དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་ཐེག་ཆེན་ཆོས་གླིང་གཙུག་ལག་ཁང་དུ་ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བ་་རྣམས་ལ་དབུ་མ་འཇུག་པའི་རང་འགྲེལ་གྱི་བཀའ་ཆོས་མཇུག་སྒྲིལ་ཏེ་རང་རྒྱུད་མ་འདུལ་བ་དེའི་ཐོག་ནས་ལས་ངན་པ་བསགས་ཏེ་སྡུག་བསྔལ་བྱུང་གི་ཡོད་སྐོར་སོགས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་ཆོས་འབྲེལ་བྱ་རྒྱུའི་ཉིན་གཉིས་པ་རེད། གང་ལྟར་ང་ཚོ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་ཆགས་བསྡད་ཡོད་རེད། དུད་འགྲོ་ཚུན་ཆད་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་རེད། དེར་བརྟེན་འཛམ་གླིང་འདིའི་སྒང་ལ་སྟོན་པ་མང་པོ་བྱུང་ཡོད་རེད། ད་ལྟའང་འཛམ་གླིང་འདིའི་སྒང་ལ་མུ་སྟེགས་པའི་སྟོན་པ་དང་ཁ་ཆེའི་སྟོན་པ་ཡོད་རེད། དེ་བཞིནའཇིའུ་ཡི་སྟོན་པ་ཡོད་རེད། སྟོན་པ་དེ་དག་སྡུག་བསྔལ་སེལ་རྒྱུའི་སླད་དུ་འགྲོ་དོན་མཛད་མཁན་ཤ་སྟག་ཆགས་བསྡད་ཡོད་རེད། སངས་རྒྱས་བཅོམ་ལྡན་འདས་ཀྱིས་སྡུག་བསྔལ་ཟེར་བ་དེ་རྒྱུ་མེད་པ་ལས་བྱུང་བ་མ་རེད། སྡུག་བསྔལ་དེ་རང་རང་གི་རྒྱུ་ལ་བརྟེན་ནས་བྱུང་བ་རེད། རྒྱུ་དེའང་ང་རང་ཚོའི་སྡུག་བསྔལ་ཉམས་སུ་མྱོང་མཁན་སོ་སོས་བསམ་བློ་དང་བྱ་སྤྱོད་ཀྱི་ཐོག་ནས་སྡུག་བསྔལ་གྱི་རྒྱུ་བསྒྲུབ་ཡོང་གི་ཡོད་རེད། ཅེས་སངས་རྒྱས་བཅོམ་ལྡན་འདས་ཀྱི་བསླབ་བྱ་མདོར་བསྡུས་ནས་སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ། ལམ་བསྒོམ་པར་བྱ་ཟེར་ནས་བདེན་བཞིའི་ངོ་བོ་ལ་བཟླས་པ། བདེན་བཞིའི་བྱ་བ་ལ་བཟླས་པ། བདེན་བཞིའི་བྱ་བ་འབྲས་བུ་དང་བཅས་པ་ལ་བཟླས་པ་ཞེས་གསུངས་པ་དེས། སྡུག་བསྔལ་ཟེར་བ་དེ་ཤེས་དགོས་པ་རེད། དེ་ཡང་སྡུག་བསྔལ་ངོ་འཕྲོད་པ་ཞིག་དགོས་རེད། དེ་མིན་སྐབས་རེ་སྡུག་བསྔལ་དེ་ཕྱི་རྟག་ཏུ་བདེ་སྐྱིད་ཀྱི་རང་བཞིན་འདྲ་པོ་ཞིག་གིས་ནང་རྟག་ཏུ་སྡུག་བསྔལ་ཡོང་རྒྱུ་ཞིག་ཆགས་ཡོང་དུས། སྡུག་བསྔལ་ཤེས་དགོས་ཀྱི་ཡོད་རེད། སྡུག་བསྔལ་གྱི་རྒྱུ་དེ་རྒྱུ་མེད་པ་ལས་རང་གར་བྱུང་བ་མ་རེད། དེར་བརྟེན་སྡུག་བསྔལ་ཀུན་ཏུ་འབྱུང་རྒྱུའི་རྒྱུ་དེ་ང་ཚོས་རྩད་གཅོད་བྱས་ནས་སྡོམ་དགོས་ཀྱི་ཡོད་རེད། གང་ལྟར་འབྲས་བུ་སྡུག་བསྔལ་མི་འདོད་པ་ཡིན་པས། འབྲས་བུ་སྡུག་བསྔལ་གྱི་རྒྱུ་དེ་ཤེས་པར་བྱས་ནས་སྡོམ་དགོས་ཀྱི་རེད། དེ་རིགས་པ་དང་ལྡན་པ་རེད་འདུག