བོད་པའི་དགེ་འདུན་པ་ཚོས་ཉི་ཧོང་དུ་སློབ་སྦྱོང་གནང་ཐུབ་ཚེ་ཕྱོགས་གཉིས་ཀྱི་འབྲེལ་ལམ་སྔར་ལས་གོང་འཕེལ་ཡོང་ཐུབ་པའི་རེ་བ་ཡོད།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བོད་དང་ཡུ་གུར། ལྷོ་སོག་མི་རིགས་ཀྱི་དཀའ་ངལ་སེལ་སླད་ཉི་ཧོང་གཞུང་ནས་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་གལ་ཆེ་སྐོར་གསུངས་འདུག

Sikyong Penpa Tsering meets Tibetans who came to Japan in the 1960s at the invitation of Dr. Maruki Seimi to study medicine, in Saitama prefecture in Japan, 24 September 2022.

ཟླ་འདིའི་ཕྱི་ཚེས་ ༢༠ ནས་ ༢༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཉི་ཧོང་ནང་གཞུང་འབྲེལ་གཟིགས་སྐྱོར་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༤ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་དུ་ཡོད་པའི་བོད་མི་ལ་གསུང་བཤད་གནང་བ་དང་། སྨན་གྱི་གཙུག་ལག་སློབ་གཉེར་ཁང་ (Saitama Medical University) ལ་འཚམས་གཟིགས་སུ་ཕེབས། དེ་བཞིན་ཁོང་གིས་ཕྱི་ལོ་ ༡༩༦༠ ནང་འབུམ་རམས་པ་ལྕམ་སྐུ་མ་རུ་ཀི་སེ་མི་ (Dr. Maruki Seimi) ལགས་ཀྱི་མགྲོན་འབོད་གནང་བ་ལྟར། ཡུལ་དེར་བོད་མི་ཁག་ཅིག་སྨན་གྱི་སློབ་སྦྱོང་ཆེད་ཕྱིན་པ་རྣམས་ལ་གསུང་བཤད་གནང་ཡོད་འདུག

ཟླ་འདིའི་ཕྱི་ཚེས་ ༢༣ ཉིན་ཉི་ཧོང་སྐུ་ཚབ་དོན་གཅོད་ཁང་དང་བོད་མིའི་རང་དབང་འབྲེལ་མཐུད་ཚོགས་པ་(Free Tibet Network) གཉིས་ཐུན་མོང་གི་གོ་སྒྲིག་འོག རྒྱ་ནག་གཞུང་གིས་བོད་དང་ཡུ་གུར། ལྷོ་སོག་མི་རིགས་ཀྱི་ངོ་བོ་རྩ་མེད་གཏོང་བཞིན་ཡོད་པ་མཚམས་འཇོག་ཡོང་ཐབས་ཀྱི་བགྲོ་གླེང་ཚོགས་འདུའི་ཐོག སྲིད་སྐྱོང་སྤེན་པ་ཚེ་རིང་མཆོག་དང་། ཡུ་གུར་དང་ལྷོ་སོག་གི་སྐུ་ཚབ་སོགས་མཱཉམ་ཞུགས་གནང་འདུག སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་གཞུང་གིས་བོད་ཕྲུག་ལོ་ན་ ༣ ལོན་པ་རྣམས་ཕ་མ་དང་རིག་གཞུང་ལས་རྒྱང་ཐག་རིང་དུ་བཏང་ནས་མི་སེར་སྤེལ་ཡུལ་གྱི་གཏན་འཇགས་སློབ་གྲྭའི་ནང་བཅུག་དང་འཇུག་བཞིན་ཡོད་པས། ད་ལྟའི་ཆར་རྒྱ་གཞུང་གིས་བོད་ནང་དུ་བོད་ཀྱི་སྐད་ཡིག་རྩ་མེད་གཏོང་བཞིན་ཡོད་པ་དེ་གནད་དོན་ཉེན་ཚབས་ཆེ་ཤོས་ཤིག་ཆགས་ཀྱི་ཡོད་སྐོར་དང་། ཨེ་ཤ་ཡའི་ཁུལ་དུ་གནས་སྡོད་མི་གྲངས་ཐེར་འབུམ་ ༡།༨ ལྷག་གིས་བོད་མཐོ་སྒང་ནས་བཞུར་བའི་གཙང་པོ་ཆེན་པོ་བཅུ་ལ་བརྟེན་ནས་འཚོ་བ་རོལ་བཞིན་ཡོད་ཀྱང་། རྒྱ་ནག་གཞུང་གིས་བོད་ནང་དུ་གཏེར་ཁ་སྔོག་འདོན་དང་། ཁོར་ཡུག་སྦག་བཙོག་ཆེན་པོ་བཟོས་ཏེ་གནམ་གཤིས་འགྱུར་ལྡོག་འགྲོ་བཞིན་ཡོད་པས་བོད་མཐོ་སྒང་སྲུང་སྐྱོབ་བྱ་རྒྱུ་གལ་ཆེན་ཡིན་པའི་སྐོར་དང་། དེ་བཞིན། ཕྱི་ལོ་ ༢༠༡༦ ནས་ ༢༠༢༢ བར་རྒྱ་ནག་གཞུང་གིས་བོད་མི་ས་ཡ་ ༡ ལྷག་གི་རིགས་རྫས་བརྟག་དཔྱད་(DNA)ཀྱི་རྒྱུ་ཆ་བསྡུ་རུབ་བྱས་ཡོད་སྐོར་སོགས་གསུངས་འདུག

