ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་སྙིང་བསྡུས་ཐོག་བོད་མི་མང་སྤྱི་འཐུས་རྣམ་པས་དོགས་འདྲི་དགོངས་འཆར་སོགས་གནང་ཞིང་། སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་མང་སྤྱི་འཐུས་རྣམས་ཀྱི་དྲི་བར་ལན་འདེབས་གསལ་བཤད་བཅས་གནང་སྟེ་ཆོས་རིག་གི་ལས་བསྡོམས་ཡོངས་སུ་མཇུག་སྒྲིལ་གནང་སོང་།
ཁ་སང་ཉིན་རྒྱབ་ནས་མགོ་འཛུགས་ཀྱིས་དེ་རིང་ཕྱི་ཚེས་ ༩ ཉིན་རྒྱབ་བར་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་བའི་ལས་སྟེང་། ཕྱི་ལོ་ ༢༠༢༡ ཟླ་ ༤ ཚེས་ ༡ ནས་ ༢༠༢༢ ཟླ་ ༣ ཚེས་ ༣༡ བར་གྱི་ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་སྙིང་བསྡུས་ཐོག་བོད་མི་མང་སྤྱི་འཐུས་རྣམ་པས་དོགས་འདྲི་དགོངས་འཆར་སོགས་ཀྱི་ལམ་ནས་བགྲོ་གླེང་གནང་ཞིང་། སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་མང་སྤྱི་འཐུས་རྣམས་ཀྱི་དྲི་བར་ལན་འདེབས་གསལ་བཤད་བཅས་གནང་སྟེ། དེ་རིང་ཉིན་རྒྱབ་ཀྱི་ཚོགས་ཐུན་ནས་ཆོས་རིག་ལས་ཁུངས་མ་ལག་དང་བཅས་པའི་ལས་བསྡོམས་ཡོངས་སུ་མཇུག་སྒྲིལ་གནང་སོང་།
སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༡ ཟླ་ ༤་ཚེས་ ༡ ནས་ ༢༠༢༢ ཟླ་ ༣ ཚེས་ ༣༡ བར་གྱི་ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་སྙིང་བསྡུས་སྒྲོག་སྦྱང་གནང་བ་ལྟར་ན། ཆོས་རིག་ལས་ཁུངས་ཀྱི་ཁྱབ་ཁོངས་སུ་རང་སྐྱོང་ཆོས་རིག་སྡེ་ཚན་ ༥ དང་། རྒྱ་གར་དང་བལ་ཡུལ་གཉིས་ནང་དགོན་སྡེ་གྲངས་ཁྱོན་ ༢༨༩ ཡོད་པའི་གྲྭ་བཙུན་སྔགས་གསུམ་ཁྱོན་ ༤༡༡༧༨ ཡོད་འདུག་ལ། ད་ལྟའི་བཀའ་ཤག་གིས་འདས་པའི་ལོ་གཅིག་རིང་དགོན་སྡེ་གྲྭ་ཚང་ཁག་དང་འབྲེལ་བའི་ལས་དོན་ཇི་བྱས་དང་གྲུབ་འབྲས་ཇི་ཐོན་སོགས་ཀྱི་ལས་བསྡོམས་སྙིང་བསྡུས་ཤོག་གྲངས་དགུ་བཏོན་གནང་འདུག
