ནད་ཡམས་ཀྱི་བཀའ་རྒྱ་རྡོག་རོལ་བཏང་བའི་ཉེས་མིང་འོག་གཞིས་ཀ་རྩེ་ནས་བོད་མི་གཉིས་ལ་རྡུང་རྡེག་བཏང་སྟེ་གཅིག་རྐྱེན་ལམ་དུ་སོང་བ་དང་གཅིག་སྨན་ཁང་དུ་ལུས་འདུག
གཞིས་ཀ་རྩེ་ནས་ཡིན་པའི་ཤེས་རབ་དང་བློ་ལྡན་ཟེར་བའི་སྐྱེས་པ་གཉིས་ཀྱིས་ཉིན་ཤས་གོང་འབྲོག་པའི་ས་ཆར་ཡོད་པའི་རང་གི་སྤུན་མཆེད་ལ་ཁ་ལག་སྐྱེལ་བར་འགྲོ་སྐབས། ཉེན་རྟོག་པས་བཟུང་ནས་ནད་ཡམས་ཀྱི་བཀའ་རྒྱ་རྡོག་རོལ་བཏང་སྟེ་གང་སར་ཕྱིན་པའི་ཉེས་མིང་འོག་ནས་རྡུང་རྡེག་དྲག་པོ་བཏང་རྐྱེན་གཅིག་རྐྱེན་ལམ་དུ་ཕྱིན་པ་དང་གཅིག་ད་དུང་སྨན་ཁང་དུ་ལུས་ཡོད་པའི་གནས་ཚུལ་ཐོན་འདུག དེའི་སྐོར་ལ་རང་མིང་བརྗོད་འདོད་མེད་པའི་འབྲེལ་ཡོད་མི་སྣ་ཞིག་གིས་འདི་གར་གནས་ཚུལ་བརྗོད་གནང་སོང་།
གནས་ཚུལ་ངོ་སྤྲོད་པས་མུ་མཐུད་བརྗོད་དོན་ནང་། དེང་སང་བོད་ནང་ལ་ཆ་བཞག་ན་ཏོག་དབྱིབས་ནད་ཡམས་ཁྱབ་པའི་རྐྱེན་གྱིས་ཁྱོན་ཡོངས་ནས་ནད་ཡམས་ཀྱི་བཀག་རྒྱ་བསྡམས་ཏེ། མང་ཚོགས་ལ་གང་ཅིའི་ཐོག་ནས་དཀའ་ངལ་ཆེན་པོ་ཡོད་པ་ཚང་མས་མཁྱེན་གསལ་རེད། ཡིན་ནའི་ནད་ཡམས་ཀྱིས་མི་གྲོངས་པའི་གནས་ཚུལ་ཧ་ལམ་གོ་རྒྱུ་ཡོད་པ་མ་རེད། ཡིན་ནའི་ཉིན་གསུམ་བཞི་ཙམ་གྱི་གོང་ལ་གཞིས་ཀ་རྩེ་ནས་ཡིན་པའི་ཤེས་རབ་དང་བློ་ལྡན་ཟེར་བའི་ཕོ་གསར་གཉིས་ནད་ཡམས་ཀྱི་བཀའ་རྒྱ་བརྩི་སྲུང་མ་བྱས་པའི་ཉེས་པའི་ཐོག་ནས་གཞིས་ཀ་རྩེ་ཉེན་རྟོག་པས་འཛིན་བཟུང་བྱས་པ་དང་ཉེས་རྡུང་དྲག་པོ་བཏང་སྟེ་ཤེས་རབ་རྐྱེན་ལམ་དུ་བཏང་བ་དང་བློ་ལྡན་ད་ལྟ་གཞུས་ཀ་རྩེ་མི་མང་སྨང་ཁང་དུ་ཛ་དྲག་གི་སྨན་བཅོས་བྱེད་བཞིན་ཡོད་པ་རེད་འདུག
ཁོ་གཉིས་ཀྱིས་གཞིས་ཀ་རྩེ་གྲོང་ཁྱེར་ནས་འབྲོག་པའི་ས་ཆར་རང་གི་སྤུན་མཆེད་ལ་ཁ་ལག་བསྐྱལ་བར་འགྲོ་སྐབས། ཉེན་རྟོག་པས་འཛིན་བཟུང་བྱས་པ་དང་ཉེན་རྟོག་པའི་བཀའ་རྒྱ་ལ་སྣང་མེད་ཀྱིས་གང་སར་སོང་བའི་ཉེས་མིང་ཐོག་ནས་ཉེས་བརྡུང་ཚད་ལས་འགལ་བ་བཏང་སྟེ་བོད་མི་ཤེས་རབ་མནར་བཅོད་ཀྱི་འོག་ནས་འདས་གྲོངས་སུ་ཕྱིན་ཡོད་པ་དང་བློ་ལྡན་ལ་ཉེས་རྡུང་དྲག་པོ་བཏང་ནས་གཟུགས་པོ་ཡོངས་རྫོགས་ལ་རྨུག་ཐིག་མང་པོ་བཟོས་ཡོད་པ་མ་ཟད་ཁ་ནས་སྐད་ཆ་ཤོད་མ་ཐུབ་པ་དང་འགུལ་སྐྱོད་ཡང་བྱེད་ཐུབ་ཀྱི་མེད་པའི་ནད་གཅོང་བཟོས་ཡོད་པ་དང་ད་དུང་གཞིས་རྩེ་མི་མང་སྨན་ཁང་དུ་ཛ་དྲག་གི་སྨན་བཅོས་བྱེད་བཞིན་ཡོད་པའི་གནས་ཚུལ་འདུག
