ཐའེ་ཝན་གྱི་གྲོས་ཚོགས་ནང་བོད་མིའི་དམངས་གཙོའི་དུས་ཆེན་སྲུང་གཙི་གནང་།

བཙན་བྱོལ་བོད་མིའི་དམངས་གཙོའི་དུས་ཆེན་ཉིན་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཧྥ་རི་ཌི་ལིམ་ལགས་ཀྱིས་ང་ཚོ་ཐའེ་ཝན་མི་མང་ལ་རེ་བོ་ཆེན་པོ་ཞིག་ཡོད་པ་ནི་༧གོང་ས་སྐྱབས་མགོན་མཆོག་ཐའེ་ཝན་ནང་ཕེབས་རྒྱུ་དང་། ཁོང་གི་སྐུ་ཚེ་ཞབས་པད་བརྟན་རྒྱུ། བོད་མི་མང་རང་དབང་གི་སྒོ་ནས་བོད་དུ་ལོག་ཐུབ་པའི་སྨོན་འདུན་ཡོད་སྐོར་གསུངས་འདུག

ཁ་སང་ཕྱི་ཚེས་ ༢ ཉིན་ཐའེ་ཝན་གྱི་གྲོས་ཚོགས་ཚོགས་ཁང་དུ་ཐའེ་ཝན་སྐུ་ཚབ་དོན་གཅོད་ཁང་དང་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ། ཐའེ་ཝན་བོད་རིགས་ཚོགས་པ་བཅས་མཉམ་འབྲེལ་གྱིས་བཙན་བྱོལ་བོད་མིའི་དམངས་གཙོ་དབུ་བརྙེས་ནས་མི་ལོ་ ༦༢ འཁོར་བའི་དུས་ཆེན་སྲུང་གཙི་གནང་འདུག མཛད་སྒོའི་ཐོག་ཏུ་སྐུ་མགྲོན་གཙོ་བོ་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་གཙོ་སྐུ་ཞབས་ཧྥ་རི་ཌི་ལིམ་ (Freddy Lim) ལགས་ཀྱིས་གཙོས་ཐའེ་ཝན་གྲོས་ཚོགས་ཀྱི་འཐུས་མི་ཧོང་སུན་ཧན་ (Hung Sun-Han) ལགས་དང་། Chiu Hsien དང་ Lin Chiu-Yin) ལགས།  ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་དྲུང་ཆེ་སྐུ་ཞབས་ (Shih Yi Hsiang) ལགས། ཐའེ་ཝན་གྲོས་ཚོགས་འགྲོ་བ་མིའི་ཐོབ་ཐང་གི་དྲུང་ཆེ་ (Wuer Kaixi) ལགས།  ཝན་ཤང་སློབ་ཆེན་གྱི་འཆར་འགོད་འགན་འཛིན་ (Lee Ming -Che) ལགས།  ཧོང་ཀོང་གཞོན་ནུའི་དྲུང་ཆེ་ (Sky Fung) ལགས་བཅས་མི་གྲངས་ ༥༠ ལྷག་མཉམ་ཞུགས་གནང་ཡོད་འདུག

མཛད་སྒོའི་དྲ་ལམ་བརྒྱུད་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། དེ་རིང་བོད་ཀྱི་དམངས་གཙོའི་ཉིན་མོ་འཛམ་གླིང་གི་ས་ཁུལ་འདྲ་མིན་ནང་སྲུང་གཙི་བྱེད་བཞིན་ཡོད་པ་ལྟར། ཐའེ་ཝན་གྱི་གྲོས་ཚོགས་ཚོགས་ཁང་དུ་བོད་ཀྱི་དམངས་གཙོ་ཉིན་མོ་སྲུང་གཙི་བྱེད་ཐུབ་པར་ཧ་ཅང་དགའ་བོ་བྱུང་། ཐའེ་ཝན་གྱི་བོད་དོན་རྒྱབ་སྐྱོར་བ་ཡོངས་ལ་བཀའ་དྲིན་ཆེ་ཞེས་དང་། འཛམ་གླིང་གི་རྒྱལ་ཁབ་མང་པོས་དམངས་གཙོའི་ཆེད་དུ་དཀའ་ལས་མང་པོ་བརྒྱབ་སྟེ་རྩོད་ལེན་བྱས་ཡོད་ཀྱང་། བོད་ཀྱི་དམངས་གཙོ་ནི་༧གོང་ས་སྐྱབས་མགོན་རིན་པོ་ཆེ་མཆོག་ནས་རྒྱ་གར་གྲོས་ཚོགས་ཀྱི་དམངས་གཙོའི་ལམ་ལུགས་གཞིར་བཟུང་ནས། བོད་མི་མང་གི་བདེ་སྡུག་ཆེད་དུ་སྩལ་བའི་གསོལ་རས་ཞིག་ཡིན་ཞིང་། བོད་མིའི་སྒྲིག་འཛུགས་ཀྱིས་དམངས་གཙོའི་སྒྲིག་གཞི་ལྟར་ལས་དོན་བྱེད་ཕྱོགས་རྒྱུན་འཁྱོངས་བྱེད་ཀྱི་ཡོད་ལ། དམངས་གཙོའི་ལམ་ལུགས་ཀྱི་རང་དབང་ཐོབ་ཐང་སྤྱད་པའི་ཐོག་ནས་རྒྱ་ནག་གཞུང་ལ་ཁ་གཏད་གཅོག་བཞིན་ཡོད་སྐོར་གསུངས་འདུག

