༧གོང་ས་མཆོག་གིས་དབྱིན་ཇིའི་སྲིད་བློན་གསར་པར་འཚམས་འཕྲིན་སྩལ།

༧གོང་ས་རྒྱལ་བ་རིན་པོ་ཆེ་མཆོག་དང་སྲིད་སྐྱོང་སྤེན་པ་ཚེ་རིང་མཆོག དེ་བཞིན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བཅས་ཀྱིས་དབྱིན་ཇིའི་སྲིད་བློན་གསར་པ་ལྕམ་ལེ་ཛི་ཊོ་རོ་ཆི་ལགས་སུ་འཚམས་འཕྲིན་སྩལ་ཡོད་འདུག

ཟླ་འདིའི་ཕྱི་ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་ལྕམ་སྐུ་ལེ་ཛི་ཊི་རོ་སི་ (Liz Truss) ལགས་དབྱིན་ཡུལ་གྱི་སྲིད་བློན་གསར་པར་འདེམས་ཐོན་བྱུང་བར་འཚམས་འདྲིའི་གསུང་འཕྲིན་སྩལ་བའི་ནང་། ལོ་རྒྱུས་ཀྱི་ཐོག་ནས་བོད་དང་དབྱིན་ཡུལ་དབར་ཡུན་རིང་དང་ཐུན་མོང་མ་ཡིན་པའི་འབྲེལ་ལམ་ཡོད་པ་དང་། ད་བར་ང་ཚོས་ཕྱི་ལོ་ ༡༩༥༩ གོང་ནས་དབྱིན་ཡུལ་གཞུང་གིས་བོད་ནང་བསྐོ་གཞག་བྱས་པའི་དབྱིན་ཇིའི་དཔོན་རིགས་ཀྱི་ནང་མི་རྣམས་དང་ལྷན་དུ་བློ་ཐག་ཉེ་པོའི་ཐོག་ནས་མུ་མཐུད་དུ་འབྲེལ་བ་བྱེད་བཞིན་ཡོད། ཅེས་དང་།

ངོས་ནས་དབྱིན་ཡུལ་གྱི་གྲོགས་པོ་ཚོས་བོད་མིའི་རང་དབང་གི་མངོན་འདོད་དང་གནས་ལུགས་ལ་ཐུགས་སྣང་དང་རྒྱབ་སྐྱོར་གནང་བཞིན་པར་རྗེས་སུ་ཡི་རང་ཞུ་ཡི་ཡོད། ད་ལྟའི་ཆར་ཆེས་གཉན་འཕྲང་ཅན་གྱི་དུས་སྐབས་ཤིག་ཆགས་ཀྱི་ཡོད་པ་དང་། ངོས་ཀྱིས་དབྱིན་ཡུལ་མུ་མཐུད་དུ་འཕེལ་རྒྱས་ཡོང་བ་དང་། དབྱིན་ཡུལ་གཞུང་གིས་གཅིག་ལ་གཅིག་བརྟེན་གྱི་འཛམ་གླིང་འདི་ཉིད་ཞི་བདེ་བརྟན་ལྷིང་དང་སྲ་བརྟན་ཡོང་སླད་ཞབས་འདེགས་རླབས་ཆེན་བསྒྲུབ་ཐུབ་པའི་ཐུགས་རེ་ཡོད། ཅེས་གསུངས།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྒེར་གྱི་ཊུ་ཝི་ཊར་སྟེང་ལྕམ་སྐུ་ལེ་ཛི་ཊི་རོ་སི་ལགས་དབྱིན་ཡུལ་གྱི་སྲིད་བློན་ཆགས་པར་འཚམས་འདྲི་གནང་བ་དང་སྦྲགས། དབྱིན་ཡུལ་གཞུང་གིས་འཛམ་གླིང་སྤྱི་ཡོངས་སུ་གཞི་རྩའི་འགྲོ་བ་མིའི་ཐོབ་ཐང་གོང་སྤེལ་གཏོང་བཞིན་ཡོད་པ་དང་། ཕྱི་ལོ་ ༢༠༢༠ ལོར་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་ལ་ཉེས་ཆད་འགེལ་བའི་ཁྲིམས་གཞི་གཏན་འབེབ་གནང་བར་ཡིད་སྨོན་གནང་གི་ཡོད། ཁྱེད་རང་གིས་སྣེ་ཁྲིད་འོག་གཞུང་འཛིན་གསར་པའི་ངོས་ནས་མུ་མཐུད་དུ་འགྲོ་བ་མིའི་ཐོབ་ཐང་གི་ཐོག་ལ་ཕྱག་ལས་རྒྱ་ཆེར་གནང་རྒྱུའི་རེ་བ་ཡོད། ཅེས་གསུངས་འདུག

དེ་བཞིན། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འཚམས་འདྲིའི་གསུང་འཕྲིན་གནང་བའི་ནང་། ངས་བོད་ཕྱི་ནང་གཉིས་ཀྱི་བོད་མི་ཡོངས་ཀྱི་ཚབ་ཞུས་ནས། ལྕམ་སྐུ་ལེ་ཛི་ཊི་རོ་སི་ལགས་དབྱིན་ཡུལ་གྱི་སྲིད་བློན་གསར་པར་འོས་འདེམས་བྱུང་བར་འཚམས་འདྲི་ཞུ་རྒྱུ་ཡིན། ཁྱེད་རང་ལ་སྲིད་བློན་གྱི་རྒྱལ་ཁ་ཐོབ་པ་ནི་དབྱིན་ཡུལ་མི་མང་གིས་ཁྱེད་རང་དང་ཁྱེད་རང་གི་སྣེ་ཁྲིད་པའི་གཞུང་ལ་ཡིད་ཆེས་དང་བློ་གཏད་ཡོད་པ་མཚོན་གྱི་ཡོད། ལྕམ་སྐུ་ཁྱེད་ཉིད་ལ་རྒྱལ་ཁ་ཐོབ་པར་བོད་མི་ཡོངས་ལ་དགའ་ཚོར་ཡོད་པ་དང་། ཁྱེད་ཉིད་ཀྱིས་བོད་དོན་གྱི་ཆེད་དུ་མུ་མཐུད་དུ་རྒྱབ་སྐྱོར་གནང་རྒྱུའི་རེ་བ་ཡོད། ཁྱེད་ཀྱིས་དབྱིན་ཡུལ་མི་མང་གི་མངོན་འདོད་བཞིན་ལས་དོན་སྒྲུབ་ཐུབ་པ་དང་། མ་འོངས་པའི་བྱ་གཞག་ལམ་ལྷོངས་ཡོང་བའི་སྨོན་འདུན་ཞུ་ཡི་ཡོད། ཅེས་གསུངས་འདུག

གསར་དུ་འོས་འདེམས་བྱུང་བའི་དབྱིན་ཇིའི་སྲིད་བློན་གསར་པ་ལྕམ་སྐུ་ལེ་ཛི་ཊི་རོ་སི་ལགས་ནི།  ཕྱི་ལོ་ ༡༩༧༥ ལོར་དབྱིན་ཇིའི་གྲོང་ཁྱེར་ཨོག་སི་ཧྥོ་ཌིར་མི་ཚང་དཀྱིལ་མའི་ཁྱིམ་ཚང་ཞིག་ཏུ་སྐྱེས་པ་དང་ད་ལྟ་རང་ལོ་ ༤༧ ཡིན་པ་རེད། ཕྱི་ལོ་ ༡༩༩༦ ལོར་ཨོག་སི་ཧྥོ་ཌིའི་མེར་ཊོན་མཐོ་སློབ་ནས་བསླབ་པ་མཐར་སོན་པ་དང་རྙིང་ཞེན་སྲིད་དོན་ཚོགས་པའི་ཁོངས་སུ་ཞུགས་ཡོད་ཅིང་། ཕྱི་ལོ་ ༢༠༠༠ བར་ཨོག་སི་ཧྥོ་ཌི་གཙུག་ལག་སློབ་གྲྭ་ཆེན་མོའི་གུ་ཡངས་མང་གཙོ་ཚོགས་པའི་ཚོགས་གཙོ་དང་ས་གནས་ (Lewisham Deptford) གྲོས་ཚོགས་འོག་མའི་ཚོགས་གཙོ། དེ་བཞིན། ཕྱི་ལོ་ ༢༠༡༠ ནས་དངོས་སུ་དབྱིན་ཇིའི་གྲོས་ཚོགས་འོག་མའི་ནང་འདེམས་ཐོན་བྱུང་བ་ནས་ད་བར་མི་ལོ་ ༢༦ ཡས་མས་ཙམ་གྱི་རིང་དབྱིན་ཇིའི་སྤྱི་ཚོགས་དང་ཆབ་སྲིད་ཀྱི་སྡིངས་ཆ་ཆེ་མ་ཆུང་གསུམ་འདྲ་མིན་ནང་སྲི་ཞུ་ཞུས་མྱོང་ཡོད་པ་རེད།

གསར་འགོད་པ། བསྟན་འཛིན་ཕུར་བུ།