག་ཆེད་སྦྱོང་གི་གཙུག་ལག་རབ་འབྱམས་པ་ཐོན་མཁན་བདེ་སྐྱིད་བཟང་མོ་ལགས་གཉིས་ལ་གསེར་གྱི་རྟགས་མ་ཐོབ་ཡོད་འདུག
ཟླ་འདིའི་ཕྱི་ཚེས ༢༧ ཉིན་ཧྥི་ལོ་མི་ན་མཐོ་སློབ་ཀྱི་རྒྱུགས་འབྲས་གཟེངས་བསྟོད་བྱ་དགའ་སྤྲོད་པའི་མཛད་སྒོ་འཚོགས་ཡོད་པ་དང་། སྐབས་དེར་མཐོ་སློབ་དེར་ལོ་ངོ་གཉིས་རིང་ཚོང་རིགས་ཐོག་གཙུག་ལག་རབ་འབྱམས་པའི་སློབ་གཉེར་བྱེད་མཁན་བོད་རིགས་བུ་མོ་བརྩོན་འགྲུས་བཟང་མོ་ལགས་དང་། དབྱིན་ཡིག་ཆེད་སྦྱོང་གཙུག་ལག་རབ་འབྱམས་པའི་སློབ་ཐོན་པ་བདེ་སྐྱིད་བཟང་མོ་ལགས་སུའང་གསེར་གྱི་གཟེངས་རྟགས་ཐོབ་ཡོད་འདུག
འདི་གའི་གསར་འགོད་པར་བརྩོན་འགྲུས་བཟང་མོ་ལགས་ཀྱིས། ཆུང་དུས་ནས་ཁོང་མོས་ནུས་པ་ཅི་ཡོད་ཀྱིས་སློབ་སྦྱོང་ལ་ཧུར་ཐག་བྱས་ཏེ། ད་ལྟ་གཡུར་དུ་ཟ་བའི་འབྲས་བུ་སྨིན་དུས། དགའ་ཚོར་ཆེན་པོ་བྱུང་བ་དང་། གྲུབ་འབྲས་ཡག་པོ་བླངས་པ་དེར་ཕ་མ་དང་གཉེན་ཉེ་སོགས་ཀྱིས་བསྔགས་བརྗོད་ཐོབ་ཡོད་སྟབས། སོ་སོའི་མི་ཚེའི་ཆེས་དོན་སྙིང་ལྡན་པའི་བྱ་བ་ཞིག་འགྲུབ་སོང་བསམ་པའི་ཚོར་བ་བྱུང་ལ། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་དབུས་ཁོང་མོའི་ཕ་མ་དང་སྤུན་མཆེད་རྣམས་ཀྱིས་ལམ་སྟོན་དང་རྒྱབ་སྐྱོར་ཁོ་ན་ལས་བྱུང་བ་ཡིན་པས། ཁོང་རྣམས་ནི་བཀྲིན་ཆེན་པོ་ཡིན་སྐོར་བརྗོད་བྱུང་།
བདེ་སྐྱིད་བཟང་མོ་ལགས་ཀྱིས་ཡིག་ཐོག་ནས། རིམས་ནད་ཀྱི་དཀའ་ཁག་ཡོད་པའི་དུས་ཚོད་གཉན་ཕྲང་ཅན་གྱི་སྐབས་སུ་སློབ་སྦྱོང་བྱ་རྒྱུ་དེ་ལས་སླ་པོ་ཞིག་མིན་ཡང་། གྲུབ་འབྲས་མཐོ་བོ་བླངས་ནས་གསེར་གྱི་གཟེངས་རྟགས་ཐོབ་པར་རང་ཉིད་ལའང་སྤོབས་སེམས་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་སྟོན་སོགས་མེད་ཚེ། འདི་ལྟ་བུའི་འབྲས་བཟང་ཞིག་གཏན་ནས་སྨིན་ཐབས་མེད་པས་ཁོང་གི་བཀའ་དྲིན་རྗེས་སུ་དྲན་བཞིན་ཡོད་སྐོར་བརྗོད་བྱུང་།
བརྩོན་འགྲུས་བཟང་མོ་ལགས་ནི་ལ་དྭགས་སུ་སྐྱེས་ཤིང་། ལ་དྭགས་དང་དྷ་སྟེང་བོད་ཁྱིམ་སློབ་གྲྭར་གཞི་རིམ་གྱི་སློབ་གཉེར་བྱས། ༢༠༡༩ ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་ནས་ཚོང་རིགས་རིག་གནས་རབ་འབྱམས་པའི་ལག་ཁྱེར་ཐོབ། ༢༠༢༡ ལོའི་ཕྱི་ཟླ་ ༨ པར་ཧྥི་ལོ་མི་ན་མཐོ་རིམ་སློབ་གཉེར་ཁང་ནས་གཙུག་ལག་རབ་འབྱམས་པའི་སློབ་མཐར་ཕྱིན་ཏེ། ད་ལྟ་དབུས་སྨན་རྩིས་ཁང་དུ་རྩིས་པའི་ལས་ཀ་གཉེར་མུས་ཡིན་པ་རེད།
བདེ་སྐྱིད་བཟང་མོ་ལགས་ནི་མོན་གྷོ་གཞིས་ཆགས་སུ་སྐྱེས་འཚར་བྱུང་ཞིང་། མོན་གྷོ་སམ་བྷོ་ཊ་ནས་གཞི་རིམ་གྱི་སློབ་གཉེར་གནང་། དེ་ནས་ལྡི་ལིར་རྟེན་གཞི་བྱས་པའི་ (Indraprastha) བུད་མེད་མཐོ་སློབ་ནས་ཉེ་བའི་གཙུག་ལག་རབ་འབྱམས་པའི་ལག་ཁྱེར་བླངས། ༢༠༢༡ ལོའི་ཕྱི་ཟླ་ ༨ པར་ཧྥི་ལོ་མི་ན་མཐོ་རིམ་སློབ་གཉེར་ཁང་ནས་གཙུག་ལག་རབ་འབྱམས་པའི་སློབ་མཐར་ཕྱིན་ཏེ་ཕུལ་བྱུང་སློབ་མའི་གསེར་གྱི་གཟེངས་རྟགས་ཐོབ།
གསར་འགོད་པ། དཔལ་ལྡན།
