སྲིད་སྐྱོང་མཆོག་གིས་ད་ལྟའི་བོད་ནང་གི་དཀའ་ངལ་དེ་རྒྱ་གཞུང་གིས་ཆབ་སྲིད་ལ་སྒྲོ་བཏགས་ནས་ཕན་པ་ལས་གནོད་པར་འགྲོ་བའི་ཉེན་ཁ་ཆེ་སྟབས། གསར་འགོད་བརྒྱུད་བསྒྲགས་ཚད་ལྡན་བྱ་རྒྱུ་གལ་ཆེན་ཡིན་སྐོར་གསུངས་སོང་།
དེ་རིང་ཞོགས་པའི་ཆུ་ཚོད་ ༩།༣༠ སྟེང་བོད་ཀྱི་རྒྱལ་ཡོངས་མང་གཙོ་ཚོགས་པའི་གོ་སྒྲིག་འོག་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་བོད་ནང་གི་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ལ་གདུང་སེམས་མཉམ་བསྐྱེད་ཆེད་མཆོད་འབུལ་སྨོན་ལམ་ཞིག་ཚོགས་སོང་བ་དང་། སྐབས་དེར་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་བཀྲ་ཤིས་དོན་གྲུབ་ལགས་ཀྱིས་མཆོད་འབུལ་སྨོན་ལམ་བྱེད་དགོས་དོན་ནི། ཉེ་ཆར་བོད་མདོ་སྟོད་སྨད་བར་གསུམ་ཁུལ་དུ་ས་ཡོམ་དང་ཆུ་ལོག ཏོག་དབྱིབས་གཉན་རིམས་འགོས་ཁྱབ་སོགས་ཀྱི་དཀའ་ངལ་འོག མི་མང་པོ་འདས་གྲོངས་སུ་ཕྱིན་ཡོད་པ་དང་། ད་ལྟ་ད་དུང་དཀའ་ངལ་འཕྲད་བཞིན་པའི་བོད་མི་རྣམས་ལ་གདུང་སེམས་མཉམ་བསྐྱེད་མཚོན་སླད་དུ་ཡིན་སྐོར་བརྗོད་སོང་།
བཀྲ་ཤིས་དོན་གྲུབ་ལགས་ཀྱིས། སྤྱིར་བཏང་དེ་རིང་གི་མཆོད་འབུལ་སྨོན་ལམ་ནི་རྣམ་རྒྱལ་གྲྭ་ཚང་གི་འགན་འཁུར་བའི་ཆོས་ཕྱོགས་ཀྱི་བྱེད་སྒོ་ཞིག་ཡིན། གདུང་སེམས་མཉམ་བསྐྱེད་བྱེད་དགོས་དོན་ཡང་ཚང་མའི་མཁྱེན་གསལ་ལྟར་དེང་སང་དྲ་ལམ་ཁག་ཏུ་བརྙན་ཐུང་བརྒྱུད་ནས་བོད་མི་མང་ལ་དཀའ་ངལ་འཕྲད་བཞིན་པ་དེ་ཛ་དྲག་གི་གནས་སྟངས་ཤིག་ཆགས་བསྡད་ཡོད། བོད་ནང་ནས་འབྱོར་བཞིན་པའི་སྙན་ངག་དང་རྩོམ་སོགས་ལ་བལྟས་པ་ཡིན་ནའང་འུ་ཐུག་ཐབས་ཟད་དུ་གྱུར་ཡོད་པ་རེད། རྒྱ་ནག་གཞུང་གིས་ནད་པ་རྣམས་ལ་སྨན་བཅོས་ཡག་པོ་བྱེད་དགོས་པ་ཞིག་ཆགས་ཡོད་ཀྱང་། དེ་ལས་ལྡོག་སྟེ་བོད་ནང་དུ་དྲག་གནོན་གྱི་སྡུག་རྩུབ་ཞིག་སྤེལ་བཞིན་ཡོད། ཏོག་དབྱིབས་གཉན་རིམས་ཀྱི་རྐྱེན་གྱིས་ནད་པ་སྟོང་ཕྲག་མང་པོ་བྱུང་ཡོད་པ་མ་ཟད། ནད་པར་སྨན་བཅོས་བྱེད་པར་སྨན་དང་ཉལ་ཁྲི་མ་རག་པའི་དཀའ་ངལ། མཐུན་རྐྱེན་གང་ཡང་མེད་པའི་གནས་སྟངས་སྐྱོ་བོ་ཞིག་གི་འོག་ལྷུང་ཡོད་འདུག