དེ་ནས་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་གཙོ་སྐུ་ཞབས་ཧྥ་རི་ཌི་ལིམ་ (Freddy Lim) ལགས་ཀྱིས། ང་ནི་ཕྱི་ལོ་༢༠༠༣ བཟུང་བོད་དོན་ཀྱི་ལས་འགུལ་ནང་འཛུལ་ཞུགས་བྱས་པ་ཡིན། དེ་དུས་ཐའེ་ཝན་མི་མང་ནང་འཛུལ་ཞུགས་པ་མང་པོ་མི་འདུག ལོ་ངོ་ཉི་ཤུའི་རྗེས་ཀྱི་དེ་རིང་འགྱུར་བ་མང་པོ་ཐེབས་འདུག ང་སེམས་འགུལ་ཐེབས་སོང་། ཕྱི་ལོ་༢༠༡༡་ལོ་ནས་བཟུང་བོད་མི་མང་གིས་རང་ཉིད་ཀྱི་དབུ་ཁྲིད་འོས་འདེམས་བྱས་ཏེ་ད་ལྟ་བར་དམངས་གཙོའི་ལམ་ལུགས་ལ་འཕེལ་རྒྱས་ཆེན་པོ་བྱུང་ཡོད། ཅེས་དང་། བོད་དང་ཐའེ་ཝན་གྱི་གནས་སྟངས་གཅིག་པ་རེད། ང་ཚོས་གོམ་པ་རེ་རེ་བརྒྱབ་ནས་མདུན་སྐྱོད་བྱས་ཚེ་ལས་དོན་འགྲུབ་ཀྱི་རེད། ང་ཚོ་ཐའེ་ཝན་མི་མང་ལ་རེ་བོ་ཆེན་པོ་ཞིག་ཡོད་པ་ནི་༧གོང་ས་སྐྱབས་མགོན་མཆོག་ཐའེ་ཝན་ནང་ཕེབས་རྒྱུ་དང་། ཁོང་གི་སྐུ་ཚེ་ཞབས་པད་བརྟན་རྒྱུ། བོད་མི་མང་རང་དབང་གི་སྒོ་ནས་བོད་དུ་ལོག་ཐུབ་པའི་སྨོན་འདུན་ཡོད་སྐོར་གསུངས་སོང་།

ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། ཐའེ་ཝན་གྲོས་ཚོགས་སུ་བོད་དང་ཐའེ་ཝན་གྱི་གྲོགས་པོ་གྲོགས་མོ་མང་པོ་མཉམ་འཛོམས་ཀྱིས་བོད་ཀྱི་དམངས་གཙོའི་ཉིན་མོ་ཐེངས་ ༦༢ པ་སྲུང་གཙི་བྱས་པར་ཐུགས་རྗེ་ཆེ་ཞེས་དང་། བོད་དང་ཐའེ་ཝན་གཉིས་ཆོས་དད་རང་མོས་དང་དམངས་གཙོའི་རང་དབང་གི་རིན་ཐང་། ཆབ་སྲིད་རིག་གཞུང་གི་ལྟ་བ་བཅས་ཀྱི་ཐོག་ནས་དུས་ཡུན་རིང་པོ་ནས་གཞུང་དང་མི་མང་རང་བཞིན་གྱི་ཐོག་ནས་མཛའ་བརྩེ་ཟབ་མོ་ཆགས་ཡོད་པ་རེད། འོན་ཀྱང་། རྒྱ་ནག་གཞུང་གིས་ཆབ་སྲིད་ཀྱི་ཐོག་ནས་ང་ཚོར་གཅིག་མཐུན་གྱི་སྟངས་འཛིན་དང་དྲག་གནོན་བྱེད་ཀྱི་ཡོད་པ་རེད་ཅེས་གསུངས་འདུག

བྱམས་པ་ཚེ་རིང་།