སྤྱི་འཐུས་དགེ་བཤེས་བློ་བཟང་ཕན་བདེ་ལགས་་ཀྱིས། དཔལ་རྒྱལ་བ་ཀརྨ་པ་མཆོག་གིས་རྒྱ་ནག་དམར་བོའི་གནས་སྟངས་ཛ་དྲག་བོའི་འོག་ཏུ་བློས་བཏང་བྱས་ནས་ས་གནས་འདི་འདྲ་ཞིག་ཏུ་ཕེབས་ཐུབ་ཡོད་ཀྱང་། རང་དབང་ལུང་པར་ཁྲིམས་ཡོད་ས་ཞིག་གི་གནས་སྟངས་འོག་མ་ཉེས་ཁ་གཡོགས་དང་། དེ་མ་ཡིན་པའི་གནས་སྟངས་ཞིག་གི་སྒྲོ་བཏེགས་ཀྱི་ཡོད་པ་གང་ཡིན་ཡང་། གང་ལྟར་ཕྱིའི་ལུང་པར་བཞུགས་ཏེ་ང་ཚོ་མཉམ་འཛོམས་ཐུབ་ཀྱི་ཡོད་པ་མ་རེད། དེ་ལ་གཞེས་བཞུགས་བོད་མི་ཡོངས་ལ་གདོང་བསྟན་དུས་ངོ་ཚ་དགོས་པའི་གནས་སྟངས་ཞིག་ཏུ་ཆགས་ཡོད། གང་ཡིན་ཞེ་ན་ཉི་ཟླ་སྐར་གསུམ་ཞེས་ཡོངས་སུ་གྲགས་པ་༧ པཎ་ཆེན་རིན་པོ་ཆེའི་ཡང་སྤྲུལ་མཆོག་ནི་རྒྱ་ནག་གི་བཙོན་འོག་ཏུ་བསྡད་ཡོད། རྒྱལ་བ་ཀརྨ་བཔ་མཆོག་ནི་ང་ཚོའི་སྒྲིག་འཛུགས་དང་། ཁོང་གི་སློབ་མ་དང་འདུལ་བྱ་ཐམས་ཅད་དང་ཁ་བྲལ་ཡོད། མ་འོངས་བར་བཀའ་སྤྱི་གཉིས་ཀྱི་ངོས་ནས་དཔལ་རྒྱལ་ཀརྨ་པ་མཆོག་གི་ཐོག་བདེན་དཔང་ཡོད་པའི་ལས་འགུལ་ཞིག་སྤེལ་དགོས་ཀྱི་འདུག་པའི་བསམ་ཚུལ་བཏོན་པར།
སྲིད་སྐྱོང་མཆོག་གིས། དཔལ་རྒྱལ་བ་ཀརྨ་པ་མཆོག་གི་གནད་དོན་དང་འབྲེལ་བའི་ཐོག་ཏུ་བཀའ་སྤྱི་གཉིས་ཀྱི་ལས་འགུལ་སྤེལ་བར་བསམ་བློ་ཡག་པོ་ཞིག་མ་གཏང་ན། ཕན་པ་ལས་གནོད་ཆེ་བའི་ཉེན་ཁ་ཡོད་པ་རེད། གནད་དོན་དེ་འབྲེལ་བ་སུ་དང་སུ་ལ་ཐུག་ཡོད་མེད་ང་ཚོས་ཤེས་བསྡད་ཡོད། གལ་ཆེ་བ་ཞིག་ནི་གནད་དོན་དེ་དང་འབྲེལ་བའི་བར་ཆད་ཁ་ཤས་ཤིག་ཡོད། བར་ཆད་དེ་སེལ་རྒྱུ་གལ་ཆེན་རེད། བར་ཆད་དེ་སེལ་བར་ང་ཚོའི་ངོས་ནས་རྒྱ་གར་གཞུང་ལ་གང་ཞུ་དགོས་པ་དེ་ཞུས་ཚར་ཡོད། ག་དུས་གྲུབ་འབྲས་ཐོན་གྱི་ཡོད་མིན་ཞུ་ཚོད་ཁག་པོ་རེད། ངས་མཚམས་རེ་རྒྱ་གར་གཞུང་གི་ལས་བྱེད་ཚོར་རྩེད་མོ་དང་མཉམ་དུ་ལབ་ཀྱི་ཡོད། ཁྱེད་ཚོ་དང་མཉམ་དུ་ལས་ཀ་བྱེད་དུས་བཟོད་སྒོམ་ཞེ་དྲག་དགོས་ཀྱི་འདུག ཟླ་བ་གཅིག་ནང་དུ་འགྲུབ་ཐུབ་པ་དེ་ཟླ་བ་དྲུག་བདུན་འགོར་གྱི་འདུག ཟླ་བ་དྲུག་བདུན་ནང་དུ་འགྲུབ་པ་དེ་ལོ་གཅིག་འགོར་གྱི་འདུག དེ་ཡིན་མིན་ལ་མ་ལྟོས་པར་རྒྱ་གར་གཞུང་གི་གཟིགས་ཕྱོགས་ཡག་པོ་ཡོད་བསྡད་པ་རེད། ད་ལྟའི་ཆར་བར་ཆད་གང་ཡོད་པ་སེལ་ཐུབ་ན་མ་གཏོགས། ཁ་ཞེ་གཉིས་མེད་ཀྱིས་ལས་འགུལ་སྤེལ་ནའང་དེའི་ཕན་ཐོགས་ག་འདྲ་ཡོང་གི་ཡོད་མིན་ཞུ་ཚོད་ཁག་པོ་རེད་འདུག ཅེས་གསུངས་སོང་།
