དེང་སྐབས་བོད་བརྒྱུད་ནང་བསྟན་གྱི་གཞུང་ལུགས་མང་པོ་ཞིག་དབྱིན་ཡིག་སོགས་སྐད་ཡིག་གཞན་དུ་སྒྱུར་མཁན་མང་པོ་ཡོད་ཀྱང་། སྐད་ཡིག་གཞན་དུ་ཡོད་པའི་ནང་པའི་གཞུང་ལུགས་རྣམས་བོད་ཡིག་ཏུ་སྒྱུར་མཁན་ཉུང་ཉུང་ཡིན་སྐོར་སོགས་གསུངས་སོང་།
དེ་རིང་བོད་ཀྱི་དཔེ་མཛོད་ཁང་གི་ཚོགས་ཁང་དུ་དྷ་རྨས་སཱ་མིན་གྱིས་བརྩམས་ཤིང་དགེ་བཤེས་ལྷ་རམས་པ་ངག་དབང་བསྟན་པ་ལགས་ཀྱིས་བོད་བསྒྱུར་གནང་བའི་དགེ་སློང་གི་རྒྱུན་ཁྱེར་ཕྱག་དེབ་ཅེས་པ་དབུ་འབྱེད་གནང་ཞིང་། མཛད་སྒོའི་ཐོག་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་སོགས་ཕེབས་ཡོད་འདུག
མཛད་སྒོའི་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས། དགེ་བཤེས་ (ངག་དབང་བསྟན་པ།) ལགས་དང་མཉམ་དུ་ཡོད་པའི་དགེ་བཤེས་མང་པོ་ཞིག་གིས་དབྱིན་ཇི་སྦྱངས་ནས། དེའི་ཁྲོད་ཀྱི་དགེ་བཤེས་ལགས་ཀྱིས་དབྱིན་ཡིག་སོགས་སྦྱངས་ནས་ཕྱིའི་སྐད་ཡིག་དབྱིན་ཡིག་ནང་ཡོད་པའི་གཞུང་ལུགས་ཤིག་ཚུར་བསྒྱུར་རྒྱུའི་ཕྱག་ལས་གནང་བ་དེ་འདྲ་ཞིག་བྱུང་བ་རེད། རྒྱ་གར་རང་ལ་བསྡད་ནས་དབྱིན་ཡིག་བོད་ཡིག་ཏུ་བསྒྱུར་རྒྱུ་ལྟ་བུ་ཞིག་བྱས་པ་ཡིན་ན་ཆ་རྐྱེན་ཡག་པོ་ཡོད་བསྡད་པའི་ཟོལ་འདྲ་བོ་ཞིག་ཆགས་ཀྱི་ཡོད་ཀྱང་། ནང་དོན་དེ་འདུལ་བའི་ནང་དོན་ཞིག་ཡིན་པ་དང་དེའི་ནང་ནས་གནས་བརྟན་སྡེ་བའི་ཁོངས་ནས་ཆགས་ཀྱི་ཡོད་དུས། གནས་བརྟན་སྡེ་བའི་ཆོས་ལུགས་གཙོ་བོ་དར་ས་རང་ལ་ཕར་ཕྱིན་ནས་(སིངྒ་ལ)། ཕར་ཕྱོགས་རང་དུ་འདུལ་བའི་ཁྲིམས་བཞག་སྲོལ་གང་འདྲ་འདུག