སྨོན་ལམ་བརྒྱབ་ནས་སྡུག་བསྔལ་སེལ་གྱི་རེད་ཟེར་ནས་གསུངས་ཡོད་མ་རེད། སྡུག་བསྔལ་གྱི་རྒྱུ་ཀུན་འབྱུང་ཟེར་བ་དེ་ཕྱི་ལོགས་ལ་མཛུབ་མོ་བཙུགས་པ་ཕལ་ཆེར་མ་རེད། ལས་དང་ཉོན་མོངས་པའི་ཀུན་འབྱུང་རང་གི་རྒྱུད་མ་འདུལ་བ་དེའི་ཐོག་ནས་ལས་ངན་པ་བསགས་པ་དེས་སྡུག་བསྔལ་སྐྱེས་ཀྱི་ཡོད་རེད། དེས་ན། ཀུན་འབྱུང་སྡུག་བསྔལ་གྱི་རྒྱུ་འདི་རང་གི་སེམས་མ་འདུལ་བའི་ཐོག་ནས་སྡུག་བསྔལ་ཞིག་ཡོང་རྒྱུའི་རྒྱུ་འདི་འགྲུབ་ཀྱི་ཡོད་པར་བརྟེན། དེ་ཡག་པོ་ཤེས་པར་བྱས་ཏེ་མེད་པར་བཟོ་ཐུབ་རྒྱུ་འབྱུང་ན། འགོག་པའི་བདེན་པ་ཟེར་བ་དེ་ཐོབ་ཡོང་གི་རེད། འགོག་པ་མངོན་དུ་བྱ། སྡུག་བསྔལ་གཏན་དུ་ཟད་པའི་བྲལ་བ་དེ་འདྲའི་མངོན་དུ་བྱེད་ཐུབ་ཀྱི་རེད། དེ་ཡང་དེ་འདྲའི་དམིགས་ཡུལ་ཆགས་ཡོང་དུས་འགོག་བདེན་འཐོབ་རྒྱུའི་དོན་དུ་ལམ་བསླབ་པ་གསུམ་གྱི་ལམ་བསྒོམ་དགོས་ཀྱི་རེད་ཟེར་ནས་གཙོ་བོ་ལམ་གྱི་བདེན་པ་རེད། དེ་ལའང་སྔོན་ལ་ལུས་ཀྱི་སྡོམ་པ་སྲུང་བ་དང་ངག་གི་སྡོམ་པ་བསྲུང་རྒྱུ་སོགས་བྱེད་དེ། གཙོ་བོ་རང་སེམས་ཉོན་མོངས་པའི་གཞན་དབང་དུ་མ་གཏང་བ་བྱ་རྒྱུ་དེ་ཡིན་པ་རེད། ཅེས་གསུངས་སོང་།
ཡང་རྒྱལ་བ་རིན་པོ་ཆེ་མཆོག་གིས། བདེན་པ་བཞི་ལ་རྟེན་མཁན་གྱིས་སྡུག་བསྔལ་གྱི་རྒྱུ་ངོས་འཛིན་ཏེ། རྒྱུ་དེ་མཐར་གཏུགས་ན་ཕྱིན་ཅི་ལོག་གི་བློ་གཅིག་གི་སྡུག་བསྔལ་ཡོང་གི་ཡོད་པར་བརྟེན། ཕྱིན་ཅི་ལོག་གི་བློ་དེ་སེལ་ཐུབ་རྒྱུ་ཡོད་མེད་སོགས་ལ་བསམ་བློ་བཏང་སྟེ། གཙོ་བོ་བདེན་བཞིའི་རྣམ་གཞག་ཤེས་པའི་ཐོག་ནས་སེམས་རྒྱུད་མ་ཞི་བ་དེ་ཞི་བར་བྱེད་དེ། མ་ཞི་བའི་རྐྱེན་གྱིས་བྱུང་བའི་སྡུག་བསྔལ་དེ་དག་རིམ་པས་མེད་པར་བཟོ་ཐུབ་པ་བྱ་དགོས་པའི་སྐོར་དང་། ཐོག་མར་སྡུག་བསྔལ་འདི་སྡུག་བསྔལ་གྱི་སྡུག་བསྔལ་དང་འགྱུར་བའི་སྡུག་བསྔལ། འདུ་བྱེད་ཀྱི་སྡུག་བསྔལ་ཟེར་བ་དེ་དག་ངོ་འཕྲོད་པ་བྱས་རྗེས། ལས་ཀྱི་ཀུན་འབྱུང་དང་ཉོན་མོངས་པའི་ཀུན་འབྱུང་དེ་དག་ཤེས་པར་བྱ་དགོས། དེ་ནས་དེ་ལ་གཉེན་པོ་ག་རེ་ཡོང་གི་ཡོད་པའི་ཐོག་ལ་བསམ་བློ་གཏིང་ཟབ་བཏང་སྟེ། མི་རྟག་པ་ལ་རྟག་པར་འཛིན་པའི་བློ་དེ་ལ་མི་རྟག་པའི་རྟོག་པའི་བློ་ཡི་རྟག་འཛིན་གྱི་བློ་དེ་རིམ་གྱིས་ཤུགས་ཆུང་དུ་འགྲོ་རྒྱུ་དང་། སྡུག་བསྔལ་བདེ་བར་ཞེན་མཁན་གྱི་བློ་དེས་སྡུག་བསྔལ་ཕྲ་རགས་ཀྱི་ཐོག་ལ་བསམ་བློ་ལེགས་པོ་བཏང་ན། སྡུག་བསྔལ་བདེ་བར་ཞེན་མཁན་གྱི་བློ་དེ་རིམ་པས་ཤུགས་ཆུང་དུ་འགྲོ་ཐུབ་ཀྱི་ཡོད་པ་དང་། མཐར་སྡུག་བསྔལ་གྱི་རྒྱུ་ཀུན་འབྱུང་ལ་གཉེན་པོ་བསྟེན་ནས་མེད་པ་ཆགས་དུས། དེ་དང་བྲལ་བའི་ཡོན་ཏན་ཞིག་མངོན་དུ་བྱེད་ཐུབ་པ་དེས་འགོག་བདེན་མངོན་དུ་བྱ་རྒྱུ་དགོས་སྐོར་གྱི་བཀའ་སློབ་ལམ་སྟོན་གནང་སོང་།
དད་ལྡན་ཆོས་ཞུ་བ་ཞིག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་ད་ལོ་ཕྱག་དེབ་གསར་པ་གདོན་རྒྱུའི་འཆར་གཞི་ཡོད་སྐོར་བཀའ་འདྲི་ཞུས་པར། ༧མགོན་པོ་མཆོག་གིས། ངོས་རང་གིས་དེབ་གསར་པ་འདོན་རྩིས་མེད། ངོས་རང་གིས་རྩོལ་བ་བྱས་ཏེ་དེབ་བཏོན་གྱི་ཡོད་མ་རེད། ངོས་རང་གི་གྲོགས་པོ་དང་ཡིག་ཚང་གི་ལས་བྱེད། དེ་བཞིན་ངོས་རང་ལ་དགའ་པོ་བྱེད་མཁན་དེ་དག་གིས་ངོས་རང་གིས་དེ་སྔ་ལབ་པའི་སྐད་ཆ་དེ་དག་བང་བསྒྲིགས་ནས་དེབ་བཟོས་པ་དེ་འདྲ་ཡོང་གི་འདུག འོན་ཀྱང་ངོས་རང་ནས་དམིགས་བསལ་གྱིས་དོ་སྣང་བྱས་ནས་དེ་འདྲའི་ཡི་གེ་བྲིས་པ་གང་ཡང་བྱེད་ཀྱི་མེད། ཅེས་བཀའ་ལན་གནང་སོང་།
ཡང་ཆོས་ཞུ་བ་ཞིག་གིས་དེང་སང་མི་ཚང་མ་བྲེལ་བ་ཚ་པོ་རེད། ཕ་མ་ཡིན་ནའང་ཕྲུ་གུ་ལ་ཡག་པོ་ལྟ་རྒྱུའི་དུས་ཚོད་ཡོང་གི་མི་འདུག དེ་འདྲ་སོང་ཙང་ཕ་མས་ཕྲུ་གུ་ལ་བྱམས་སྐྱོང་མང་ཙམ་བྱ་ཐུབ་རྒྱུ་དང་སློབ་སྦྱོང་ཡག་པོ་སྤྲོད་པར་ག་རེ་བྱ་དགོས་ཀྱི་ཡོད་སྐོར་བཀའ་འདྲི་ཞུས་པར། མགོན་པོ་མཆོག་གིས། དེའི་སྐོར་ལ་ངོས་རང་གིས་ཞེ་དྲགས་བཤད་རྒྱུ་ཡོད་མ་རེད། ངོས་རང་ལ་ཕྲུ་གུ་ཡོད་མ་རེད་པཱ། འདི་ཁྱེད་རང་ཚོ་བཟའ་ཚང་བུ་ཕྲུག་ཡོད་པ་རྣམས་ཀྱིས་དངོས་ཡོད་གནས་ཚུལ་ལ་བལྟས་ཏེ། ཉམས་མྱོང་གསོག་གིན་བསམ་བློ་གཏང་རྒྱུ་དེ་རེད། བཅོམ་ལྡན་འདས་ཀྱིས་ཀྱང་ཁྱིམ་ནས་ཁྱིམ་མེད་པར་རབ་ཏུ་བྱུང་། དེ་བཞིན་བཅོམ་ལྡན་འདས་ཀྱི་རྗེས་འབྲངས་བ་ཚོས་ཁྱིམ་སྤངས་ཏེ་དོན་ཉུང་བྱ་ཉུང་བྱས་ནས་སོ་སོའི་སྒོ་སྲུང་པའི་ནུས་པ་གང་ཡོད་པ་དེ་ཆོས་ཕྱོགས་ཀྱི་ཐོག་ནས་འགྲོ་བསྡད་ཡོད་པ་རེད། དེ་ནང་པ་གཅིག་པུ་ལ་མིན་པར་ཧིན་དྷུ་འི་ཆོས་པ་དང་ཁ་ཆེའི་ཆོས་པ་མང་པོའི་ནང་དེ་འདྲ་ཡོད་པ་རེད། ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