སྤྱི་འཐུས་ཚེ་རིང་ལྷ་མོ་ལགས་ཀྱིས་དེང་སང་རྒྱལ་སྤྱིའི་བོད་རིག་པའི་ཚོགས་འདུ་རབ་དང་རིམ་མང་པོ་འཚོགས་བཞིན་ཡོད་པར་བོད་ཀྱི་དགོན་སྡེའི་ནང་གི་གཞོན་སྐྱེས་གྲྭ་བཙུན་རྣམས་ཚོགས་འདུ་མཉམ་ཞུགས་བྱེད་པའི་མཐོང་ཆེན་སོགས་ཀྱི་སྟེང་དུ་མཐུན་རྐྱེན་སྦྱར་དགོས་གལ་ཆེ་བའི་བསམ་ཚུལ་བཏོན་པར། སྲིད་སྐྱོང་མཆོག་གིས། བོད་རིག་པའི་ཚོགས་ཆེན་གྱི་སྐོར་ལ་མཚོན་ན། བོད་རིག་པའི་ཚོགས་འདུ་གཉིས་འཚོགས་བཞིན་ཡོད། ད་ལོ་ཅེག་རྒྱལ་ཁབ་ཏུ་རྒྱལ་སྤྱིའི་བོད་རིག་པའི་ཚོགས་འདུ་འཚོགས་པ་དང་། ཨ་རི་ཝ་ཤིན་ཀྲོང་ཊི་སི་རུ་གཞོན་སྐྱེས་བོད་རིག་པའི་ཚོགས་འདུ་འཚོགས་པ་རེད། ཚོགས་འདུ་དེ་གཉིས་ཀར་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གིས་ཞིབ་འཇུག་བྱས་ཏེ། ཉམས་ཞིབ་པ་ཚང་མར་རྒྱབ་གཉེར་ཡི་གེ་དང་མཐོང་ཆེན་ཡིག་ཆ། དཔལ་འབྱོར་གྱི་མཐུན་རྐྱེན་སྦྱར་ཡོད། དགོན་སྡེ་ནང་གི་ལོ་ན་ཆུང་བའི་དཔེ་ཆ་ཡག་པོ་ཡོད་པ་དེ་ཚོ་འཛུལ་ཞུགས་ཞུ་སྟངས་སྐོར་རེད། སྤྱིར་བོད་རིག་པ་ཚོགས་འདུ་ལོ་གསུམ་གྱི་ནང་དུ་ཐེངས་གཅིག་བསྡུ་བཞིན་ཡོད་པ་རེད། བོད་མིའི་སྒྲིག་འཛུགས་ཀྱིས་ད་ལོ་བོད་རིག་པའི་ནང་དུ་མཉམ་ཞུགས་བྱས་པ་ཙམ་མ་ཡིན་པར། མཉམ་ཞུགས་བྱེད་པའི་གནས་སྟངས་ག་འདྲ་ཆགས་ཀྱི་ཡོད་པ་དང་མཉམ་ཞུགས་བྱེད་མཁན་རྣམས་གང་ནས་ཡོང་གི་ཡོད་མེད། བརྗོད་གཞི་མ་འདྲ་བ་ག་རེའི་སྟེང་དུ་སྐད་ཆ་བཤད་ཀྱི་ཡོད་མེད། དེ་བཞིན་འགན་འཛིན་ལྷན་ཚོགས་ཀྱི་ཚོགས་མི་ག་འདྲ་འདེམས་ཀྱི་ཡོད་མེད་སོགས་ཀྱི་ཐོག་ཏུ་ཆེད་དུ་ཉམས་ཞིབ་བྱེད་མཁན་བཏང་ཡོད། མ་འོངས་བར་ཚོགས་འདུར་ཉམས་ཞིབ་བྱེད་པའི་སྐབས་སུ་མི་སྒེར་གྱི་དཔྱད་རྩོམ་བྲིས་པ་བཀླག་ནས་འགྲོ་བ་ཙམ་མ་ཡིན་པར། ཚོགས་འདུའི་ནང་དངོས་ཤུགས་བརྒྱུད་གསུམ་ཐོག་ནས་མཉམ་ཞུགས་བྱས་ཏེ་ཕན་ཐོགས་པའི་གནས་སྟངས་ཞིག་ཆགས་པར། ད་ལོའི་ཚོགས་འདུའི་སྙན་ཐོ་འབྱོར་བར་གཞི་བཞག་ནས་མ་འོངས་བར་མཉམ་ཞུགས་བྱེད་སྟངས་དང་། བོད་མིའི་སྒྲིག་འཛུགས་ཀྱི་མཐུན་རྐྱེན་སྦྱར་སྟངས་སོགས་སུ་བལྟས་ནས་སྔོན་མ་ལས་ཚོགས་འདུ་ཚགས་ཚུད་དང་ཕན་ཐོགས་ཡོང་བར་བཟོ་རྒྱུ་ཡིན། ཞེས་གསུངས་སོང་།
