དེ་རིང་ཕྱི་ཚེས་ ༧ ཉིན་གྱི་ཕྱི་དྲོའི་ཆུ་ཚོད་ ༡།༣༠ སྟེང་གངས་ཅན་སྐྱིད་ཤོངས་ཀྱི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་དབུ་ཚུགས་སོང་བ་དང་། ཚོགས་ཐོག་ཏུ་གཞུང་འབྲེལ་རྗེས་དྲན་དང་མྱ་ངན་གུས་འདུད་ཀྱི་གྲོས་འཆར་ཁག་གསུམ་དང་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་གཅིག་བཅས་སྤྱི་མོས་ཐོག་ནས་གཏན་འབེབ་གནང་སོང་བ་དང་། ད་ཐེངས་ཀྱི་གྲོས་ཚོགས་སུ་སྤྱི་འཐུས་གཅིག་གིས་གྲོས་ཚོགས་ཀྱི་ཚོགས་ཡུན་ཆ་ཚང་རིང་དགོངས་པ་ཞུས་ཡོད་པ་དང་སྤྱི་འཐུས་གཉིས་ནས་ཉིན་གྲངས་གསུམ་བཞིའི་རིང་ལ་དགོངས་པ་ཞུས་ཡོད་འདུག
སྐབས་དེར་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་གཙོའི་གསུང་བཤད་གནང་སྐབས། དེ་རིང་སྔ་དྲོར་༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་ལ་ཚོགས་སྡེ་ཁག་ཅིག་ནས་བརྟན་བཞུགས་བསྟར་འབུལ་ཞུ་བའི་སྐལ་བ་བཟང་པོ་བྱུང་བ་དང་མཉམ་དུ། གྲོས་ཚོགས་ཚོགས་མི་ཚང་མས་༧གོང་ས་མཆོག་གི་གསེར་ཞལ་མཇལ་རྒྱུ་བྱུང་བའི་སྐལ་བ་བཟང་པོ་བྱུང་། ༧སྐྱབས་མགོན་རིན་པོ་ཆེ་མཆོག་ནས་ལོ་ངོ་བཅུ་ཕྲག་གཉིས་རིང་སྐུ་འཚོ་བཞུགས་ཀྱི་ཡིད་ཆེས་དང་མཚན་མ་ཡོད་པ་བཀའ་གསལ་བོ་གསུངས་སོང་། ཉེ་ཆར་༧ གོང་ས་མཆོག་གི་སྐུ་གཟུགས་ལ་ལྡི་ལི་ནས་བརྟག་དཔྱད་བྱེད་པའི་སྐབས་སུ་གྲུབ་དོན་དང་གནས་བབ་ཧ་ཅང་ཡག་པོ་ཡིན་པའི་བཀའ་སློབ་ཕེབས་པར་དེ་རིང་ང་ཚོ་ཧ་ཅང་དགའ་བོ་བྱུང་། རྣམ་པ་ཚོ་རྒྱ་ཆེ་མང་ཚོགས་ཀྱིས་མཁྱེན་གྱི་ཡོད་རེད་དེ་གསལ་འདོན་བྱས་ནས་ཞུས་པ་ཡིན།
ཉེ་ཆར་༧གོང་ས་སྐྱབས་མགོན་ཆེན་པོ་མཆོག་ནས་བོད་མི་ཡོངས་ལ་མང་གཙོ་གསོལ་སྩལ་གནང་བའི་དུས་དྲན་ཐེངས་ ༦༢ པ་སྲུང་གཙི་ཞུས་ཟིན་ཙམ་རེད། དེར་བརྟེན། ང་ཚོའི་ཆབ་སྲིད་ཀྱི་གནས་བབ་དང་བཙན་བྱོལ་བོད་མིའི་མང་གཙོའི་འཕེལ་རིམ་ཐོག་གྲོས་ཚོགས་དང་འཛིན་སྐྱོང་བཀའ་ཤག་གི་གཏམ་བཤད་ནང་དེ་ཚོ་གསལ་བོ་འཁོད་ཡོད་པ་རེད། དེ་རིང་ང་ཚོ་འདིར་འཛོམས་པའི་གྲོས་ཚོགས་ཀྱི་ཚོགས་མི་ཚང་མ་བོད་མི་མང་གིས་དངོས་སུ་འོས་བླུགས་ཏེ། མི་མང་བརྒྱུད་པའམ་གྲོས་ཚོགས་ཀྱི་འགན་དབང་སྐུལ་ཡོད་པ་དང་མདོར་ན་མི་མང་གིས་འོས་བསྡུ་བྱས་ནས་ལངས་བསྡད་པ་ཤ་སྟག་ཆགས་ཀྱི་ཡོད། དེ་བས་ང་ཚོར་མང་གཙོའི་ལྟ་གྲུབ་ཀྱི་ཐོག་ལ་ཡིད་ཆེས་དང་ངེས་པ་གང་ལ་གང་འཚམ་རྙེད་དགོས་པའི་གནས་སྟངས་ཆགས་ཡོད།
༧གོང་ས་སྐྱབས་མགོན་ཆེན་པོ་མཆོག་གི་མཛད་འཕྲིན་གྱི་ནང་དུ་ཆོས་དང་ཆབ་སྲིད། སྤྱི་ཚོགས་བཅས་ཀྱི་མཛད་འཕྲིན་རྒྱ་ཆེ་བ་མང་པོ་ཞིག་ཡོད། དེའི་ནང་དུ་འཛམ་གླིང་སྤྱི་ལ་ཆབ་སྲིད་ཀྱི་ལམ་སྟོན་མང་པོ་ཡོད་པ་དང་ལྷག་པར་དུ་ང་ཚོ་བོད་མི་རྣམས་ལ་ཆབ་སྲིད་ཀྱི་ལམ་སྟོན་དང་མང་གཙོ་གསོལ་སྩལ་གནང་བ་སོགས་ཡོད། ༧གོང་ས་སྐྱབས་མགོན་རིན་པོ་ཆེ་མཆོག་གི་བཀའ་སློབ་སྔ་རྗེས་ཕེབས་ཡོད་པ་རེད། རིང་ནས་སྙིང་ལ་བརྣག་པའི་འདོད་དོན་གཅིག་ཡིན་ཞེས་གསུངས་པ་དེ། རྣམ་པ་ཚོས་དཔྱད་ཤེས་ཀྱི་རེད་བསམ་བཞིན་ཡོད། དེ་འདྲ་བའི་ལས་ཀ་བྱས་པའི་ཐོག་ནས་བལྟས་ཡོང་དུས། ང་ཚོས་ཆབ་སྲིད་ཀྱི་ཐོག་ནས་རྒྱབ་སྐྱོར་འཚོལ་དགོས་པ་དང་དཔལ་འབྱོར་གྱི་རོགས་ཚོགས་འཚོལ་དགོས་པ། ང་ཚོའི་ཆབ་སྲིད་དང་འཐབ་རྩོད་ཀྱི་གནས་བབ། སྒྲིག་འཛུགས་ཀྱི་གནས་བབ་སོགས་མུ་མཐུད་གནས་ཐུབ་པའི་སྲོག་ཤིང་ནི་མང་གཙོ་ཆགས་ཡོད། སྤྱིར་མང་གཙོའི་ནང་གྲོས་ཚོགས་ཀྱི་ལམ་ལུགས་དང་སྲིད་འཛིན་གྱི་ལམ་ལུགས། སྔ་མོའི་དུས་ཚོད་ལ་ཐད་བསྐོས་དང་བརྒྱུད་ནས་མང་གཙོ་ཟེར་བའི་བརྒྱུད་རིམ་གྱི་ཐོག་ནས་བཤད་སྟངས་ཡོད་པ་རེད། ང་ཚོ་སྐུ་ཚབ་ཀྱི་གྲོས་ཚོགས་ཆགས་ཡོད་པ་དང་གྲོས་ཚོགས་དང་སྲིད་འཛིན་གྱི་ལམ་ལུགས་གཉིས་ཀྱི་ཐོག་ནས་ལས་འཆར་ཡོད་པ་ཞིག་རེད། ང་ཚོ་བཙན་བྱོལ་གྱི་སྒྲིག་འཛུགས་འདི་བཙན་བྱོལ་གྱི་མང་གཙོ་ལ་བརྟེན་པའི་སྒྲོམ་གཞི་འདི་ཧ་ཅང་ཡག་པོ་ཡོད་པའི་ངེས་ཤེས་བསྐྱེད་ཡོང་གི་འདུག
