ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་ཐའེ་ཝན་དུ་གཞུང་འབྲེལ་འཚམས་གཟིགས་ཕེབས་རྗེས། ཐའེ་ཝན་གྱི་མཐའ་སྲུང་དམག་མིས་རྒྱ་ནག་གཞུང་ལ་རྒོལ་ལན་ཐེངས་དང་པོ་བསློགས་འདུག 
Kinmen is a group of islands just kilometres away from mainland China
ཉེ་ལམ་ཨ་རིའི་གྲོས་ཚོགས་འོག་མའི་ལྕམ་སྐུ་ནེན་སི་པེ་ལོ་སི་མཆོག་དང་ཨ་རིའི་གཞུང་ཚབ་མི་སྣ་ཁག་ཐའེ་ཝན་དུ་གཞུང་འབྲེལ་འཚམས་གཟིགས་སུ་ཕེབས་ནས། ཐའེ་ཝན་གྱི་སྲིད་འཛིན་ཚའེ་དབྱིང་ཝན་མཆོག་དང་མཇའ་འཕྲད་བྱས་པར་བརྟེན། རྒྱ་ནག་གཞུང་གིས་ཐའེ་ཝན་གྱི་མཚོ་འགག་ཁུལ་དུ་ས་མཚོ་གནམ་གསུམ་གྱི་དམག་མིས་དྲག་པོའི་སྟོབས་ཤུགས་ལན་མང་ངོམས་ནས། ཐའེ་ཝན་གཞུང་མང་གཉིས་སུ་འཇིགས་སྐུལ་ཡང་ཡང་བྱེད་ཀྱི་ཡོད་པ་ལྟར། དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༣༠ ཉིན་རྒྱ་ནག་གཞུང་གིས་ཐའེ་ཝན་གྱི་བདེ་སྲུང་འོག་ཏུ་ཡོད་པའི་མཁའ་དབྱིངས་སུ་མཁའ་དབྱིངས་ལྟ་ཞིབ་བརྙན་ཆས་ (Drone) གསུམ་མངག་གཏོང་བྱས་ཏེ། ཐའེ་ཝན་གཞུང་གི་བདེ་སྲུང་སོགས་སུ་སོ་ཉུལ་བྱས་པར་བརྟེན། ཐའེ་ཝན་གཞུང་གིས་རྒྱ་ནག་གི་ཚུལ་མཐུན་མིན་པའི་བྱ་སྤྱོད་ལ་སྐྱོན་བརྗོད་ནན་མོ་བྱས་ཏེ། རྒྱ་གཞུང་གིས་མངག་གཏོང་བྱས་པའི་མཁའ་དབྱིངས་ལྟ་ཞིབ་བརྙན་ཆས་དེ་དག་ལ་མེ་མདའ་འཕངས་ནས་རྒོལ་ལན་སློག་ཡོད་འདུག་ལ། དེ་ནི་ཐའེ་ཝན་ནས་རྒྱ་ནག་གཞུང་གི་འཇིགས་སྐུལ་ལ་ཚད་མཐོ་བོའི་ཐོག་ནས་རྒོལ་ལན་སློག་པ་ཐེངས་དང་པོར་གྱུར་ཡོད་འདུག
དེའི་ཐད་ཐའེ་ཝན་གྱི་སྲིད་འཛིན་ལྕམ་ཚའེ་དབྱིང་ཝན་མཆོག་གིས། ཁོང་མོས་ད་ལན་རྒྱ་ནག་གཞུང་གིས་ཐའེ་ཝན་གྱི་བདེ་སྲུང་མཁའ་དབྱིངས་སུ་མཁའ་དབྱིངས་ལྟ་ཞིབ་བརྙན་ཆས་མངག་གཏོང་བྱས་ཏེ། རྒྱ་ནག་གཞུང་གི་དྲག་པོའི་འཇིགས་སྐུལ་བྱས་པར། ཐའེ་ཝན་གཞུང་གིས་ཚད་རིམ་མཐོ་བོའི་ཐོག་ནས་དམག་དོན་གྱི་རྒོལ་ལན་སློག་པར་སྐུལ་མ་བྱས་ཡོད་པ་མ་ཟད། ཐའེ་ཝན་གཞུང་གིས་རྩོད་རྙོག་གང་ཡང་སློང་འདོད་མེད་པར་རང་ཉིད་ཀྱི་རྒྱལ་ཁོངས་སྟངས་འཛིན་བྱས་ནས་སྡོད་ཀྱི་ཡོད་ཀྱང་། དེས་ཐའེ་ཝན་གཞུང་ནས་རྒྱ་ནག་གཞུང་གི་འཇིགས་སྐུལ་ལ་རྒོལ་ལན་སློག་མི་སྲིད་པ་ཞིག་གཏན་ནས་མིན་སྐོར་དང་། ཡང་ཐའེ་ཝན་བདེ་སྲུང་བློན་ཆེན་ལས་ཁུངས་ཀྱིས། འདས་པའི་བདུན་ཕྲག་ཁ་ཤས་རིང་རྒྱ་ནག་གཞུང་གིས་མངག་གཏོང་བྱས་པའི་མཁའ་དབྱིངས་ལྟ་ཞིབ་བརྙན་ཆས་དེ་དག་གིས་ཐའེ་ཝན་གྱི་བདེ་སྲུང་འོག་ཏུ་ཡོད་པའི་མཁའ་དབྱིངས་ཀྱི་ཉེ་འདབས་སུ་འཕུར་སྐྱོད་བྱས་ཡོད་སྟབས། ཐའེ་ཝན་གྱིས་དྲག་རྒོལ་བྱས་རྗེས་རྒྱ་ནག་ཏུ་ཕྱིར་ལོག་བྱས་ཡོད་སྐོར་འགྲེལ་བརྗོད་བྱས་ཡོད་འདུག
