རྒྱ་དཀར་ནག་གཉིས་ཀྱི་ཆེས་མཐོའི་དམག་དོན་མི་སྣས་ཐུག་འཕྲད་ཐེངས་ལན་མང་བྱས་ཡོད་ཀྱང་བོད་ཧིན་མཐའ་མཚམས་ཀྱི་དཀའ་རྙོག་སེལ་ཐུབ་མེད་པ་རེད་འདུག
ཕྱི་ལོ་ ༢༠༢༠ ལོར་བོད་ཧིན་མཐའ་མཚམས་སུ་ཁེལ་བའི་ལ་དྭགས་གྷལ་ཝན་ལུང་གཤོངས་ (Galwan Valley) སུ་རྒྱ་དཀར་ནག་གཉིས་ཀྱི་དམག་མི་བར་གདོང་ཐུག་དྲག་པོ་བྱུང་རྗེས་ཡུལ་གཉིས་ཀྱི་འབྲེལ་བ་སྔར་ལས་ཇེ་སྡུག་ཏུ་ཕྱིན་ཡོད་པ་དང་། ཕྱོགས་གཉིས་ནས་གྲོས་མོལ་ཐེངས་མང་བྱས་ཡོད་ཀྱང་མུ་མཐུད་ནས་མཐའ་མཚམས་སྲུང་སྐྱོབ་དང་དམག་རྒྱག་གི་གྲ་སྒྲིག་བྱེད་བཞིན་ཡོད་པ་ལྟར། ཁ་སང་ཕྱི་ཚེས་ ༡༣ ཉིན་རྒྱ་གར་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། བོད་ཧིན་ས་མཚམས་སུ་ཁེལ་བའི་ཆུ་ཚན་ཁུལ་དུ་རྒྱ་དཀར་ནག་གཉིས་ཀྱི་དམག་དོན་ཆེས་མཐོའི་མི་སྣ་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱིས་བོད་ཧིན་མཐའ་མཚམས་སུ་ཁེལ་བའི་ས་གནས་ཁག་གི་རྩོད་རྙོག་རྣམས་ཞི་འགྲིག་བྱས་ཐུབ་མེད་ཀྱང་། ཆུ་ཚན་ཁུལ་གྱི་ཕྱོགས་གཉིས་ཀའི་དམག་མི་ཕྱིར་འཐེན་བྱ་རྒྱུ་བྱས་ཡོད་འདུག
དེ་རིང་རྒྱ་གར་པེ་རིན་ཌི་( The Print ) གསར་ཁང་གིས་གནས་ཚུལ་སྤེལ་བ་ལྟར་ན། ༢༠༢༠ ལོ་དཀྱིལ་ཙམ་ནས་བོད་ཧིན་མཐའ་མཚམས་ཁུལ་དུ་རྒྱ་དཀར་ནག་གཉིས་ཀྱི་དམག་མི་འགྲེམས་འཇོག་བྱས་ནས་རང་རང་གི་མཐའ་མཚམས་འགོག་སྲུང་བྱེད་མུས་ཡིན་ཡང་། ཁ་སང་རྒྱ་དཀར་ནག་གི་ཆེས་མཐོའི་མི་སྣ་ཁག་བོད་ཧིན་མཐའ་མཚམས་ (LAC) སུ་ཐུག་འཕྲད་བྱས་པ་བརྒྱུད། ཕྱོགས་གཉིས་ཀས་དམག་མི་རྣམས་ཕྱིར་འཐེན་བྱ་རྒྱུ་དང་། གནས་སྐབས་རིང་དམག་མིའི་སྡོད་ཁང་གསར་རྒྱག དེ་བཞིན་རྒྱ་དཀར་ནག་གི་དམག་མིའི་གདོང་ཐུག་དང་འཐབ་འཁྲུག་མི་ཡོང་སླད་གནས་སྐབས་རིང་བོད་ཧིན་མཐའ་མཚམས་སུ་ཁེལ་བའི་ཆུ་ཚན་ཁུལ་དེ་ཕྱོགས་གཉིས་ཀྱི་བར་གནས་མངའ་ཁུལ་ (buffer zone) བྱ་རྒྱུའི་འགྲིག་མཐུན་བྱུང་ཡོད་འདུག
རྒྱ་དཀར་ནག་གཉིས་ཀྱི་མཐའ་མཚམས་ཞི་འགྲིག་གི་གནད་དོན་ཕྱིར་འཐེན་བྱས་ཡོད་ཀྱང་། ཕྱོགས་གཉིས་ཀས་ཆུ་ཚན་ཁུལ་དེ་གནས་སྐབས་བར་གནས་མངལ་ཁུལ་དུ་བཟོ་རྒྱུའི་འགྲིག་མཐུན་བྱུང་ཡོད་སྟབས། རྒྱ་གར་གཞུང་གི་དམག་དོན་ཆེད་མཁས་པ་དག་གིས། ཕྱི་ལོ་ ༢༠༢༠ ནས་རྒྱ་དཀར་ནག་གཉིས་ཀྱི་བར་མཐའ་མཚམས་ཀྱི་རྩོད་རྙོག་མང་པོ་ཞིག་བྱུང་བའི་ཁྲོད། ཕྱོགས་གཉིས་ཀྱི་བར་གནས་མངའ་ཁུལ་(buffer