དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་གཟུགས་གསལ་ཐང་ཡིན་པ་མ་ཟད་འབྱུང་འགྱུར་མི་ལོ་བཅུ་ཕྲག་གཉིས་ལྷག་རིང་བཞུགས་རྒྱུར་ཐུགས་ཁྲལ་མེད་སྐོར་སོགས་གསུངས་སོང་།
དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞིས་བྱེས་གཉིས་ཀྱི་རྒྱལ་བ་ཇོ་ནང་བ་ཡོངས་དང་། མདོ་སྨད་མང་འབའ་བྱ་གསུམ། མོན་ཡུལ་རིག་གཞུང་གཅེས་འཛིན་ཁང་། སིཌ་ནི་བོད་རིགས་སྤྱི་མཐུན་ཚོགས་པ་སོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་གནང་སོང་།
མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་ལ་བྱང་ཆུབ་སེམས་ཀྱི་མྱོང་བ་བཅོས་མ་ཞིག་སྐྱེས་བསྡད་ཡོད་རེད། བྱས་ཙང་བྱང་ཆུབ་སེམས་ཀྱི་མྱོང་བ་བཅོས་མ་ཞིག་ཡོད་པའི་ཐོག་ནས། ཇི་སྲིད་ནམ་མཁའ་གནས་པ་དང་། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །ཅེས་ངོས་རང་ནས་ཉིན་མཚན་མེད་པར་སྨོན་ལམ་བརྒྱག་གི་ཡོད། ངོས་རང་ལས་དང་སྨོན་ལམ་གྱིས་༧རྒྱལ་དབང་གི་མིང་ཐོགས་མཁན་ཞིག་ཏུ་སྐྱེས། བོད་རྒྱ་ཆེ་མི་མང་ལྟ་ཅི་དགོས། ཧི་མ་ལ་ཡའི་རི་རྒྱུད་ཀྱི་མི་མང་དེ་དག་གིས་ཀྱང་མཐའ་གཅིག་ཏུ་དད་མོས་ཆེན་པོ་བྱེད་ཀྱི་འདུག ཉེ་ཆར་ངོས་རང་ཟངས་དཀར་དང་ལ་དྭགས་གླེའི་ས་ཁུལ་ཁག་ཁ་ཤས་སུ་ཕྱིན་པ་ཡིན། མི་མང་ཚོས་དད་འདུན་དེ་ཧ་ལས་པའི་ཤུགས་ཆེན་པོ་རེད། འབྱུང་འགྱུར་མོན་ལ་འགྲོ་རྒྱུའི་འཆར་གཞི་བཏིང་གི་ཡོད། མོན་པ་ཚོས་ཀྱང་དངོས་གནས་དྲང་གནས་དད་དམ་གཡོ་བ་མེད་པ་བྱེད་ཀྱི་ཡོད་པ་རེད། བྱས་ཙང་། སྐྱེས་བ་འདིར་མཐོང་ཆོས་སུ་མི་མང་པོ་ཞིག་གིས་དགའ་མོས་བྱས་ནས། ངོས་རང་གིས་བསྟན་པའི་ཞབས་འདེགས་གང་ལ་གང་འཚམ་སྒྲུབ་པ་མིག་མཐོང་ལག་ཟིན་ཡིན་པའི་སྐབས་སུ། ངོས་རང་གིས་ཚེ་རིང་དུ་གནས་རྒྱུ་དེ་རྒྱུ་མཚན་ལྡན་པ་ཞིག་རེད། ངོས་རང་ད་ལྟ་ལོ་ ༨༧ རེད། མུ་མཐུད་ནས་བརྟག་དཔྱད་བྱས་ཡོང་དུས། ལོ་བརྒྱ་དང་བཅུ་གྲངས་ཤིག་འཚོ་ཐུབ་རྒྱུའི་ཚད་མ་བརྟན་པོ་འདུག དེ་འདྲ་ཡིན་དུས་ད་ལྟ་འབྱུང་འགྱུར་ལོ་ ༢༠ ལྷག་འཚོ་ཐུབ་ཀྱི་རེད། དངོས་ཡོད་གནས་ཚུལ་ལ་ངོས་རང་གིས་མི་མང་པོ་ཞིག་ལ་ཕན་ཐོགས་བྱ་ཐུབ་རྒྱུ་དང་། ནང་པ་མིན་པའི་མི་མང་པོ་ཞིག་ལའང་ཕན་ཐོགས་ཏོག་ཙམ་བྱེད་ཐུབ་པ་ཆགས་དུས། ནམ་མཁའ་མ་ཟད་ཀྱི་བར་དུ་འགྲོ་བའི་དོན་བྱེད་ཀྱི་ཡིན་ཞེས་སྨོན་ལམ་བརྒྱབ་པ་དང་། དམ་བཅའ་བཞག་ཡོད་མཁན་ཞིག་ཡིན་དུས། དེ་འདྲའི་ཕན་ཐོགས་ཡོད་པའི་གོ་སྐབས་དེ་ག་ཚོད་རིང་རིང་འཚོ་ཐུབ་པ་བྱ་རྒྱུ་དེ། རྒྱུ་མཚན་ལྡན་པའི་སྐད་ཆ་རེད་པཱ། དེ་ནི་ཆབ་སྲིད་དང་དཔལ་འབྱོར་གྱི་ལས་ཀ་སོགས་ཀྱི་སྐད་ཆ་ཞིག་མ་རེད། གཞན་ཕན་གྱི་ལྷག་བསམ་ལྡན་པའི་བློ་ཞིག་སྐྱེས་ནས་གང་ལ་གང་འཚམ་གྱིས་ཕན་ཐོགས་ཡོང་གི་ཡོད་དུས། ཚེ་འདི་རིང་དུ་གནས་རྒྱུ་ཞིག་ངོས་རང་གིས་སྨོན་ལམ་བརྒྱབ་ཀྱི་ཡོད། ཁྱེད་ཚོས་ཀྱང་སྨོན་ལམ་བསྐྱོན་ཤོག་ཨ། དེ་རིང་སྒྲོལ་དཀར་གྱི་ཚེ་སྒྲུབ་དང་འབྲེལ་ནས་བརྟན་བཞུགས་གནང་གི་ཡོད་རེད། ཁོང་འཕགས་པའི་ལྷ་ཐུན་མོང་མ་ཡིན་པ་ཞིག་རེད། ངོས་རང་གིས་སྒྲོལ་དཀར་གྱི་ཚིག་དེ་ཉིན་ལྟར་འདོན་གྱི་ཡོད། དེ་རིང་འདིར་ཚེ་སྒྲུབ་གནང་རྒྱུར་ཁྱེད་རང་ཚོས་སྨོན་ལམ་ཡག་པོ་ཞིག་བསྐྱོན། ངོས་རང་ནས་རྡོ་རྗེ་ཕ་ལམ་ནང་བཞིན་གྱི་ཕན་པ་བརྟན་པོ་ཞིག་བཟུང་བསྡད་ཡོད་པས། ཁྱེད་རང་ཚོ་ཚང་མ་བློ་བདེ་པོ་བྱེད་ནས་བཞུགས་ཨ། ཅེས་གསུངས་སོང་།