ཡང་ཆོས་རིག་ལས་ཁུངས་ཀྱི་ལས་བསྡོམས་སྐབས་སྤྱི་འཐུས་གོ་བོ་བློ་བཟང་ཕན་བདེ་ལགས་དང་སྤྱི་འཐུས་རིན་ཆེན་རྒྱལ་མཚན་ལགས་གཉིས་ཀྱིས། དྷ་སའི་གྲྭ་ཚང་ཁག་གི་ཁོངས་མེད་པའི་གནས་བཞུགས་གྲྭ་བཙུན་ལ་སྡོད་ཁང་གི་ཆ་རྐྱེན་བསྐྲུན་གལ་ཆེ་བ་དང་སྡོད་ཁང་སྐྲུན་མི་ཐུབ་པའི་གནས་སྟངས་ག་འདྲ་ཞིག་ལ་ཐུག་ཡོད་མིན་སྐོར་དྲིས་པར། སྲིད་སྐྱོང་མཆོག་གིས་ནང་སྲིད་ལས་ཁུངས་ཀྱི་ལོ་འཁོར་ལས་བསྡོམས་སྐབས་གནང་བའི་ལན་དུ། ཕྱིས་འབྱོར་སྡོད་ཁང་མེད་པ་དེའི་ནང་བོད་ནས་འབྱོར་བའི་ལམ་སྟོན་སྒྲིག་གཞི་ནང་གསེས་དོན་ཚན་ ༡༢ ཡོད་པའི་ནང་ཚན་དོན་ཚན་ ༡༤ བར། སྒྲིག་གཞི་བཅོས་མིན་ལ་མ་ལྟོས་པར་ཞེས་པར་དགོན་སྡེའི་ཁག་མ་ཟད། ད་ལྟ་ཁྱིམ་ཚང་ཡོད་མཁན་རྣམས་ལའང་ཁང་པ་ཕུལ་ཐུབ་ཀྱི་ཡོད་པ་མ་རེད། རིམ་པ་དང་པོ་དེ་བོད་ནས་ཡོང་བའི་ཁྱིམ་ཚང་ཡོད་པའི་ནང་མི་དང་མི་གཅིག་ཅན་ལ་ཕུལ་རྒྱུ་དང་། དེའི་རྗེས་སུ་དགེ་འདུན་པ་དང་བཙུན་མ་དགོན་སྡེའི་སྒྲིག་ཁུངས་སུ་མེད་པ་རྣམས་ལ་སྤྲོད་རྒྱུ། སློབ་གྲྭ་འགྲིམས་བཞིན་པའི་སློབ་ཕྲུག་རྣམས་ཀྱི་ལོ་ཚད་ཀྱི་ཚད་གཞིར་བཟུང་མ་གཏོགས་སློབ་གྲྭ་འགྲོ་བཞིན་པར་ཐོབ་ཐང་སྤྲད་ན་ཏག་ཏག་བསྡད་ཀྱི་མི་འདུག སློབ་གྲྭ་ཐོན་ཚར་རྗེས་སྡོད་ཁང་མེད་པ་ཡིན་ན་སྡོད་ཁང་སྤྲད་རྒྱུ་ཡིན་པའི་རིམ་པ་གཉིས་པའི་བང་སྒྲིག་བཞིན་ཡོད། སྒྲིག་ཁུངས་སུ་མེད་པའི་གྲྭ་བཙུན་རྣམས་ལ་གྲོས་ཚོགས་ནས་ཐག་བཅད་དེ་བཀའ་གནང་བ་ཡིན་ན་རིམ་པ་དང་པོའི་ཁུངས་སུ་འཇོག་རྒྱུ་དང་། དེ་མིན་རིམ་དང་པོ་བོད་འབྱོར་ཁྱིམ་ཚང་ ༡༩༩༩ ལ་སྡོད་ཁང་སྤྲོད་ཐུབ་ཡིན་ཚེ། དེ་ནས་རིམ་པ་གཉིས་པ་འགྲོ་པར་འཆར་གཞི་སྒྲིག་དགོས་ཐུབ། རིམ་པ་དང་པོ་འགྲོ་བར་ལོ་གང་འཚམ་འགོར་རྒྱུ་རེད་ལ། དེའི་བར་དུ་གནས་སྟངས་ག་འདྲ་ཆགས་མིན་བཤད་ཤེས་ཀྱི་མི་འདུག ཚང་མ་འཆར་གཞི་ལྡན་པའི་ཐོག་ན་འགྲོ་དགོས་དུས་ད་ལྟ་ཆའི་གསལ་བསྒྲགས་བྱས་ཡོད་པ་དེ་འདྲ་ཞིག་ཡིན། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་དང་སྐལ་བཟང་སྦྱིན་པ།
