རིན་ཆེན་དོན་འགྲུབ་ཚུད་པའི་བོད་མི་བདུན་འཛིན་བཟུང་བྱས་འདུག

རིན་ཆེན་དོན་འགྲུབ་ཚུད་པའི་བོད་མི་བདུན་ལ་ཏོག་དབྱིབས་རིམས་ནད་སྐོར་གྱི་པར་དང་བརྙན་སོགས་འགྲེམས་སྤེལ་བྱས་པའི་ཉེས་མིང་གཡོགས་ནས་འཛིན་བཟུང་བཀག་ཉར་བྱས་ཏེ་ཁྲིམས་ལུགས་སློབ་གསོ་ཟེར་བ་ཞིག་སྤྲོད་མུས་ཡིན་འདུག

བོད་ནང་དུ་ཏོག་དབྱིབས་རིམས་ནད་ཁྱབ་གདལ་ཤུགས་ཆེན་ཕྱིན་ནས་བོད་ཀྱི་རྒྱལ་ས་ལྷ་ས་གཙོས་བོད་ཁུལ་མང་པོ་ཞིག་ཏུ་ཐེམ་སྤང་བཀག་རྒྱ་བསྡམས་ནས་ཟླ་བ་གཅིག་ལྷག་འགྲོ་མུས་ཡིན་པ་དང་། བོད་ནང་གི་བོད་མི་མང་པོ་ཞིག་ས་གནས་གཞན་དང་ཟུར་བཀག་ཚོམས་ཁང་སོགས་སུ་བཀག་ཉར་བྱས་ཏེ། ནད་པ་རྣམས་ལ་སྨན་བཅོས་དང་ཟ་མ་དུས་ཐོག་མི་སྟེར་བར་དཀའ་ངལ་འཕྲད་མུས་ཡིན་པ་ལྟར། ཟླ་འདིའི་ཕྱི་ཚེས་ ༡༤ ཉིན་བོད་ནག་ཆུ་རྫོང་ནས་ཤན་རྩ་རྫོང་དང་། ལྷ་ས། ཆུ་དམར་ལེབ་རྫོང་བཅས་ནས་ཡིན་པའི་རིན་ཆེན་དོན་འགྲུབ་ཚུད་པའི་བོད་མི་བདུན་གྱིས་དྲ་ལམ་སོགས་སུ་ཏོག་དབྱིབས་རིམས་ནད་སྐོར་གྱི་སྐད་ཆ་བཤད་པ་དང་། བརྙན་དང་པར་སོགས་འགྲེམས་སྤེལ་བྱས་པའི་ཉེས་མིང་གཡོགས་ནས་འཛིན་བཟུང་བཙན་འཁྲིད་བྱས་ཡོད་འདུག

འདི་གའི་གསར་འགོད་པར་གནས་ཚུལ་ཁུངས་ལྡན་མཁོ་སྤྲོད་བྱས་པ་ལྟར་ན། བོད་ཤན་རྩ་རྫོང་དང་། ལྷ་ས། ཆུ་དམར་ལེབ་རྫོང་ནས་ཡིན་པའི་རིན་ཆེན་དོན་འགྲུབ་གཙོས་བོད་མི་བདུན་གྱིས་རྒྱ་ནག་གཞུང་གིས་བཟོས་པའི་ཏོག་དབྱིབས་རིམས་ནད་ཀྱི་ཟུར་བཀག་ཁང་དུ། བོད་མི་རྣམས་ལ་ཉིན་གཅིག་ལ་ཟས་ཐུན་གཅིག་ལས་སྟེར་གྱི་མེད་པ་མ་ཟད། ནད་རྟགས་ཐོན་པ་དང་ནད་རྟགས་མེད་པའི་བོད་མི་རྣམས་མཉམ་དུ་ཟུར་བཀག་བྱས་པ་དང་། ཏོག་ནད་འགོས་པའི་བོད་མི་རྣམས་ལ་སྨན་བཅོས་བྱེད་ཀྱི་མེད་པའི་བརྙན་བླངས་པ་དང་། དྲ་ལམ་དུ་བརྒྱུད་བསྐུར་བྱས་པ། པར་སོགས་འགྲེམས་སྤེལ་བྱས་པའི་ཉེས་མིང་གི་འོག་ནས་འཛིན་བཟུང་བཙན་ཁྲིད་བྱས་ཡོད་སྐོར་སོགས་འགྲེལ་བརྗོད་བྱས་སོང་།