དེར་གཟིགས་ཐུབ་རྒྱུ་འདུག་གམ། དེ་བཞིན་ཁྲིམས་ཉིས་བརྒྱ་ལྔ་བཅུ་རྩ་གསུམ་གྱི་སྐོར་ལ་ལུང་པ་རང་དང་ས་གནས་རང་གི་གནས་བརྟན་སྡེ་བའི་ཆོས་བརྒྱུད་འཛིན་མཁན་ཚོས་འདུལ་བའི་ཁྲིམས་དང་འབྲེལ་བའི་ཐོག་ནས་འགྲེལ་བཤད་གང་འདྲ་བྱས་ནས་ཡོད་མེད་བལྟ་རྒྱུར་ཐུགས་རེ་གནང་ནས། ས་གནས་རང་ལ་ཕེབས་ནས་གནས་བརྟན་སྡེ་བའི་ཆོས་བརྒྱུད་ཀྱི་ཁྱབ་ཁོངས་ཀྱི་སིངྒ་ལའི་ལུང་བ་རང་ནས་འགྲེལ་བཤད་བརྒྱབ་སྟངས་དེ་བསྟན་ཐུབ་ན་བསམས་ནས། མཐའ་མའི་གྲུབ་འབྲས་ལ་ཕྱག་དེབ་འདི་བཏོན་པ་རེད། ཅེས་གསུངས་སོང་།
ཡང་རིན་པོ་ཆེ་མཆོག་གིས། དཔེ་དེབ་འདིའི་དམིགས་བསལ་ཁྱད་ཆོས་ནི། དགེ་བཤེས་ལགས་ཀྱིས་བོད་བསྒྱུར་གནང་བའི་དཔེ་དེབ་དེ་ས་གནས་ལ་ཕེབས་ནས། ཉམས་ཞིབ་དང་རྟོག་ཞིབ་དུ་མ་གནང་ནས་བསྒྱུར་ཡོད་སྟབས། ཐག་རིང་པོ་ནས་དཔེ་དེབ་སོགས་ལ་བལྟས་ནས་ཉམས་ཞིབ་བྱས་པ་དང་། ས་གནས་རང་ལ་ཕྱིན་ནས་ཉམས་ཞིབ་ཟབ་མོ་གནང་བར་ཉམས་ཞིབ་ཀྱི་གནས་བབ་དང་དཔེ་དེབ་ཀྱི་སྤུས་ཀ་སོགས་ཀྱི་ཐད་ནས་ཁྱད་པར་ཆེན་པོ་ཡོད་པ་དང་། དགེ་བཤེས་ལགས་ཀྱི་དབྱིན་ཡིག་སྦྱངས་ནས་དཔེ་དེབ་བོད་བསྒྱུར་བྱས་པར་བརྟེན། ཕྱིས་སུ་དབྱིན་ཡིག་སྐད་ཡིག་སྦྱོང་མཁན་ཞིག་གི་ཆེས་གཡུར་དུ་ཟ་བ་དང་འབུར་ཐོན་གྱི་གྲུབ་འབྲས་ཤིག་ཡིན་སྐོར་དང་། དཔེ་དེབ་དེའི་བརྗོད་བྱའང་འདུལ་ཁྲིམས་ཡིན་ཞིང་། དེང་གི་ཆར་ཁྲིམས་སྒྲིག་ནི་འཚོ་བའི་ནང་གི་ཆ་ཤས་གལ་ཆེན་ཞིག་ཡིན་པ་ལྟར། སྟོན་པའི་རྗེས་འབྲངས་བ་ཡོངས་ལ་ཁྲིམས་ཀྱིས་དབང་བསྒྱུར་བྱ་རྒྱུའི་ལམ་སྲོལ་ཞིག་དར་ནས། སྟོན་པ་སངས་རྒྱས་ཀྱི་འདུལ་བའི་གཞུང་ལུགས་དང་དེར་དཔྱད་པ་མཛད་ཡོད་སྟབས། དེ་དག་ནི་ནང་པའི་ཁྲིམས་ལུགས་རིག་པའི་གཞུང་ལུགས་གཙོ་བོ་དེ་ཆགས་ཀྱི་ཡོད་ཅིང་། ད་ལན་དགེ་བཤེས་ལགས་ཀྱིས་དོན་ལ་གནས་པ་དང་། སྤྱི་ཚོགས་ཀྱི་དགོས་མཁོ་དང་མཐུན་པའི་དཔེ་དེབ་ཅིག་བོད་བསྒྱུར་གནང་བར་བསྔགས་བརྗོད་ཡོད་སྐོར་སོགས་གསུངས་སོང་།