མང་གཙོ་སྤྱི་ཚོགས་དང་སྒྲིག་འཛུགས་ཀྱི་ནང་དུ་ལྟ་གྲུབ་མི་འདྲ་བ་ཡོང་ཆོག་པ་དང་དེ་འདྲ་ཡོང་བའི་སྡིངས་ཆ་བསྐྲུན་དགོས་ཀྱི་ཡོད། འོན་ཀྱང་། རང་གི་རྒྱལ་ཁབ་དང་མི་རིགས་ཀྱི་གནད་དོན་ཐོག་བསླེབས་དུས། ཆབ་སྲིད་ཚོགས་པ་མི་འདྲ་བ་དང་སྒེར་གྱི་ལྟ་བ་མི་འདྲ་བ་ཚང་མས་མཉམ་དུ་ནུས་པ་སྤུང་ཐུབ་དགོས་རྒྱུ་འཛམ་གླིང་གི་ཆབ་སྲིད་ནང་གལ་ཆེན་པོ་བརྩི་ཡི་ཡོད། ཉེ་ཆར་མང་གཙོའི་དུས་དྲན་གྱི་གསུང་བཤད་ནང་དུ་དེ་བཀོད་ཡོད། ང་ཚོ་བཙན་བྱོལ་གྱི་མང་གཙོའི་སྒྲིག་འཛུགས་ནུས་པ་ལྡན་པ་དང་ཚགས་ཚུད་ཡོད་པ། བོད་ཀྱི་འཐབ་རྩོད་ཀྱི་ནུས་པ་ཉམས་དམས་སུ་མི་འགྲོ་བ། ལྷག་པར་དུ་བོད་མིའི་ཆིག་སྒྲིལ་གྱི་གནས་བབ་དེ་ཉམས་དམས་སུ་མི་འགྲོ་རྒྱུ་ནི། ང་ཚོ་བཙན་བྱོལ་གྱི་མང་གཙོའི་སྲོག་ཤིང་ལྟ་བུར་ངོས་འཛིན་བྱེད་ཀྱི་ཡོད། ཅེས་གསུངས་སོང་།
ང་ཚོའི་སྒྲིག་འཛུགས་ཀྱི་དམིགས་ཡུལ་དང་ང་ཚོའི་ཕྱག་ལས་གནང་ཕྱོགས་ཀྱི་བརྒྱུད་རིམ། ༧གོང་ས་མཆོག་གི་དགོངས་གཞི་སོགས་གང་ལྟར་ང་ཚོ་རྩ་དོན་འཐབ་རྩོད་བྱེད་མཁན་གྱི་སྒྲིག་འཛུགས་ཤིག་ཆགས་བསྡད་ཡོད། བཙན་བྱོལ་བོད་མིའི་བཅའ་ཁྲིམས་ནང་འགན་དབང་གལ་ཆེ་ཤོས་བོད་དོན་བདེན་མཐའ་སེལ་ཐབས་དང་བཙན་བྱོལ་སྤྱི་ཚོགས་ཀྱི་གནས་བབ་ལ་ལྟ་རྟོག་བྱ་རྒྱུ། གཞིས་ལུས་བོད་མི་རྣམས་ཀྱི་དཀའ་ངལ་དེ་དག་སེལ་ཐབས། དེ་བཞིན་བོད་ཀྱི་ཁོར་ཡུག་སོགས་ཀྱི་འགན་དབང་མང་པོ་སྐུལ་ཡོད། དེར་བརྟེན་ང་ཚོའི་འཐབ་རྩོད་ཀྱི་དམིགས་ས་དེ་རྒྱ་ནག་གཞུང་གི་གནས་བབ་དེ་ཆགས་ཡོད། ད་ལྟའི་ཆར་རྒྱ་ནག་ནང་སྤྱི་ཡོངས་ནས་ལྟ་གྲུབ་དང་བསམ་བློ་མི་འདྲ་བ་གང་ལ་གང་འཚམ་ཡོད