ཡང་ཁོང་གིས། རྒྱ་ནག་གཞུང་གིས་འཛིན་བཟུང་བཀག་ཉར་བྱས་པའི་བོད་མི་བདུན་པོ་ནི་སློབ་སྦྱོང་གང་ཡང་མེད་པའི་འབྲོག་མི་རྣལ་མ་རྐྱང་རྐྱང་ཡིན་པ་དང་། ཁོང་ཚོ་འཛིན་བཟུང་བྱས་རྗེས་ཉིན་གྲངས་ལྔ་རིང་ལ་ནག་ཆུ་རྫོང་གི་བདེ་འཇགས་ལས་ཁུངས་ཟེར་བ་ཞིག་གིས་བཀག་ཉར་བྱས་ཏེ། རིམས་ནད་སྐོར་གྱི་པར་དང་བརྙན་སོགས་སུ་སུ་ལ་བསྐུར་ཡོད་སྐོར་འདྲི་བརྩད་ནན་མོ་བྱས་ཡོད་པ་མ་ཟད། མི་རེ་རེ་ལ་རྒྱ་སྒོར་སུམ་སྟོང་རེ་ཡི་ཉེས་ཆད་བཅད་ནས། ད་ལྟ་མུ་མཐུད་དུ་ནག་ཆུ་རྫོང་བདེ་འཇགས་ལས་ཁུངས་ (ཉེན་རྟོག་ཁང་།) ཟེར་བར་བཀག་ཉར་དང་ཁྲིམས་ལུགས་སློབ་གསོ་ཟེར་བ་ཞིག་སྤྲོད་མུས་ཡིན་སྐོར་དང་། སྤྱིར་རྒྱ་ནག་གཞུང་གི་རིམས་ནད་གོ་སྒྲིག་ཚོགས་ཆུང་ཟེར་བ་ཞིག་གིས་བོད་མི་སུ་འདྲ་ཞིག་ལ་ཏོག་ནད་འགོས་ཚེ། ཟུར་བཀག་ཁང་དུ་ཟས་གོས་གནས་མལ་སོགས་ཀྱི་མཐུན་རྐྱེན་ཡག་པོ་ཡོད་ལུགས་བཤད་ཡོད་ཀྱང་། ཟུར་བཀག་ཁང་དུ་བོད་མི་རྣམས་ལ་ཟས་ཐུན་གཅིག་ལས་མི་སྤྲད་པ་དང་། སྨན་པ་ཚོས་ནད་པ་རྣམས་ལའང་སྨན་བཅོས་བྱེད་ཀྱི་མེད་སྐོར་སོགས་འགྲེལ་བརྗོད་བྱས་སོང་།

གཞན་ཡང་། ཉེ་ལམ་བོད་ཁུལ་གྱི་ས་གནས་མང་པོ་ཞིག་ཏུ་ཏོག་དབྱིབས་རིམས་ནད་ཁྱབ་གདལ་ཤུགས་ཆེན་ཕྱིན་ནས་བོད་མི་རྣམས་ཀྱི་འཚོ་བར་དཀའ་ངལ་འཕྲད་མུས་ཡིན་པ་ལྟར། རྒྱ་ནག་གཞུང་གི་ཉེན་རྟོག་པས་ཏོག་དབྱིབས་རིམས་ནད་ལ་ཁ་གཡར་ནས། ཡ་ཆེན་སྒར་གྱི་གྲྭ་བཙུན་རྣམས་ཀྱི་སྡོད་ཤག་ཞིབ་བཤེར་དང་མིང་ཐོ་སོགས་བསྡུ་རུབ་བྱས་ཏེ། ས་གནས་གཞན་ནས་ཡོང་བའི་གྲྭ་བཙུན་རྣམས་ཕྱིར་ཕུད་དང་འཇིགས་སྐུལ་བྱེད་བཞིན་ཡོད་འདུག