དེའི་རྗེས་དམིགས་བསལ་སྐུ་མགྲོན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། སྤྱིར་དེང་གི་སྤྱི་ཚོགས་སུ་བོད་བརྒྱུད་ནང་བསྟན་ཁོངས་ཀྱི་གཞུང་ལུགས་མང་པོ་ཞིག་ཕར་སྐད་ཡིག་གཞན་དུ་བསྒྱུར་བར་འབད་འབུངས་བྱེད་མུས་ཡིན་པ་ལས། སྐད་ཡིག་གཞན་གྱི་ནང་དུ་ཡོད་པའི་ནང་པའི་གཞུང་ལུགས་རྣམས་བོད་ཡིག་ཏུ་སྒྱུར་མཁན་ཉུང་ཉུང་ཡིན། ད་ལན་དགེ་བཤེས་ངག་དབང་བསྟན་པ་ལགས་ཀྱིས་ཤེས་རིག་གི་གནས་ལ་འབད་པ་ལྷོད་མེད་དང་དཀའ་བ་ཡུན་རིང་སྤྱད་ནས་དཔེ་དེབ་ཅིག་བོད་བསྒྱུར་གནང་སྟེ་པར་འགྲེམས་བྱས་པར་ཧ་ཅང་ཡག་པོ་ཡིན་ཡང་། དགེ་བཤེས་ལགས་ཀྱིས་དབྱིན་ཡིག་ནས་ཐད་ཀར་བོད་བསྒྱུར་བྱས་པ་ལས། པ་ལི་རང་གི་སྐད་དུ་ཡོད་པའི་འདུལ་ཁྲིམས་སྐོར་དེ་བོད་བསྒྱུར་བྱ་རྒྱུ་དཀའ་ལས་ཁག་པོ་ཡོད་ཀྱང་། དགེ་བཤེས་ལགས་ཀྱིས་ཉིན་མཚན་འབད་འབུངས་ཀྱི་ཁྲོད་ནས་དཔེ་དེབ་འདི་འདྲ་ཞིག་བཏོན་ཐུབ་པར་བསྔགས་བརྗོད་དང་རྗེས་སུ་ཡི་རངས་ཞུ་ཡི་ཡོད་ཅིང་། དེང་གི་ཆར་དཔེ་དེབ་འདྲ་མིན་འབྲི་མཁན་ཧ་ཅང་མང་པོ་ཞིག་ཡོད་ཀྱང་། ཆེས་གནད་འགག་ཆེ་བའི་འདུལ་ཁྲིམས་སོགས་ཀྱི་ཐད་ནས་འབྲི་མཁན་ཉུང་ཉུང་ཡིན་པའི་ཁར། ཚུལ་ཁྲིམས་བསྲུང་རྒྱུ་དེ་ནི་གལ་ཆེན་པོ་ཡིན་ཡང་ཁག་པོ་ཡིན་སྐོར་སོགས་གསུངས་སོང་།
དགེ་སློང་གི་རྒྱུན་ཁྱེར་ཕྱག་དེབ་ཅེས་པ་ནི་དྷ་རྨ་སཱ་མིན་གྱིས་དབྱིན་ཡིག་ཏུ་བྲིས་ཤིང་། དགེ་བཤེས་ངག་དབང་བསྟན་པ་ལགས་ཀྱིས་བོད་བསྒྱུར་གནང་ནས་དཔར་ཐེངས་དང་པོར་དཔེ་གྲངས་ ༦༠༠ དཔར་འགྲེམས་བྱས་ཡོད་པ་དང་། དཔེ་དེབ་དེའི་བརྗོད་བྱ་གཙོ་བོ་དེ་འདུལ་བ་དང་། སོ་ཐར་གྱི་བསླབ་ཁྲིམས་ ༢༢༧། དགེ་སློང་ཇི་ལྟར་བྱ་དགོས་སྐོར། དགེ་སློང་གི་བསྲུང་བྱ་གང་ཡིན་མིན་སོགས་ཀྱི་སྐོར་གསལ་ཡོད་པ་རེད་འདུག
གསར་འགོད་པ། དཔལ་ལྡན།