Sikyong Penpa Tsering addresses members of the Tibetan community in Japan at the Tibet House, 24 September 2022.

ད་དུང་སྲིད་སྐྱོང་མཆོག་གིས། ཉེ་ལམ་བོད་ནང་དུ་ཏོག་དབྱིབས་གཉན་རིམས་ཁྱབ་གདལ་ཤུགས་ཆེར་ཕྱིན་པའི་སྐབས་སུ། རྒྱ་ནག་གཞུང་གིས་སྟངས་འཛིན་ལེགས་པོ་མ་བྱས་པར་བོད་ཀྱི་རྒྱལ་ས་ལྷ་ས་གཅིག་པོར་བོད་མི་བརྒྱ་ཆ་ ༢༠ ནས་ ༣༠ ཙམ་ལྷ་ས་ནས་བཙན་གྱིས་ཕྱིར་བཏོན་ཏེ་ཟས་བཅུད་དང་སྨན་བཅོས་ཀྱི་མཐུན་རྐྱེན་ཧ་ཅང་ཞན་པོའི་ཁང་པ་ཞིག་ཏུ་ཚང་མ་སྡེབ་འཇོག་བྱས་ཡོད་སྐོར་ངོ་སྤྲོད་གནང་ཡོད་འདུག དེ་བཞིན་ཕྱི་ལོ་ ༡༩༤༩ ལོར་རྒྱ་ནག་གིས་བོད་བཙན་བཟུང་མ་བྱས་པའི་སྔ་རོལ་དུ་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། རྒྱལ་སྤྱིའི་ཁྲིམས་ལུགས་རིག་པའི་མཁས་དབང་སྐུ་ཞབས་མཱ་ཡེ་ཁལ་ཝན་ཝ་ཌི་ (Michael Van Walt) ལགས་དང་རྒྱ་རིགས་མཁས་དབང་སྐུ་ཞབས་ཧན་ཁྲིན་ (Hon-Shiang Lau) ལགས་རྣམ་གཉིས་ཀྱིས་ཉམས་ཞིབ་གནང་བའི་ལོ་རྒྱུས་ཀྱི་དེབ་ནང་དུ་གནའ་རབས་ནས་བོད་དེ་རྒྱ་ནག་གི་ཆ་ཤས་སུ་གྱུར་མེད་པ་གསལ་སྟོན་བྱས་ཡོད་པ་དང་། ད་ལྟའི་ཆར་རྒྱལ་སྤྱིའི་ཐོག་བོད་དེ་རྒྱ་ནག་གི་ཆ་ཤས་རེད་ཅེས་བཤད་པ་དེ་རྒྱལ་སྤྱིའི་ཁྲིམས་དང་འགལ་གྱི་ཡོད་སྐོར་དང་། བོད་དང་ཡུ་གུར། ལྷོ་སོག་མི་རིགས་ཀྱི་དཀའ་ངལ་སེལ་སླད་ཉི་ཧོང་གཞུང་ནས་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་དགོས་ཤིང་། རྒྱལ་སྤྱིའི་གཞུང་དེ་དག་གིས་རྒྱལ་སྤྱིའི་སྟེང་དང་རང་དབང་དང་། དམངས་གཙོ། ཁྲིམས་ཀྱི་དབང་བསྒྱུར་སྲུང་སྐྱོབ་སླད་རྒྱ་ནག་གཞུང་ལ་གདོང་ལེན་གནང་དགོས་སྐོར་གསུངས་ཡོད་འདུག

Sikyong addressing Japanese students and faculty at the Chiba Institute of Technology.

