རྔ་བ་ཁུལ་ཁྱུང་མཆུ་རྫོང་རྨེ་བ་ཡུལ་ཚོ་ནས་ཡིན་པའི་དགེ་རྒན་མགོན་ཚེ་ཞེས་པ་ཞིག་རྒྱ་ནག་ཉེན་རྟོག་པས་བཙན་འཁྲིད་བྱས་ཏེ་ཟླ་གཅིག་དང་ཟླ་ཕྱེད་ཙམ་འགྲོ་བཞིན་ཡོད་ཀྱང་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་ཡོད་འདུག
འདི་གར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཉེ་སྔོན་ཕྱི་ཟླ་ ༨ ཚེས་ ༡༤ ཉིན་རྒྱ་ནག་ཉེན་རྟོག་པས་རྔ་བ་ཁྱུང་མཆུ་རྫོང་རྨེ་བ་ཡུལ་ཚོ་ནས་ཡིན་པའི་མགོན་ཚེ་ཞེས་པའི་བོད་མི་ཞིག་རང་ཁྱིམ་ནས་བཙན་འཁྲིད་བྱས་ཡོད་པ་དང་། ཁོང་བཙན་འཁྲིད་བྱས་ཏེ་ཟླ་གཅིག་དང་ཟླ་ཕྱེད་ཙམ་འགྲོ་བཞིན་ཡོད་ཀྱང་ཁོང་གི་གནས་སྟངས་གང་ཡང་ཤེས་རྟོགས་མ་ཐུབ་པར་ལྷག་ཡོད་འདུག
ཁོང་འཛིན་བཟུང་བྱེད་སྐབས་ཁྱིམ་མི་རྣམས་ལ་རྒྱུ་མཚན་ཅི་ཡིན་སོགས་གང་ཡང་འགྲེལ་བརྗོད་བྱས་མེད་ཀྱང་། ཉེ་སྔོན་རྒྱ་ནག་གཞུང་གི་བཀའ་རྒྱའི་འོག་བོད་ཀྱི་རྒྱལ་ས་ལྷ་སའི་བོད་མི་རྣམས་ལ་དཀའ་ངལ་ཆེན་པོ་འཕྲད་བཞིན་ཡོད་པའི་ཛ་དྲག་གནས་སྟངས་དང་འབྲེལ་བའི་གནས་ཚུལ་མང་པོ་ཞིག་ཁོང་གིས་སྤྱི་ཚོགས་དྲ་ལམ་དུ་སྤེལ་ཡོད་སྟབས། ཏོག་དབྱིབས་དང་འབྲེལ་བའི་གནས་ཚུལ་གང་བྱུང་ཁྱབ་སྤེལ་བྱས་པའི་ཉེས་མིང་འོག་འཛིན་བཟུང་བྱས་ཡོད་པའི་ཚོད་དཔག་བྱེད་ཀྱི་འདུག
དགེ་རྒན་མགོན་ཚེ་ལགས་ནི་རང་ལོ་ ༤༠ ཡས་མས་ཤིག་ཡིན་ཞིང་། ཁྱུང་མཆུ་རྫོང་ཁོངས་ཀྱི་རྨེ་བ་ཡུལ་ཚོའི་སློབ་ཆུང་གི་དགེ་རྒན་ཞིག་ཡིན་འདུག