ལྷག་པར་དུ་ཏོག་དབྱིབས་ནད་རིམས་འགོས་ཡོད་མེད་གཉིས་ཀ་ས་གནས་གཅིག་ཏུ་ཉར་བཞིན་ཡོད་སྟབས། ཏོག་དབྱིབས་གཉན་རིམས་ལས་ཐར་ཐུབ་པ་ཞིག་རེད་བསམ་གྱི་མི་འདུག དེའི་རྒྱབ་ལོགས་སུ་རྒྱ་ནག་གི་ཇུས་ངན་ཞིག་ཡོད་པ་མངོན་གསལ་རེད། འདིའི་ཐོག་མང་གཙོ་ཚོགས་པས་ལས་འགུལ་རབ་དང་རིམ་པ་སྤེལ་རྒྱུ་ཡིན་པས་མི་མང་ངོས་ནས་འཛུལ་ཞུགས་བྱེད་པར་འབོད་སྐུལ་ཞུ་རྒྱུ་ཡིན། ཞེས་གསུངས་སོང་།
ཉེ་ཆར་སྐབས་ ༡༧ བོད་མི་མང་སྤྱི་འཐུས་གྲོས་ཚོགས་སྐབས་བཞི་བའི་སྟེང་སྤྱི་འཐུས་ཨ་འབྲུག་ཚེ་བརྟན་ལགས་ཀྱིས་ཀྱང་། བོད་ནང་དུ་ཏོག་དབྱིབས་གཉན་རིམས་ཀྱི་དཀའ་ངལ་ཤུགས་ཆེན་འཕྲད་བཞིན་པར་བོད་མི་མང་པོས་སེམས་འཚབ་བྱེད་ཀྱི་ཡོད་པ་མ་ཟད། བོད་ཀྱི་རྒྱལ་ས་ལྷ་ས་གཙོས་བོད་མི་མང་པོར་ཏོག་དབྱིབས་གཉན་རིམས་འགོས་པར་བསྙད་བཏགས་ནས་ཡུལ་ལུང་མང་པོའི་མི་མང་བཟང་བཙོན་དུ་བཀག་སྟེ། འགྲོ་འདུག་སོགས་ལ་རང་དབང་མེད་ཁར། ཉིན་མང་པོར་ཟ་མ་ཙམ་ཡང་མ་རེག་པའི་དཀའ་ངལ་རྒྱ་ནག་གི་བརྒྱུད་ལམ་ཁག་ཏུ་བརྙན་ལམ་ནས་འགྲེལ་བརྗོད་བྱས་ཡོད་སྟབས། བྱེས་ཀྱི་གདན་ས་སེ་འབྲས་གཉིས་ཀྱི་གྲྭ་མང་འདུ་འཛོམས་ཀྱི་ཐོག་ནས་སེམས་ཚོར་ཆེན་པོས་ཞབས་རིམ་གསོག་སྒྲུབ་བྱས་ཡོད་པ་དང་། གྲོས་ཚོགས་ཀྱིས་ཀྱང་བོད་ནང་གི་བོད་མི་གནས་སྟངས་གལ་ཆེན་དུ་བརྩིས་ནས་ཞུ་གཏུགས་སོགས་གནང་དགོས་སྐོར་གསུངས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས་གྲོས་ཚོགས་སྐབས་སུ་བོད་ནང་གི་ཏོག་དབྱིབས་གཉན་རིམས་ཀྱི་སྐོར་ལ། ༧གོང་ས་མཆོག་ལ་དྭགས་སུ་བཞུགས་པའི་སྐབས་སུ་བོད་ནང་གི་ཏོག་དབྱིབས་གཉན་རིམས་སྐོར་བདེ་སྲུང་བཀའ་བློན་བརྒྱུད་ནས་སྙན་སེང་ཞུས་ཏེ། སྒྲོལ་མའི་གཟུངས་སྔགས་གང་མང་བསགས་དགོས་པའི་བཀའ་ཕེབས་པ་བཞིན་ཆོས་རིག་ལས་ཁུངས་ནས་དགོན་སྡེ་ཁག་དང་གཞིས་ཆགས་ཁག་བཀའ་མངགས་ཏེ་ཞབས་རིམ་སྒྲུབ་བཞིན་ཡོད་པ་དང་། ཕྱི་ཚེས་ ༧ ཉིན་བརྟན་བཞུགས་སྐབས་བོད་ནང་གི་ཏོག་དབྱིབས་གཉན་རིམས་ཀྱི་ཆེད་དུ་མང་ཚོགས་ཀྱིས་སྒྲོལ་མའི་གཟུངས་སྔགས་གང་མང་བསགས་དགོས་ཞེས་གསུངས་སོང་བ་དང་། རྒྱ་གཞུང་གིས་བོད་ནང་གི་ཏོག་དབྱིབས་ནད་པའི་གྲངས་ཐོ་ཞིག་ཉིན་ལྟར་འདོན་བཞིན་ཡོད་མོད། དེ་ལ་གཞི་རྩ་ཅི་ཙམ་ཡོད་མིན་ཤེས་ཀྱི་མི་འདུག་སྟབས། ལྷ་སའི་ནང་དུ་ཆ་བཞག་པ་ཡིན་ན་མི་འབོར་འབུམ་ ༨ ལྷག་ཡོད་པ་དང་། དེའི་ནང་གི་བརྒྱ་ཆ་ ༢༠ ནས་ ༣༠ ཟུར་བཀག་བྱས་ཡོད་ཚོད་དང་ཟ་མ་སོགས་བཙོན་ཁང་ལས་ཀྱང་སྐྱོ་བོ་ཡོད་སྐོར་དང་། བོད་ནང་གི་བོད་མི་ཚོར་དངོས་གནས་འཕྲོད་བསྟེན་གྱི་དཀའ་ངལ་འཕྲད་བཞིན་འདུག་པ་དང་། རྒྱ་ནག་ཁྱོན་ཡོངས་སུ་ཏོག་དབྱིབས་གཙང་སེལ་གྱི་སྲིད་ཇུས་སྤེལ་ནས་མི་འབོར་ས་ཡ་ ༣༠༠ ལྷག་ཟུར་བཀག་བྱས་པའི་གནས་ཚུལ་ཐོན་ཡོད་སྟབས། ཕྱི་ཟླ་ ༡༠ ནང་རྒྱ་ནག་གི་གྲོས་ཚོགས་མ་རྫོགས་བར་དུ་འགྱུར་བ་ཐེབས་རྒྱུ་མིན་པའི་བསམ་ཚུལ་སླེབས་ཀྱི་ཡོད་པས། ང་ཚོས་གསར་འགོད་གསལ་བསྒྲགས་ཚད་ལྡན་ཞིག་བྱེད་མ་ཐུབ་པ་ཡིན་ན། ད་ལྟའི་བོད་ནང་གི་དཀའ་ངལ་རྒྱ་གཞུང་གིས་ཆབ་སྲིད་ལ་སྒྲོ་བཏགས་ནས་ཕན་པ་ལས་གནོད་པར་འགྲོ་བའི་ཉེན་ཁ་ཆེ་སྐོར་སོགས་གསུངས་སོང་ལ། ཟླ་འདིའི་ཕྱི་ཚེས་ ༦ ཉིན་བོད་མིའི་སྒྲིག་འཛུགས་ངོས་ནས་བོད་ནང་ནད་ཡམས་ཁྱབ་གདལ་ཇེ་ཆེར་འགྲོ་བཞིན་པ་དང་འབྱུང་བའི་གོད་ཆགས་འོག་རྐྱེན་ལམ་དུ་ཤོར་བའི་གཞིས་བཞུགས་བོད་མི་ཚོའི་ཆེད་དུ་གཞུང་འབྲེལ་སྨོན་ལམ་གསུང་འདོན་གནང་ཡོད།
བྱམས་པ་ཚེ་རིང་།