ཡང་མགོན་པོ་མཆོག་གིས། ཉེ་ཆར་ངོས་རང་བོད་ཀྱི་ས་མཚམས་སུ་ཡོད་པའི་ལ་དྭགས་དང་ཟངས་དཀར་སོགས་སུ་འགྲོ་དུས། མི་ཚོས་ཧ་ལས་པའི་དད་པ་གཡོ་བ་མེད་པ་ཞིག་བྱེད་ཀྱི་འདུག དེ་བོད་ཀྱི་ཆོས་དང་རིག་གཞུང་གཅིག་གྱུར་ཡིན་པའི་ཆ་ནས་དད་པ་དམ་ཚིག་གཡོ་བ་མེད་པ་ཞིག་འདུག་གཱ ད་ལྟ་བཙན་དབང་གི་འོག་ཏུ་ཚུད་པའི་བོད་ནང་ལ་ཡོད་པའི་རྒྱ་ཆེ་མི་མང་བརྒྱ་ཆ་བརྒྱ་ཐམ་པ་ངོས་རང་ལ་དད་པ་དང་། མོས་པ། ཡིད་ཆེས་རྩེ་གཅིག་ཡོད་པ་རེད། དེ་རིང་ཁ་སང་རྒྱ་ནག་ནང་དུ་ཡིན་ན་ཡང་ནང་ཆོས་ལ་དོ་སྣང་ཤུགས་ཆེ་རུ་ཕྱིན་འདུག ནང་ཆོས་ཤེས་ཡོང་དུས་དེ་སྔ་ཏཱ་ལའི་བླ་མ་ལོག་སྤྱོད་པ་ཞེས་བཤད་བསྡད་པ་དེ་ལོག་སྤྱོད་པ་རང་རེད་མི་འདུག་ག་ཞེས་བཤད་ཀྱི་འདུག གང་ལྟར་དགའ་པོ་བྱེད་མཁན་མང་དུ་འགྲོ་ཡི་འདུག མཐོང་ཆོས་སུ་མི་མང་པོར་ཕན་གྱི་ཡོད་པ་ཡིན་དུས་ངོས་རང་ནས་སྙིང་སྟོབས་སྐྱེད་ནས་ཚེ་ཡུན་དུ་བརྟན་གྱི་ཡིན། དེ་བཞིན་འཕགས་ཡུལ་རྒྱ་གར་དང་། རྒྱ་ནག བོད་ཁ་བ་གངས་ཅན་གྱི་མི་ཙམ་མ་ཡིན་པའི་ཡུལ་ལྷ་གཞིས་བདག་ཚང་མས་དངོས་གནས་དྲང་གནས་ངོས་རང་ལ་དད་འདུན་ཆེན་པོ་བྱེད་ཀྱི་ཡོད་པ་དེ། རྨི་ལམ་སོགས་ཀྱི་ནང་དུ་གནས་ཚུལ་གསལ་པོ་ཡོང་གི་འདུག དེ་འདྲ་ཡིན་དུས་བྱང་ཆུབ་ཀྱི་སེམས་བསམ་བློ་གཏོང་མཁན་ཞིག་གིས་དངོས་ཡོད་གནས་ཚུལ་ལ་མི་མང་པོ་ཞིག་ལ་ཁ་ཡོད་ལག་ཡོད་ཀྱིས་དངོས་སུ་ཕན་གྱི་ཡོད་རེད། དེ་འདྲ་ཡིན་དུས་ཕན་ས་དེར་བསམ་བློ་གང་ཡང་མེད་པ་བྱས་ནས་གཞན་པ་ཞིག་ལ་གཞན་དོན་བྱེད་ཀྱི་ཡིན་ལབ་ན་ཆོ་གལ་མི་འདུག ད་ལྟ་ཁ་ཡོད་ལག་ཡོད་ཀྱིས་མི་ལ་ཕན་ཡོང་བསྡད་པ་དེས་མི་ཙམ་མ་ཡིན་པར་ཡུལ་ལྷ་གཞིས་བདག་སོགས་ཀྱི་དགའ་བོ་ཞེ་དྲགས་གནང་གི་འདུག