༧གོང་ས་རྒྱལ་བ་རིན་པོ་ཆེ་མཆོག་གིས་སྨན་སོགས་བཟས་ནས་སེམས་ལྷོད་ལྷོད་ཆགས་ཐབས་མེད་པར་སེམས་དཀྲུག་མཁན་གྱི་ཞེ་སྡང་དང་ང་རྒྱལ། ཕྲག་དོག་སོགས་སྤངས་ན་སེམས་ལྷོད་ལ་བབ་ཐུབ་ཀྱི་ཡོད་སྐོར་སོགས་གསུངས་སོང་།
ལྷོ་ཤར་ཨེ་ཤ་ཡའི་དད་ལྡན་ཆོ་ཞུ་བ་རྣམས་ཀྱིས་ཇི་ལྟར་གསོལ་བ་བཏབ་པ་ལྟར། དེ་རིང་ནས་ཕྱི་ཚེས ༡༦ བར་ཉིན་གཉིས་རིང་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་ལྷོ་ཤར་ཨེ་ཤ་ཡའི་དད་ལྡན་མང་ཚོགས་རྣམས་ལ་དཔལ་ལྡན་ཟླ་བ་གྲགས་པས་མཛད་པའི་དབུ་མ་འཇུག་པའི་རང་འགྲེལ་གྱི་བཀའ་ཆོས་སྩལ་མགོ་བཙུགས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ལ་རབ་བྱེད་ ༢༧ ཡོད་པ་རེད། དེའི་མཇུག་དེར་སྟོན་པའི་བཀའ་དྲིན་དྲན་པའི་སྒོ་ནས་ཕྱག་འཚལ་བའི་ཚིགས་སུ་བཅད་པ་དེ་ནུས་པ་ཆེན་པོ་རེད་འདུག གང་གི་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། །དམ་པའི་ཆོས་ནི་སྟོན་མཛད་པའི། །གོོ་ཏམ་དེ་ལ་ཕྱག་འཚལ་ལོ། ཞེས་པ་དེ་ཧ་ཅང་འདུས་ཆེན་པོ་འདུག བརྩེ་བ་སྙིང་རྗེ་ཆེན་པོའམ་ཐུགས་རྗེ་ཆེན་པོས་ཀུན་ནས་བསླངས་ཏེ། སྡུག་བསྔལ་གྱི་རྩ་བ་མི་ཤེས་པའི་རྨོངས་པ་སེལ་ཆེད་ཕྱིན་ཅི་ལོག་པའི་ལྟ་བ་མཐའ་དག་སེལ་བ་དང་། ཐོས་བྱུང་གི་ཤེས་རབ་དང་བསམ་བྱུང་གི་ཤེས་རབ། སྒོམ་བྱུང་གི་ཤེས་རབ་བཅས་རིམ་བཞིན་སྐྱེས་ནས་སྟོང་ཉིད་ཀྱི་ལྟ་བར་བསམ་བློ་གཏོང་དུས་ཐོག་མའི་ཆར་ཐོས་བྱུང་གི་ཤེས་རབ་ཙམ་རེད། ངོས་རང་གི་ཉམས་མྱོང་གི་ཐོག་ནས་ཞུས་ན། ཐོག་མར་བླ་མ་བཀའ་དྲིན་ཅན་ཚོས་སྟོང་ཉིད་ཀྱི་ལྟ་བ་གསུངས་སྐབས་མོས་པ་སྐྱེས་པ་ཞིག་དང་། གཙོ་བོ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་དང་། དཔལ་ལྡན་ཟླ་བ་གྲགས་པས་མཛད་པའི་རྩ་བ་ཤེས་རབ་ཀྱི་དོན་འགྲེལ་དབུ་མ་འཇུག་པར་ཡང་ཡང་བལྟས་ནས་ཡོང་སྐབས། ཐོག་མར་ཟབ་མོ་སྟོང་པ་ཉིད་ཀྱི་དོན་ལ་ཐོས་བྱུང་གི་ཤེས་རབ་ཅིག་སྐྱེས། དེ་ནས་ཡང་ཡང་བསམ་བློ་གཏོང་དུས་སེམས་ཀྱི་གཏིང་ནས་ངེས་པ་ཐོབ་པའི་བསམ་བྱུང་གི་ཤེས་རབ་ཅིག་སྐྱེས། སྒོམ་བྱུང་གི་ཤེས་རབ་ཟེར་བ་ནི་སྦྱོར་ལམ་ཐོབ་ན་མ་གཏོགས་ལམ་སེང་ཡོང་གི་མེད། གང་ལྟར་བསམ་བློ་བཏང་ན་སེམས་ལ་འགྱུར་བ་ཐེབས་ཀྱི་ཡོད་པ་དང་། ཆོས་རྣམས་ཀྱི་ཡིན་ལུགས་ཇི་ལྟར་སྣང་བ་ནང་བཞིན་དོན་ལ་གྲུབ་མེད་པ་ཞིག་རེད། ཚད་རྡུལ་དངོས་ཁམས་རིག་པས་ཀྱང་འདི་ལྟར་བཤད་ཀྱི་ཡོད། ཆོས་གང་དང་གང་ཡིན་རུང་དོན་གྱི་ངོས་ནས་ཡོད་པ་ཞིག་ང་ཚོར་སྣང་ཡོང་དུས། སྣང་བ་ལྟར་དུ་མེད་ཅེས་སྟོང་ཉིད་ཀྱི་གོ་བ་ཞིག་སླེབས་ཀྱི་རེད། ཅེས་གསུངས་སོང་།
ཡང་༧གོང་ས་རྒྱལ་བ་རིན་པོ་ཆེ་མཆོག་གིས། སངས་རྒྱས་བཅོམ་ལྡན་འདས་ཀྱིས་གདུལ་བྱར་བླང་དོར་གྱི་གནས་སྟོན་ནས་གཞན་དོན་མཛད་ཡོད་པ་རེད། དེ་ཡང་གཞན་ལ་ཕན་བདེ་བསྒྲུབ་རྒྱུ་ཟེར་བ་དེ་ཟས་གོས་གནས་མལ་སྦྱིན་པ་ཙམ་མིན་པར། ཕ་རོལ་པའི་ཕྱིན་ཅི་ལོག་གི་ལྟ་བ་དེ་དག་སེལ་དགོས་པ་ཞིག་རེད། ངོས་རང་སྒེར་གྱི་ངོས་ནས་ཆ་བཞག་ན་ཐོག་མར་མངོན་རྟོགས་རྒྱན་བློ་ལ་བཟུང་ནས། དབུ་མ་འཇུག་པ་བློ་ལ་བཟུང་། རྒྱན་འཇུག་གཉིས་པོ་འདི་ཡང་ཡང་འདོན་གྱི་ཡོད། མངོན་རྟོགས་རྒྱན་གྱིས་ས་བཅུ་ལམ་ལྔའི་འགྲོ་སྟངས་དང་ཐེག་པ་གསུམ་གྱི་ལམ་གྱི་འགྲོ་སྟངས་དེ་དག་ཆ་ཚང་གསུངས་ཡོང་གི་འདུག དབུ་མ་འཇུག་པས་སྟོང་ཉིད་ཀྱི་ལྟ་བ་གཙོ་བོ་རྩལ་དུ་བཏོན་ནས་གསུང་གི་ཡོད་རེད། དེར་བརྟེན་དེ་རིང་ཁ་སང་ཡིན་རུང་དབུ་མ་འཇུག་པ་དང་འཇུག་པ་རང་འགྲེལ་དེ་དག་ངོས་རང་གི་ཅོག་རྩེའི་སྟེང་དུ་བཞག་སྟེ་ཀློག་བཞིན་ཡོད། གནད་འགག་ཆེན་པོ་རེད་འདུག ཅེས་དང་། ཕྱིན་ཅི་ལོག་གི་ལྟ་བ་སེལ་བར་སྨོན་ལམ་འདེབས་པ་དང་སྔགས་བགྲངས་ནས་མེད་པ་ཆགས་ཀྱི་མེད་པ་དང་། ཕྱིན་ཅི་ལོག་གི་ལྟ་བ་དེ་གང་འདྲ་ཡོད་པ་དང་བློའི་འཛིན་སྟངས་གང་འདྲ་ཡོད་པ་དེ་དག་ཤེས་པར་བྱས་ནས་གཏན་ཚིགས་ཀྱི་རིགས་མང་པོར་བསམ་བློ་གཏོང་ཡོང་དུས། གང་ལྟར་ཕྱི་ནང་གི་ཆོས་གང་དང་གང་ཡིན་རུང་དོན་གྱི་ངོས་ནས་ཡོད་པ་ཞིག་ང་ཚོར་སྣང་གི་ཡོད་རེད་དེ། སྣང་བ་ལྟར་དུ་གྲུབ་མེད་པ་སེམས་ནང་ཁོ་ཐག་ཆོད་པ་ཞིག་ཡོང་ཐུབ་ཀྱི་ཡོད་སྐོར་སོགས་གསུངས་སོང་།
ཡང་མགོན་པོ་གང་ཉིད་མཆོག་གིས། ད་ལྟའང་རྒྱ་མི་རིགས་ཀྱི་ནང་དུ་གུང་ཁྲན་ཏང་གི་བསམ་བློ་གུ་དོག་པོ་ཡོད་པ་དེ་དག་གིས་བོད་གངས་ཅན་ལྗོངས་ལ་ཡོད་པའི་སངས་རྒྱས་ཀྱི་ཆོས་དེ་དག་མེད་པར་བཟོ་རྒྱུའི་ཐབས་ཤེས་རིམ་པ་བྱས་ཀྱང་། རྩ་བ་ཉིད་ནས་བཟོས་ཐུབ་མེད་པ་དང་། བོད་རྒྱ་ཆེ་མི་མང་གི་ལྷག་བསམ་དང་སྙིང་སྟོབས་དེ་དག་རི་བཙུགས་པ་ནང་བཞིན་རེད་འདུག