རྒྱ་ནག་གཞུང་གིས་ཐའེ་ཝན་གྱི་ལྷོ་ཤར་མཁའ་དབྱིངས་སུ་སྔ་གཞུག་ཐེངས་གཉིས་ཙམ་ལ་མཁའ་དབྱིངས་ལྟ་ཞིབ་བརྙན་ཆས་མངག་གཏོང་བྱས་ཡོད་སྟབས། ཐའེ་ཝན་གྱི་མཐའ་སྲུང་དམག་མིས་བརྙན་ཆས་དེ་ལ་མེ་མདའ་འཕངས་ནས་དེའི་བརྙན་མིག་སོགས་བཅག་རྗེས། བརྙན་ཆས་དེ་དག་ཐའེ་ཝན་གྱི་མཚོ་འགག་ལས་བརྒལ་ནས། རྒྱ་ནག་གི་ལྷོ་ཤར་ཁུལ་གྱི་ཤཱ་མན་ (Xiamen) ཕྱོགས་སུ་འཕུར་སྐྱོད་བྱས་ཡོད་ཀྱང་། ཐའེ་ཝན་དམག་དཔུང་གིས་མུ་མཐུད་དུ་མཐའ་མཚམས་འགོག་སྲུང་བྱས་ཏེ། རྒྱ་ནག་གི་དྲག་པོའི་དཔུང་ཤུགས་ངོམས་པར་རྒོལ་ལན་བསློག་རྒྱུའི་གྲ་སྒྲིག་བྱེད་མུས་ཡིན་ཡང་། རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཀྲོ་ལི་ཅན་ (Zhao Lijian) གྱིས། རྒྱ་ནག་གཞུང་གིས་མཁའ་དབྱིངས་ལྟ་ཞིབ་བརྙན་ཆས་དེ་དག་རྒྱ་ནག་གི་རང་སྐྱོང་ས་ཁུལ་གྱི་མཁའ་དབྱིངས་སུ་མངག་གཏོང་བྱས་ཡོད་སྟབས། དེར་ཧང་སངས་དགོས་དོན་གཏན་ནས་མེད་ལུགས་བཤད་ཡོད་འདུག
གཞན་ཡང་། ཨ་རིས་ཐའེ་ཝན་གྱི་བདེ་སྲུང་དང་རྒྱ་ནག་གཞུང་གིས་ཐའེ་ཝན་ལ་སུན་གཙེར་ཡང་ཡང་བཟོ་མུས་ཡིན་པར་འགོག་རྒོལ་བྱ་རྒྱུར་རོགས་འདེགས་བྱེད་ཀྱིན་ཡོད་པ་ལྟར། བྷའེ་ཌིན་སྲིད་གཞུང་གིས་ཐའེ་ཝན་གྱི་མཐའ་མཚམས་འགོག་སྲུང་དང་དམག་ཆས་སོགས་ཀྱི་སླད་དུ། གྲུ་གཟིངས་གཏོར་ཆེད་ཀྱི་མེ་ཤུགས་འཕུར་མདའ་ (anti-ship missiles) ༦༠ དང་། མཁའ་དབྱིངས་སུ་ཆེད་གཏོང་མེ་ཤུགས་འཕུར་མདའ་ ༡༠༠ ཚུད་པའི་ཨ་སྒོར་ཐེར་འབུམ ༡།༡ ལྷག་གི་དམག་གི་གོ་མཚོན་བཙོང་འཆར་ཡོད་པར། ཨ་རིའི་རྒྱལ་ཡོངས་གྲོས་ཚོགས་སུ་སྙན་གསེང་ཞུས་ཏེ་བཀའ་འཁྲོལ་ཐོབ་རྒྱུའི་རེ་བ་བྱེད་ཀྱི་ཡོད་འདུག
ཟླ་འདིའི་ཕྱི་ཚེས་ ༡༦ ཉིན་རྒྱ་ནག་གཞུང་གིས་ཐའེ་ཝན་གྱི་གནད་ཡོད་མི་སྣ་ ༧ ལ་དཔལ་འབྱོར་དང་འགྲོ་འོང་བཀག་སྡོམ་གྱི་ཉེས་ཆད་བཅད་ཡོད་པ་མ་ཟད། ཐའེ་ཝན་གྱི་མཚོ་ཁོངས་སུ་བཅིངས་གྲོལ་དམག་གི་ Su-30 རྟགས་ཅན་དང་། J-11 ། J- 16 ། Y-8 རྟགས་ཅན་ཟེར་བ་སོགས་ཚུད་པའི་འཐབ་འཁྲུག་གནམ་གྲུ་ ༡༧ དང་མཚོ་གྲུ་ ༥ མངག་གཏོང་བྱས་ཏེ། ཐའེ་ཝན་གཞུང་མང་གཉིས་ལ་འཇིགས་སྐུལ་བྱས་ཡོད་པ་དང་། རྒྱ་ནག་དང་ཨ་རི་བར་གྱི་མཉམ་ལས་སོགས་ཚུད་པའི་གནད་དོན་ ༨ ཕྱིར་འཐེན་བྱས་ཏེ་རྒོལ་ལན་སྤྲད་ཡོད་པ་དང་། ཐའེ་ཝན་དུའང་ཚོང་རྫས་རིགས་བཀག་སྡོམ་བྱས་ཡོད་འདུག
གསར་འགོད་པ། དཔལ་ལྡན།
འཛམ་གླིང་དམག་ཆེན་གསུམ་པའི་སྔོན་བརྡ་མིན་པ་ཤོག་།