སྤྱིར་བཏང་གཞིས་ཀ་རྩེ་ལ་དེང་སང་ནད་ཡམས་ཀྱི་བཀག་སྡོམ་ཏོག་ཙམ་གུ་ཡང་དུ་ཕྱིན་ཡོད་ནའི་མི་ཁག་ཅིག་གིས་དབང་ཆ་བེད་སྤྱོད་ལོག་པ་གཏང་ནས་ནད་ཡམས་ལས་སྡུག་པའི་དཀའ་ངལ་སྤྲོད་ཀྱི་ཡོད་པའི་གནས་ཚུལ་མང་པོ་འདུག་ཅེས་སོགས་འགྲེལ་བརྗོད་གནང་ཡོད། དེ་དང་ཕྱོགས་མཚུངས་ཉེ་ལམ་ཕྱི་ཟླ་བརྒྱད་པའི་ནང་བོད་ནང་ལྷོ་ཁ་ས་གནས་སུ་བོད་མི་ཞིག་ལ་ཏོག་དབྱིབས་ནད་ཡམས་ཀྱི་འགྲིམ་འགྲུལ་བཀག་སྡོམ་ས་ཚིགས་ནས་རྒྱ་མིའི་ལས་བྱེད་མི་སྣ་ཞིག་གིས་འགྲམ་ལྕག་དང་རྡོག་རྒྱག་ཞུས་པའི་དྲག་རྩུབ་ཀྱི་བརྙན་པར་ཞིག་སྤྱི་ཚོགས་དྲ་ལམ་ཁག་ཏུ་ཁྱབ་རྗེས། མི་ཚོས་ལས་བྱེད་མི་སྣ་དེའི་བྱ་སྤྱོད་ལ་བློ་ཕམ་མི་འདོད་པའི་ཁ་བརྡུང་དྲག་པོ་བཏང་ཡོད་པ་རེད།
ཡང་རྒྱ་ནག་གཞུང་འབྲེལ་བརྒྱུད་ལམ་ཁག་གིས་བོད་ནང་གི་ནད་ཡམས་སྐོར་གྱི་གནས་ཚུལ་གསར་ཤོས་སྤེལ་བའི་ནང་། ཟླ་༩ པའི་ཚེས་༧ ཉིན་ལྷ་ས་གྲོང་ཁྱེར་ནང་ནད་པ་༡༧༣མང་དུ་ཕྱིན་པ་དང་གཞིས་རྩེ་གྲོང་ཁྱེར་ཁོངས་སུ་ནད་པ་༡༣༡མང་དུ་ཕྱིན་པ། ལྷོ་ཁ་གྲོང་ཁྱེར་དུ་ནད་པ་༡༣། ནག་ཆུར་༤༧། ཆབ་མདོར་༣༥། མངའ་རིས་ལ་༢༧བཅས་བོད་རང་སྐྱོང་ལྗོངས་ནང་ནད་པ་ཁྱོན་༤༢༦ གསར་དུ་ཐོན་ཡོད་པའི་གནས་ཚུལ་སྤེལ་འདུག
ཡང་ལྷ་ས་གྲོང་ཁྱེར་ཁོངས་ཀྱི་སྟག་རྩེ་རྫོང་དང་། ལྷུན་གྲུབ་རྫོང་། ཆུ་ཤུར་རྫོང་། འདམ་གཞུང་རྫོང་། སྙེ་མོ་རྫོང་། མལ་གྲོ་གུང་དཀར་རྫོང་བཅས་ཉེན་ཁ་ཆུང་བའི་ས་ཁུལ་དྲུག་ནང་ནད་ཡམས་ཀྱི་གནད་དོན་ཚོད་འཛིན་ཐུབ་པ་བྱུང་སྟེ། ཕྱི་ཟླ་༩ ཚེས་ ༥ ཉིན་ནས་རྒྱུན་གཏན་གྱི་ཐོན་སྐྱེད་དང་འཚོ་བའི་སྒྲིག་ལམ་རིམ་བཞིན་སླར་གསོ་བྱ་རྒྱུ་ཡིན་ཡང་སློབ་གྲྭ་ཁག་དང་ཡུལ་སྐོར་གླིང་ག་ཟ་ཁང་སོགས་སྤྱི་བའི་འདུ་འཛོམས་བྱེད་སྒོ་ཁག་གནས་སྐབས་གཉེར་མི་ཆོག་པའི་གནས་ཚུལ་སྤེལ་འདུག