ཟླ་འདིའི་ཕྱི་ཚེས་ ༢༢ ཉིན་སྲིད་སྐྱོང་སྤེན་པ་ཚེ་རིང་མཆོག་རེ་ཏ་ཀུ་གཙུག་ལག་སློབ་གཉེར་ཁང་ (Reitaku University) དང་ཅི་པཱ་བཟོ་རིག་སློབ་གཉེར་ཁང་ (Chiba Institute of Technology) དུ་ཆེད་ཕེབས་ཀྱིས། སློབ་ཕྲུག་དང་དགེ་ལས་རྣམས་ལ་བོད་མཐོ་སྒང་གི་ཁོར་ཡུག་ལ་སྲུང་སྐྱོབ་གནང་གལ་ཆེ་སྐོར་དང་། ཕྱི་ལོ་ ༡༩༤༩ ལོར་རྒྱ་ནག་གཞུང་གིས་ཁྲིམས་འགལ་ཐོག་བོད་ས་ཡོངས་རྫོགས་བཙན་བཟུང་མ་བྱས་གོང་དུ་བོད་ནི་རང་བཙན་ལྡན་པའི་རྒྱལ་ཁབ་ཅིག་ཡིན་པ་གསུངས་ཡོད་པ་དང་། ཉི་ཧོང་ཚུད་པའི་ཕྱིའི་རྒྱལ་ཁབ་ཁག་གིས་རྒྱ་ནག་དང་ལྷན་དུ་འབྲེལ་བ་གནང་སྐབས་ཡིད་གཟབ་མ་གནང་ཚེ། འབྱུང་འགྱུར་རྒྱལ་ཁབ་ཀྱི་དམངས་གཙོ་དང་རང་དབང་ལ་དོ་ཕོག་འགྲོ་ངེས་ཡིན་སྐོར་གསུངས་ཡོད་འདུག

ཡང་ཁོང་གིས། ད་ལྟའི་ཆར་ཅི་པཱ་བཟོ་རིག་སློབ་གཉེར་ཁང་དུ་བོད་ཕྲུག་ ༦ གིས་གཙུག་ལག་རབ་འབྱམས་པའི་སློབ་གཉེར་བྱེད་མུས་ཡིན་པ་དང་། རེ་ཏ་ཀུ་གཙུག་ལག་སློབ་གཉེར་ཁང་དུ་བོད་མིའི་སྒྲིག་འཛུགས་ཀྱི་ལས་བྱེད་གཅིག་གིས་ཉི་ཧོང་གི་སྐད་ཡིག་དང་རིག་གཞུང་སྦྱོང་བཞིན་ཡོད་པར་བརྟེན། ཉི་ཧོང་གི་གཙུག་ལག་སློབ་ཁང་ནས་བོད་མི་རྣམས་ལ་སློབ་སྦྱོང་གི་གོ་སྐབས་གནང་བར་ཐུགས་རྗེ་ཆེ་ཞུ་རྒྱུ་དང་། བོད་པའི་སློབ་ཕྲུག་ཚོས་གོ་སྐབས་དེ་དག་ཆུད་ཟོས་སུ་མི་གཏོང་བར་སློབ་སྦྱོང་ལ་འབད་བརྩོན་བྱས་ཏེ་བོད་དོན་སླད་ཕྱག་ལས་གནང་དགོས་པའི་ལམ་སྟོན་དང་། སློབ་གཉེར་ཁང་དེའི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་སེ་ཏོ་ཀུ་མ་ཨོ་ས་མུ་ (Setokuma Osamu) ལགས་ཀྱིས། སློབ་གཉེར་ཁང་གི་ངོས་ནས་ཉི་ཧོང་དུ་ཡོད་པའི་བོད་པའི་སློབ་ཕྲུག་རྣམས་ཀྱི་སློབ་སྦྱོང་ཐད་མུ་མཐུད་དུ་རྒྱབ་སྐྱོར་གནང་རྒྱུ་ཡིན་སྐོར་གསུངས་ཡོད་འདུག

གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།