zone) ཞིག་བཟོས་མྱོང་མེད་པ་དང་། རྒྱ་ནག་གཞུང་གིས་བར་གནས་མངའ་ཁུལ་དེ་ཕྱོགས་གཉིས་ཀྱི་དམག་མི་གདོང་ཐུག་སོགས་མི་ཡོང་བའི་ཆེད་དུ་ཡིན་ལུགས་བཤད་ཡོད་ཀྱང་། དེར་རྒྱ་གར་གྱི་ས་གནས་རྒྱ་ཆེ་བ་ཚུད་ཡོད་པས་རྒྱ་གར་གྱི་མཐའ་མཚམས་དམག་མིར་གྱོང་གུད་ཆེ་བ་ཐེབས་ཉེན་ཡོད་སྐོར་འགྲེལ་བརྗོད་བྱས་ཡོད་འདུག འདི་ལོའི་ཕྱི་ཟླ་ ༨ ཚེས་ ༢༩ ཉིན་རྒྱ་ནག་བཅིངས་གྲོལ་དམག་མི་ཟེར་བ་ཞིག་གིས་བོད་ཧིན་ས་མཚམས་སུ་ཁེལ་བའི་བདེ་མཆོག་ཁུལ་གྱི་ས་གནས་ཕྱུགས་ཟོག་འཚོ་མཁན་རྣམས་བཀག་འགོག་དང་ཕྱིར་ཕུད་བྱས་ཏེ། རྒྱ་ནག་བཅིངས་གྲོལ་དམག་མི་ཟེར་བས་ཡུལ་མི་རྣམས་ལའང་སུན་གཙེར་ཡང་ཡང་བཟོས་ཀྱི་ཡོད་པར་བརྟེན། ད་ལྟ་རྒྱ་གར་གཞུང་གིས་བོད་ཧིན་ས་མཚམས་སུ་ཁེལ་བའི་འདེབས་བཟང་དང་བདེ་མཆོག་མངལ་ཁུལ་དུ་མཐའ་སྲུང་ནན་མོ་བྱེད་མུས་ཡིན་པ་རེད་འདུག
གཞན་ཡང་འདི་ལོའི་ཕྱི་ཟླ་ ༧ ཚེས་ ༢༡ ཉིན་རྒྱ་ནག་གཞུང་གིས་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་བོད་ཧིན་ས་མཚམས་སུ་ཁེལ་བའི་བོད་ལྷུན་རྩེ་རྫོང་ནས་ཤིན་ཅང་གི་མཱ་ཛ་ (Mazha) བར་སྤྱི་ལེ་ ༤༦༡།༠༠༠ ཡོད་པའི་མཐའ་མཚམས་ཀྱི་མྱུར་སྐྱོད་གཞུང་ལམ་ G695 ཟེར་བ་ཞིག་གསར་རྒྱག་གི་ལས་གཞི་སྤེལ་བཞིན་ཡོད་འདུག་ལ། གཞུང་ལམ་དེ་ནི་རྒྱ་གར་བྱང་ཕྱོགས་འབྲས་ལྗོངས་ཀྱི་མཐའ་མཚམས་སུ་ཁེལ་བའི་བོད་གམ་པ་རྫོང་དང་། རྒྱ་གར་དང་བལ་ཡུལ་གཉིས་ཀྱི་མཐའ་མཚམས་སུ་ཁེལ་བའི་སྐྱིད་གྲོང་རྗོང་བརྒྱུད་ནས་གསར་རྒྱག་བྱ་རྒྱུའི་ལས་གཞི་མུ་མཐུད་དུ་ལག་བསྟར་བྱེད་མུས་ཡིན་ཡང་། ལས་གཞི་དེ་ཕྱི་ལོ་ ༢༠༣༥ བར་ལེགས་འགྲུབ་ཡོང་བའི་འཆར་གཞི་ཡོད་པ་ཙམ་ལས། ད་ལྟའི་ཆར་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།
ད་བར་རྒྱ་དཀར་ནག་གཉིས་ཀྱིས་མཐའ་མཚམས་ཀྱི་རྩོད་རྙོག་དང་འབྲེལ་ནས་གྲོས་མོལ་ཐེངས་ ༡༧ བྱས་ཡོད་ནའང་། དམིགས་བསལ་གྱི་གྲུབ་འབྲས་གང་ཡང་ཐོན་མེད་ཀྱང་། རྒྱ་གར་གཞུང་གིས་བོད་ཧིན་ས་མཚམས་ཀྱི་མངལ་ཁུལ་དུ་འགོག་སྲུང་ནན་མོ་བྱེད་མུས་ཡིན་པ་དང་། ལྷག་པར་རྒྱ་ནག་བཅིངས་གྲོལ་དམག་མིས་རྒྱ་གར་གྱི་བདེ་མཆོག་དང་འདེབས་བཟང་ཁུལ་དུ་སིམ་འཛུལ་དང་རྙོག་གླེང་བཟོ་བར་འགོག་རྒོལ་བྱེད་མུས་ཡིན་པ་རེད་འདུག
གསར་འགོད་པ། དཔལ་ལྡན།
