རྒྱ་ནག་གཞུང་གིས་བོད་དཀར་མཛེས་རྫོང་ཁོངས་ནས་ཡིན་པའི་བོད་མི་རིན་ཆེན་བསམ་འགྲུབ་ལགས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ནས་ཟླ་བ་གསུམ་ལྷག་འགྲོ་བཞིན་ཡོད་འདུག
རྒྱ་ནག་གཞུང་གིས་བོད་མི་རྣམས་ལ་ནག་ཉེས་འདྲ་མིན་གཡོགས་ནས་གང་བྱུང་འཛིན་བཟུང་བཀག་ཉར་དང་ཚད་ལས་འདས་པའི་གཅར་རྡུང་བྱེད་ཀྱི་ཡོད་པ་ལྟར། འདི་ལོའི་ཕྱི་ཟླ་ ༥ ནང་རྒྱ་ནག་གཞུང་གི་ཉེན་རྟོག་པས་བོད་དཀར་མཛེས་རྫོང་མཚོ་གསར་གྲོང་བརྡལ་ནས་ཡིན་པའི་བོད་མི་རིན་ཆེན་བསམ་འགྲུབ་ལགས་ཀྱིས་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་པའི་ཉེས་མིང་གཡོགས་ནས་འཛིན་བཟུང་བཙན་འཁྲིད་བྱས་ནས་ཟླ་ ༣ ལྷག་འགྲོ་མུས་ཡིན་ཡང་། ཁོང་གི་གནས་ཚུལ་གང་ཡང་གོ་ཐོས་མེད་པའི་ཁར། ཁོང་གི་ཨ་མ་དབང་མོ་ལགས་ཀྱང་ནད་པ་ཆགས་ནས་ཁྲིན་འདུ་གྲོང་ཁྱེར་དུ་ཛ་དྲག་གི་སྨན་བཅོས་བྱེད་མུས་ཡིན་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་བྱས་པ་ལྟར་ན། ད་ལོའི་ཕྱི་ཟླ་ ༥ པའི་ནང་རིན་ཆེན་བསམ་འགྲུབ་ལགས་ཁོང་གི་གྲོགས་པོ་ཁ་ཤས་མཉམ་དུ་དཀར་མཛེས་རྫོང་གི་མགྲོན་ཁང་ཞིག་ཏུ་སྡོད་ཡོད་པའི་སྐབས། རྒྱ་ནག་གཞུང་གི་ཉེན་རྟོག་པས་གློ་བུར་དུ་འཛིན་བཟུང་བྱས་ནས་ས་གནས་བདེ་འཇགས་ལས་ཁུངས་སུ་ཁྲིད་ཡོད་སྐོར་འགྲེལ་བརྗོད་བྱས་སོང་།
ཡང་ཁོང་གིས། ཁོང་གི་གྲོགས་པོ་ཞིག་བརྒྱུད་ནས་ཁོང་གི་ནང་མིར་ཁོང་ཉིད་ས་གནས་བདེ་འཇགས་ལས་ཁུངས་ཟེར་བ་ཞིག་ཏུ་བཙན་ཁྲིད་བྱས་པའི་གནས་ཚུལ་འབྱོར་སྐབས། ནང་མི་རྣམས་ས་གནས་བདེ་འཇགས་ལས་ཁུངས་སུ་ཕྱིན་ནས། ཁོང་གིས་ནག་ཉེས་ག་རེ་བྱས་ཡོད་མེད་སོགས་ཀྱི་སྐོར་ལ་དྲིས་ཏེ། གང་མགྱོགས་ཀློད་གྲོལ་གཏང་དགོས་པའི་རེ་སྐུལ་བྱས་ཀྱང་། རྗེས་སུ་བདེ་འཇགས་ལས་ཁུངས་ཟེར་བས་ཁ་པར་བརྒྱུད། ཁོང་གིས་ས་གནས་ཀྱི་བདེ་འཇགས་དང་། རྒྱལ་ཁབ་ཀྱི་བདེ་འཇགས་ལ་གཏོར་བརླག་བཏང་ཡོད་སྐོར་བཤད་ཡོད་པ་དང་། ནང་མི་ཚོས་ཁོང་གིས་ག་རེ་བྱས་ཡོད་མེད་ཤེས་ཀྱི་རེད་ཟེར་ནས་ཁ་པར་བཞག་ཡོད་པས། ཁོང་གི་ནང་མི་ཚོས་ཁོང་ལ་སེམས་འཚབ་བྱེད་མུས་ཡིན་པ་མ་ཟད། ཁོང་གི་ཨ་མ་དབང་མོ་ལགས་ཀྱང་ནད་པ་ཆགས་ནས་ཛ་དྲག་གི་སྨན་བཅོས་བྱེད་མུས་ཡིན་སྐོར་སོགས་འགྲེལ་བརྗོད་བྱས་སོང་།
རིན་ཆེན་བསམ་འགྲུབ་ལགས་ནི་བོད་དཀར་མཛེས་རྫོང་མཚོ་གསར་གྲོང་བརྡལ་ནས་ཡིན་པ་དང་། ཕྱི་ལོ་ ༢༠༡༥ ནས་ས་གནས་སུ་རྟ་ཚོང་བརྒྱབ་ནས་འཚོ་བ་རོལ་མུས་ཡིན་ཞིང་། ཁོང་ལ་ས་གནས་བོད་མི་དང་ཉམ་ཐག་རྒན་གཞོན་མང་པོ་ཞིག་གིས་བརྩི་མཐོང་དང་གདེང་འཇོག་ཆེན་པོ་བྱེད་ཀྱི་ཡོད་པ་དང་། ཁོང་ལ་ནང་མི་བཞི་ཡོད་འདུག