བྱས་ཙང་མདོ་སྨད་ནས་སྐྱེས་པའི་ཨ་མདོ་ལྷ་མོ་དོན་གྲུབ་ཀྱི་ལས་དང་སྨོན་ལམ་གྱི་ཐོག་ནས་ལྷ་འདྲེ་མི་གསུམ་མང་པོ་ཞིག་ལ་ཕན་ཐོགས་ཡོང་བསྡད་པ་ཞིག་ཆགས་བསྡད་འདུག་པས། ཇི་སྲིད་ནམ་མཁའ་མ་ཟད་ཀྱི་བར་དུ་སེམས་ཅན་གྱི་དོན་བྱེད་ཀྱི་ཡིན་ཟེར་ནས་སྨོན་ལམ་བརྒྱབ་ཀྱི་ཡོད་རེད་ལ། ཁ་ཡོད་ལག་ཡོད་ཀྱིས་མི་ཚེ་འདིར་མཐོང་ཆོས་ལ་ལྷ། ཀླུ། གཞིས་བདག་མང་པོ་ཞིག་ལ་ཕན་གྱི་ཡོད་པ་ཡིན་དུས། ངོས་རང་གི་གཟུགས་པོ་ཡག་ཐག་ཆོད་ཡོད། ཉེ་ཆར་ལྡི་ལི་ནས་བརྟག་དཔྱད་བྱས་པ་ཡིན། ཡག་པོ་ཞེ་དྲགས་འདུག་ཟེར། ད་པུས་མོ་ཏོག་ཙམ་དཀའ་ངལ་འདུག་མ་གཏོགས་གཞན་གཟུགས་པོ་ཞེ་དྲགས་ཡག་པོ་འདུག་ཟེར། བྱས་ཙང་ངོས་རང་འབྱུང་འགྱུར་ལོ་ཉི་ཤུ་སུམ་ཅུ་བསྡད་ཀྱི་རེད། ཁྱེད་རང་ཚོས་དེ་རིང་བརྟན་བཞུགས་གནང་ནས་སྨོན་ལམ་བཏབ་པར། ངོས་རང་གིས་སྨོན་ལམ་དེ་དེ་བཞིན་བསྒྲུབ་པའི་ཚོད་ཐིག་གི་འདུག ཅེས་གསུངས་སོང་།
མགོན་པ་གང་ཉིད་ཀྱིས། བོད་བྱང་བརྒྱུད་ཀྱི་མོན་ནས་བཟུང་ཁྱེད་རང་ཚོས་གཙོ་བོ་བྱས་ནས་བོད་ཆོལ་ཁ་གསུམ་གྱི་མི་རིགས་ཡོངས་རྫོགས་སྔོན་གྱི་ལས་སྨོན་གྱི་འབྲེལ་བའི་ཐོག་ནས། ངོས་རང་གིས་བོད་བསྟན་སྲིད་ཀྱི་ཞབས་འདེགས་ངོ་སོ་མེད་པ་ཞིག་བསྒྲུབ་ཡོད་རེད། ད་དུང་སླད་ཀྱང་ཚེ་རབས་ནས་ཚེ་རབས་གཞན་དོན་དང་བསྟན་པའི་དོན་བསྒྲུབ་རྒྱུར་སྨོན་ལམ་ཉིན་ལྟར་བརྒྱབ་ཀྱི་ཡོད། ད་ལྟ་དངོས་ཡོད་གནས་ཚུལ་ཁ་ཡོད་ལག་ཡོད་ལ་བསྟན་པ་དང་འགྲོ་བའི་དོན་དུ་ཞབས་འདེགས་སྒྲུབ་ཀྱི་ཡོད་དུས། ངོས་རང་གིས་མུ་མཐུད་ནས་ལོ་བཅུ་གྲངས་ཁ་ཤས་ཤིག་བསྡད་རྒྱུར་ཡིད་ཆེས་ཡོད་ལ་སྨོན་ལམ་ཀྱང་བརྒྱབ་ཀྱི་ཡོད། ངོས་རང་གི་སྙིང་སྟོབས་སྐྱེད་ནས་འབྱུང་འགྱུར་ལོ་བཅོ་ལྔ་ཉི་ཤུ་ལྷག་བསྡད་ཀྱི་ཡིན། ཞེས་གསུངས་སོང་།
གསར་འགོད་པ། དཔལ་ལྡན།
