དབྱིན་ཡུལ་གྱི་སྲིད་བློན་གསར་པ་འོས་འདེམས་བྱུང་།

དབྱིན་ཇིའི་རྙིང་ཞེན་སྲིད་དོན་ཚོགས་པའི་ཚོགས་མི་གཉིས་ཀྱི་བར་སྲིད་བློན་གྱི་དངོས་གཞིའི་འོས་འགྲན་བྱས་ཏེ། ལྕམ་ལེ་ཛི་ཊི་རོ་སི་ལགས་དབྱིན་ཡུལ་གྱི་སྲིད་བློན་གསར་བར་འདེམས་ཐོན་བྱུང་ཡོད་ཅིང་། མོ་ནི་དབྱིན་ཇིའི་ལོ་རྒྱུས་ནང་གི་བུད་མེད་སྲིད་བློན་ཐེངས་གསུམ་པ་དེ་ཆགས་ཀྱི་ཡོད་འདུག

ཁ་སང་ཕྱི་ཚེས་ ༥ ཉིན་དབྱིན་ཇིའི་སྲིད་བློན་གྱི་འོས་བསྡུའི་གྲུབ་འབྲས་ཡོངས་བསྒྲགས་བྱས་པའི་ཁྲོད། རྙིང་ཞེན་སྲིད་དོན་ཚོགས་པའི་ཚོགས་མི་སྐུ་ཞབས་རཱི་ཤེ་སའོ་ནག་ (Rishi Sunak) ལགས་སུ་འོས་གྲངས་ ༦༠༣༩༩ འཐོབ་པ་དང་ཆབ་སྲིད་ཚོགས་པ་དེའི་མགོ་ཁྲིད་ལྕམ་ལེ་ཛི་ཊི་རོ་སི་(Liz Truss) ལགས་སུ་འོས་གྲངས་ ༨༡༣༢༦ འཐོབ་སྟེ། ལྕམ་ལེ་ཛི་ཊི་རོ་སི་ལགས་དབྱིན་ཡུལ་གྱི་སྲིད་བློན་གསར་པ་དང་དབྱིན་ཇིའི་ལོ་རྒྱུས་ནང་གི་བུད་མེད་སྲིད་བློན་གསུམ་པ་བཅས་ཆགས་ཀྱི་ཡོད་འདུག་ལ། ད་རེས་ཁོང་གི་གལ་འགངས་ཆེ་བའི་བློན་ཆེན་རིམ་པའི་ཁྲོད་མི་རིགས་དཀར་པོའི་རིགས་རྒྱུད་ཀྱི་སྐྱེས་པ་གཅིག་ཀྱང་བསྐོ་གཞག་བྱ་རྒྱུ་མིན་སྐོར་བརྗོད་ཡོད་འདུག

ཁ་སང་ལྕམ་ལེ་ཛི་ཊི་རོ་སི་ལགས་ཀྱིས་སྲིད་བློན་འོས་འགྲན་གྱི་རྒྱལ་ཁའི་གཏམ་བཤད་སྤེལ་སྐབས། དེང་སྐབས་འཛམ་གླིང་སྤྱི་དང་བྱེ་བྲག་ཏུ་དབྱིན་ཡུལ་ནང་གློག་ཆས་དང་རྫས་འགྱུར། ནུས་ཤུགས་སོགས་ཀྱི་རིན་གོང་འཕར་བཞིན་པ་འགོག་སྲུང་བྱ་རྒྱུ་མ་ཟད། དབྱིན་ཇིའི་ནང་དཔྱ་ཁྲལ་སྤོར་གཅོག་གི་གོམ་སྟབས་ཤུགས་ཆེན་སྤོས་ཏེ། དབྱིན་ཇིའི་དཔལ་འབྱོར་ཉམས་རྒུད་སྲུང་སྐྱོབ་དང་ཚོང་ལས་དར་འཕེལ་གྱི་ཕྱོགས་སུ་བསྐྱོད་རྒྱུ་ཡིན་སྐོར་སོགས་བརྗོད་ཡོད་པ་རེད།

ཡུ་རོབ་མཐུན་ཚོགས་ཀྱི་ཚོང་དོན་སྒྲིག་འཛུགས་ཀྱི་སྲིད་འཛིན་ལྕམ་ལེ་ཡན་ (Leyen) ལགས་དང་འཇར་མན་སྲིད་བློན་ལཱ་ཧྥི་ (Olaf Scholz) ལགས། དེ་བཞིན། ཨོ་གླིང་སྲིད་བློན་ཨན་ཐོ་ནེ་ (Anthony Albanese) དང་རྒྱ་གར་སྲིད་བློན་མུ་དྷི་སོགས་ནས་ལྕམ་ལེ་ཛི་ཊི་རོ་སི་ལགས་སུ་འཚམས་འདྲི་ཞུས་ཏེ། མ་འོངས་པར་དབྱིན་ཇི་དང་རྒྱལ་ཁབ་དེ་དག་བར་གྱི་འབྲེལ་ལམ་གོང་འཕེལ་དང་མཉམ་ལས་དང་རོགས་འདེགས་སོགས་ཀྱི་ལམ་ཁ་སྔར་ལྷག་གིས་ཇེ་ཡང་དུ་འགྲོ་བའི་སྨོན་འདུན་ཞུས་འདུག་ལ། དམིགས་བསལ་འཁྱུག་ལ་ཉེ་བའི་དབྱིན་ཇིའི་སྲིད་བློན་ཇོན་སན་བྷོ་རེ་སི་ལགས་དང་སྲིད་ཟུར་ཐི་རེ་སཱ་ (Theresa May)།  སྲིད་ཟུར་ཌེ་ཝི་ཌི་(David Cameron) བཅས་ཀྱིས་འཚམས་འཕྲིན་ནང་། དབྱིན་ཇིའི་རྒྱལ་ཁབ་ཀྱི་མངའ་ཐང་ཁོད་སྙོམས་དང་དར་སྤེལ་གཏོང་སླད། རྙིང་ཞེན་སྲིད་དོན་ཚོགས་པའི་ཚོགས་མི་ཡོངས་མ་གྲོས་བསམ་པ་གཅིག་མཐུན་གྱིས་ཁོ་མོའི་རྒྱབ་རྩར་ལངས་ཏེ་མདུན་བསྐྱོད་བྱ་དགོས་པའི་སྐུལ་མ་བཏང་འདུག

ད་རེས་སྐབས་སྔོན་མའི་སྲིད་བློན་གྱི་དུས་ཡུན་མ་རྫོགས་གོང་ནས་དབྱིན་ཡུལ་ནང་འོས་བསྡུ་བྱས་པ་དེ། འདི་ལོའི་ཕྱི་ཟླ་ ༧ ནང་འཁྱུག་ལ་ཉེ་བའི་སྲིད་བློན་ཇོན་སན་བྷོ་རེ་སི་ལགས་སུ་ལས་དོན་སྒྲུབ་ཕྱོགས་ཀྱི་ཐོག་ནས་རང་གི་སྲིད་དོན་ཚོགས་པའི་ཚོགས་མི་དང་ཁ་གཏད་ངལ་རྩོལ་ཚོགས་པ་སོགས་ཀྱིས་ཡིད་ཆེས་བློ་གཏད་མེད་པའི་རྩོད་པ་བསླངས་བར་བརྟེན། སྲིད་བློན་ཇོན་སན་བྷོ་རེ་སི་ལགས་ནས་དགོངས་པ་ཞུ་རྒྱུའི་ཐག་གཅོད་བླངས་པ་ལ་བརྟེན་ནས་བྱུང་བ་ཞིག་ཡིན་པ་དང་། ད་ལྟ་དབྱིན་ཇིའི་གཞུང་ལ། ཡོ་ཁུ་རེན་གྱི་དམག་འཁྲུག་དང་ཡུ་རོབ་མཐུན་ཚོགས་དང་ཁ་བྲལ་གྱི་མཇུག་སྐྱོང་གི་ལས་དོན། ཏོག་དབྱིབས་གཉན་རིམས་དང་འཕྲོད་བསྟེན། ཚོང་རྫས་ཀྱི་རིན་གོང་ཇེ་ཆེར་སོང་བ་དང་བདེ་སྲུང་དང་འབྲེལ་བའི་ནུས་རྫས་ཀྱི་དཀའ་ངལ། དེ་བཞིན་རྒྱལ་ཡོངས་འོས་བསྡུ་ཆེན་མོ་ཐོན་ལ་ཉེ་བ་སོགས་ཀྱི་དཀའ་ངལ་མང་དག་ཅིག་འཕྲད་ཀྱི་ཡོད་པ་རེད་འདུག

གསར་དུ་འོས་འདེམས་བྱུང་བའི་དབྱིན་ཇིའི་སྲིད་བློན་གསར་པ་ལྕམ་ལེ་ཛི་ཊི་རོ་སི་ལགས་ནི།  ཕྱི་ལོ་ ༡༩༧༥ ལོར་དབྱིན་ཇིའི་གྲོང་ཁྱེར་ཨོག་སི་ཧྥོ་ཌིར་མི་ཚང་དཀྱིལ་མའི་ཁྱིམ་ཚང་ཞིག་ཏུ་སྐྱེས་པ་དང་ད་ལྟ་རང་ལོ་ ༤༧ ཡིན་པ་རེད། ཕྱི་ལོ་ ༡༩༩༦ ལོར་ཨོག་སི་ཧྥོ་ཌིའི་མེར་ཊོན་མཐོ་སློབ་ནས་བསླབ་པ་མཐར་སོན་པ་དང་རྙིང་ཞེན་སྲིད་དོན་ཚོགས་པའི་ཁོངས་སུ་ཞུགས་ཡོད་ཅིང་། ཕྱི་ལོ་ ༢༠༠༠ བར་ཨོག་སི་གཙུག་ལག་སློབ་གྲྭ་ཆེན་མོའི་གུ་ཡངས་མང་གཙོ་ཚོགས་པའི་ཚོགས་གཙོ་དང་ས་གནས་(Lewisham Deptford) གྲོས་ཚོགས་འོག་མའི་ཚོགས་གཙོ། དེ་བཞིན། ཕྱི་ལོ་ ༢༠༡༠ ལོ་ནས་དངོས་སུ་དབྱིན་ཇིའི་གྲོས་ཚོགས་འོག་མའི་ནང་འདེམས་ཐོན་བྱུང་བ་ནས་ད་བར་མི་ལོ་ཉེར་དྲུག་ཡས་མས་ཙམ་གྱི་རིང་དབྱིན་ཇིའི་སྤྱི་ཚོགས་དང་ཆབ་སྲིད་ཀྱི་སྡིངས་ཆ་ཆེ་མ་ཆུང་གསུམ་འདྲ་མིན་ནང་སྲི་ཞུ་ཞུས་མྱོང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།