དེར་བརྟེན་སངས་རྒྱས་བཅོམ་ལྡན་འདས་ཀྱི་བདེན་གཉིས་ཟུང་དུ་འབྲེལ་བའི་ཐོག་ནས་བློ་སྦྱང་རྒྱུའི་བསམ་བློ་གཏོང་སྟངས་དེ། འཛམ་གླིང་འདིའི་སྒང་ལ་དམིགས་བསལ་ཆགས་ཀྱི་ཡོད་རེད། འོན་ཀྱང་། ང་ཚོ་ནང་པ་ཡིན། ཚང་མ་ནང་པ་བྱེད་དགོས་རེད་ཟེར་གྱི་ཡོད་མ་རེད། ཅེས་དང་། ང་ཚོས་སངས་རྒྱས་ཀྱི་བསྟན་པ་ཉག་ཕྲག་བའི་དུས་ཚོད་གཉན་འཕྲང་ཅན་གྱི་སྐབས་སུ། སྟོན་པའི་ཆོས་ལུགས་ཟབ་ཅིང་རྒྱ་ཆེ་བ་དེ་འདྲ་སློབ་སྦྱོང་བྱ་རྒྱུ་དང་བསམ་བློ་གཏང་རྒྱུ་ཡོད་པ། དེ་བཞིན་རིམ་པས་སེམས་ནང་དུ་མྱོང་བ་སྐྱེ་རྒྱུ་ཡོད་པ་དེ་མངོན་སུམ་ཡིན་པ་དང་། ང་ཚོ་བཙན་བྱོལ་བ་ཞིག་ཡིན་རུང་། དུས་ད་ལྟའང་དཔལ་ལྡན་ཟླ་བ་གྲགས་པའི་གཞུང་ལ་སོགས་པ་བལྟ་རྒྱུའི་གོ་སྐབས་ཡོད་པ་དེ་རྩ་ཆེན་པོ་ཡིན་སྐོར། གཞན་ཡང་། སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་གཉིས་པོས་སེམས་ལ་ཕན་ཐོགས་ཆེན་པོ་ཡོང་གི་ཡོད་པ་དང་། དེའི་ཐོག་ལ་བསམ་བློ་གཏིང་ཟབ་པ་དང་རྒྱ་ཆེན་པོ་བཏང་ནས་སེམས་སུ་འགུལ་སྐྱོད་ཐེབས་དུས། རང་བཞིན་གྱིས་སེམས་ལྷོད་ལྷོད་ཆགས་བསྡད་མཁན་གང་ཟག་གཉིད་སྐྱིད་པ་དང་གཟུགས་པོ་བདེ་བ། ཉིན་རེའི་མི་ཚེ་ཞི་ལྷོད་དང་བག་ཕེབས་པོ་ཡོང་ཐུབ་ཀྱི་ཡོད་པ་རེད། དེ་ཡང་སེམས་ཞི་ལྷོད་ཡོང་བར་སྨན་སོགས་བཟས་ཏེ་སེམས་ལྷོད་ལྷོད་ཆགས་པ་ཞིག་མིན་པར། བསམ་བློ་གཏོང་ཕྱོགས་ཀྱི་ཐོག་ནས་སེམས་དཀྲུག་མཁན་གྱི་ཞེ་སྡང་དང་ང་རྒྱལ། ཕྲག་དོག་ཟེར་བ་དེ་དག་གི་གཞི་རྩ་མེད་པ་ཆགས་པ་དེའི་སྐོར་བསམ་བློ་གཏོང་དུས། རང་བཞིན་གྱིས་སེམས་ལྷོད་ལྷོད་ཆགས་ཀྱི་ཡོད་སྐོར་དང་། སེམས་ཀྱིས་བརྩེ་བའི་ཉམས་ལེན་ཡག་པོ་བྱེད་དེ། སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཟུང་དུ་འབྲེལ་བའི་ཐོག་ནས་ཡང་ནས་ཡང་དུ་བསམ་བློ་བཏང་ན། ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་མིན་ལ་མ་ལྟོས་པར། ཉིན་རེ་བཞིན་དུ་སེམས་ལ་ཞི་བདེ་དང་། སེམས་ལྷོད་ཤིག་ཤིག་ཡོང་རྒྱུ་ཡོད་པ་རེད། དེར་བརྟེན་ཚང་མས་ཐུགས་ལ་བཅངས་དགོས་པ་སོགས་ཀྱི་བཀའ་སློབ་ལམ་སྟོན་གནང་སོང་།
གསར་འགོད་པ། བསྟན་འཛིན་ཕུར་བུ།