་པ་ང་ཚོས་ངོས་འཛིན་བྱེད་ཀྱི་ཡོད། བསམ་ཚུལ་དང་ལྟ་གྲུབ་མི་འདྲ་བ་ཙམ་གྱིས་རྒྱ་ནག་ནང་ཆབ་སྲིད་ཀྱི་འགྱུར་བ་ག་འདྲ་ཞིག་འགྲོ་ཡི་ཡོད་པ་ང་ཚོས་ཞུ་ཚོད་ཐིག་གི་མེད་ལ། མུ་མཐུད་མཁྲེགས་བཟུང་གི་རྣམ་པ་དེ་ཐོན་བསྡད་ཡོད། རིང་མིན་ཕྱི་ཟླ་ ༡༠ ཚེས་ ༡༦ ཉིན་རྒྱ་ནག་གི་ཚོགས་ཆེན་དེ་འཚོགས་གཏན་འཁེལ་ཡོད་པ་རེད། དེའི་ཐོག་ནས་རྒྱ་ནག་གི་ད་ལྟའི་མགོ་ཁྲིད་དེ་ཚོ་འགྱུར་བ་ཐེབས་ཀྱི་ཡོད་དང་མེད། ལྷག་པར་ད་ལྟ་སྲིད་འཛིན་ཞི་ཅིན་ཕིན་གྱི་ལས་ཡུན་མུ་མཐུད་གནས་རྒྱུ་ཡིན་པ་དབྱེ་ཞིབ་པ་ཚོས་ཐག་བཅད་ནས་གསུངས་བསྡད་ཡོད། དེའི་ཐོག་ནས་བོད་ནང་གི་གནས་སྟངས་ལ་འགྱུར་བ་ཆེན་པོ་ཞིག་འགྲོ་ཡི་ཡོད་མེད་དེ་དྲི་བ་ཆེན་པོ་ཞིག་ཆགས་བསྡད་ཡོད།
དེ་བཞིན། སྲིད་འཛིན་ཞི་ཅིན་ཕིན་གྱི་འདས་པའི་ལོ་བཅུ་རིང་རྒྱ་ནག་ནང་ལོགས་ཀྱི་སྲིད་ཇུས་ཐོག་ནས་གནས་བབ་ག་འདྲ་བསྐྲུན་ཡོད་པ་དང་རྒྱ་ནག་གི་བཙན་འཛུལ་འོག་ཡོད་པའི་བོད་མཚོན་པའི་གྲངས་ཉུང་མི་རིགས་སོགས་ཀྱི་གནས་བབ་ག་འདྲ་ཆགས་ཡོད་མེད་ཀྱི་གནས་སྟངས་གང་ལ་གང་འཚམ་ཁ་གསལ་བོ་ཆགས་བསྡད་ཡོད། ད་དེ་འདྲ་བའི་སྲིད་ཇུས་མུ་མཐུད་ནས་ཕྱིན་པ་ཡིན་ན། ང་ཚོའི་ངོས་ནས་གདོང་ལེན་དང་ཁ་གཏད། འཆར་གཞི་ག་འདྲ་སྒྲིག་དགོས་པ་སོགས་ཀྱི་བྱེད་སྒོ་དག་གལ་ཆེན་པོ་ཆགས་ཡོད། བོད་ཀྱི་བཞུགས་མོལ་ཚོགས་འདུ་ཟེར་བ་དེ་ཕྱི་ལོ་ ༢༠༢༠ ལོར་འཚོགས་ཡོད་པ་དང་རྒྱ་ནག་གི་སྲིད་ཇུས་དེའི་ཐོག་ནས་བོད་ནང་ལ་སྲིད་ཇུས་ག་རེ་འཛིན་གྱི་ཡོད་མེད་དབྱེ་ཞིབ་གནང་གི་ཡོད། སྲིད་ཇུས་དེའི་ཐོག་ནས་ང་ཚོའི་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བའི་ལས་འགུལ་སོགས་ཤུགས་ཆེན་སྤེལ་བཞིན་འདུག དེ་རྗེས་ཕྱི་ལོ་ ༢༠༢༡ ཟླ་ ༨ ནང་ཞི་ཅིན་ཕིན་ལྷ་སར་ཕེབས་པ་རེད། ལྷ་སར་ཀྲུང་ཧཱ་མི་རིགས་གཅིག་མཐུན་གྱི་འདུས་གྲུབ་ཟེར་ནས་མི་རིགས་མཉམ་བསྲེས་ཀྱི་ལྟ་གྲུབ་ཤུགས་ཆེན་པོ་བསླེབས་ཡོང་གི་ཡོད། ད་ལྟ་བོད་ཀྱི་མགོ་ཁྲིད་དེ་ཚོས་བཀའ་མོལ་གསུང་ཡོང་དུས། དང་པོ་གྲོང་ཁྱེར་དང་ལྷག་པར་གྲོང་གསེབ་ཁག་ཏུ་ལྟ་གྲུབ་དེ་ཚོ་ལག་བསྟར་བྱེད་ཀྱི་ཡོད། གང་ལྟར་བོད་ཀྱི་བཞུགས་མོལ་ཚོགས་འདུ་དང་ཞི་ཅིན་ཕིན་ལྷ་སར་ཕེབས་པ་དེ་ཚོའི་ཐོག་ནས་བལྟས་ཡོང་དུས། ཐད་ཀར་ཞུས་པ་ཡིན་ན་འཆར་གཞི་དང་དམིགས་ཡུལ་ཡོད་པའི་ཐོག་ནས་བོད་མི་རིགས་རྩ་མེད་གཏོང་བའི་བསམ་བློ་འདུག་ཅེས་ངོས་འཛིན་ཞུས་ན་ཞུ་མི་ཐུབ་པའི་གནས་སྟངས་གང་ཡང་མི་འདུག
ཕྱི་ལོ་ ༢༠༢༢ ཟླ་ ༦ ནང་གྲོས་ཚོགས་ཀྱིས་གཙོ་འགན་འཁུར་ནས་ཨ་རིའི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་ཆེན་ཐེངས་༨ པ་སྐོང་འཚོག་ཞུ་ཐུབ་ཡོད་པ་རེད། སྐབས་དེ་དུས་༧གོང་ས་མཆོག་གི་གསུང་འཕྲིན་གནང་ཡོད་ལ། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་ཕི་ལོ་སི་མཆོག་དབུ་འབྱེད་ལ་དངོས་སུ་ཕེབས་པ་དང་། རྒྱལ་ཁབ་ཁག་ ༢༨ གྱི་གྲོས་ཚོགས་འཐུས་མི་དངོས་སུ་ཕེབས་པ་དང་།དྲ་ལམ་ནས་ཀྱང་འཛུལ་ཞུགས་བྱེད་ཐུབ་ཡོད། ཉིན་གཉིས་རིང་གི་གྲོས་ཚོགས་སྟེང་དུ་བོད་དོན་གྱི་ལས་འཆར་དང་བསྒྲགས་གཏམ་སྤེལ་བར་ཧ་ཅང་ཡག་པོ་བྱུང་ཡོད། རྒྱ་ནག་གིས་བོད་ཀྱི་གནད་དོན་ནི་རྒྱ་ནག་ནང་ཁུལ་གྱི་གནས་ཚུལ་ཞིག་ངོས་འཛིན་བྱེད་ཀྱི་ཡོད་པ་དེ། རྒྱལ་སྤྱིའི་གནས་བབ་ཐོག་ནས་བོད་དོན་ནི་རྒྱལ་སྤྱིའི་ངོ་བོ་ཞིག་ཏུ་གྱུར་ཡོད་པ་གསལ་བ་ཆགས་ཡོད་པར་བསམ་བྱུང་།ལོ་ངོ་ ༦༠ རིང་༧གོང་ས་མཆོག་གི་ཐུགས་རྗེ་བཀའ་དྲིན་དང་། གྲོས་ཚོགས་དང་ས་གནས་བོད་མིའི་ནུས་པ་མཉམ་སྤུངས་ལ་བརྟེན་ནས་ལས་དོན་ཚགས་ཚུད་ཆགས་འདུག
