བོད་རིགས་སློབ་མ་གསུམ་ལ་ཉི་ཧོང་གི་སློབ་ཡོན་ཐོབ།

བོད་རིགས་བུ་མོ་སློབ་མ་གསུམ་ལ་ཕྱི་ལོ་ ༢༠༢༣ ལོའི་ཉི་ཧོང་གི་ཅི་པཱ་བཟོ་རིག་སློབ་གཉེར་ཁང་གི་སློབ་ཡོན་ཐོབ་འདུག

དེ་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གསལ་བསྒྲགས་ཤིག་སྤེལ་བའི་ནང་དུ། སེ་ལ་ཀུ་བོད་ཁྱིམ་སློབ་གྲྭ་ནས་འཛིན་རིམ་བཅུ་གཉིས་ཐོན་ཞིང་སྨན་སྦྱོར་གྱི་ (Bachelor of Pharmacy)ཉེ་བའི་གཙུག་ལག་རབ་འབྱམས་པ་ཐོན་པའི་བདེ་སྐྱིད་དཔལ་མོ་དང་བཟོ་རིག་གི་ཉེ་བའི་གཙུག་ལག་རབ་འབྱམས་པ་ (BTech)ཐོན་པའི་ཨོ་རྒྱན་དཔལ་མོ་ལགས། དྷ་སྟེང་བོད་ཁྱིམ་ནས་འཛིན་རིམ་བཅུ་གཉིས་ཐོན་ཞིང་ཚོང་ལས་རིག་པའི་ཉེ་བའི་གཙུག་ལག་རབ་འབྱམས་པ་ (Bachelor in Marketing) ཐོན་པའི་གཡུ་ལྷ་སྒྲོལ་མ་ལགས་བཅས་ལ་ཕྱི་ལོ་ ༢༠༢༣ ལོའི་ཉི་ཧོང་ཅི་པཱ་བཟོ་རིག་སློབ་གཉེར་ཁང་གི་སློབ་ཡོན་ཐོབ་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ཤེས་རིག་ལས་ཁུངས་ཀྱི་སློབ་ཡོན་འགན་འཛིན་བསོད་ནམས་བཟང་མོ་ལགས་སུ་ཉི་ཧོང་གི་སློབ་ཡོན་དེ་གང་འདྲ་འཐོབ་ཀྱི་ཡོད་མེད་སྐོར་དྲིས་པར་ཁོང་གིས། ད་ལོ་སློབ་མ་ ༡༡ གིས་མཉམ་ཞུགས་གནང་ཡོད་པ་དང་། ཐོག་མར་ཤེས་རིག་ལས་ཁུངས་ཀྱིས་ངག་རྒྱུགས་བཏང་སྟེ་སློབ་མ་ ༥ བདམས་པ་དང་། དེ་ནས་ཉི་ཧོང་དུ་རྟེན་གཞི་བྱས་ཡོད་པའི་ཅི་པཱ་བཟོ་རིག་སློབ་གཉེར་ཁང་ (Chiba Institute of Technology) ནས་ངག་རྒྱུགས་བཏང་སྟེ་སློབ་མ་ ༣ འདེམས་ཐོན་བྱུང་ཡོད་པ་རེད། སློབ་མ་གསུམ་གྱིས་འབྱུང་འགྱུར་ཕྱི་ལོ་ ༢༠༢༣ ཟླ་ ༣ དང་ ༤ པ་གང་རུང་གི་ནང་ཉི་ཧོང་དུ་སློབ་སྦྱོང་ཆེད་བསྐྱོད་རྒྱུ་ཡིན་སྐོར་བརྗོད་བྱུང་།

བསོད་ནམས་བཟང་མོ་ལགས་ཀྱིས་གསུངས་པ་ལྟར་ན། ཉི་ཧོང་གི་ཅི་པཱ་བཟོ་རིག་སློབ་གཉེར་ཁང་དུ་སློབ་ཡོན་ཞུ་བའི་ཆ་རྐྱེན་ཁག་ནི། སྙན་ཞུ་འབུལ་མཁན་བོད་རིགས་སློབ་མ་ཡིན་དགོས་ཤིང་། རང་བཙན་ལག་དེབ་དང་སྐྱབས་བཅོལ་ལག་དེབ་ཀྱི་དུས་འགྱངས་ཞུས་ཟིན་དགོས་པ་མ་ཟད། དེ་བཞིན་སློབ་ཕྲུག་རྣམས་ལ་ཉེ་བའི་གཙུག་ལག་རབ་འབྱམས་པ་སློབ་མཐར་སོན་པའི་ལག་འཁྱེར་དགོས་པ་དང་ཉུང་མཐའི་བརྒྱ་ཆ་ ༥༠ དང་ཡང་ན་བརྒྱ་ཆ་ ༥༠ ཡན་ཡོད་པ། དུས་ཡོལ་མེད་པའི་ཕྱི་སྐྱོད་ལག་དེབ་བཅས་དགོས་ཀྱི་ཡོད་འདུག་ལ། ཉི་ཧོང་གི་ཆི་བྷ་བཟོ་རིག་སློབ་གཉེར་ཁང་གི་སློབ་ཡོན་དེ་ཕྱི་ལོ་ ༢༠༡༧ ལོ་ནས་མགོ་བཙུགས་ཏེ། ད་བར་སློབ་གཉེར་ཁང་དེའི་ནང་བོད་པའི་སློབ་མ་ ༡༤ ལ་སློབ་སྦྱོང་གི་གོ་སྐབས་འཐོབ་མྱོང་ཡོད་པ་རེད།

གསར་འགོད་པ། བསྟན་འཛིན་ཕུར་བུ།