དེ་བཞིན་བཀའ་ཤག་དང་ཨ་རིའི་སྐུ་ཚབ་དོན་གཅོད་ཁང་། རྒྱལ་སྤྱིའི་དོན་ལས་འགུལ་ཁང་བཅས་ཀྱི་མཉམ་རུབ་མཐུན་སྦྱོར་ཡག་པོ་གནང་སོང་བས། དེ་རིང་འདིར་བརྒྱུད་ནས་ཚང་མར་ཐུགས་རྗེ་ཆེ་ཞུ་རྒྱུ་ཡིན། དེ་རིང་གྲོས་ཚོགས་ཚོགས་ཐུན་བཞི་བའི་ལས་རིམ་སྙན་སྦྱོར་ཞུ་བར་མྱ་ངན་གྲོས་ཆོད་གྲོས་གཞི་དོན་ཚན་གསུམ་ཡོད། དང་པོ་ནི་ཕྱི་ལོ་༢༠༢༢ ཟླ་༣ ཚེས་ ༢༧ ཉིན་རྔ་བ་ཀིརྟི་དགོན་པའི་ཉེ་འགྲམ་དུ་བཀྲ་ཕུན་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་པར་རྒྱ་གཞུང་གིས་བཙན་ཁྲིད་བྱས་ཡོད་པ་རྗེས་སུ་འདས་གྲོངས་ཕྱིན་ཡོད་པ་ཤེས་རྟོགས་བྱུང་པས་ཁོང་ལ་མྱ་ངན་གྱི་གྲོས་ཆོད་དང་། གཉིས་པ། སྤྱི་འཐུས་ཟུར་བ་བྱ་སྲང་ཚེ་དབང་རྣམ་རྒྱལ་ལགས་ཕྱི་ལོ་ ༢༠༢༠ ཟླ་༧ ཚེས་ ༢༣ འདས་གྲོངས་ཕྱིན་ཀྱང་། ཉེ་ཆར་འབྲེལ་ཡོད་ནས་ཤེས་རྟོགས་བྱུང་བར། དགུང་ལོ་༨༤ སྟེང་ཨ་རི་ནས་སྐུའི་འཕན་པ་རྫོགས་པར་མྱ་ངན་གྱི་གྲོས་གཞི་གྲོས་ཆོད་གཅིག་འཁོད་ཡོད། གསུམ་པ། ང་ཚོ་བོད་ཀྱི་བློས་ཐུབ་གྲོགས་པོ་ཉི་ཧོང་གི་སྲིད་བློན་ཟུར་པ་ཤིན་ཛོ་ཨ་བྷེས་མཆོག་ཕྱི་ཟླ་༧ ཚེས་༨ ཉིན་འོས་བསྡུའི་དྲིལ་བསྒྲགས་སྐབས་སུ་ཡུལ་མི་ཞིག་གིས་མེ་མདས་བརྒྱབ་ནས་སྐུའི་འཕན་པ་རྫོགས་འདུག་པར་གྲོས་ཚོགས་ཐོག་མྱ་ངན་གུས་འདུད་ཀྱིས་གྲོས་ཆོད་གྲོས་གཞི་འཁོད་ཡོད།
བོད་ནང་གི་ཛ་དྲག་གནད་དོན་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་གཞི་གཅིག་འཁོད་ཡོད། འདི་ནི་ཕྱི་ལོ་ ༢༠༠༨ ནས་ད་ལྟ་བར་བོད་ནང་གི་ཛ་དྲག་གི་གནས་སྟངས་གནས་བསྡད་ཀྱི་འདུག གདུང་སེམས་མཉམ་བསྐྱེད་ཀྱི་གྲོས་གཞི་དེའི་ནང་དུ་བོད་ཀྱི་ཆབ་སྲིད་གནས་བབ་ཐོག་ལ། འཛིན་སྐྱོང་བཀའ་ཤག་དང་སྤྱི་འཐུས་ཡོངས་དགོངས་ཚུལ་དང་བྱེད་ཕྱོགས་ག་འདྲ་གནང་སྟངས་ཁ་གསལ་ཡོང་གི་རེད། བཅའ་ཁྲིམས་དང་ཁྲིམས་སྒྲིག་བསྐྱར་བཅོས་རིགས་གཅིག་ཡོང་གི་རེད། དཔལ་འབྱོར་ལས་ཁུངས་ཀྱི་ཁྱབ་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ཅི་ཆགས་རྟོག་ཞིབ་ཆེད་བཙུགས་ཚོགས་ཆུང་གི་སྙན་ཐོ་གྲོས་ཚོགས་སུ་སླེབས་ཡོད། གྲོས་ཚོགས་ཀྱི་ལས་དོན་མང་པོ་བྱེད་རྒྱུ་ནི་ཕྱི་ལོ་ ༢༠༢༡་ ནས་ ༢༠༢༢་ལྷན་ཁང་ཁག་ཁྱབ་ཁོངས་དང་བཅས་པའི་དབུས་རྒྱུན་གྱི་ལས་སྡོམ་དང་། ལྷན་ཁང་ཁྱབ་ཁོངས་དང་བཅས་པའི་ལས་སྡོམ་རྒྱས་པར་སྤྱི་འཐུས་རྒྱུན་ལས་ཀྱིས་ཞིབ་འཇུག་བྱས་པའི་སྙན་ཐོ་གྲོས་ཚོགས་སུ་སླེབས་ཀྱི་ཡོད་པའི་ཐོག་ལ་བགྲོ་གླེང་དང་གསལ་བཤད། ལན་འདེབས་བཅས་བྱེད་ཀྱི་རེད།
དེ་བཞིན་སྐབས་ཐོག་གི་དྲི་བ་དང་གཞུང་འབྲེལ་གྱི་གྲོས་ཆོད་རིགས་བཅས་ཡོང་གི་ཡོད་པ་གྲོས་ཚོགས་ཚོགས་དུས་བཞི་པའི་རགས་ཟིན་དང་། ལས་རིམ་གྱི་ནང་དུ་ཆ་ཤས་བཞེས་པའི་སྐབས་བོད་མི་མང་གི་བཅའ་ཁྲིམས་བཀུར་བའི་ཐོག་ནས་བཀའ་ཤག་དང་་སྤྱི་འཐུས་རྣམ་པས་ལྷག་བསམ་དང་སེམས་ཤུགས་ཀྱིས་བོད་ཀྱི་རྩ་དོན་ཐུགས་ཕན་སོས་ཐུབ་པའི་བསམ་ཚུལ་སྤུངས་རྒྱུ་གལ་ཆེན་པོ་རེད། མཚམས་རེ་སྒེར་གྱི་ཚོར་བས་གྲོས་ཚོགས་ཀྱི་ལས་རིམ་ལ་བར་ཆད་ཆགས་ཀྱི་འདུག དེ་ནང་བཞིན་སྤྱི་ཚོགས་ནང་དུ་གོ་བརྡ་ལོགས་ཀ་ཆགས་མི་སྲིད་པ་མེད་དུས། ཚང་མས་ལྷག་བས་མརྣམ་དག་འགན་འཁུར་བཞེས་ནས་བགྲོ་གླེང་དང་ལན་འདེབས། ཆ་ཤས་བཞེས་སྟངས་སོགས་ལ་བོད་སྤྱི་བའི་ལས་དོན་ཐོག་འབབ་པར་དགོངས་པ་རྒྱ་ཆེ་ས་བཞེས་པར་འབོད་སྐུལ་ཞུ་རྒྱུ་ཡིན། ལས་རིམ་རྣམ་གཞག་ཀྱང་ཁྲིམས་སྒྲིག་ནང་བཞིན་འགྲོ་ཐུབ་པ་ཡིན་ན་དཀའ་ངལ་མི་འདུག་ལ། ཁྲིམས་སྒྲིག་བཞིན་འགྲོ་མ་ཐུབ་དུས་ཚོགས་གཙོ་གཙོ་སྐྱོང་བྱེད་ཕྱོགས་ལའང་བསམ་བློ་མང་པོ་ཞིག་གཏོང་དགོས་ཀྱི་འདུག ཁྲིམས་སྒྲིག་གཞིར་བཟུང་གིས་འགྲོ་ཐུབ་པ་ཡིན་ན་དཀའ་ངལ་གང་ཡང་ཡོང་གི་མི་འདུག ཅེས་གསུངས་སོང་།
གསར་འགོད་པ། བྱམས་པ་ཚེ་རིང་དང་སྐལ་བཟང་སྦྱིན་པ་གཉིས་ནས་སྤེལ།
